Roma

Roma 1

1  Naan si Pablo, sesuguꞌenu ni Kristu Isus, puꞌ inggatu nu Megbebayaꞌ mbaal peneliganen. Tinduꞌ dau dema niin megukit Gempia Petenday.
2  Ki Gempia Petenday, iin sug daansamaꞌ pinasad nu Megbebayaꞌ tu nga pimuunanen sinuguꞌen kanugdiin mukaꞌ su sinulat nilan di pegbesaan Misulat Taluꞌen.
3  Iin, mekatag dig Bataꞌen su Kaunutan ta si Isukristu. Si Isukristu, kilawan, puꞌ su kegigetawen, sapuꞌ ni David.
4  Diniwatai ginaanen, puꞌ su ketubuꞌen puliꞌ, minitaꞌ di ketaas ginuungen puꞌ iin sug Bataꞌ nu Megbebayaꞌ.
5  Naa naan, pipiananu nu Megbebayaꞌ, puꞌ bigayanu niin pegbayaꞌ peneliganu ni Isukristu, adun enggaten kui getaw dig launan bansa mekpetuud diniin.
6  Sampay yamu nga getaw megbenwa ditug lunsud Roma, puꞌ inggat amu nu Megbebayaꞌ sumakup dini Isukristu.
7  Mendadi suminulatu diniu ngag launan petailen nu Megbebayaꞌ dia, ginggaten mbaal piglegetawanen. Penenebiin ku tu Gamaꞌ ta Megbebayaꞌ mukaꞌ tu Kaunutan ta si Isukristu, begayan amu nilan tulung mukaꞌ pianan ginaa.
8  Mendadi yamu, iinig bekna teluꞌen ku diniu, puꞌ mekpaladpaladu tu Megbebayaꞌ sabaꞌ di kelaunan niu, puꞌ migdedengeg na di tibuukan benwai kekpetuud niu dini Isukristu. Kagina sakupu ni Isukristu, mekpaladpaladu tu Megbebayaꞌ su pektemuyen ku.
9  Bisan saak tug Diwata, metuudi sinulatu kini. Puꞌ saꞌ menenabiu, tatapu amu penenebiay ditu Megbebayaꞌ su pektemuyen ku di ndiꞌ megduaꞌduaꞌig delendeman ku. Ki kektamuyu, iin su kegukitu di Gempia Petenday mekatag dig Bataꞌen.
10  Iini penenebiin ku, buang nau niin meguliug dia niu, saꞌ delendemanen,
11  puꞌ mauyaꞌan ku gupia mekinitaꞌay ita, adun mbegayan ku amu kepia nu Megbebayaꞌ. Iini begayan ku amu dun, puꞌ adun mpantekig delendeman niu.
12  Saꞌitada, mektinebangay ita di kekpetuud ta dini Isukristu, puꞌ mebangan amu nu kekpetuudu, mukaꞌ mebangan dau dema nu kekpetuud niu.
13  Mingumpated, mauyaꞌan ku dadema mesuunan niu puꞌ sanu deksuꞌ na delendeman ku mangayu dia niu, laak duuni migbelibad dun. Puꞌ mauyaꞌan ku melaun diniui magaku sumakup dini Isukristu, maaꞌ danu kesakup dun nu ngag lain getaw kanaꞌ getaw Judea.
14  Subay ebangan ku na su nga ginis bansa getaw, su nga gindukadu mukaꞌ nga ndaꞌi sebutenen, su nga metaasi sinuunanen mukaꞌ nga ginuranti.
15  Kaas mauyaꞌan ku gupia, ukiten ku dadema diniu su Gempia Petenday, yamu nga getaw megbenwa diag Roma.
16  Naa, ki Gempia Petenday kini, kanaꞌu mpiid dun, puꞌ iin su mbaluy ginuung nu Megbebayaꞌ mekeglegawen tug launan getaw mekpetuud dun. Pigbeknanan petendayay su nga getaw Judea, dayun su nga kanaꞌ getaw Judea.
17  Puꞌ biwasan di nga getaw su kebian di kekpesikesuun dinita nu Megbebayaꞌ miksekat di Gempia Petenday. Ki kesalig tai kebianen, puꞌ iin su puunanen mukaꞌ deksuꞌanen. Ndaꞌ ba mesulat di Misulat Taluꞌ nu Megbebayaꞌ kanugdiin, “Adini getaw pemilangen nu Megbebayaꞌ mekesuun sabaꞌ nu kesaligen, malapen sug begu ketubuꞌ.”
18  Naa, su nga getaw mimilas tu Megbebayaꞌ mukaꞌ miglimbung tu samatawen, pisuun na nu Megbebayaꞌ puꞌ ilan, melabuꞌ ilan gelaꞌ di ginukumanen, su nga getaw megbebelabag tu metuud mekatag di Megbebayaꞌ sabaꞌ nu kemilasen.
19  Diadia melabuꞌ di ginukuman nu Megbebayaꞌ, puꞌ pia pimantek nu Megbebayaꞌ diniin su kekpesuun mekatag di Megbebayaꞌ, pimilasen.
20  Ndiꞌ ba metuud? Genat tu kegbuat nu Megbebayaꞌ dinig lumbang kini, su gasal nu Megbebayaꞌ ndiꞌ maitaꞌ mukaꞌ su ginuungen ndaꞌi tamanen, mesuunan nu getaw puun tug biwaten. Kaas ndaꞌi katadenganen dun su kemilasen.
21  Pia misuunanen puꞌ su Megbebayaꞌig Diwata, ndaꞌen pegbesaay su mbantang tu Megbebayaꞌ, mukaꞌ ndaꞌen peladpeladay di kepianen diniin. Kaas sug delendemanen, ndaꞌ nai pantagen, lumbus laak benguꞌbenguꞌen.
22  Pia maaꞌ laungen dun metaasi sinuunanen, mibaluy benguꞌbenguꞌen.
23  Mukaꞌ pa pagid, piktamuyeni ngag ledawan binaal maaꞌ palas nu kilawan mukaꞌ nu manukmanuk mukaꞌ nu metetubuꞌ, sabayaꞌ su Megbebayaꞌ, su ndaꞌi gumulen.
24  Mendadi, kagina midupangi nga getaw, biwang nu Megbebayaꞌ diadia megdusa mikpuun tu melaat gayaken, su tampusan mekepiidpiid.
25  Pigbelesen tug balus su kedawaten tu metuud mekatag di Megbebayaꞌ. Pingadapen mukaꞌ piktamuyen sug binaal nu Megbebayaꞌ, sabayaꞌ su Minaal dun, su gempia pegdedengegen di ndaꞌi gikteben. Amen.
26  Kagina mikteliud su getaw tu Megbebayaꞌ, biwang nu Megbebayaꞌ penggulaulanen su gayaken mekepiidpiid. Pia su ngag libun, diadia ndaꞌen pektalentenay sug betaden pekelibun.
27  Su ngag laki dadema, diadia tiliudanen sug betaden mayak tug libun, puꞌ mitutung gayaken tu samalakinen. Pinggulaulanen tu samalakineni mekepiidpiid gupia. Mbiananen dayun su mitibabaꞌ mbantang ginukuman nu Megbebayaꞌ.
28  Kagina laung dun nu getaw puꞌ ndiꞌen mpia pektalentenan su tantu sinuunan mekatag di Megbebayaꞌ, biwang diniin nu Megbebayaꞌ dunutanen su kanaꞌ gempia delendeman. Kaas penggulaulanen dadema su ndiꞌ mpia penggulaulaan.
29  Melenduꞌan kedupang. Megdusa. Mesaku gupia. Melaat gupiai pigbetaden. Melaat gupiaig delendemanen. Mengimbegu. Memunuꞌan. Meksual, melimbung, mengumpiid, menlibak.
30  Peglaatanen sug dengeg nu samatawen, bentaanen su Megbebayaꞌ. Mekpelegbas gulaulanen. Mekpelabawlabaw. Menakabul. Daal daig delendemanen, su ginis melaat gulaulanen. Mesandeng tu nga mekegulangen.
31  Megbuꞌangbuꞌang gupia. Ndaꞌi saligen, ndaꞌig lelaaten tug dumanen.
32  Misuunanen su Palinta nu Megbebayaꞌ puꞌ adini getaw menggulaula dun, ginukuman dun nu Megbebayaꞌ lagaꞌ na ginaanen. Pia misuunanen ia, pinemalanen penggulaulaay su melaat, mukaꞌ dedialanen pa pagid su ngag duma getaw menggulaula dun.

Roma 2

1  Naa mendadi, daniꞌa, pia taꞌ taway dun, saꞌ pegdenaꞌen mu su ngag duma getaw mekedupang, taꞌ mai pegelalan mu dun? Puꞌ saꞌ pegdenaꞌen mu ilan, maleg dig lawas mu, puꞌ misama dai gulaula mu.
2  Ndiꞌ ba metuud, misuunan ta puꞌ melegdengi kaukum nu Megbebayaꞌ di nga getaw menggulaula di melaat gulaula kia?
3  Naa, saꞌ pegdenaꞌen mu su menggulaula dun, asal penggulaulaan mu dadema, taꞌig batik mu dun, ndiꞌa mpeduma di ginukuman nu Megbebayaꞌ?
4  Mukaꞌ maꞌniin ndaꞌ naig lagaꞌen di ginaa mu su gembagel lelaat nu Megbebayaꞌ diniꞌa, mukaꞌ su kektigelen dig dupangan nu nga getaw. Ndaꞌ mu ba mesuunay puꞌ lelaatan ka nu Megbebayaꞌ, adun meksikesuun ka?
5  Laaki gaak ginaa mu mukaꞌ mpauka gusay meksikesuun, kaas pebegelen mui ginukuman diniꞌa nu Megbebayaꞌ, saꞌ matengi gendaw paitaꞌen dig launan getaw su ginukumanen. Puꞌ melepengi kengukumen di tibaꞌan getaw.
6  Puꞌ sugdaan nu Megbebayaꞌ su nga getaw, saladuaꞌ, mbantang tu gulaulanen.
7  Maꞌantu duuni getaw menamal meksikesuun, adun enalen nu Megbebayaꞌ mukaꞌ pegbesaanen, mukaꞌ begayanen pa pagid ketubuꞌ ndaꞌi tamanen. Adin su mengmaꞌnia, begay diniin nu Megbebayaꞌ su ketubuꞌ.
8  Duun dademai getaw mesaku gupia, mukaꞌ gempemilas tu metuud, puꞌ adun dunutanen sug limbung. Adin su mengmaꞌnia, pelebuꞌan nu Megbebayaꞌ ginukuman, puꞌ mangit dun gupia su Megbebayaꞌ.
9  Mendadi, pia taꞌ taway dun, saꞌ menggulaula melaat, peglegetan mukaꞌ melegenan, saꞌ su getaw Judea, saꞌ su kanaꞌ getaw Judea, megelaꞌ mekebian dun.
10  Laak dagid, enalen nu Megbebayaꞌ mukaꞌ pegbesaanen su nga menggulaula tu melengas. Begayan ilan nu Megbebayaꞌ kelinaw, puꞌ piseksuden ilan diniin mukaꞌ tu nga samataw nilan. Duun dademai nga getaw Judea mukaꞌ kanaꞌ getaw Judea mekebian dun.
11  Puꞌ ndaꞌidunig lingken petailen nu Megbebayaꞌ.
12  Naa, su nga kanaꞌ getaw Judea, ndaꞌ ilan pesuunay ni Moises Palinta nu Megbebayaꞌ. Pia ndaꞌ ilan palintaay, saꞌ mekesalaꞌ ilan, gukuman dinilan matay di ndaꞌi tamanen. Su nga getaw Judea pelum, pisuunan ilan ni Moises kanugdiin Palinta nu Megbebayaꞌ. Kaas saꞌ mekesalaꞌ ilan, su Palintai mukum dun dinilan.
13  Puꞌ kanaꞌ nu mekineeg laak tu Palintai mekeseksud tu Megbebayaꞌ. Iini pesikesuunen nu Megbebayaꞌ, sug dumunut dun.
14  Su nga kanaꞌ getaw Judea, pia ndaꞌ ilan palintaay nu Megbebayaꞌ, saꞌ dunutan nilan sug betad nu Palintanen puun tug delendeman nilan, mpaitaꞌ nilan puꞌ mesuunan nilan su gempia baalen mukaꞌ su ndiꞌ mpia.
15  Puꞌ mpaitaꞌ di gulaula nilan puꞌ mibetang dig dialem ginaa nilan sug betad nu Palinta nu Megbebayaꞌ. Misanguꞌ dadema nug delendeman nilan puꞌ di ginaa nilan su Palinta, puꞌ taang dun, dengaten nug delendeman nilan sug lawas nilan, taang dun, penagalen.
16  Su gendaw paukum na nu Megbebayaꞌ dini Isukristu su giglud delendeman nug launan getaw, maꞌantui mpenggulaula. Iini mitaluꞌ di Gempia Petenday pigukitu di nga getaw.
17  Naa yamu, tinaluꞌ niu puꞌ getaw Judea amu mukaꞌ siligan daw niu su Palinta nu Megbebayaꞌ pesalabuuken amu niin daw diniin. Pingangyaꞌ niu su kesambat niu tu Megbebayaꞌ.
18  Misuunan daw niu saꞌ taꞌ alanduni mauyaꞌan nu Megbebayaꞌ baalen niu. Kagina mituꞌunan amu Palintanen, misuunan da niu dema su tantu kepianan.
19  Mituudan amu dun puꞌ mekpenuluꞌ daw amu tu nga getaw maaꞌ nu mibuta, puꞌ ndaꞌ ilan mpalintaay. Maꞌniin daw amu tilaw nu nga getaw mideleman, adun maitaꞌ nilan sug bianan pangay ditu Megbebayaꞌ.
20  Mektituluꞌ amu tu ngag benguꞌbenguꞌen, mukaꞌ mekpetuꞌun damu dema di nga maikaꞌ pai misuunanen, puꞌ migelaꞌ palintaay diniu su sinuunan mukaꞌ su metuud mitaluꞌ di Palinta nu Megbebayaꞌ.
21  Yamu nga getaw Judea, piktuꞌunan niu sug duma getaw, mauma dema ndaꞌ niu pektuꞌunay sug lawas niu? Migwali amu puꞌ ndiꞌ mpia megdaaw, asal masiꞌ megdaaw damu dema.
22  Tinaluꞌ niu tu getaw puꞌ subay ndiꞌ menlelingay, mauma dema menlelingay amu? Pigliaw daw niu su nga sagya diwata, mauma dema suled mamu tug balay tandaꞌ bitangan ledawan nu sagya diwata, adun megdaaw amu dia?
23  Yamu getaw Judea, mingangyaꞌ amu puꞌ yamu dawi piwitan nu Megbebayaꞌ Palintanen. Mauma dema pingumpiid niu su Megbebayaꞌ, puꞌ pimilas niu gupia su Palintanen?
24  Ndaꞌ ba mesulat kanugdiin, “Sabaꞌ diniu nga getaw Judea, piksudiꞌan su Megbebayaꞌ nu nga kanaꞌ getaw Judea.”
25  Naa, ki kesirkunsisu diniu tuꞌus puꞌ getaw Judea amu, duun daani pantagen saꞌ laak dunutan niu su kelaun pinalinta nu Megbebayaꞌ.
26  Mendadi, saꞌ duun dayuni getaw kanaꞌ getaw Judea, laak medunutanen sug betad nu Palinta nu Megbebayaꞌ, pemilangen nu Megbebayaꞌ tantu getaw Judea.
27  Pia kanaꞌ getaw Judea mukaꞌ ndaꞌ mbaalay tuꞌus puꞌ getaw Judea, dinunutanen sug betad Palinta. Maꞌnia, paitaꞌen puꞌ yamu pasiꞌ, ukumen amu nu Megbebayaꞌ mekatag di kektalenten niu dun, puꞌ mimilas amu, pia mipalintaan amu nu misulat Palinta nu Megbebayaꞌ mukaꞌ mituꞌusan amu dig betad getaw Judea.
28  Puꞌ adin ma su tantu getaw Judea mukaꞌ su tantu tinuꞌusanen? Kanaꞌ nu getaw mituꞌusan dig lawas laak.
29  Iini tantu getaw Judea, su meginetaw Judea dig delendemanen. Saꞌitada, su mikpetuꞌus dig delendemanen. Kiai ketuꞌus dun nug Balakat nu Megbebayaꞌ, kanaꞌ nug betaden getaw Judea. Su getaw maꞌnia, iini mekpenal diniin, su Megbebayaꞌ, kanaꞌ nu getaw.

Roma 3

1  Naa saꞌ maꞌantu, su nga getaw Judea, gembagel pa bai pantagen batul nu nga kanaꞌ getaw Judea? Mukaꞌ ki tuꞌus nilan kia, duun bai pantagen?
2  Duun lai! Gembageli pantagen dig launan kibianan. Beknanen, siligan ilan nu Megbebayaꞌ Misulat Taluꞌen.
3  Metuud, duuni getaw Judea kanaꞌ meseligan. Laak, pia maꞌantu, penuuden tantu nu Megbebayaꞌ su pinasaden dinilan kanugdiin.
4  Puꞌ pia belusenig launan getaw, ndaꞌiduni teluꞌen nu Megbebayaꞌ, subay metuud. Ndaꞌ ba mesulat kanugdiin, “Subay mpaitaꞌ mu su kekesuun mu dig launan taluꞌ mu. Mukaꞌ subay mekegdaaga saꞌ dengaten ka.”
5  Laak dagid, pinenggiꞌ saꞌ mpaitaꞌ ta di kemilas ta puꞌ mekesuun pasiꞌ su Megbebayaꞌ, taꞌ maig delendeman ta dun? Delendeman ta ba sia puꞌ kanaꞌ ita mbantang ukumen nu Megbebayaꞌ? Kinilawan laaki sinulatu kini.
6  Ndiꞌ lai mesuꞌat! Puꞌ saꞌ metuud, kanaꞌ meglepengi kaukum nu Megbebayaꞌ, kendutaꞌi kaukumen dun sug launan getaw?
7  Naa, saꞌ pinenggiꞌ megbalusu, mukaꞌ puun tug balusu maitaꞌ dayun puꞌ meglegintuud su Megbebayaꞌ, mauma dema ukumen dinaan mikesalaꞌu, asal metaas pai kegdedengeg nu Megbebayaꞌ sabaꞌ nug balusu?
8  Mukaꞌ pa pagid, mauma dema ndiꞌ teluꞌen, “Penemalan ta penggulaulaay su melaaten, adun medeksuꞌ di melengas?” Duun daani getaw miglekuti dinaan, puꞌ laung nilan kiai tituluꞌan ku. Ukuman pailan nu Megbebayaꞌ di mitibabaꞌ nilan!
9  Naa mendadi, taꞌig batik niu dun? Su kebetang nami nga getaw Judea, melengas pa ba di pegitaꞌen nu Megbebayaꞌ batul nu kebetang niu nga kanaꞌ getaw Judea? Kanaꞌ! Ndaꞌi pigbidaꞌanen. Ndiꞌ ba metuud pinitaꞌu na daan diniu puꞌ gempantek sug launan getaw, milabuꞌ dig betad nilan mekesalaꞌ, su nga getaw Judea sampay su nga kanaꞌ getaw Judea?
10  Ndaꞌ ba mesulat, “Saladuaꞌ, ndaꞌiduni mekesuun di pegitaꞌen nu Megbebayaꞌ.
11  Ndaꞌidun dademai getaw mesabuten saꞌ taꞌ alanduni kekesuun. Ndaꞌi getaw pekpenengaunenig bianan pangay tu Megbebayaꞌ.
12  Tiliudan nug launan getaw su Megbebayaꞌ. Kig launanen kia, mikesalaꞌ. Bisan sala tawan, ndaꞌiduni mekesuun.
13  Su peneluꞌen nilani maaꞌ nug lebeng binulingkal, sabaꞌ kelaatenen. Ndaꞌiduni kabit nilan, lumbus balus. Mukaꞌ iin dademai teluꞌen nilan, su kegbulang nilan tug duma nilan, maaꞌ nu telis nu mamak.
14  Maꞌniin miglimpawaꞌig babaꞌ nilan di tuyud.
15  Iini mededaliꞌ nilani pemesait mukaꞌ patay.
16  Bisan tandaꞌ ilan pangay, pikiatiat nilani kelaatan mukaꞌ kelegenay nilan di nga getaw.
17  Ndiꞌ nilan eksudeni nga getaw di kelinaw.
18  Ndaꞌ dig delendeman nilan su Megbebayaꞌ, kaas ndaꞌ nilan iin pegbesaay, mukaꞌ ndaꞌ nilan endekay.”
19  Naa, su kelaun Palinta nu Megbebayaꞌ, mesuunan ta puꞌ iin laakig duunig labeten dun, yami nga getaw Judea. Kagina maꞌnia, sug launan ta, ndaꞌi gempia ta sembag dun sug dangat dinita, kaas mbianan ta pai ginukuman nu Megbebayaꞌ, puꞌ migelaꞌ mekesalaꞌ sug launan getaw.
20  Puꞌ pia sala tawan, ndaꞌiduni mekesuun di pegitaꞌen nu Megbebayaꞌ mekatag di kedunuten tu Palinta. Iini pinalinta dun dinita nu Megbebayaꞌ, adun mesuunan nug launan getaw, mikesalaꞌ ita.
21  Naa, nandaw, kig bian nu Megbebayaꞌ tu kemilangen di nga getaw mekesuun, biwasanen na. Kanaꞌ iinig bian dun su kedunut nu nga getaw di Palinta. Pia maꞌantu, duuni misulat di Palinta nu Megbebayaꞌ pisulaten dini Moises mukaꞌ su ngag duma pimuunanen dengantu mekatag di kepesikesuun di getaw.
22  Pemilangen nu Megbebayaꞌ mekesuun su nga getaw pebian di kesalig ta dini Isukristu. Sug launan getaw mekpetuud diniin, mesamai kemilangen dun, saꞌ su getaw Judea, saꞌ kanaꞌ.
23  Puꞌ mikesalaꞌ ita, launan ta, mukaꞌ melayuꞌ naita di kelengas nu pegbayaꞌ daansamaꞌ mitenduꞌ nu Megbebayaꞌ gasal getaw.
24  Laak dagid, tinulung naita nu Megbebayaꞌ di ndaꞌi sugda ta dun. Pemilangen ita mekesuun, sabaꞌ nu kegantiꞌ ni Kristu lekaten ita di salaꞌ.
25  Mitenduꞌ nu Megbebayaꞌ si Kristu kini matay megusan duguꞌ, adun launan getaw sumalig diniin, pedesunenen di salaꞌ nilan. Mingmaꞌnia adun pesuun nu Megbebayaꞌ di nga getaw puꞌ iini mekesuun. Pia daansamaꞌ pituyang nu Megbebayaꞌ su salaꞌ nu getaw sabaꞌ nug lelaaten dinilan,
26  nandaw, pisuunen di nga getaw puꞌ meglepengi kaukumen di getaw, puꞌ pengebetenen nai salaꞌ nilan. Mukaꞌ pisuunen na puꞌ mesuꞌat na pemilangen mekesuun su mekpetuud dini Isus.
27  Naa maꞌantu, taꞌ mai gempia ta pengangyaꞌ? Ndaꞌidun! Mauma dema? Puꞌ su kemilang dinita nu Megbebayaꞌ mekesuun, kanaꞌ sabaꞌ nu kedunut ta tu Palinta. Iini pemilangen ita niin dun mekesuun, puꞌ sumalig ita diniin.
28  Puꞌ mituudan ita dun puꞌ pemilangen nu Megbebayaꞌ mekesuun su nga getaw sabaꞌ nu kesalig ta laak, kanaꞌ nu kedunut ta tu misulat Palintanen.
29  Su getaw Judea ba laaki mektamuy tu Megbebayaꞌ? Saꞌ pektemuyen dadema nu nga kanaꞌ getaw Judea? Pektemuyen dadema nilan lai!
30  Asa salabuuki Megbebayaꞌ. Pemilangen mekesuun su nga getaw Judea meksekat di kesalig nilan dini Kristu. Pemilangen dadema mekesuun su nga kanaꞌ getaw Judea, saꞌ sumalig dailan dema diniin.
31  Mingmaꞌanan ba ia puꞌ tiliudan nu kesalig ta su Palintanen? Ndiꞌ lai! Kagina sumalig ita dini Isukristu, dumunut daita dema tu Palintanen.

Roma 4

1  Naa si Abraham, su ginepuꞌay nug bansa nami, alandun dayuni teluꞌen ta mekatag diniin? Taꞌ mai mibiananen?
2  Saꞌ upama iin siai pimilang dun nu Megbebayaꞌ mekesuun si Abraham, puꞌ sabaꞌ nu pinggulaulanen, duun siai pengangyaꞌen. Laak ndiꞌ mesuꞌat di pegitaꞌen nu Megbebayaꞌ.
3  Alanduni tinaluꞌ di Misulat Taluꞌ nu Megbebayaꞌ mekatag dini Abraham kini? “Mikpetuud si Abraham ditu Megbebayaꞌ, kaas pimilang nu Megbebayaꞌ mekesuun, sabaꞌ nu kesaligen diniin.”
4  Naa, pinenggiꞌ duuni tinindanan, su tinindan dun, ndiꞌ mpemilang bigay, puꞌ piglesayanen.
5  Naa, kanaꞌ maꞌniai kemilang nu Megbebayaꞌ mekesuun su getaw, puꞌ saꞌ seligan nu getawi kesaligen ditu Megbebayaꞌ sabayaꞌ su gulaulanen, pemilangen nu Megbebayaꞌ kekesuuneni kesaligen. Puꞌ su Megbebayaꞌi memilang mekesuun tu getaw mimilas saꞌ sumalig na diniin.
6  Maꞌnia dademai maꞌanan nu tinaluꞌ kini ni David kanugdiin, puꞌ leliagen su getaw pemilangen nu Megbebayaꞌ mekesuun di ndaꞌi tegelen dun. Ndaꞌ ba mesulat,
7  “Liliag na su getaw pidasun na nu Megbebayaꞌ ditug limbungen, mukaꞌ lilaatan nu Megbebayaꞌ ditu salaꞌen!
8  Liliag nai getaw ndaꞌ na dig delendeman nu Megbebayaꞌ su salaꞌen!”
9  Naa, kig leliag kia tinaluꞌ ni David, danu nga getaw Judea ba laak? Kanaꞌ lai, puꞌ leliagen dadema su nga kanaꞌ getaw Judea, puꞌ mialapu kamun ditu sinulat ni Moises, laungen, “Pimilang nu Megbebayaꞌ mekesuun si Abraham, sabaꞌ nu kesaligen diniin.”
10  Mendadi si Abraham, nanunen maia mibianan? Su ndaꞌ pain sirkunsisuay, saꞌ mitubus na? Su kemilang dun nu Megbebayaꞌ mekesuun, mibiananen na, su ndaꞌ pa sirkunsisuay.
11  Sikna mikpetuud si Abraham ditu pinasad nu Megbebayaꞌ diniin, sinirkunsisu dayun, puꞌ tuꞌus tu gandang kemilang nu Megbebayaꞌ diniin mekesuun. Iini pimilang dun, puꞌ sabaꞌ nu kesaligen. Kaas si Abraham, mibaluy maꞌniin gamaꞌ di ginaa nug launan getaw sumalig ditu Megbebayaꞌ mukaꞌ pemilangenen mekesuun. Kiin, bisan ndaꞌ ilan mesirkunsisu.
12  Iin dademai gamaꞌ nu nga getaw misirkunsisu, saꞌ minunggiling dailan dema tu kesalig ni Abraham, su ndaꞌ pain mesirkunsisu.
13  Naa su Megbebayaꞌ, kanugdiin minasad iin dini Abraham sampay tu nga sapuꞌen puꞌ begayen dinilanig lumbang kini. Iini pinasaden dun puꞌ suminalig si Abraham diniin, kanaꞌ nu kedunut ni Abraham tu Palintanen. Pimilangen dayun si Abraham mekesuun.
14  Puꞌ saꞌ upama begayan pinasaden su nga dumunut tu Palintanen, ndaꞌ siai gatagen su kesalig nu getaw. Mikulaꞌulaꞌ dadema sia su pinasad nu Megbebayaꞌ, puꞌ ndaꞌiduni mekedunut gupia tu Palintanen.
15  Kaas pebiananeni nga getaw ginukumanen mikpuun tu Palintanen. Laak saꞌ ndaꞌidun siai palinta, ndaꞌidun dadema siai memilas dun.
16  Mendadi ki pinasad kini nu Megbebayaꞌ, malap ta meksekat di kesalig ta, adun mpantek puꞌ su tulung nu Megbebayaꞌi tantu puunen. Kiin, adun mpantek dadema puꞌ mekalap dun sug launan sapuꞌ ni Abraham, saꞌ su ngag dumunut tu Palintanen, saꞌ su nga mpeduunan kesalig maaꞌ dadema nu kesalig ni Abraham. Puꞌ si Abraham, mibaluy na ginepuꞌay nug launan ta, ita nu nga suminalig tu Megbebayaꞌ.
17  Puꞌ ndaꞌ ba mesulat kanugdiin di Misulat Taluꞌ nu Megbebayaꞌ, “Binaalu yaꞌa gamaꞌ nu getaw di melaun bansa.” Kaas di pegitaꞌen nu Megbebayaꞌ, mikpalas su pinasaden. Iini minasad dun, su Megbebayaꞌ, su seligan ni Abraham mukaꞌ su mekpetubuꞌ di minatay na, sampay su maal tug launanen, pibian laak di taluꞌen.
18  Naa si Abraham, mituudan dun su tinaluꞌ nu Megbebayaꞌ puꞌ mbaluy melaun bansa su sapuꞌen, kaas mikpedateng dun. Pia ndaꞌidun siai pedetengenen, puꞌ megulang na gupiai sawanen, mikpedateng gusay. Kaas mibaluy ginepuꞌay nu melaun getaw, maaꞌ da nu tinaluꞌ nu Megbebayaꞌ diniin, laungen, “Su kelaun nu nga sapuꞌ mu, maaꞌ danug bitun.”
19  Benaꞌ midelendemen sug lawasen, mipemilangen maꞌniin minatay na, puꞌ pekpanaw na di megatus taun. Ndiꞌ na mapet bataꞌen su sawanen si Sara. Pia maꞌantu, mituudan da dun gusay.
20  Ndaꞌ melukaꞌi kesaligen tu Megbebayaꞌ, puꞌ ndaꞌ pegduaꞌduaꞌig delendemanen mekatag di pinasaden. Migiseg dademai kesaligen, saananen menamal mekpededengeg tu Megbebayaꞌ.
21  Mekpedateng da gusay puꞌ megaga nu Megbebayaꞌ penggulaulaanen su pinasaden diniin.
22  Sabaꞌ nu kesaligen, misulat dayun kanugdiin puꞌ pimilang nu Megbebayaꞌ mekesuun.
23  Su sinulat ditu Misulat Taluꞌ nu Megbebayaꞌ, laung, “Pimilang nu Megbebayaꞌ mekesuun,” kanaꞌ laak mekatag dini Abraham.
24  Mekatag dadema dinita, ita nu nga pemilangen nu Megbebayaꞌ mekesuun saꞌ mekpetuud ita tu Megbebayaꞌ, su mikpetubuꞌ puliꞌ dini Isus su Kaunutan ta.
25  Si Isus kini, iini bigay nu Megbebayaꞌ matay puun tu kemilas ta. Pitubuꞌen dayun puliꞌ, adun mpemilang ita niin mekesuun, maꞌniin ndaꞌi salaꞌ ta.

Roma 5

1  Mendadi ita, kagina pimilang ita nu Megbebayaꞌ mekesuun sabaꞌ nu kesalig ta, piseksud daita dema nu Kaunutan ta si Isukristu ditu Megbebayaꞌ.
2  Mukaꞌ piduma naita niin di tulungen mbianan ta gebii gendaw mekatag di kesalig ta. Kaas liliag ita tu pedetengen ta puꞌ ditug binayaꞌ gebii buꞌ gendaw, mpeduma ita tantu tu kegdedengeg nu Megbebayaꞌ.
3  Sinangkaliꞌ pa tanan, liliag ita tu kegleget dinita, puꞌ misuunan ta saꞌ peglegetan ita, meglegintau paita mektigel dun.
4  Mukaꞌ saꞌ metau naita mektigel di kegleget dinita, leliagen dinita su Megbebayaꞌ. Mendadi kagina leliagen dun su Megbebayaꞌ, pedetengen ta puꞌ pepianan ita niin.
5  Ki pedetengen ta, kanaꞌ kebulug, puꞌ lilaatan ita gupia nu Megbebayaꞌ pibian dig Balakaten bigayen megbenwa di ginaa ta.
6  Naa, su ndaꞌ paita megawen, saꞌ minateng nai gendaw tinduꞌ nu Megbebayaꞌ, minatay si Kristu megabang dinita nu nga memilas getaw.
7  Melegen ta pegdelendemeni getaw meliag matay adun megabang dig duma ndaꞌi salaꞌen. Asa duuni getaw mauyaꞌanen matay megabang di mekesuun getaw.
8  Laak su Megbebayaꞌ pasiꞌ, pinitaꞌen dinita su kebagel petailanen, puꞌ sinegay mikesalaꞌ paita getaw, minatay si Kristu megabang dinita.
9  Kagina mipemilang ita nu Megbebayaꞌ mekesuun miksekat tu kepatay ni Kristu, labi naita niin megawen di ginukumanen tug launan getaw.
10  Puꞌ saꞌ saanan ta kumuntra tu Megbebayaꞌ, mipeseksuden ita diniin sabaꞌ nu kepatay nug Bataꞌen, labi na guunen ita niin meksekat di ketubuꞌen nemun.
11  Pidag pa tanan, liliag ita tu pipenggulaula nu Megbebayaꞌ di Kaunutan ta si Isukristu, puꞌ piseksud ita ni Isukristu ditu Gamaꞌen Megbebayaꞌ.
12  Naa sug betad mekesalaꞌ, iini mituaꞌ dun dinig lumbang, puꞌ duuni sala tawan mikesalaꞌ kanugdiin, si Adan. Sabaꞌ nu salaꞌ ni Adan, pipatay nu Megbebayaꞌ, kaas mileep na dig launan getaw ki gasalen matay, puꞌ mikesalaꞌ dademaig launan getaw.
13  Su ndaꞌ pa palintaay nu Megbebayaꞌ su Palintanen, daan na dinig lumbang sug betad mekesalaꞌ. Kagina ndaꞌ pai Palinta, ndaꞌ pa mpengebeti salaꞌ.
14  Pia maꞌantu, genat di timpu ni Adan sampay di gendaw pisuun nu Megbebayaꞌ dini Moises su Palintanen, mesuunan ta mikesalaꞌ da gusay su nga getaw, puꞌ launan nilan, minatay. Minatay dailan gusay, asa su salaꞌ nilan, kanaꞌ maaꞌ nu salaꞌ ni Adan, su mimilas tu tinituluꞌ diniin nu Megbebayaꞌ. Naa, si Adan mukaꞌ ki getaw metuaꞌ pa dig binayaꞌ gebii buꞌ gendaw, mesuꞌat peguntain tailan.
15  Laak ndaꞌ ilan duaꞌ peksama, puꞌ ki tulung nu Megbebayaꞌ pibian di sala tawan kini si Kristu, kanaꞌ maaꞌ nu salaꞌ ni Adan. Sala da ni Adan, laak minatay su melaun getaw sabaꞌ nu melaat pinggulaulanen. Gembagel paig lelaat nu Megbebayaꞌ ditu salaꞌ ni Adan, puꞌ tinulungen su melaun getaw sabaꞌ nu kepepia dinita nu sala tawan si Isukristu.
16  Ndiꞌ meksamai mibianan ta sabaꞌ nu tulung nu Megbebayaꞌ mukaꞌ su mibianan ta sabaꞌ nu melaat gulaula nu sala tawan kia si Adan. Sikna na mikesalaꞌ si Adan, inukuman dayun nu Megbebayaꞌ mikesalaꞌ su nga getaw. Laak kagina tinulung ita nu Megbebayaꞌ, pimilang ita niin mekesuun, pia mikesalaꞌ daita dema gupia.
17  Metuud, kagina mimilas si Adan, mengasal menumpat, matay sug launan getaw. Misebuꞌan paita dun su tulung nu sala tawan si Isukristu, puꞌ mpeduunan ketubuꞌ ndaꞌi tamaneni nga getaw dumawat tu gembagel tulung nu Megbebayaꞌ, mukaꞌ pimilangen nailan mekesuun mikpuun dini Kristu. Mukaꞌ pa pagid saanan nilan metubuꞌ pa, mekedaag dailan dema di melaat.
18  Mendadi sabaꞌ nu kemilas nu sala tawan, inukuman nu Megbebayaꞌ sug launan getaw salaꞌen, lagaꞌ na ginaanen. Maꞌnia dademai kekesuun pinggulaula nu sala tawan pelum, saꞌitada su kepatayen. Sabaꞌ nu pinggulaulanen kia, pibeluy naita nu Megbebayaꞌ di ginukumanen dinita, mukaꞌ bigayen dinitai ketubuꞌ ndaꞌi tamanen.
19  Sabaꞌ nu kemilas nu sala tawan kia si Adan, mibaluy mikesalaꞌ sug launan getaw. Maꞌnia dadema, pemilangen nu Megbebayaꞌi melaun getaw mekesuun, mikpuun di kekpetuud nu sala pelum, si Kristu.
20  Naa, iini pisuun dun nu Megbebayaꞌ su Palintanen dini Moises, puꞌ adun medugangi kemilas dun. Laak dagid, saꞌ migdugangi salaꞌ nu nga getaw, pibagel nu Megbebayaꞌ su tulungen dinita nu nga getaw.
21  Mendadi, daansamaꞌ mengasal menumpat, matay su nga getaw mikpuun di salaꞌ. Laak nandaw, kagina pimilang ita nu Megbebayaꞌ mekesuun, su tulungeni megbayaꞌ na di ginaa ta, mukaꞌ su gasal ta, ketubuꞌ ndaꞌi tamanen mikpuun di kepatay nu Kaunutan ta si Isukristu.

Roma 6

1  Naa ki pegbetaden ta, taꞌ alandun dayuni gempia ta teluꞌen? Metaluꞌ ta ba menamal ita mekesalaꞌ, adun meksibagelig lelaat nu Megbebayaꞌ dinita, puꞌ adun melaun pai pedesunenen?
2  Ndiꞌ lai mesuꞌat! Puꞌ ndaꞌ naig labet ta di salaꞌ, maaꞌ nu getaw minatay na, ndiꞌ na mekesalaꞌ. Ndiꞌ naita mekenamal mekesalaꞌ.
3  Misuunan da niu gupia, saꞌ mibunagan naita tubig, tuꞌus puꞌ suminalabuuk ita dini Kristu Isus, mipeduma ita di kepatayen.
4  Kaas saꞌ mikpebunag ita tubig, lepeng mipeduma ita di kepatay ni Kristu dayun libeng ita, adun metubuꞌ ita begu ketubuꞌ, maaꞌ ni Kristu pitubuꞌ puliꞌ nu Gamaꞌ ta mikpuun di melengas gupia pegbayaꞌen.
5  Naa ita, kagina mipeduma ita di kepatay ni Kristu saꞌ mibunagan ita tubig, mituudan ita dun puꞌ sumalabuuk daita dema di ketubuꞌen puliꞌ, puꞌ begayan ita begu ketubuꞌ.
6  Misuunan ta dadema puꞌ maꞌniin mipeduma dini Kristu petayay dia kurus sug daan delendeman ta, adun ndaꞌ nai pegbayaꞌen su gayak ta tug betad mekesalaꞌ, mukaꞌ adun kanaꞌ naita gulipen nug betad ta mekesalaꞌ.
7  Puꞌ saꞌ mipedumai getaw di kepatay ni Kristu, pemilangen na nu Megbebayaꞌ kanaꞌ na mekesalaꞌ.
8  Mukaꞌ kagina miksalabuuk ita di kepatay ni Kristu, mituudan ita dun puꞌ mpeduma daita dema di ketubuꞌen.
9  Puꞌ misuunan ta mitubuꞌ puliꞌ si Kristu, mukaꞌ ndiꞌ na mesuꞌat matay puliꞌ. Su gumul, ndaꞌ nai pegbayaꞌen diniin.
10  Su kepatay ni Kristu, minatay di salaꞌ mainsan, ndiꞌ na mpuliꞌan. Nandaw mitubuꞌ si Kristu, adun sumalabuuk tu Megbebayaꞌ.
11  Maꞌnia damu dema, gempia niu pemilangen niuig lawas niu minatay na, ndaꞌ naig labet niu tu salaꞌ, mukaꞌ mitubuꞌ namu, sumalabuuk namu tu Megbebayaꞌ pebian dini Kristu Isus.
12  Kaas, ndiꞌ niu begay sug betad niu mekesesalaꞌ megbayaꞌ pa dig lawas niu, adun dunutan niu su da melaat gayaken.
13  Subay ndiꞌ dadema niu begay pia tandaꞌ dun dig lawas niu mekesalaꞌ. Gempia pegwakil niui tibuuk lawas niu tu Megbebayaꞌ, adun pepenggulaulaanen diniu su kekesuun. Puꞌ pia daansamaꞌ maꞌniin amu minatay, nandaw mitubuꞌ amu puliꞌ.
14  Ndiꞌ na mpia megbayaꞌ dig delendeman niu sug betad mekesalaꞌ, puꞌ kanaꞌ niu siligani kektalenten niu tu palinta, puꞌ siligan niu pasiꞌ su tulung nu Megbebayaꞌ diniu.
15  Naa, taꞌ maig baalan ta dun dayun? Kagina kanaꞌ na seligan tai kektalenten ta tu palinta, puꞌ seligan ta na ki tulung dinita nu Megbebayaꞌ, mekesalaꞌ baita? Ndiꞌ da pagid mpia!
16  Yamu, misuunan niu tantu puꞌ saꞌ upama pegwakil niuig lawas niu gulipen nu getaw, adun mekpetuud amu gupia di getaw kia, gulipen amu niin tantu! Naa, saꞌ pinenggiꞌ, mekpetuud amu tug betad niu mekesalaꞌ, gulipenen amu dayun. Mukaꞌ deksuꞌanen ia, matay damu. Laak dagid, saꞌ mekpetuud amu tu Megbebayaꞌ, pemilangen amu niin mekesuun.
17  Laak mekpaladpaladu tu Megbebayaꞌ, puꞌ pia daansamaꞌ gulipen amu nug betad mekesalaꞌ, nandaw, pituud niu di ndaꞌ pegduaꞌduaꞌig delendeman niu su metuud tituluꞌan piktuꞌun diniu.
18  Likat namu nu Megbebayaꞌ, kaas mikegawaꞌ namu di salaꞌ mukaꞌ mibaluy namu sesuguꞌen nu Megbebayaꞌ, kaas mekesuun namu dema.
19  Naa ki sinulatu kini, kinilawan betad laak, puꞌ ndiꞌ pa niu megaga dig diniwata. Daansamaꞌ bigay niuig lawas niu mbaal gulipen nu kegdusa mukaꞌ nug limbung, adun mekesalaꞌ. Maꞌnia dema nemun, subay pegwakil niuig lawas niu sesuguꞌen namu nu kekesuun, adun meksikesuun amu, mukaꞌ medawat namu nug Megbebayaꞌ maꞌniin ndaꞌi salaꞌ niu.
20  Mendadi, saꞌ gulipen pamu nug betad niu mekesalaꞌ, ndaꞌig labet niu dun su kekesuun.
21  Mukaꞌ ndaꞌi gatagen tantu sug daan pinggulaula niu, su mpiid namu dun, puꞌ deksuꞌanen ia, kepetayan niu ndaꞌi tamanen.
22  Laak tumuꞌ nemun, likat namu nu Megbebayaꞌ di salaꞌ, mukaꞌ mibaluy namu sesuguꞌen nu kekesuun. Kaas gembagel nai sugda dun puꞌ gilaꞌ na niu pegwakil diniin su pegbetaden niu, mukaꞌ deksuꞌanen ia, ketubuꞌ ndaꞌi tamanen.
23  Mendadi, saꞌ begay nu getawig lawasen mekesalaꞌ, iini sugda dun, kepatay di ndaꞌi gikteben. Laak dagid iini begay nu Megbebayaꞌ tu nga sumalabuuk dini Kristu Isus su Kaunutan ta, ki ketubuꞌ ndaꞌ dademai tamanen. Mukaꞌ kiin, begayen di ndaꞌi sugda dun.

Roma 7

1  Naa, Mingumpated, mesabut niui sunguun ku sulatay, puꞌ sug betad palinta, misuunan niu, launan niu. Su palinta, iin su meguit di getaw sampay matengi gumulen.
2  Pinenggiꞌig libun, sinegay pektetubuꞌ pai sawanen, diin pa gengkeman nu sawanen, miksekat tu palinta. Laak, saꞌ matay nai sawanen, meleksunen nai palinta.
3  Kaas, saꞌ upama uliꞌanenig lain laki sinegay tetubuꞌ pai sawanen, paingalan dun megdusa. Laak dagid, saꞌ upama minatayi sawanen, mileksuneni palinta. Mukaꞌ saꞌ penginsuaan nug lain laki, kanaꞌ na dusa.
4  Naa yamu, Mingumpated, maꞌnia damu dema. Kagina maꞌniin amu sengkapan nug lawas ni Kristu, su kepatayen, minatay damu dema. Kaas kanaꞌ namu di gengkeman nu Palinta, puꞌ suminalabuuk amu dig lain, saitada dini Kristu. Su ketubuꞌen puliꞌ, gitunganen dun mitubuꞌ damu dema puliꞌ, adun penggulaulaan ta su gempia, sug leliagen dun su Megbebayaꞌ.
5  Su kedunut ta pa tug betad nu kinilawan, pidelendem dinita nu Palinta su melaat gayak ta. Kiai migbayaꞌ di ginaa ta, mukaꞌ deksuꞌanen ia, kepatay ta sia.
6  Laak nandaw, mileksu ta su Palinta, puꞌ maꞌniin daita minatay mekatag di migbalud dinita, tug daansamaꞌ mikpedelendem dun dinita. Su kektamuy ta tu Megbebayaꞌ, kanaꞌ na nu kedunut ta tu Misulat Palinta, puꞌ pektemuyen tain miksekat dig Balakaten.
7  Naa kagina maꞌantu, saꞌ su Palinta, taꞌ alandun mai gempia ta teluꞌen? Mesuꞌat ta ba teluꞌen puꞌ melaati Palinta nu Megbebayaꞌ? Ndiꞌ lai! Su Palintai mikpesuun dinaan puꞌ melaat gupiai salaꞌ. Pinenggiꞌ, ki kesaku, ndaꞌu sia mesuunay puꞌ salaꞌ, saꞌ ndaꞌ sia palintaay, “Ndiꞌa mayak tug danug duma mu.”
8  Benaꞌ misuunan ku su pinalinta, mikesikaw dayunig betad mekesalaꞌ tu pinalinta, mukaꞌ milamug dayun di gunedui gayak. Puꞌ saꞌ sia ndaꞌiduni pinalinta, ndaꞌi mekesuun tu salaꞌ.
9  Su ndaꞌu pa mesuunayi pinalinta, metubuꞌ pau, puꞌ maꞌniin ndaꞌiduni salaꞌu. Saꞌ mitituluꞌan nau, milamug dayunig betad mekesalaꞌ di gunedu,
10  kaas maꞌniin nau minatay. Iin siai tinituluꞌu dun nu Megbebayaꞌ, puꞌ adun mesuunan ku sug bianan di tantu ketubuꞌ. Laak danaan, mibianan ku iini miukumanu dun, su pinalinta.
11  Pisikaw nu palinta su salaꞌ, kaas milimbunganu, puꞌ laung ku dun, ketubuꞌig deksuꞌanen sia. Masiꞌ kepatay!
12  Misuunan ta puꞌ su Megbebayaꞌi pigenatan nu Palinta. Su nga tituluꞌ dia Palinta, genat dadema diniin, kaas melegdeng mukaꞌ melengas.
13  Taꞌ alandun dayuni maꞌananen? Iin bai mikesabaꞌ dinaan su melengas? Kanaꞌ lai! Puꞌ iini mikpatay dinaan su salaꞌ, pibian di gempia tituluꞌ, adun medayagig betad nu salaꞌ. Mendadi, mibuasan nu palinta puꞌ sug betad mekesalaꞌ, melaat gupia, mukaꞌ naan, maꞌniinu minatay na.
14  Naa ki Palinta, misuunan ta puꞌ genat tu Megbebayaꞌ. Laak naan, kilawan dau, mukaꞌ maꞌniinu piksaluy tug betadu mekesalaꞌ, kaas gulipenu nug betadu.
15  Ndiꞌu mesabuti pigbetadu, puꞌ iini pinggulaulau, su ndaꞌ dig delendeman ku, sabayaꞌ tu mauyaꞌan ku penggulaulaay.
16  Kagina pinggulaulau su ndaꞌ dig delendeman ku, mipantek puꞌ misanguꞌu su kelengas nu Palinta.
17  Saꞌ maꞌantu, kanaꞌ naan tantui minggulaula dun, puꞌ sug betad nug lawasu mekesalaꞌ, iin su minggulaula dun.
18  Misuunan ku puꞌ ndaꞌiduni kekesuun dig lawasu, saꞌitada, ndaꞌi melengas mikpuun dig betadu kinilawan. Puꞌ pia duuni mauyaꞌan ku penggulaulaan ku su gempia, ndiꞌu megaga.
19  Su melengas, ndiꞌu mpenggulaula, pia mauyaꞌan ku. Laak iin dai mpenggulaulau, su melaat ndaꞌ dig delendeman ku.
20  Naa, saꞌ penggulaulaan ku su ndaꞌ dig delendeman ku, maꞌananen, kanaꞌ na naani minggulaula dun, puꞌ iini minggulaula dun, sug betad mekesalaꞌ miseled dig lawasu.
21  Kaas mbianan kuig betad maꞌniniꞌ. Saꞌ mauyaꞌan ku penggulaulaan ku su melengas, metulimbagu sungkin tu melaat.
22  Su Palinta nu Megbebayaꞌi mauyaꞌan ku gupia di ginau.
23  Laak lain betadi miseluk dinaan megbayaꞌ dig betadu kinilawan, puꞌ miksumpakiꞌ di Palinta mitaguꞌ dig delendeman ku mukaꞌ mingulipen dinaan. Maꞌnia, gulipenu nug betad mekesalaꞌ.
24  Apelai! Milegenanu lai dun gupia! Saaken ku dayun, taꞌ mai kegawen dinaan di kekilawan ku mekangay ditu kepatay di ndaꞌi tamanen?
25  Mukaꞌ didaliꞌu sembagay, mekeglegawen dinaan su Megbebayaꞌ, sabaꞌ nu Kaunutan ta si Isukristu! Kaas mikpaladpaladu diniin, pibian dadema dini Isus pelum. Mendadi, iini kebetangu. Su Palinta nu Megbebayaꞌi dunutan nug delendeman ku, laak su kekilawan ku, mitulu na tug betad mekesalaꞌ.

Roma 8

1  Naa maꞌantu, ki nga getaw suminalabuuk dini Kristu Isus, ndiꞌ na nilan mbianan su ginukuman dun nu Megbebayaꞌ. 2Puꞌ iinig betad nug Balakat nu Megbebayaꞌ. Kagina pisalabuuk ita niin dini Kristu Isus, bigayan daita dema niin begu ketubuꞌ. Ginawen naita di pegbayaꞌ nu gasal ta mekesalaꞌ pangay ditu kepatay. 3Kagina ndiꞌ ta megaga su kekinilawan ta, ndiꞌ ta medunutan su Palinta, kaas ndiꞌ ta mbelengig betad ta mekesalaꞌ. Laak megaga nu Megbebayaꞌ. Mendadi iini sinuguꞌ dun nu Megbebayaꞌ sug Bataꞌen medini, puꞌ adun uaꞌenen di ginaa getaw su pegbayaꞌ nug betad mekesalaꞌ. Miksibaluy getaw kig Bataꞌen kini, kaas mipeduunan kekinilawanen maaꞌ danita nga getaw mekesalaꞌ, adun mbiananen su ginukuman sia dinita nu Megbebayaꞌ mukaꞌ uaꞌenen su salaꞌ. 4Iini pinggulaula dun nu Megbebayaꞌ, adun megelaꞌ ta mpenggulaula su kepianan mauyaꞌan nu Megbebayaꞌ, maaꞌ dadema nu tinituluꞌ di Palintanen. Megelaꞌ ta mpenggulaula saꞌ pektalentenan ta su tinituluꞌ nug Balakaten, kanaꞌ nu kekinilawan ta. 5Puꞌ su getaw mektalenten laak tu gayak nu kekinilawanen, mekpebayaꞌ di ginaanen tu kekinilawanen. Laak su getaw pektalentenanen su mauyaꞌan nug Balakat nu Megbebayaꞌ, pebayaꞌen su ginaanen diniin. 6Saꞌ su kekinilawan tai megbayaꞌ dig delendeman ta, deksuꞌanen ia, kepatay ta di ndaꞌi tamanen. Saꞌ su mauyaꞌan nug Balakat nu Megbebayaꞌi megbayaꞌ dig delendeman ta, malap taig begu ketubuꞌ mukaꞌ pianan ginaa. 7Kaas kumuntrai getaw tu Megbebayaꞌ saꞌ su kekinilawaneni megbayaꞌ dig delendemanen, puꞌ ndiꞌen penggulaulaan su tinituluꞌ di Palinta nu Megbebayaꞌ, mukaꞌ ndiꞌ mekegdunut dun. 8Su getaw mekpetuud tu kekinilawanen laak, ndaꞌig leliagen dun su Megbebayaꞌ. 9Laak yamu pasiꞌ, pektalentenan niu su mauyaꞌan nug Balakat nu Megbebayaꞌ, sabayaꞌ di gayak nu kekinilawan niu, saꞌ metuud, pigbenwanan nug Balakaten su ginaa niu. Adin su ndaꞌ pegbenwanay nug Balakat ni Kristu, kanaꞌ sakup ni Kristu. 10Laak dagid, kagina metuud puꞌ pigbenwanan ni Kristui ginaa niu, puun tu kemilang diniu nu Megbebayaꞌ mekesuun, ki ginaa niu, petubuꞌen nug Balakaten pia mekangayig lawas niu tu kepatay sabaꞌ nu salaꞌ. 11Kagina migbenwa di ginaa niu sug Balakaten, petubuꞌen puliꞌ nu Megbebayaꞌ sug lawas niu pebian dig Balakaten migbenwa na di ginaa niu, puꞌ pitubuꞌ puliꞌ nu Megbebayaꞌ si Kristu Isus. 12Kaas uu Mingumpated, subay iini pegbetaden ta, su mauyaꞌan nug Balakat nu Megbebayaꞌ, kanaꞌ nu mauyaꞌan nu kekinilawan ta. 13Puꞌ saꞌ pegbetaden niu su kekinilawan niu, mekangay amu tu kepatay niu. Laak dagid, saꞌ pebian di gabang nug Balakaten teliudan niu su melaat gulaula, maꞌniin niu pinatay su pigbetad niu kinilawan. Malap niu dayuni ketubuꞌ ndaꞌi tamanen. 14Su nga getaw inagak nug Balakat nu Megbebayaꞌ, bataꞌ nailan nu Megbebayaꞌ. 15Puꞌ sug Balakaten bigay diniu nu Megbebayaꞌ, ndiꞌ mengulipen diniu, mukaꞌ ndiꞌ mekpengendek diniu. Puꞌ pibataꞌ ita niin tu Megbebayaꞌ. Kaas puun tu pegbayaꞌ nug Balakaten, iini ingelanan ta dun su Megbebayaꞌ, laung ta “Uu Amaꞌ, Gamaꞌ nami.” 16Kig Balakaten kia, suminalabuuk di ginaa ta mukaꞌ miglegintuud dun dadema di ginaa ta puꞌ bataꞌ ita nu Megbebayaꞌ. 17Kagina bataꞌ ita niin, mpeduunan ita kepianan tinaguꞌen begay tu nga piglegetawanen ditug binayaꞌ gebii buꞌ gendaw. Mukaꞌ mpeduma daita dema dini Kristu saꞌ malapen su tinaguꞌ nu Megbebayaꞌ begay pa diniin. Puꞌ saꞌ mpeduma ita di kelegenay ni Kristu, mpeduma daita dema di kegdedengegen. 18Naa, ki nga kelegenay mbianan ta dini nemun, pimilangu kanaꞌ mbantang peguntay tu kepianan buasan dinita ditug binayaꞌ gebii buꞌ gendaw, puꞌ mpeduma ita nu Megbebayaꞌ tu kegdedengegen. 19Bisan sug launan biwat nu Megbebayaꞌ, pegelatan pa nilan gusay su pedetengen nilan puꞌ paitaꞌ nu Megbebayaꞌ su ngag bataꞌen mektetubuꞌ di ndaꞌi tamanen. 20Puꞌ binukaꞌ nu Megbebayaꞌ su ngag biwaten, ndaꞌ nai gatagen. Laak kanaꞌ danilan delendeman, puꞌ miuyaꞌan da nu migbukaꞌ dun, 21puꞌ pedetengeneni gendaw lekatenen su kelaun biwaten tu gasal nilan mpapas da. Mukaꞌ pedumanen dailan dema di ngag bataꞌen, su ngag pebeluyen, sampay mbianan nilan su melengas kebeluy dun di tibaꞌan megbalud dinilan. 22Puꞌ misuunan ta milegenan gupia sug launan biwat nu Megbebayaꞌ sampay nandaw, sinegay pegelatan pa nilan su gendaw kia. 23Kanaꞌ laak ilani milegenan. Ita padun nu nga bigayan Balakaten, sug inunaanen begay dinita, milegenan daita dema, sinegay pedetengen ta su gendaw metubus nu Megbebayaꞌ su kebaalen dinita ngag bataꞌen, mukaꞌ ki keglekaten dig lawas ta. 24Maꞌantu, migawen naita di ginukuman dinita, laak pedetengen ta pa puꞌ megelaꞌ menuud, sampay kegawen nug lawas ta. Naa, saꞌ upama maitaꞌ ta na su pedetengen ta, kanaꞌ paingalan dun pedetengen, puꞌ maitaꞌ ma. Ndaꞌi getaw mekpelab tu minitaꞌen na. 25Saꞌ ndiꞌ ta maitaꞌ su pedetengen ta, laak saꞌ pekpelaban ta gusay, mektigel daita dema di kegelat ta dun. 26Maꞌnia dadema kig Balakat nu Megbebayaꞌ, lumusad dini adun ebangan ita niin saꞌ kulangi kesalig ta. Saꞌ pinenggiꞌ, ndiꞌ ita gupia metau menenabi tu Megbebayaꞌ, iini mekpedialem mengamuyuꞌ dun dinita tu Megbebayaꞌ, di taluꞌ ndaꞌ dinita. 27Laak misuunan gupia nu Megbebayaꞌ su ginaa getaw, kaas mesabuten sug delendeman nug Balakaten mekatag dinita, puꞌ su kengamuꞌen di nga piglegetawanen, megdunut gupia tu mauyaꞌan nu Megbebayaꞌ. 28Misuunan ta puꞌ sug launan getaw mekpetail diniin, pegebangan nu Megbebayaꞌ, adun mpianan ilan di kelaun mbianan nilan. Iini inggaten dun su mekpetail diniin, puꞌ daansamaꞌ pigdelendemen. 29Su nga ginggaten, daansamaꞌ tinduꞌen pesamanen ilan dig Bataꞌen, adun iin dayuni mbaal gulangbataꞌ nu melaun mekpated. 30Kaas su nga tinduꞌen, inggaten ilan sumakup diniin, pimilangen ilan mekesuun, mukaꞌ pidumanen ilan di kekpededengeg diniin nu ngag launan. 31Saꞌ maꞌantu, taꞌ alandun dayuni gempia ta teluꞌen? Kagina megabang dinita su Megbebayaꞌ, taꞌ mai mekakuꞌ mengatu dinita? 32Puꞌ pia sug Bataꞌen, ndaꞌen belibad gumantiꞌ di kepatay ta. Kaas misuunan ta begayan ita niin launan kepianan, di ndaꞌi sugda ta dun. 33Naa, taꞌ mai mekakuꞌ dumangat dinita tu Megbebayaꞌ, ita nga tinduꞌen sakupen, asa ndaꞌi ginukuman dun nu Megbebayaꞌ? 34Kaas duun bai mekaukum dinita lagaꞌ na ginaa ta? Si Kristu Isus, mukum ma dinita? Ndiꞌ lai mesuꞌat, puꞌ iini minatay dayun pitubuꞌ puliꞌ, bitang na tu gupid nu Megbebayaꞌ, tandaꞌ pekpenenebian ita niin gebii gendaw. 35Duun ma dayuni mekebelabag dig lelaat ni Kristu dinita? Mekebelabag dun ba saꞌ melegenan ita, saꞌ peglegetan ita? Saꞌ mbianan tai gembagel gutem ba, saꞌ gempubri baita gupia, saꞌ mbianan tai mekekaꞌid ba, saꞌ pegbunuꞌ? 36Ndaꞌ ba mesulat kanugdiin, “Sabaꞌ diniꞌa, lilebungan ami mekaꞌiday gendawgendaw. Maꞌniin ami karniru, sungu titiꞌay.” 37Laak ndiꞌ mesuꞌat. Pia taꞌ alanduni mbianan ta, mekegdaag ita dun tuꞌu, puꞌ iini mekpedaag dun dinita, su Megbebayaꞌ su melelaat dinita. 38Mituudanu dun ndaꞌiduni mekegbelabag dig lelaaten dinita, pia matay ita, saꞌ pektetubuꞌ paita, pia pengetuan ita nu nga sesuguꞌen nu Megbebayaꞌ, saꞌ pengetuan ita nu nga megbayaꞌ mukaꞌ meglekaunutan di kediwetaan. Ndaꞌiduni mekegbelabag dig lelaaten dinita pia taꞌ alanduni mpenggulaula dinita nandaw, saꞌ ditug binayaꞌ gebii buꞌ gendaw, 39pia pengetuan ita nu nga ndiꞌ maitaꞌ dia gawanawan, saꞌ dig dialem benwa ta. Saꞌitada, ndaꞌidunig binaal di gekleb langit buꞌ lupaꞌ mekegbelabag dig lelaat nu Megbebayaꞌ dinita pibian di Kaunutan ta si Kristu Isus.

Roma 9

1Naa, ki pekteluꞌen ku kini, kagina sakupu ni Kristu, peglegintuuden ku, ndiꞌu megbalus. Dig dialem delendeman ku kanaꞌ balus, puꞌ iini megbayaꞌ dun sug Balakat nu Megbebayaꞌ. 2Miubaꞌu gupia, maꞌniin ndaꞌi taman nu kelegenayu, sabaꞌ nug lelaatu tu nga samau getaw Judea. 3Puꞌ saꞌ sia mesuꞌat, mauyaꞌan ku naan siai ukuman nu Megbebayaꞌ, mukaꞌ pesuayu niin sia dini Kristu, sabayaꞌ dinilan nga getaw Israel. 4Ki nga getaw Israel kini, ilan su pimiliꞌ nu Megbebayaꞌ piglegetawanen. Kanugdiin binataꞌen ilan, mukaꞌ pinitaꞌen dinilan su kelengas nu pegbayaꞌen maitaꞌ di tiagen. Pisadan nu Megbebayaꞌ su nga ginepuꞌay nilan, mukaꞌ pinalintaanen ilan. Danilani tantu kektamuy, mukaꞌ melauni pinasad nu Megbebayaꞌ dinilan. 5Megdedengegi nga ginepuꞌay nilan, si nga Abraham. Samabansa dailan dema ni Kristu su meguit dig launanen, su Megbebayaꞌ gempia pegdedengegen di ndaꞌi gikteben. Amen. 6Naa, ndiꞌu metaluꞌ puꞌ mibulugan su pinasad nu Megbebayaꞌ di nga getaw Israel kanugdiin. Iini teluꞌen ku, kanaꞌ nug launan getaw Israeli mpemiliꞌ nu Megbebayaꞌ. Duuni mpemiliꞌ, duuni ndaꞌ. 7Mukaꞌ dadema, kanaꞌ bataꞌ nu Megbebayaꞌ sug launan nu sapuꞌ ni Abraham, puꞌ miktaluꞌ su Megbebayaꞌ dini Abraham kanugdiin, “Su sapuꞌ nug bataꞌ mu si Isaac, iin laaki pemilangen sapuꞌ mu.” 8Saꞌitada, kanaꞌ nu nga migigetaw di gasal getawig bataꞌ nu Megbebayaꞌ. Iini pemilangen tantu bataꞌ nu Megbebayaꞌ, su migigetaw puun tu pinasad nu Megbebayaꞌ dini Abraham. 9Puꞌ su kepasaden, miktaluꞌ su Megbebayaꞌ dini Abraham kanugdiin, “Saꞌ mateng nai gendaw, mpuliꞌ dau dini. Megbataꞌ dayun su sawa mu si Sara, bataꞌlaki.” 10Naa, sinangkaliꞌ pa tanan, su sawa ni Isaac kiin, si Rebecca, migbedes gapid, bataꞌ ni Isaac, ginepuꞌay nami. 11-12Saꞌ sungu megbataꞌ si Rebecca, miktaluꞌ su Megbebayaꞌ diniin, “Su gulangbataꞌi mbaal sesuguꞌen nu ngudanen.” Iini tinaluꞌen dun, puꞌ adun mbaluy su pigdelendemen mpinig su nga pimiliꞌen. Su ketaluꞌen dun, ndaꞌ pailan pegigetaw, ndaꞌ pai gulaula nilan melaat saꞌ gempia, kaas misuunan ta kanaꞌ puun tu gulaula nilan su kepemiliꞌ dinilan duaꞌ, segaga puun da tu ketenduꞌ nu Megbebayaꞌ. 13Ndaꞌ ba mesulat kanugdiin di Misulat Taluꞌ nu Megbebayaꞌ, “Pitailu si Jacob, laak misengayu si Esau.” 14Taꞌ alandun dayuni gempia ta teluꞌen? Duun baig limbung nu Megbebayaꞌ? Ndaꞌidun lai! 15Puꞌ miktaluꞌ su Megbebayaꞌ dini Moises, “Lelaatan ku su mauyaꞌan ku lelaatay, mukaꞌ petailen ku su mauyaꞌan ku petailen.” 16Kaas misuunan ta puꞌ su kepemiliꞌ nu Megbebayaꞌ, iin dai metau dun, kanaꞌ nu mauyaꞌan nu getaw, kanaꞌ dadema nu tegelen, puꞌ danug lelaat nu Megbebayaꞌ. 17Ndaꞌ ba mesulat kanugdiin puꞌ miktaluꞌ su Megbebayaꞌ ditu gadiꞌ nu getaw Ehipto, “Iini pipeglegadiꞌu yaꞌa dun, adun paitaꞌu su pegbayaꞌu mukaꞌ su ginuungu, puꞌ dinaagu yaꞌa. Keduaꞌen, pipeglegadiꞌu yaꞌa puꞌ adun megdedengegu di tibuukan lumbang, puun diniꞌa.” 18Kaas gempantek, lelaatan nu Megbebayaꞌ su nga mauyaꞌanen lelaatay, mukaꞌ pebuklusenen dadema su nga mauyaꞌanen pebuklusay. 19Naa, pinenggiꞌ duun diniui sumaak dinaan, “Saꞌ maꞌantu, mauma dema besulen nu Megbebayaꞌ di getaw sug dupanganen? Duun bai mekeguut tu mauyaꞌan nu Megbebayaꞌ?” 20Sembagen ku dayun, “Naa su Megbebayaꞌ, mpegbeluꞌan mu bain, asal kilawan ka da? Mesuꞌat ba sumaakig binaal ditu migbaal dun, ‘Mauma dema binaal mau maꞌnini kini?’” 21Pesemaan ku di getaw megdiun. Iin dai metau dun saꞌ megbaal betangan melengas, saꞌ betangan melemuꞌ, sebugel daig lupaꞌ. 22Maꞌantu dademai pinggulaula nu Megbebayaꞌ. Pia mauyaꞌanen pesuunen di nga getaw sug lengeten mukaꞌ paitaꞌen dinilan su ginuungen, mektigel gupia tu nga getaw piglengetanen, su ngag bantang pelebuꞌan ginukumanen. 23Mauyaꞌanen dadema mpaitaꞌ su kelengas nu pegbayaꞌen. Puꞌ su kelengas nu pegbayaꞌen, bigay na gupia dinita, ita ngag bantang lelaatanen, ki ngag daansamaꞌ pingandamen mekedawat tu kelengasen. 24Puꞌ itai nga ginggaten sumakup diniin, ita nga getaw Judea mukaꞌ nga kanaꞌ getaw Judea dadema. 25Ndaꞌ ba mesulat kanugdiin nu pimuunanen si Oseas, “Su nga getaw kanaꞌu pailan piglegetawan, paingalan ku dun ‘piglegetawan ku nailan’. Sug bansa kanaꞌu pa mauyaꞌan, paingalan ku dun, mauyaꞌan ku na.” 26Duun pa pagidi sinulat ni Oseas, laungen, “Diag benwa tandaꞌ tiluꞌan nu Megbebayaꞌ su nga getaw, ‘Ndaꞌig labetu diniu,’ dia pa pagid paingalanen dinilan, ‘ngag bataꞌ nu tantu Megbebayaꞌ’.” 27Si Isaias pa pagid, ndaꞌen ba pelaktag kanugdiin, laungen, “Pia melaun gupiai sapuꞌ ni Israel, maaꞌ na kelaun nug lubek tu geksid dagat, mbilang dai megawen.” 28Puꞌ ndaꞌ peglugbad su ginukuman nu Megbebayaꞌ di tibaꞌan getaw, puꞌ penggulaulaanen dedaliꞌ. 29Kaas maꞌniaig duma misulat tu pimuun nu Megbebayaꞌ pedaan dini Isaias, laungen, “Saꞌ kanaꞌ nug lelaat nu Megbebayaꞌ, su megbayaꞌ Kaunutan, migelaꞌ sia petayay kig launan ta getaw Israel, maaꞌ na nu getaw tug lunsud Sodoma mukaꞌ ditu Gomora, laak duuni sinawaden bataꞌ ta.” 30Taꞌ alandun dayuni gempia ta teluꞌen? Ki nga kanaꞌ getaw Judea, duun dinilani pimilang nu Megbebayaꞌ mekesuun sabaꞌ nu kesalig nilan diniin, bisan ndaꞌ ilan penamal meksikesuun. 31Laak dagid su nga sapuꞌ ni Israel, pia pinemalan nilan dunutay su Palinta nu Megbebayaꞌ, ndaꞌ ilan mpemilang mekesuun, 32puꞌ su kegdunut nilan tu Palinta, ndaꞌ nilan sekatay tu kesalig dini Kristu, puꞌ sikat nilan tu tegel nilan. Saꞌitada, maꞌniin ilan midapal tug batu melemu meseknun. 33Puꞌ ndaꞌ ba mesulat kanugdiin di Misulat Taluꞌ nu Megbebayaꞌ, “Pektalentenay niu ini, betangen kuig batu meseknun ditug benwa Sion. Mekesulaub tu getaw kig batu kini. Laak adin su sumalig diniin, ndiꞌ mekpelilu.”

Roma 10

1Naa, uu Mingumpated, ki nga samatawu su nga sapuꞌ ni Israel, mauyaꞌan ku gupia di ndiꞌ megduaꞌduaꞌig delendeman ku, megawen ilan. Penenebian ku ilan gusay ditu Megbebayaꞌ. 2Misuunan ku gupia, mukaꞌ peglegintuuden ku diniu, puꞌ menamal ilan sia mektamuy tu Megbebayaꞌ, laak su kektamuy nilan, kanaꞌ mekpuun tu metuud sinuunan. 3Puꞌ ndaꞌ nilan mesuunayi gempia nilan penggulaulaan adun mpemilang ilan mekesuun. Laung nilan dun, subay penemalan nilan dunutay su nga pinalintanen, kaas ndaꞌ ilan metuuday dun sug betad nu Megbebayaꞌ pemilangeneni nga getaw mekesuun. 4Puꞌ tinubus ni Kristu su pegbayaꞌ nu Palinta nu Megbebayaꞌ, kaas nandaw, adini getaw mekpetuud diniin, pemilangen nu Megbebayaꞌ mekesuun. 5Naa, saꞌ su getaw dunutanen sug betad nu Palinta nu Megbebayaꞌ adun pemilangen sia nu Megbebayaꞌ mekesuun, duuni sinulat ni Moises mekatag diniin. Ndaꞌ ba mesulat, laungen, “Adini getaw dumunut tu nga pinalinta nu Megbebayaꞌ, malapeni ketubuꞌ mekpuun ditu.” 6Laak saꞌ su getaw sumalig ditu Megbebayaꞌ adun mpemilang mekesuun, duun dademai misulat mekatag diniin. Ndaꞌ ba mesulat, “Ndiꞌ mu betangay di ginaa mu puꞌ subay duuni luntu ditug langit” (saꞌitada, adun pelusadenen dinig lumbang si Kristu). 7“Mukaꞌ ndiꞌ mu na kambat betangay di ginaa mu puꞌ subay duuni lumusad ditu guliꞌan nu minatay” (saꞌitada, adun uitenen dinig dibabaw si Kristu genat tu kepatayen). 8Iin pai misulat kanugdiin, laungen, “Su pimuun nu Megbebayaꞌ, mesempel na diniꞌa. Diin da ginaa mu, mukaꞌ diin da babaꞌ mu.” Kia su Gempia Petenday pegukit nami diniu mekatag di kesalig niu dini Kristu. 9Puꞌ saꞌ meglegintuuda di ngag duma mu puꞌ si Isusi Kaunutan ta, mukaꞌ saꞌ metuudan ka dun puꞌ pitubuꞌ puliꞌ nu Megbebayaꞌ, guunen ka niin di ginukuman dinita nu Megbebayaꞌ. 10Puꞌ saꞌ sumaligi getaw dini Kristu, pemilangen nu Megbebayaꞌ mekesuun, mukaꞌ saꞌ ukitenen su kesaligen tu ngag dumanen, megawen. 11Maꞌantui misulat pa pagid kanugdiin, laungen, “Adin su sumalig diniin, ndiꞌ mekpelilu.” 12Kig launan getaw, duunig labeten dun, ndaꞌi pigisu dun su getaw Judea mukaꞌ su kanaꞌ getaw Judea, puꞌ salabuuk dai tantu Kaunutan di tibaꞌan getaw, mukaꞌ ndaꞌi gikteb nu kepianen dig launan mekpaingabang diniin. 13Maꞌniai misulat kanugdiin, laungen, “Adin su getaw mekpaingabang tu Kaunutan, iini guunenen.” 14Laak, ndiꞌ mesuꞌat mekpaingabangi nga getaw dini Kristu, saꞌ ndaꞌ ilan metuuday dun. Ndiꞌ mesuꞌat mekpetuudi nga getaw diniin, saꞌ ndaꞌi midengeg nilan mekatag diniin. Ndiꞌ mesuꞌat medengeg nu nga getaw mekatag diniin, saꞌ ndaꞌi megukit dun dinilan. 15Mukaꞌ ndiꞌ pa pagid mesuꞌat megukit, saꞌ ndaꞌ suguꞌay. Laak, duuni sinuguꞌ, puꞌ ndaꞌ ba mesulat kanugdiin, “Melengas lai gupiai pegdateng nu nga megukit Gempia Petenday mekatag di keseksud nu getaw tu Megbebayaꞌ.” 16Laak dagid, pia maꞌantu, ndaꞌ megelaꞌ metuuday dun su nga mikedengeg tu Gempia Petenday, puꞌ sinulat ni Isaias kanugdiin, laungen, “Uu Kaunutan, taꞌ taway duni mituudan dun su ginukit nami? Ndaꞌidun.” 17Mendadi, iini puun tu kesalig nu getaw, su kedengegen di Gempia Petenday. Mukaꞌ iini puun tu kedengegen dun, su kegukit tu Gempia Petenday mekatag dini Kristu. 18Naa, saaken ku saꞌ ndiꞌ ba metuud puꞌ su nga getaw Judea, midengeg nilan su ginukit kiin? Midengeg na nilan tantu, puꞌ ndaꞌ ba mesulat di Misulat Taluꞌ nu Megbebayaꞌ, “Su tinaluꞌ nilan, mileep na di tibuukan lumbang. Su ginukit nilan, midepet na ditu pingikteban nug lupaꞌ.” 19Saaken ku pelum, saꞌ ndiꞌ ba metuud puꞌ misabut nu nga sapuꞌ ni Israel su ginukit? Mialapu bekna sembagu di tinaluꞌ nu Megbebayaꞌ sinulat ni Moises kanugdiin, laungen, “Yamu nga piglegetawan ku, pepengimbeguun ku amu di nga kanaꞌ getaw Judea. Su nga getaw benguꞌbenguꞌen, pepangitu amu dinilan.” 20Keduaꞌen, labi pa gembeluꞌ si Isaias, kaliꞌ pektaluꞌ, “Mibaanganu nu nga getaw ndaꞌu nilan penengaway. Mikpaitaꞌu tu nga getaw ndaꞌu nilan laaway.” 21Laak duun pai sinulat ni Isaias mekatag di nga sapuꞌ ni Israel, laungen, “Lilabungu sabaꞌu menembaꞌ dinilan, su nga getaw mibuklusi kemilasen dinaan.”

Roma 11

1Naa kagina maꞌantu, saaken ku dayun, ki nga sapuꞌ ni Israel, su nga piglegetawan nu Megbebayaꞌ, tiliudan bailan nu Megbebayaꞌ? Ndiꞌ lai mesuꞌat! Puꞌ pia naan, getaw Israel dau dema maaꞌ da dinilan. Sapuꞌu ni Abraham mukaꞌ kausebaanu ni Benjamin. 2Su nga getaw tinduꞌen sumakup diniin su ndaꞌ pa mbaali gekleb langit buꞌ lupaꞌ, ndiꞌ meteliudan nu Megbebayaꞌ. Ndaꞌ ba niu mesuunay su tinaluꞌ ni Elias, saꞌ dengatenen su nga sapuꞌ ni Israel ditu Megbebayaꞌ, kaliꞌ pektaluꞌ, 3“Uu Megbebayaꞌ, pimatay nilan su nga pimuunan mu sinuguꞌ mu megwali dinilan. Gibaꞌ nilan su nga gentudan gilak diniꞌa. Naan laaki mibilin mektamuy diniꞌa, mukaꞌ mauyaꞌan nilan petain dau dema sia.” 4Laak kaliꞌ sembag su Megbebayaꞌ, “Duun pai pinaasu pitu ngibu tawan getaw, ndaꞌu ilan mainsan pepengedapay tu sagya diwata, si Baꞌal.” 5Maꞌantu dadema nandaw, su nga getaw Israel, ndaꞌ dailan gelaꞌ pemilas tu Megbebayaꞌ. Puꞌ sabaꞌ nu tulungen, duuni tinduꞌen sumakup diniin, laak metuud, miniwatak dailan. 6Naa, kagina mitenduꞌen ilan puun dig lelaaten, kanaꞌ sekat tu gulaula nilan. Puꞌ saꞌ sekat tu gulaula nu getawi tulung nu Megbebayaꞌ, kanaꞌ na sia tantu tulung. 7Mendadi, maꞌniniꞌ. Su nga sapuꞌ ni Israel, ndaꞌ ilan gelaꞌ mekebian tu kegawen dinilan nu Megbebayaꞌ, bisan mauyaꞌan nilan sia gupia. Iin laaki mikebian dun, su mitenduꞌ nu Megbebayaꞌ. Meliang dailan. Su ngag duma, ndaꞌ penembaꞌ tu keꞌenggat dinilan nu Megbebayaꞌ. 8Ndaꞌ ba mesulat kanugdiin, “Pitegas nu Megbebayaꞌ su gulu nilan. Sampay nandaw, ndiꞌ ilan mekengitaꞌ mukaꞌ ndiꞌ ilan mekedengeg.” 9Si David, ndaꞌ ba pektaluꞌ kanugdiin, “Kagina pipeglekebibu ilan gupia nu Megbebayaꞌ, laung nilan dun, ndaꞌen pengebetay ki ngag limbung nilan. Su keglekebibu nilan, mekegdaang pa dinilan, iin dayuni mbaal pelabuꞌ dinilan. 10Subay mbuta ilan adun ndiꞌ ilan mekengitaꞌ, mukaꞌ subay mbektut ilan sabaꞌ nu gembagel kelegenay peguiten nilan.” 11Saaken ku pa pagid, kagina maꞌantu, ndaꞌ metuuk di telinga nu nga getaw Judea su metuud mekatag dini Kristu, mbeleng bailan? Ndiꞌ dadema lai mesuꞌat! Kagina memilas su nga getaw Judea, naa su nga kanaꞌ getaw Judea, mbianan na nilan su keglegawen dinilan nu Megbebayaꞌ. Iini mipenggulaula dun, puꞌ adun mengimbegu su nga getaw Judea tu kegawen nu nga kanaꞌ getaw Judea. 12Naa, gembageli kepianan dig launan getaw mikpuun di kemilas nu nga getaw Judea. Pipianan gupia nu Megebayaꞌ su nga kanaꞌ getaw Judea puꞌ ndaꞌ medawat nu nga getaw Judea su kepepianen sia dig delendeman nilan. Labi pa pepianayen sug launan getaw, saꞌ metektub nai kelaun nu nga getaw Judea sumakup dini Kristu ditug binayaꞌ gebii buꞌ gendaw. 13Yamu nga kanaꞌ getaw Judea, taman taluꞌu diniu, kagina mitenduꞌu nu Megbebayaꞌ peneliganu niin, adun ukitan ku amu mekatag dini Kristu, liliagu gupia tu sinuguꞌan dinaan nu Megbebayaꞌ. Menamalu dumunut dun, 14puꞌ adun saꞌ mesuꞌat, pepengimbeguun ku su samau getaw Judea, adun duun dinilani megawen. 15Puꞌ saꞌ tiliudan nu Megbebayaꞌ su nga getaw Judea, miseksud diniin su ngag lain bansa dinig lumbang. Saꞌ mpeduma puliꞌi nga getaw Judea, maꞌniin na metubuꞌ puliꞌ su nga minatay. 16Mendadi ki nga getaw Judea, kagina sakup nu Megbebayaꞌ su nga ginepuꞌay nilan, si nga Abraham, sakupen dadema su nga sapuꞌ nilan. Pesemaan ku ilan di pan pengilak tu Megbebayaꞌ. Saꞌ begay nu getaw tu Megbebayaꞌi sailasan di pan, daniin su tibuuk pan. Mukaꞌ maꞌnia dademai gayu. Saꞌ begay nu getaw tu Megbebayaꞌi gangeten, daniin dadema su nga panganen. 17Naa, ki nga getaw Judea, pesemaan ku ilan pa pagid tu panga nu gayu olibo. Duuni panganen pinutuk na, adun sumpat duni panga nu guliꞌ olibo. Yamu nga kanaꞌ getaw Judeai panga nu guliꞌ, puꞌ piduma namu nu Megbebayaꞌ tu melembuꞌ ketubuꞌ nu gayu pimula, saꞌitada su kepepia nu Megbebayaꞌ tu nga getaw Judea. 18Laak dagid, subay ndiꞌ amu mekpelabawlabaw di ngag daan panga nu gayu olibo. Ndiꞌ amu mangyaꞌ dun, puꞌ panga laak amu. Kanaꞌ amui mekepepagen tu gangeten, su gangeteni mekepepagen diniu. 19Naa, pinenggiꞌ duuni mektaluꞌ dayun dinaan, “Metuud, laak iini pinutuk dun su ngag daan panga kia, puꞌ adun sumpatan nami.” 20Sembagen ku, metuud daan, yamui suminukli di nga getaw Judea. Laak dagid iini teliudan ilan dun nu Megbebayaꞌ, puꞌ ndaꞌ ilan pekpetuud dini Kristu. Yamu pasiꞌ, iini ndaꞌ amu teliuday dun, puꞌ suminalig amu diniin. Pia maꞌantu, ndiꞌ niu pengangyaꞌ, subay mendek amu. 21Puꞌ saꞌ pinutuk nu Megbebayaꞌ su tantu panga, saꞌitada su nga getaw Judea, batik niu dun ba, saꞌ metalin amu, saꞌ ndiꞌ amu menamal sumalig diniin, ndiꞌ amu dadema mputuk? 22Subay pektalentenan niu ini, sug betad nu Megbebayaꞌ, ndaꞌi gikteb nug lelaaten tu nga getaw lilaatanen, mukaꞌ ndaꞌi tamanen su kekpetugaꞌen tu getaw pitugaꞌen. Petugaꞌenen gupia su nga mimilas kia getaw Judea. Laak yamu, penemalan amu niin lelaatay, saꞌ menamal amu sumalig tug lelaaten. Dagid, saꞌ ndiꞌ amu menamal sumalig diniin, mesuꞌat putuken amu niin, saꞌitada teliudan amu niin. 23Saꞌ metuudan dun dadema su nga getaw Judea, sumpat ilan puliꞌ nu Megbebayaꞌ tu pinutukanen dun. Puꞌ ndaꞌi ndiꞌ megaga nu Megbebayaꞌ uliꞌay. 24Yamu nga kanaꞌ getaw Judea, pisamau amu di panga pinutuk di guliꞌ olibo. Sinumpat namu tu puun nu tantu pimula, pia kanaꞌ mbantang sumpaten. Ki nga getaw Judea, melemu pailan sumpaten puliꞌ nu Megbebayaꞌ tu puunen, puꞌ ilani maaꞌ nu tantu panga nu pimula. 25Naa, Mingumpated, kig delendeman nu Megbebayaꞌ daansamaꞌ pigbuninen, buasan ku na diniu, adun ndiꞌ niu delendemen puꞌ metaas pai sinuunan niu. Iinig delendeman nu Megbebayaꞌ, puꞌ pia duuni nga getaw Israel mimilas diniin, ndiꞌ maulayuni kemilas nilan, puꞌ memilas ilan sampay laak megelaꞌ sumakupi nga kanaꞌ getaw Judea tinduꞌ nu Megbebayaꞌ sumakup diniin. 26Megelaꞌ dayun megawen su tibaꞌan sapuꞌ ni Israel. Ndaꞌ ba mesulat kanugdiin, “Ki Meglegawen, genat tu Sion, sug benwa nu nga getaw Judea. Belengenen dayun sug launan melaat gulaula nu nga sapuꞌ ni Israel, puun tu kemilas nilan tu Megbebayaꞌ. 27Tinaluꞌen puꞌ menuud su pinasaden dinilan puꞌ tubusenen su nga salaꞌ nilan.” 28Kagina pimilas nu nga getaw Judea su Gempia Petenday mekatag dini Kristu, kuminuntra ilan tu Megbebayaꞌ, kaas megawen amu nga kanaꞌ getaw Judea. Laak kagina tinduꞌ ilan nu Megbebayaꞌ bansanen, pitailen ilan, adun menuud su pinasaden tu nga ginepuꞌay nilan. 29Puꞌ ndiꞌ mpalin sug delendeman nu Megbebayaꞌ. Su nga getaw pimiliꞌen, tenduꞌenen tuꞌu. Su nga getaw ginggaten pepiananen, pepiananen tuꞌu. 30Sug daan pigbetad niu, pimilas niu gupia su Megbebayaꞌ. Nandaw pasiꞌ, mibianan na niu sug lelaaten puun tu kemilas nu nga getaw Judea. 31Maꞌnia dademai mbianan nilan. Nandaw mimilas ilan, kaas mbianan niu sug lelaat nu Megbebayaꞌ. Lemaꞌ denlag mbianan pa nilan sug lelaaten ki mibianan na niu. 32Puꞌ bigay na nu Megbebayaꞌ su tibaꞌan getaw mbalud tu kemilas nilan, adun mbulus sug lelaaten dig launan nilan. 33Ki Megbebayaꞌ, gembagel gupiai tulungen di nga getaw! Su kekesuunen, ndaꞌi gikteben. Medalem dadema gupiai telisebutayen. Su pigdelendemen, ndaꞌ mesabut nu getaw, pia sala tawan. Ndaꞌiduni getaw mekesabut tug betaden! 34Ndaꞌ ba mesulat kanugdiin, “Su Kaunutan ta, taꞌ taway dun mai mikesuun tug delendemanen? Taꞌ taway dun mai mikektituluꞌ diniin? 35Ndaꞌi kulangen, pia maikaꞌ. Kaas, taꞌ taway dun mai mikegbegay diniin, adun sia mesuliꞌanen?” 36Puꞌ kanugdiin, ndaꞌiduni binaal, iini minaal dun. Nandaw, ndaꞌiduni mekuleg, iini megbayaꞌ dun. Mukaꞌ pa pagid, launan binaalen, iini binaalen dun, penemalan gusay pegbesaay su Megbebayaꞌ. Kaas, enalen tain mukaꞌ pegbesaan ta di ndaꞌi gikteben. Amen.

Roma 12

1Kaas yamu nga Mingumpated, duuni penengiin ku diniu. Pegwakil niuig lawas niu tu Megbebayaꞌ maaꞌ nu guliden pektetubuꞌ pa, gilak tu Megbebayaꞌ mukaꞌ leliagen dun iin, puꞌ melelaat gupia su Megbebayaꞌ dinita. Kiai tantu kektamuy tu Megbebayaꞌ. 2Ndiꞌ niu dunutay sug betad nu kinilawan dig lumbang kini. Tumuꞌ pepelinen niuig delendeman niu tu Megbebayaꞌ, adun pebegunenig betad dig delendeman niu. Mesuunan niu dayun su mauyaꞌan nu Megbebayaꞌ, su melengas, sug leliagen dun iin mukaꞌ su tampusan kepianan. 3Naa, kagina tinulungu nu Megbebayaꞌ puꞌ bigayanu niin gelalu, iini pelaktagu diniu, saladuaꞌ, ndiꞌ niu pemilangayig lawas niu metaas pa di mbantang delendemen niu. Laak betang niu di ginaa niu ki sinukalay. Pebantang niui ketaas nug lawas niu tu tinawan bigay diniu nu Megbebayaꞌ mekpuun di kekpetuud niu. 4Puꞌ su ngag lawas ta, melauni sengkapanen, ndiꞌ ba? Mukaꞌ lainlaini kegamit ta dun su nga sengkapan. 5Maꞌnia daita dema, puꞌ bisan melaun ita sakup ni Kristu, maꞌniin salabuuk lawas ita suminalabuuk dini Kristu, mikpingkit ita, launan ta, adun bisan migininisan ita, mibaluy ita salabuuk lawas. 6Mendadi diadia dinita, lainlaini tinawanen bigay nu Megbebayaꞌ mekpuun di tulungen dinita. Su tinawan ta, subay peguaꞌen ta. Naa saꞌ upama iinig bigay diniꞌa, metawa megwali taluꞌ nu Megbebayaꞌ, subay megwalia lepeng tu kesalig mu. 7Saꞌ pasiꞌ metawa megabang, megabanga gusay. Su metau mekpetuꞌun, subay menamal mekpetuꞌun. 8Saꞌ su mbantang mengulikseg tug dumanen, subay penguliksegenen gupia. Su metau megbegay, subay megbegay di ndaꞌi geginugunen dun. Su meglekaunutan, subay ndiꞌ megliawliaw. Adin su melelaat tug dumanen, subay tembusanen sug lelaaten. 9Maꞌantu, subay ndaꞌi metaas mbabaꞌ di kekpetail niu di nga samataw niu. Teliuday niu su melaaten, mukaꞌ pektalentenay niu su melengas. 10Pekpinetailay amu lepeng tu petailan nu kepetedan sakup ni Kristu. Subay megbinesaay amu gupia. 11Subay ektak niui tegel niu mengimbaal, mukaꞌ gelaꞌ niui ginaa niu di kektamuy niu tu Kaunutan ta Megbebayaꞌ. 12Subay leliagen amu sabaꞌ nu pedetengen ta puꞌ pepianan ita gupia nu Megbebayaꞌ ditug binayaꞌ gebii buꞌ gendaw. Pektigel amu di kelegenay niu. Penamal amu menenabi. 13Su nga piglegetawan nu Megbebayaꞌ mekelelaatlelaati kebetangen, pemegayay niu, mukaꞌ su nga meguliug diniu, dedialay niu. 14Naa su mekpeleget diniu, penenebiay niu, adun pepianan ilan nu Megbebayaꞌ. Pepianay niu ilan, ndiꞌ niu ilan tuyuday. 15Saꞌ duuni liliag gupia, salabuuk amu tug leliagen. Saꞌ duuni mengelaw, salabuuk damu dema tu gelawen. 16Subay peksama niui kektagikul niu tu ngag duma niu. Ndiꞌ amu mekpelabawlabaw. Su mekpebabaꞌ dig lawasen, telimaꞌ niu. Ndiꞌ niu delendemay puꞌ metaas pai sinuunan niu. 17Saꞌ duuni mekpelaat diniu, ndiꞌ niu iin suliꞌay melaat. Iini penggulaulaan niu, sug delendeman nug launan getaw melengas. 18Peksalabuuk amu gikteb nu megaga niu. 19Uu Mingumpated, ndiꞌ amu suliꞌ, bisan taꞌ alanduni kelaatan niu. Pegwakil niu tu Megbebayaꞌ ki suliꞌ dun, puꞌ ndaꞌ ba mesulat di Misulat Taluꞌen, “Kaliꞌ pektaluꞌ su Kaunutan Megbebayaꞌ, ‘Naani metau sumuliꞌ tu nga getaw mekpelaat dig dumanen.’” 20Tumuꞌ maaꞌ danu sala misulat kanugdiin, laungen, “Saꞌ duuni kumuntra diniꞌa megutem, paan mu iin. Saꞌ kuaun, painum mu. Saꞌ maꞌniai penggulaulaan mu diniin, mpiid dayun gupia ditu pinggulaulanen diniꞌa.” 21Ndiꞌ amu mekpedaag di melaat. Pedaag niu su melengas tu melaaten.

Roma 13

1Naa, ki nga getaw pipegbayaꞌ nu gubirnu meglekaunutan di ngag duma, subay petuuden tailan, launan ta, saladuaꞌ, puꞌ ndaꞌiduni megbayaꞌ, su Megbebayaꞌi pigenatanen. Su nga meguit di nga getaw nandaw, pitindeg nu Megbebayaꞌ. 2Kaas adin su memilas dinilan, pemilasenen su tinindeg nu Megbebayaꞌ, mukaꞌ mpelebuꞌanenig lawasen. 3Puꞌ ndiꞌ mendek di nga peguit di getaw su nga menggulaula melengas. Mendek dun su nga melaati gulaulanen. Subay penggulaulaan niu su melengas, adun ndiꞌ namu mendek di meguit tu getaw. Enalen amu nilan dayun, 4puꞌ sesuguꞌen ilan nu Megbebayaꞌ, adun pepianan amu nilan. Saꞌ upama melaat sungkini gulaula niu, tumuꞌ mendek amu dun, puꞌ duun daani pegbayaꞌ nilan bigay nu Megbebayaꞌ silutan nilan su nga mikesalaꞌ. 5Kaas, iini dunutan niu dun su nga meguit tu getaw, adun ndaꞌi pegbiksuꞌan niu, keduaꞌen, sabaꞌ nu silut pigwakil nu Megbebayaꞌ dinilan. 6Iin dademai biadan niu dun su mendawat buis, puꞌ saꞌ metembusan nilan su ketenduꞌ dinilan, pegebangan nilan su Megbebayaꞌ. 7Mendadi, pemegay niu di nga meguit tu getaw su mbantang begay. Saꞌ su nga mendawat buis, subay megbuis amu dun. Saꞌ su mbantang pegbesaan, subay pegbesaan niu ilan gupia, launan nilan. 8Ndiꞌ amu peglibed di gutang niu. Daal da laaki mbayaꞌ utangen niu, ki keglinelaatay niu. Puꞌ adin su getaw melelaat tu samatawen, megelaꞌen dunutay su Palinta nu Megbebayaꞌ. 9Puꞌ duuni nga pinalinta maꞌniniꞌ, “Ndiꞌa pegdusa, ndiꞌa pekpatay, ndiꞌa pegdaaw, ndiꞌa mayak tug danug samataw mu,” mukaꞌ duun pa lain pinalinta. Lumbus mitingeb tu peneluꞌen, laungen, “Subay pekpetaila tu ngag duma mu maaꞌ nu petail mu dig lawas mu.” 10Saꞌ duuni getaw lelaatan niu, ndiꞌ niu dayun pelaatan, ndiꞌ ba? Saꞌ melelaat ita tug duma ta, megelaꞌ ta dunutay su tibuuk Palinta nu Megbebayaꞌ. 11Naa iin pa pagidi penggulaulaan niu dun, puꞌ misuunan niu sungu na matengi gendaw megawen ita, kaas gempia na niu pektenudan, saꞌitada belengen niu sug betad niu mekpetuyang di ginaa niu. Puꞌ su bekna kekpetuud ta dini Kristu, maiben pa matengi gendaw megawen ita. Nandaw, kanaꞌ na maiben. 12Iini kebetang ta dinig lumbang, maꞌniin ita medeleman maaꞌ mitulayuni gebii, laak sungu mpupusi gebii. Sungu megendaw, puꞌ kanaꞌ na maiben mateng puliꞌ su Kaunutan ta. Kaas sug betad ta mbantang di medeleman, belengen ta. Iini penggulaulaan ta, su gempia, maaꞌ nu sundalu misangkap na lumumpak saꞌ medelagan na. 13Subay pepian ta su gulaula ta, maaꞌ nu getaw midelagan nu gendaw. Ndiꞌ mpia menamal amu megbebulek mukaꞌ megimbeluꞌan, ndiꞌ damu dema mpia megdusa, ndiꞌ amu pa pagid mpia meksinualay mukaꞌ meksesigiay. 14Tumuꞌ pa penunggilingay niu sug betad nu Kaunutan ta si Isukristu. Ndiꞌ niu dunutay sug betad niu kinilawan, adun ndiꞌ niu malap su melaat gayak niu dun.

Roma 14

1Naa, su nga sakup ni Kristu ndaꞌ pa mpanteki kesaligen, melengas penembaꞌen niu. Laak ndiꞌ niu ilan sualay mekatag di gempia gulaula mukaꞌ di ndiꞌ mpia. 2Duuni getaw, mikpuun tu kesaligen, ndaꞌi piliꞌen. Su sala, kagina kulangi kesaligen, maꞌaanen laak lempaan mesedaꞌen di gaanen. 3Naa, su kanaꞌ mesumiliꞌ, ndiꞌen mpia peksudiꞌani gendiꞌen maꞌaani karni. Maꞌantu dadema su maan laak lempaan, subay ndiꞌen pegdenaꞌen su kanaꞌ mesumiliꞌ, puꞌ pinembaꞌ nu Megbebayaꞌ. 4Ndiꞌ niu mpia pegdenaꞌen su sesuguꞌen nug duma niu, puꞌ su gegaleneni metau dun saꞌ mitembusanen su pibaal diniin, saꞌ ndaꞌ. Maꞌniin dadema, ndiꞌ ta mpia pegdenaꞌen su samasakup ta, puꞌ iini megbayaꞌ dun su Megbebayaꞌ. Mukaꞌ su samasakup ta, metembusaneni kekpetuuden, puꞌ meꞌebangan nu Megbebayaꞌ mekpetindeg dun. 5Naa duuni getaw, delendemanen duuni gendaw pegbesaanen. Duun laungi gendaw gempia pegbesaan, duun dademai ndiꞌ. Duuni sala tawan, peksemaaneni nga gendaw. Saladuaꞌ, subay ndiꞌ megduaꞌduaꞌig delendemanen dun. 6Adin su getaw megbasa di gendaw, iini pegbesaanen dun, su kektamuyen tu Kaunutan ta. Adin su getaw kanaꞌ mesumiliꞌ di kaꞌaanen, mesuunan ta dayun puꞌ iin dademai aanenen dun, su kektamuyen tu Kaunutan ta, puꞌ mekpaladpalad dun tu Megbebayaꞌ. Maꞌantu dademai getaw duuni ndiꞌen maꞌaan. Mesuunan ta puꞌ iini ndiꞌen maꞌaan dun, su kektamuyen tu Kaunutan ta. Saꞌ maan, mekpaladpalad dun dadema tu Megbebayaꞌ. 7Saanan ta tetubuꞌ pa, kanaꞌ laak itai metau dun. Mukaꞌ saꞌ matay naita, kanaꞌ daita dema laaki metau dun. 8Puꞌ saꞌ pektetubuꞌ paita, mektamuy ita tu Kaunutan ta. Saꞌ matay naita, megangag daita dema diniin. Kaas matay saꞌ metubuꞌ, danu Kaunutan ita. 9Iini minatay mukaꞌ mitubuꞌ puliꞌ dun si Kristu, puꞌ adun meglekaunutan di nga sakupen, su nga tetubuꞌ mukaꞌ su nga minatay na. 10Mendadi, yamu nu nga maan laak lempaan, mauma dema pegdenaꞌen niui samasakup niu? Yamu dema nga ndaꞌi pemiliꞌen, mauma dema peksudiꞌan niui samasakup niu? Ditug binayaꞌ gebii buꞌ gendaw mengadap ita tu Megbebayaꞌ, launan ta, puꞌ iin dai mukum dinita. 11Ndaꞌ ba mesulat, “Kaliꞌ pektaluꞌ su Kaunutan, ‘Metuud ini, naani tantu Megbebayaꞌ. Maꞌantu dadema ini, mektamuy dinaan su tibaꞌan getaw. Mukaꞌ peglegintuuden nug launan getaw puꞌ naani Megbebayaꞌ.’” 12Kagina maꞌantu, misuunan ta puꞌ saladuaꞌ, subay sumbag ita tu Megbebayaꞌ mekatag di gulaulanen. 13Kaas, subay mesikpaꞌ ita megigukumay. Tumuꞌ pegdelendemen ta pa pagid ndiꞌ ta penggulaulaan su mekegdaang tu samasakup ta. 14Kagina suminakupu tu Kaunutan ta si Isus, mituudanu dun gupia puꞌ ndaꞌiduni gaan ndiꞌ maꞌaan. Laak dagid, saꞌ duuni getaw batiken dun duuni ndiꞌ maꞌaan, naa ndiꞌ mpia saꞌ aanenen. 15Saꞌ melibuleng su samasakup niu sabaꞌ nu kaꞌaan niu, ndaꞌ na niu pematut sug lelaat niu diniin. Mendadi saꞌ meglaat su kesalig nu getaw megentiꞌan nu kepatay ni Kristu sabaꞌ nu kaꞌaan niu, subay ndiꞌ niu aanen. 16Adin su mipemilang niu melengas, saꞌ teluꞌen nug duma niu melaaten, ndiꞌ niu penggulaulaay. 17Puꞌ su kaꞌaan ta mukaꞌ keginum ta, ndaꞌig labeten tu Keglekaunutan nu Megbebayaꞌ. Iin daig duuni pantagen, su kekesuun, su gempia ginaa mukaꞌ sug leliag mikpuun da tanan tug Balakat nu Megbebayaꞌ. 18Saꞌ duuni mektamuy dini Kristu maꞌnia, naa leliagen dun su Megbebayaꞌ, mukaꞌ pegbesaan dadema nu ngag duma getaw. 19Kaas, subay penemalan ta penggulaulaay su mekegbegay pianan ginaa mukaꞌ su mekepaiseg di kesalig ta dini Kristu. 20Ndiꞌ niu dayun mpeglaatan su pegbaalen nu Megbebayaꞌ dialem ginaa nu samasakup niu sabaꞌ nu gaan. Mesuꞌat aanenig launan ginis gaan, laak ndiꞌ maꞌaan su mekegdaang di samasakup ta. 21Gempia na niu belengan aanayi karni, peginum mukaꞌ penggulaulaay bisan taꞌ alandun, saꞌ mekegdaang di samasakup niu. 22Adin su mituudan amu dun mikpuun tu kesalig niu dini Kristu, pegbuni niu deliꞌ, puꞌ yamu laak nu Megbebayaꞌi mekesuun dun. Ndiꞌ niu deliꞌ pesuunay su nga samasakup niu. Pektalentenay niu ini, leliagen su getaw saꞌ ndaꞌi pegbiksuꞌanen di penggulaulaanen, su kebaalen dun di gempia ginaanen. 23Laak dagid, saꞌ duuni getaw, migduaꞌduaꞌ dig delendemanen su gininisan pengaanenen, dayun aanenen, ukuman nu Megbebayaꞌ, puꞌ ndaꞌ sekat di kesaligen su pinggulaulanen. Adin su penggulaula nu getaw ndaꞌ peksekat di kesaligen, iini salaꞌ.

Roma 15

1Naa, ita nu nga meligeni kesaligen, subay ebangan ta su nga samasakup ta ndaꞌ pa mpanteki kekpetuuden. Subay ndiꞌ ta baalen sug leliagen dun sug lawas ta. 2Tumuꞌ penggulaulaan nug launan ta sug leliagen dun su nga samasakup ta, adun megiseg dai kesalig nilan. 3Puꞌ bisan si Kristu, ndaꞌ metubuꞌ adun pepiananenig lawasen. Ndaꞌ ba mesulat kanugdiin, “Uu Megbebayaꞌ, sug badas diniꞌa, libaneg dinaan.” Kaas maꞌantu midawat ni Kristu su sudiꞌ nu getaw tu Megbebayaꞌ. 4Naa, iini sinulat dun kanugdiin sug launan Misulat Taluꞌ nu Megbebayaꞌ, puꞌ adun metituluꞌ ita. Pektituluꞌ dinita, adun metau daita dema mektigel tu mbianan ta, mukaꞌ adun mengulikseg ita mekpedateng tu kepia dinita gusay. 5Kagina su Megbebayaꞌi pikpuunan nu kektigel mukaꞌ nu kegulikseg, penenebiin ku diniin, begayen diniu baalen niu lendasan niu su pigbetad ni Kristu Isus, adun meksalabuuk amu, launan niu. 6Iini penenebian ku amu dun, peksalabuukan niu penalay su Megbebayaꞌ, su Gamaꞌ nu Kaunutan ta si Isukristu mukaꞌ su pektemuyenen. 7Kaas subay penembaꞌen niu su nga samasakup niu, maaꞌ nu kenembaꞌ diniu ni Kristu, adun mpenalan su Megbebayaꞌ mukaꞌ mpegbesaan dadema. 8Puꞌ taluꞌu diniu, kini si Kristu, iini ibanganen dun su nga getaw Judea, adun paitaꞌen dinilan puꞌ meseligan su Megbebayaꞌ, puꞌ pinuud nu Megbebayaꞌ su pinasaden kanugdiin tu nga ginepuꞌay nilan. 9Mukaꞌ iin dademai ibanganen ilan dun, adun su nga kanaꞌ getaw Judea, penalan nilan mukaꞌ pegbesaan nilan su Megbebayaꞌ meksekat dig lelaaten dinilan. Ndaꞌ ba mesulat kanugdiin, “Kaas, uu Kaunutan, enalen nami yaꞌa, naan sampay su nga kanaꞌ getaw Judea. Enalen nami mukaꞌ pegbesaan nami yaꞌa dig bebat.” 10Mukaꞌ misulat da pagid, laungen, “Yamu nga kanaꞌ getaw Judea, subay leliagen amu, sampay su piglegetawan nu Megbebayaꞌ!” 11Mukaꞌ misulat pa pagid, laungen, “Yamu, launan niu kanaꞌ getaw Judea, enal niu su Megbebayaꞌ. Yamu nug launan getaw, enal niu iin!” 12Duun pagidi sinulat ni Isaias dengantu, laungen, “Duuni sapuꞌ ni Isai metuaꞌ pa. Metuaꞌ adun meglekaunutan tu nga kanaꞌ getaw Judea. Pekpedetengen nilan puꞌ iin dayuni Meglegawen dinilan.” 13Naa penenebiin ku tu Megbebayaꞌ, su pigenatan nu pedetengen ta, puꞌ begayen diniuig leliag niu di ndaꞌi tamanen mukaꞌ pianan ginaa sabaꞌ nu kesalig niu diniin. Iini menenabiu dun, adun megiseg pai pedetengen niu puun di ginuung nug Balakat nu Megbebayaꞌ. 14Yamu nga Mingumpated, mituudanu dun gupia puꞌ mekesuun amu getaw, metaas nai sinuunan niu mekatag di Megbebayaꞌ, mukaꞌ metau namu mektinikukay. 15Pia maꞌantu, naan, duuni pinluksadu sulatay diniu adun mektegyungu diniu. Maꞌniin minibeluꞌu sumulat dun diniu, puꞌ bigayanu nu Megbebayaꞌ pegbayaꞌ, 16adun mbaalu sesuguꞌen ni Kristu Isus, ebangan ku su nga kanaꞌ getaw Judea. Maaꞌ da nug baalen nug belian ki gabangu dinilan, puꞌ ukiten ku dinilan su Gempia Petenday genat tu Megbebayaꞌ, adun saꞌ metuudan ilan dun, mbaalu ilan maaꞌ nug betang gilaku tu Megbebayaꞌ, telimaꞌenen mukaꞌ pigwakil diniin nug Balakaten. 17Kagina suminalabuuku dini Kristu Isus, saꞌ penggulaulaan ku su pebaal dinaan nu Megbebayaꞌ, leliagenu dun sug baalen ku. 18Pebeluꞌen kui ginau puꞌ ukiten ku diniu su pipenggulaula laak dinaan ni Kristu, egaken ku su nga kanaꞌ getaw Judea mekpetuud tu Megbebayaꞌ. Pipenggulaulanen dinaan pebian di tinaluꞌu mukaꞌ di pinggulaulau. 19Kia, pipenggulaula di pegbayaꞌ nug Balakat nu Megbebayaꞌ, puꞌ bigayanu niin ginuung mukaꞌ pibaalen dinaani mekesalebuꞌ tuꞌus. Kaas, genat tu Jerusalem sampay ditug Ilirico, mipanawu, gilaꞌu pegukit su Gempia Petenday mekatag dini Kristu. 20Mauyaꞌan ku gusay pengukitay su nga getaw di Gempia Petenday ditu ngag benwa ndaꞌ pai mekedengeg mekatag dini Kristu, adun ndiꞌu maukitan su ngag daan minayan ukitay nug duma. 21Ndaꞌ ba mesulat kanugdiin, “Maitaꞌ nu nga ndaꞌ siben ukitay mekatag diniin, mukaꞌ mesabut nu nga ndaꞌ mainsan mekedengeg dun.” 22Naa kia mai tatap mekebelabag dun dinaan pangay ditu niu. 23Nandaw, kagina mitubus sug baalen ku di ngag benwa kini, mukaꞌ miniben nai taun mauyaꞌan ku tumukaw ditu niu, 24pedetengen ku mekitaꞌ ita. Mauyaꞌan ku, saꞌ mesuꞌat, tumukawu dia niu nga santaꞌ gebii, saꞌ mekangayu ditug España. Dayun saꞌ mekeksalabuuk ita sampay mawaꞌig bugaꞌan ku diniu, saꞌ mesuꞌat, ebangan niau pelum di kebundasu ditug España. 25Laak megunau meditu Jerusalem nandaw, adun eteden kui gamut ditu nga piglegetawan nu Megbebayaꞌ dia. 26Puꞌ su nga pikumpungan nu nga sakup dini Macedonia mukaꞌ Grecia, delendeman nilan, melengas pegemutan su nga gempusuk getaw di nga piglegetawan nu Megbebayaꞌ ditu Jerusalem, kaas piwit nilan dinaan. 27Laak kia, danilan da delendeman. Maꞌniin duuni gutang nilan ebangan su nga samasakup nilan nga getaw Judea ditu Jerusalem, puꞌ mipeduma ilan di kekpepia nu Megbebayaꞌ di nga getaw Judea, benaꞌ duuni nga getaw Judea migukit dinilan mekatag dini Kristu. 28Naa, saꞌ metubus nai tuyuꞌu ditu, saꞌ metulun ku gelaꞌ su ginamut tu nga samasakup ta ditu, sukatu dayun mpanaw, pangay ditug España. Mapitu dayun dia niu. 29Saꞌ matengu ditu niu, naa mesuunan ku pepianan ita gupia ni Kristu di ndaꞌi kulangen. 30Naa, Mingumpated, kagina suminalabuuk ita di Kaunutan ta si Isukristu, mukaꞌ bigay dinita nug Balakaten ki keglinelaatay ta, penengiin ku diniu, peksalabuukay niau penenebiay tu Megbebayaꞌ, 31adun megawenu di kegleget sia dinaan nu nga ndiꞌ mekpetuud dini Kristu ditu Judea. Penenabi damu dema, metelimaꞌ nu nga piglegetawan nu Megbebayaꞌ ditu su gabangu dinilan. 32Penenabi amu padun, matengu dia niu saꞌ mauyaꞌan nu Megbebayaꞌ, mukaꞌ leliagenu sampay mpiananu di keguliugu dia. 33Naa, penenebiin ku tu Megbebayaꞌ, su puun gupia nu pianan ginaa, megduma iin diniu, launan niu. Amen.

Roma 16

1Naa, ki mimated dinita si Febe, pailalau diniu, iinig libun megabang ditu pikumpungan nu nga sakup dia Cencrea. 2Kagina sakup nu Kaunutan ta, melengas penembaꞌen niu iin mbantang tug betad nu piglegetawan nu Megbebayaꞌ. Pia taꞌ alanduni mekpaingabang dun diniu, ebangay niu iin, puꞌ migabang gupia tu melaun getaw sampay dinaan. 3Naa, sambay niau dinilan senlangan si Priscila mukaꞌ si Aquila, ngag limbangu megukit di Gempia Petenday mekatag dini Kristu Isus. 4Piksaliununganu nilan di kebinesaan ku. Gempia gupiai ginau dinilan. Gempia dademai ginaa dinilan nug launan pikumpungan nu nga sakup ni Kristu di nga kanaꞌ getaw Judea. 5Sambay da niau dema tu nga sakup mekpungun lelayun diag balay ni nga Aquila. Sambay da niau pagid tu petailen ku si Epeneto, sug bekna suminakup dini Kristu di tibuuk prubinsya Asia. 6Sambay niau dini Maria, su minamal megabang diniu. 7Sambay da niau dema dinilan senlangan si Junias mukaꞌ Andronico, nga samau getaw Judea mukaꞌ dumau dia pirisuan. Megdedengeg ilan di nga peneligan ni Kristu. Miguna dailan dema dinaan sumakup dini Kristu. 8Sambay niau tu petailen ku si Ampliato, su sumalabuuk tu Kaunutan ta. 9Sambay niau dini Urbano, sug limbangu dadema mangay megukit di Gempia Petenday mekatag dini Kristu. Sambay da niau dema dini Estaquis, su petailen ku sambatu. 10Sambay pa niau pagid dini Apeles, su mitekad nai kesakupen dini Kristu. Sambay niau tu nga gapen ni Aristobulo. 11Sambay niau dini Herodion, su samau getaw Judea. Sambay niau dadema tu nga sakup ni Kristu di nga gapen ni Narciso. 12Sambay pa niau pagid dini nga Trifena mukaꞌ Trifosa. Minamal ilan megabang tu Kaunutan ta. Sambay niau dini Persida, petailen ku dadema sambat. Minamal dadema megabang di Kaunutan ta. 13Sambay niau dini Rufo, su migdedengeg di nga megukit di Gempia Petenday mekatag di Kaunutan ta, sampay su ginaꞌen, puꞌ pilepengu niin bataꞌen. 14Sambay da niau pagid dini Asincrito, si Flegonte, si Hermes, si Patrobas, si Hermas, sampay su ngag duma nilan kepetedan ta. 15Sambay niau dinilan senlangan si Julia mukaꞌ Filologo, si Nereo mukaꞌ su pateden libun, sampay dini Olimpas mukaꞌ dig launan piglegetawan nu Megbebayaꞌ duma nilan. 16Naa, saꞌ mekpungun amu, pegdedialay amu, maaꞌ nug dedial niu di gapen niu. Sinambay amu nug launan pikumpungan nu nga sakup ni Kristu dini dapit. 17Naa, taman taluꞌu diniu, Mingumpated, ki nga mekpesuay di nga sakup nu Megbebayaꞌ mukaꞌ mekpeduaꞌduaꞌ di kekpetuud nu nga sakup, penengiin ku diniu, peglengilamay niu ilan. Maꞌnia, kuminuntra ilan di gempia tinituluꞌ diniu. Pegliaw niu ilan gusay! 18Puꞌ kanaꞌ nu Kaunutan ta si Kristu su pektemuyen nilan, puꞌ iin laaki pituud nilan, su gayak nug lawas nilan. Kagina metawakal ilan, mukaꞌ sabaꞌ nu kekpenalenal nilan, buus melimbungan nilan su nga kulangi kesabuten di metuud. 19Yamu, migdedengegi kedunut niu tu Gempia Petenday, kaas liliagu dun. Mauyaꞌan ku metaasi tinawan niu di kekesuun, mukaꞌ meleglud diniui melaat. 20Su Megbebayaꞌ, su pikpuunan nu pianan ginaa, ndiꞌ na maiben, daagenen si Satanas mekatag diniu. Naa, penenebiin ku, mbianan niu lelayun su tulung nu Kaunutan ta si Isus. 21Naa sinambay amu ni Timoteo, sug limbangu. Sinambay damu dema ni Lucio, si Jason mukaꞌ si Sosipatro, nga samau getaw Judea. 22Naan si Tercio, su suminulat di sulat kini, sinambayu amu, puꞌ samasakup daita. 23Si Gayo, su gapuꞌ balay tinuunan ku, tandaꞌ pikumpungan nu nga sakup dini, si Erasto dadema, su trisuriru dig lunsud kini, mukaꞌ si Cuarto mimated dinita, sinembayan amu nilan gelaꞌ. 24[Penenebiin ku mbianan niu lelayun, launan niu, su tulung diniu nu Kaunutan ta si Isukristu. Amen.] 25Naa su Megbebayaꞌ, melengas enalen ta mukaꞌ pegbesaan ta. Iin su mekepepagen tu kekpetuud niu, mbantang tu Gempia Petenday pigukitu mekatag dini Isukristu. Mekepepagen tu kekpetuud niu mbantang dadema tu metuud miniben na pegbuniay, laak nemun biwasan na. 26Nandaw ki metuud kini, pisuun na pibian di nga sinulat nu nga pimuunan nu Megbebayaꞌ begudiin. Pisuun di nga tibaꞌan bansa puun tu suguꞌan nu tantu Megbebayaꞌ, adun metuudan duni tibaꞌan getaw. 27Mendadi, gempia ta enalen mukaꞌ pegbesaan su Megbebayaꞌ, su mekesuun dig launan. Enalen tain mekatag dini Isukristu di ndaꞌi gikteben! Amen. Daal daitu. Pablo