Biwasan

Biwasan 1

1  Mendadi, mibetang di sulat kini sug biwasan ni Isukristu. Kig biwasan kini, pisalig nu Megbebayaꞌ dini Isukristu, adun paitaꞌen dinita nga sakup nu Megbebayaꞌ dinig lumbang kini. Iinig biwasanen, su sungu mpenggulaula. Kaas sinuguꞌ ni Kristui sesuguꞌenen getaw langit mekpetenday dinaan, sesuguꞌenen dadema, ngalan ku si Juan. 2Mendadi su kelaun minitaꞌu, sinulatu, su tinaluꞌ nu Megbebayaꞌ, su metuud inukit dadema ni Isukristu. 3Naa, ki sinulat kini, adin su megbasa dun sampay su mekineeg di tituluꞌan kini misulat pedaan di gempenggulaula lemaꞌ denlag mukaꞌ mekpetuud di tibaꞌan misulat di sulat kini, iini leliagen gupia. Puꞌ sungu na mpenggulaulaig launanen kini. 4Naa, naan si Juan, piwitan ku amu sulat, yamu nga pitu pikumpungan nu nga sakup ni Kristu diag benwa Asia. Penenebiin ku mbianan amu tulung mukaꞌ pianan ginaa. Megbegay dun su Megbebayaꞌ, su tetubuꞌ nandaw, su tetubuꞌ dengantu sampay su metuaꞌ pa. Megbegay dun dadema su pitu tawan sesuguꞌen nu Megbebayaꞌ megabang diniin dia gedapan nu melengas gingkudanen. 5Megbegay dun pa pagid si Isukristu, su meseligan megukit, su penganay Bataꞌ nu Megbebayaꞌ pitubuꞌ puliꞌ, su meglekaunutan di nga gadiꞌ dinig dibabaw lumbang. Kini si Isukristu, pitail ita niin, mukaꞌ miksekat di kepatayen, ginawen ita niin di ginukuman dinita puun tu salaꞌ ta. 6Pinungun ita niin di Keglekaunutanen mukaꞌ tinduꞌ ita niin belian, adun mektamuy ita tu Megbebayaꞌ, su Gamaꞌen. Subay pegbesaan si Isukristu mukaꞌ meglekaunutan dadema iin di ndaꞌi gikteben! Amen. 7Pektalentenay niu ini! Si Isukristu, metuaꞌ pa, peglidungan nu nga gabun. Mekaitaꞌ dun sug launan getaw, sampay su migilek diniin. Melegenan gupia su nga getaw dig lumaun bansa mekatag dini Isukristu. Amen! 8Kaliꞌ pektaluꞌ su Kaunutan Megbebayaꞌ, su Tampusan Ginuungan, “Naa naan, su ndaꞌidun pai mibaal, daan nau. Mukaꞌ saꞌ megelaꞌ na mpapas sug launanen, kini pau gusay.” Puꞌ iini tetubuꞌ nandaw, tetubuꞌ dengantu, sampay metuaꞌ pa. 9Naan kini si Juan, su mimated diniu, mukaꞌ duma niu di kelegenay mbianan nu nga miksalabuuk dini Isukristu. Samasakup dau dema niu di Keglekaunutanen. Puun tu keksalabuuk ta dini Isukristu, mekektigel ita di mbianan ta. Naa naan, inutidanu ditug daan benwau mukaꞌ miatedu dini puluꞌ ngalanen Patmos, sabaꞌ nu kegukitu taluꞌ nu Megbebayaꞌ mukaꞌ su metuud ginukit ni Isukristu. 10Mendadi duuni gendaw, mitaang tu gendaw pegbasa tu Kaunutan, mingapuꞌ dinaan sug Balakat nu Megbebayaꞌ. Midengegu dayun dia teliudan kui mesekeg taluꞌ metenug maꞌniin nug bugyung. 11Kaliꞌ pektaluꞌ, “Kini mpaitaꞌ diniꞌa, sulat mu, dayun mu puitay dun su pitu buuk pikumpungan nu nga sakupu ditug Efeso, ditu Smirna, ditu Pergamo, ditu Tiatira, ditu Sardis, ditu Filadelfia sampay ditug Laodicea.” 12Kaliꞌu luminingay, adun guguden ku saꞌ taꞌ taway duni pekabit dinaan. Masiꞌ iini minitaꞌu, pitu buuk betangan suluꞌ, lumbus bulawan. 13Duun dademai pegindeg dia titengaꞌ nu ngag betangan suluꞌ maꞌniin palas kilawan, silukeni suub midepet di pelapanen, mukaꞌ bikesani gegdeben bakes bulawan. 14Gemputiꞌig buuken, maꞌniin nu gemputiꞌ gupia penepeten atawaka maꞌniin nug dupiꞌ batu. Ki matanen pagid, maaꞌ ligaꞌ gapuy. 15Ki geksuden, maꞌniin nug bedunsi iknasan sampay metinggas gupia, puꞌ tinitiꞌ di gapuy. Ki tingegen, maꞌniin tubig megdeguk, saꞌ metaas gupia baga. 16Piguidaneni pitu buuk bitun dig lintu kemeten, mukaꞌ dig babaꞌen mikseleputi sundang duaꞌig babaꞌen. Su muluꞌen, mekesulaw, maꞌniin nu mata gendaw saꞌ taasendaw. 17Saꞌ minitaꞌu iin, mikeglaubu dia mesunguꞌanen, maꞌniinu daan na minatay. Laak dagid dipenanu niin dig lintu kemeten, kaliꞌ pektaluꞌ, “Ndiꞌa mendek. Naan ki pikpuunan nug launan. Naan su katapusanen dadema. 18Naan pa pagidi tetubuꞌ. Minayan nau matay tuꞌu, laak bentayay mu pa daan, tetubuꞌ dau mukaꞌ ndiꞌ nau puliꞌ matay! Megbayaꞌu di gumul getaw mukaꞌ ditug bayaꞌ, su pegbenwanan nu nga mimatay. 19Naa, ki kelaun maitaꞌ mu kini, ki mpenggulaula nemun mukaꞌ su sungu mpenggulaula, sulat mu. 20Buasan ku na diniꞌa sug daansamaꞌ pigbuni. Kinii gulugan nu pitu buuk bitun minitaꞌ mu dig lintu kemetu mukaꞌ su pitu buuk betangan suluꞌ bulawan. Su pitu buuk bitun, iin su nga sesuguꞌen nu Megbebayaꞌ getaw langit megingat tu pitu buuk pikumpungan nu nga sakupu. Su pitu buuk betangan suluꞌ, iin su pitu buuk pikumpungan nga sakupu.”

Biwasan 2

1  Kaliꞌ gusay pektaluꞌ si Isus, “Mendadi ki pikumpungan nu sakupu diag Efeso, puitay mu sulat su sesuguꞌen nu Megbebayaꞌ getaw langit megingat dun. Iini sulat mu, kinii pemuun nu megawid di pitu buuk bitun dig lintu kemeten mukaꞌ megleketas di pitu buuk betangan suluꞌ, lumbus bulawan. 2Naa, misuunan ku su pinggulaula niu, saꞌitada sug lesayan niu mukaꞌ su kektigel niu di kelegenay. Misuunan ku dadema puꞌ mpauk amu gupia ditu nga melaat getaw, piksimaꞌ niui gulaula nu nga getaw paingalan nilan dun sug lawas nilan peneligan ni Kristu asa kanaꞌ, kaas misuunan niu belusen ilan gupia. 3Mikektigel amu daan di nga kelegenay niu puun di kesakup niu dinaan, mukaꞌ ndaꞌ amu dema lukas dun. 4Laak dagid duuni pegdenaꞌen ku diniu. Kiin, su kepetail niu dinaan nemun, kanaꞌ na maaꞌ nu kepetail niu dinaan dengantu. 5Kaas, pegdelendem niu gupia su kebagel nug bekna kepetail niu, mukaꞌ su kelukas niu na dun. Peksikesuun amu gusay mukaꞌ penggulaulaay niu su maaꞌ danug bekna pinggulaula niu. Saꞌ pinenggiꞌ ndiꞌ amu gusay meksikesuun, medituunu niu, adun uaꞌen ku sug betangan niu suluꞌ ditu kibetanganen. 6Laak duun dademaig leliagenu dun diniu, puꞌ mpauk amu gupia ditu nga gulaula nu nga sakup ni Nicolas, maaꞌ danu kepauku dun dadema. 7“Naa, adin sug duuni telinganen, mekineeg dema tuꞌu di teluꞌen kini nug Balakat nu Megbebayaꞌ tu nga pikumpungan nga sakupu. Adin su nga mekegdaag di melaat, begayu dinilan mekaꞌaan ilan dig bunga gayu megbegay ketubuꞌ ndaꞌi tamanen, su gayu pimula dia Pegimulanan nu Megbebayaꞌ. 8“Mendadi ki pikumpungan nu sakupu dia Smirna, puitay mu sulat su sesuguꞌen nu Megbebayaꞌ getaw langit megingat dun. Iini sulat mu, kinii pemuun nu pikpuunan nug launan mukaꞌ katapusanen dadema, su minatay dayun mitubuꞌ puliꞌ. 9Naa, misuunan ku su kelegenay niu mukaꞌ su kepubri niu, asa medatuꞌ amu gupia. Misuunan ku pa padun su nga pembaalbaal mekatag diniu nu nga megangken puꞌ getaw Judea ilan, laak kanaꞌ, puꞌ masiꞌ sakup ilan tantu ni Satanas! 10Naa, ndiꞌ amu gusay mendek ditu sungu niu mpenggulaula. Pektalentenay niu ini, duun diniui pepirisuun nu Palin, adun pengindanan amu, ki kelegenay niu gikteb sepuluꞌ gebii. Subay meseligan amu pia petain amu, sabaꞌ nu kesalig niu dinaan. Begayu dayun diniu su tundek gadiꞌ, saꞌitada su ketubuꞌ ndaꞌi tamanen. 11“Naa adin sug duuni telinganen, mekineeg dema tuꞌu di teluꞌen kini nug Balakat nu Megbebayaꞌ tu nga pikumpungan sakupu. Puꞌ adin su mekegdaag di melaat, ndiꞌen mbianani keduaꞌ kepatay, su kepatay ndaꞌi tamanen.” 12Laung padun ni Isus, “Mendadi ki pikumpungan nu sakupu dia Pergamo, puitay mu sulat su sesuguꞌen nu Megbebayaꞌ getaw langit megingat dun. Iini sulat mu, kinii pemuun nu megawid di mauteng gupia sundang, duaꞌig babaꞌen. 13Naa, misuunan ku puꞌ su pegbenwanan niu, ditu keglekaunutan ni Satanas. Laak pia maꞌantu, meseligan amu, ndaꞌ niu teliuday ki kesalig niu dinaan, pia pa su kepatay ni Antipas kiin, ki meseligan megukit taluꞌu, puꞌ iin, pinatay ditug benwa pigbenwanan ni Satanas. 14Laak dagid duuni maikaꞌ pegdenaꞌen ku diniu. Duun diniui munut tu pituꞌun ni Balaam dengantu. Si Balaam kiin, pituꞌunanen si Balak megdaang di nga getaw Israel, adun mekesalaꞌ ilan, puꞌ maꞌaan daw nilan sug betang ginilak tug ledawan mukaꞌ mesuꞌat ilan daw megdusa. 15Maꞌantu dadema duun diniui santaꞌ tawan duminunut ditu tituluꞌan nu nga sakup ni Nicolas. 16Kaas teliuday niu su nga salaꞌ niu! Puꞌ saꞌ pinenggiꞌ ndiꞌ amu gusay meksikesuun, laawan ku amu sungu, dayun bunuꞌen kui nga getaw kia sundang duaꞌig babaꞌen, mikseleput dig babaꞌu. 17“Naa adin sug duuni telinganen, mekineeg dema tuꞌu di teluꞌen kini nug Balakat nu Megbebayaꞌ di nga pikumpungan sakupu. Adin su mekegdaag di melaat, begayu dun su gaan giglud ditug langit, piningalan dun manna. Begayan ku padun diadia gemputiꞌ batu sinulatan begu ngalan, ki ndaꞌiduni mekebasa dun, subay su laak mekedawat dun gupia. 18“Mendadi ki pikumpungan nu sakupu dia Tiatira, puitay mu sulat su sesuguꞌen nu Megbebayaꞌ getaw langit megingat dun. Iini sulat mu, kinii pemuun nug Bataꞌ nu Megbebayaꞌ, maaꞌ nu pegligaꞌ gapuy su matanen mukaꞌ maaꞌ danu metilak bedunsi su pelapanen. 19Naa, misuunan ku su kelaun penggulaula niu. Misuunan ku dadema su kepetail niu mukaꞌ su kesalig niu dinaan, su gabang niu di nga samasakup niu mukaꞌ su kektigel niu di kegleget diniu. Misuunan ku pa padun puꞌ melengas pa dun su penggulaula niu nandaw ditu pinggulaula niu dengantu. 20Laak dagid duun dademai pegdenaꞌen ku diniu, puꞌ ndaꞌ niu pemaagayig libun kiin si Jezabel. Iin, paingalanen dunig lawasen pimuunan nu Megbebayaꞌ, laak piktuꞌunanen su nga sakupu sampay duuni pegdaanganen, adun megdusa ilan mukaꞌ maan ilan dig betang ginilak di ngag ledawan nu sagya diwata. 21Naa, miniben ku na pegelatay su kegbiksuꞌ sia nug libun kia di salaꞌen, laak mpauk gusay megbiksuꞌ di kenlelingayen. 22Kaas pegduksaken ku iin ditug belilidanen sampay sug dumanen minlelingay, saꞌitada, pepegleduun ku ilan patiꞌ, melegenan ilan dun gupia. Saꞌ ndiꞌ ilan gusay megbiksuꞌ di melaat gulaula nilan, penggulaulaan ku ini ganam. 23Tigaꞌwan, petain ku dadema su nga sakup ni Jezabel. Saꞌ maꞌantu, mesuunan dayun nu kelaun pikumpungan nga sakupu puꞌ naani mekesuun di ginaa mukaꞌ dig delendeman nug launan getaw. Kaas, sugdaan ku amu saladuaꞌ mbantang tu pinggulaula niu. 24“Laak yamu ngag duma sakupu dia Tiatira ndaꞌ mpeduma di melaat tituluꞌan kia, yamu nu nga ndaꞌ dadema petuꞌunay di medalem laung tituluꞌan ni Satanas, naa taman taluꞌu diniu, ndiꞌu da puit diniu su melegenan amu dun. 25Iin laak, subay engkemen niu gusay su misuunan na niu sampay matengu puliꞌ. 26Naa, adin pasiꞌ su mekegdaag di melaat mukaꞌ penggulaulaanen gusay su mauyaꞌan ku sampay matengi gumulen, begayan ku iin pegbayaꞌ di kelaun nasud, maaꞌ danu pegbayaꞌ dun mialapu genat tu Gamaꞌu. 27Metegas dayuni keguiten dinilan, mukaꞌ gebaꞌenen su nga nasud, maaꞌ danu melaat gulen buungen nu migbaal dun. 28Duun dademai begayu di nga mekegdaag, paingalan dun sug bitun pemulaw. 29“Naa, adin sug duuni telinganen, mekineeg dema tuꞌu di teluꞌen kini nug Balakat nu Megbebayaꞌ di nga pikumpungan nga sakupu.”

Biwasan 3

1  Laung padun ni Isus, “Mendadi ki pikumpungan nu sakupu dia Sardis, puitay mu sulat su sesuguꞌen nu Megbebayaꞌ getaw langit megingat dun. Iini sulat mu, kinii pemuun nu megawid di pitu tawan sesuguꞌen nu Megbebayaꞌ megabang lelayun diniin mukaꞌ su pitu buuk bitun. Naa misuunan ku su pinggulaula niu. Misuunan ku dadema puꞌ megdedengeg amu mipeduunan amu begu ketubuꞌ asa maꞌniin minatay amu tuꞌu! 2Kaas tanud amu, ektak niui kesalig niu dinaan, adun ndiꞌ niu melengaꞌan, puꞌ kaitaꞌu dun di pegitaꞌen nug Diwata pektemuyen ku, ndaꞌ pa pengganget su pinggulaula niu. 3Naa, su tituluꞌan pituꞌun na diniu, pegdelendem niu gupia kampuꞌ nu midengeg niu. Pekpetuud amu dun, teliuday niu su kelaun salaꞌ niu. Saꞌ ndiꞌ amu meksikesuun, medituunu niu maꞌniin nu megdaaw, ndiꞌ niu mesuunan saꞌ nanutaꞌu dateng. 4Laak dagid duun diniu nga getaw dia Sardis ndaꞌ niu begay melemuꞌay, pia laak su penepeten niu. Tundug amu dinaan pekseluk amu gemputiꞌ penepeten, puꞌ mbantang amu dun. 5Adin su mekegdaag, maꞌantu dadema peselukan nu gemputiꞌ penepeten, mukaꞌ ndiꞌu eknasen su ngalanen bitang na dig linulun sinulat tandaꞌ milista su ngalan nu kelaun getaw mpeduma di ketubuꞌ ndaꞌi tamanen. Peglegintuuden ku di gedapan nu Gamaꞌu mukaꞌ di gedapan nu nga sesuguꞌenen getaw langit puꞌ sakupu iin. 6“Naa adin sug duuni telinganen, mekineeg dema tuꞌu di teluꞌen kini nug Balakat nu Megbebayaꞌ di nga pikumpungan nga sakupu. Su Pemuun tu Pikumpungan ditug Lunsud Filadelfia 7“Mendadi ki pikumpungan nu sakupu dia Filadelfia, puitay mu sulat su sesuguꞌen nu Megbebayaꞌ getaw langit megingat dun. Iini sulat mu, kinii pemuun nu meseligan pinaas nu Megbebayaꞌ, sug bigayan pegbayaꞌ meglekaunutan maaꞌ nu bigay ditu ni David dengantu, iin su mekpukaꞌ di gulu gegdan ndaꞌiduni meketakep dun. Iin pa pagidi mektakep dun, ndaꞌiduni mekepukaꞌ dun. 8Misuunan ku su penggulaula niu. Misuunan ku dadema puꞌ pia maikaꞌi megaga niu, pituud niu gelaꞌ su tituluꞌan ku. Meseligan damu dema dinaan. Bigayu na diniui sikawan niu mbaal niu su pibaalu diniu, sikawan ndaꞌiduni getaw mekebelabag dun. 9Pekineegay niu! Ki nga getaw laung nilan puꞌ getaw Judea ilan asa kanaꞌ, belusen ilan sungkin, puꞌ sakup ilan ni Satanas. Pesempelen ku ilan diniu, mukaꞌ pepengemuꞌen ku ilan diniu. Mesuunan nilan dayun gelaꞌ puꞌ petailen ku amu. 10Kagina piktalentenan niu su suguꞌan ku diniu puꞌ miktigel amu di kelegenay niu, penendingan ku amu di kelegenay sungu mateng di nga kilawan, adun mpengindanan ku sug launan getaw dinig dibabaw lumbang. 11Naa sungu nau metuaꞌ. Subay engkemen niu gusay su misuunan niu na, adun ndaꞌiduni mekagaw dun su melengas sugda tu kegdaag niu. 12Adin su getaw mekegdaag, baalen ku iin gempagen pasek ditug Balay Pengedapan tu Gamaꞌu, sug Diwata pektemuyen ku, dayun ndiꞌ nain mawaꞌ dia. Sulatan ku dayun su getaw mekegdaag kia di ngalan nug Diwata pektemuyen ku, mukaꞌ su ngalan nu syudad pegbenwanan nug Diwata pektemuyen ku, sug begu syudad Jerusalem lumusad genat ditug langit, genat ditug Diwata pektemuyen ku. Sulatan ku su mekegdaag kia dig begu ngalan ku. 13“Naa adin sug duuni telinganen, mekineeg dema tuꞌu di teluꞌen kini nug Balakat nu Megbebayaꞌ tu nga pikumpungan nga sakupu.” 14Laung padun ni Isus, “Mendadi ki pikumpungan nu sakupu diag Laodicea, puitay mu sulat su sesuguꞌen nu Megbebayaꞌ getaw langit megingat dun. Iini sulat mu, kinii pemuun nu gilal Amen, saꞌitada su meseligan megukit, puꞌ teluꞌenen su metuud. Iini teluꞌen nu puun nu kelaun binaal nu Megbebayaꞌ. 15Naa, misuunan ku su pinggulaula niu. Maꞌniin amu nu tubig, kanaꞌ amu metegdaw, kanaꞌ damu dema mainit, saꞌitada, mikagelagel pai kesalig niu. Mauyaꞌan ku mainit amu sungkin atawaka metegdaw. 16Laak dagid, kagina maꞌniin amu nu melebab tubig, luaꞌen ku amu, belengen ku amu. 17Laung niu dun medatuꞌ amu, memis dademai kebetang niu sampay ndaꞌi kulang niu. Laak dagid ndaꞌ niu mesuunay puꞌ mekelelaatlelaat amu gupia. Gempusuk amu, buta damu dema sampay milebasan amu! 18Kaas tituluꞌen ku amu, saluy amu dini naan tantu bulawan, adun amu dumatuꞌ. Saluy damu dema gemputiꞌ penepeten, seluken niu, adun metebunan su mekepiidpiid keglebas niu. Saluy amu pa pagid bulung ugid niu di mata niu, adun mekengitaꞌ amu. 19Adin su petailen ku, pemaagen ku mukaꞌ tituluꞌen ku, kaas pektinantu amu mukaꞌ teliuday niu su kelaun salaꞌ niu. 20Bentayay pa daan niu, megindegu di gulu gegdan mukaꞌ meksabiu. Saꞌ duuni mekedengeg di tingegu mukaꞌ pukaꞌanen su gulu gegdan, suledu dayun diag balayen dayun ami meksalu maan. 21Naa, adin su mekegdaag, begayu diniini pegbayaꞌ megabang dinaan meglekaunutan, maaꞌ nu kebegay dinaan nu Gamaꞌu megabang diniin meglekaunutan, puꞌ naan, mikegdaag dau. 22“Naa adin sug duuni telinganen, mekineeg dema tuꞌu di teluꞌen kini nug Balakat nu Megbebayaꞌ di nga pikumpungan nga sakupu.”

Biwasan 4

1  Naa tubus nitu, duun na pelumi pinitaꞌ dinaan. Iini minitaꞌui gulu gegdan ditug langit, mipukaꞌ. Mukaꞌ ki tingeg maaꞌ nug bugyung midengegu kamun mektaluꞌ dinaan, kaliꞌ pektaluꞌ, “Diniin ka ditaas, adun paitaꞌu diniꞌa saꞌ taꞌ alanduni mpenggulaula ditug binayaꞌ gebii buꞌ gendaw.” 2Seduꞌunduꞌun mingapuꞌ na dinaan sug Balakat nu Megbebayaꞌ. Minitaꞌu dayun diag langiti melengas gingkudan gadiꞌ, duuni pegingkud dia. 3Ki pegingkud dia, tumiagi muluꞌen maꞌniin palas nu metinggas batu piningalan dun haspe mukaꞌ kornalina. Milibed di gingkudan kiai melunaw landung maꞌniin palas nu sala metinggas batu piningalan dun esmeralda. 4Duun paig duaꞌ puluꞌ buꞌ paat buuk gingkudan gadiꞌ miktabuꞌ di melengas gingkudan gadiꞌ kia. Pemegingkud diaig duaꞌ puluꞌ buꞌ paat tawan meglegulang kaunutan piselukan gemputiꞌ suub, miktukid ilan tundek bulawan. 5Naa, ki gingkudan kia dia titengaꞌ, migilat lamug mikpenlugung. Duun pa padun dia mesunguꞌaneni pitu buuk tilaw peglamag. Ki pitu buuk tilaw kia, iin su pitu tawan sesuguꞌen nu Megbebayaꞌ megabang lelayun diniin. 6Duun pa pagid dia mesunguꞌan nu gingkudan kiai maꞌniin palas dagat, maꞌniin nu pagalungan sabaꞌ ketinawen. Naa, milibut di melengas gingkudan nu gadiꞌ ki paat buuk tetubuꞌ biwat. Ki ngag biwat kia, diadia mileep dig lawaseni mata, dia gatubanganen sampay dig lekuden. 7Naa, su palas nug bekna biwat, maaꞌ nug limaung. Su keduaꞌ biwaten pelum, maaꞌ nu turu baka, dayun su ketelunen, maaꞌ nug lakii muluꞌen, sampay su kepaaten, maaꞌ nu tipuli peglayug. 8Diadia duun dademai genem buuk gekpaken. Mileep pa pagid di gekpakeni mata, di dapit dibabawen sampay di dapit silungen. Gebii gendaw ndiꞌ nilan sikpaꞌan bebatay ini, laung nilan, “Ki Kaunutan Megbebayaꞌ, su Tampusan Ginuungan, iin, ndaꞌig lamug dun melaat, pia maikaꞌ. Iin su tetubuꞌ dengantu, tetubuꞌ pa nandaw sampay metuaꞌ pa.” 9Ki paat buuk tetubuꞌ biwat, pekpenalan nilan dig bebat ki megingkud dia titengaꞌ gingkudan, iin su ndaꞌiduni gumulen. Pegbesaan nilan iin sampay pekpeladpeladan nilan. 10Saꞌ megbebat ilan, sug duaꞌ puluꞌ buꞌ paat tawan meglegulang kaunutan, menginlulud ilan dia gedapan nu megingkud kia dia titengaꞌ gingkudan, pegbesaan nilan su ndaꞌi gumulen. Tikpuꞌen nilan su nga tundek nilan dia gedapan nu gingkudanen. Kaliꞌ ilan pektaluꞌ, 11“Yaꞌa, Kaunutan nami Megbebayaꞌ, pektemuyen nami yaꞌa, gembantanga penalan nu ngag launan biwat mu, gembantanga dadema pegbesaan nilan sampay gembantanga meglekaunutan dinilan gelaꞌ. Puꞌ yaꞌai miwat di tibaꞌan maitaꞌ sampay su ndiꞌ maitaꞌ, adin sug biwat mu, su gikteb bigayan ketubuꞌ, ndaꞌig lain puunanen, su laak mauyaꞌan mu!”

Biwasan 5

1  Naa mendadi, diag lintu kemet nu megingkud di titengaꞌ gingkudan gadiꞌ kia, duuni minitaꞌu linulun sinulat. Kig linulun kini, miktimpang sulatay. Su pitu lapis patalen, pideketan pitu kumpelig lunay, adun ndaꞌi mekebembal dun. 2Duun dademai minitaꞌu sesuguꞌen nu Megbebayaꞌ getaw langit ginuungan gupia, miktegas iin sumaak, “Taꞌ taway duni gembantang meksekat dig lunay kia, adun mbembalig linulun sinulat kini?” 3Laak dagid di gekleb langit buꞌ lupaꞌ sampay ditug bayaꞌ, pia sala tawan, ndaꞌi mibaangan metau megbembal di sinulat kiin mukaꞌ megbasa dun sia. 4Kaliꞌu mesuunay, mikengelawu gupia, puꞌ ndaꞌidun masiꞌi mibaangan gembantang megbembal di sinulat mukaꞌ megbasa dun. 5Laak dagid, duuni sala tawan dia nga meglegulang kaunutan miktaluꞌ dinaan, “Ndiꞌa pengaduy, puꞌ bentayay pa daan! Ki gilal limaung, su sapuꞌ ni Juda, mukaꞌ migdedengeg sapuꞌ dadema ni David, dinaagen na tuꞌu su nga kuntranen, kaas iinen na tuꞌui mekesekat di pitu kumpelig lunay, mukaꞌ mekegbembal di sinulat kiin.” 6Iin dayuni minitaꞌu ki Nati Karniru, pegindeg dia titengaꞌ nu gingkudan gadiꞌ, pigalidungan nu paat buuk tetubuꞌ biwat mukaꞌ nu ngag duaꞌ puluꞌ buꞌ paat meglegulang kaunutan. Ki Karniru kini, su palasen, maꞌniin minayan na matay. Duuni pitu buuk sungagen, pitu buuk dademai matanen, saꞌitada su pitu tawan sesuguꞌen nu Megbebayaꞌ megabang lelayun diniin sinuguꞌ mangay tu tibuukan lumbang. 7Mendadi, mikpesempel ki Karniru di gingkudan dia titengaꞌ, mukaꞌ inalapen sug linulun sinulat diag lintu kemet nu pegingkud dia. 8Su saananen malap dun, su paat buuk tetubuꞌ biwat mukaꞌ sug duaꞌ puluꞌ buꞌ paat tawan meglegulang kaunutan, mimenlaub ilan dia gedapanen. Miktukid ilan gayepan paingalan dun arpa mukaꞌ yaꞌung mipenuꞌ pelinan, saꞌitada su kenenabi nu nga piglegetawan nu Megbebayaꞌ. 9Lamug mimegbebat ilan begu bebat, laung nilan, “Yaꞌai gembantang malap dig linulun sinulat, mukaꞌ mekesekata di pitu kumpelig lunay pideket dun, Puꞌ pinataya, mukaꞌ puun tu kepatay mu siluyan mu su Megbebayaꞌ nga piglegetawanen. Ki nga getaw likat mu, genat ilan dig launan bansa, dig launan pikebitan ilan, sakup ilan di tibaꞌan benwa sampay lumaun nasud. 10Pigbaal mu ilan sala keglekaunutan, launan nilan, belian mektamuy tu Megbebayaꞌ pektemuyen ta, mukaꞌ meglekaunutan ilan ditug dibabaw lumbang.” 11Naa, pigbentayan ku na puliꞌ, mukaꞌ midengegui nga sesuguꞌen nu Megbebayaꞌ getaw langit, ndiꞌ ilan mbilang sabaꞌ nu kelaunen, mabuꞌ labi selaksaꞌ piluꞌ di selaksaꞌ tawan ilan. Pemegindeg ilan dia pegalidung di gingkudan nu gadiꞌ, mukaꞌ di paat buuk tetubuꞌ biwat sampay dig duaꞌ puluꞌ buꞌ paat meglegulang kaunutan. 12Memegbebat ilan meketikteg, laung nilan, “Ki Nati Karniru kini pinatay, gembantang meglekaunutan, medatuꞌ, metelisebuten sampay ginuungan. Gembantang dadema pegbesaan, megdedengeg sampay penalan.” 13Naa, midengegu dayun su kelaun biwat dia gekbus langit, kampuꞌ nu ngag bitang diag dibabaw lupaꞌ, su ngag ditug bayaꞌ, sampay su ngag bitang diag dagat, saꞌitada su tibaꞌan biwat di gekleb langit buꞌ lupaꞌ. Midengegu ilan memegbebat, maꞌniniꞌ, “Ki pegingkud dia titengaꞌ gingkudan, sampay ki Nati Karniru kini, di ndaꞌi gikteben enalen ilan mukaꞌ pegbesaan ilan, di ndaꞌi tamanen megdedengeg ilan mukaꞌ meglekaunutan ilan!” 14Kaliꞌ peksembag su paat buuk tetubuꞌ biwat, “Amen!” Mimeglaub dayun su nga meglegulang kaunutan, mukaꞌ pinginluꞌudan nilan su pegingkud mukaꞌ su Nati Karniru.

Biwasan 6

1  1Mendadi ki Nati Karniru, minitaꞌu dayun iin, peksekatenen sug bekna kumpelig lunay pideket dig linulun kia, mukaꞌ midengegu su tingeg nu salabuuk tetubuꞌ biwat, maaꞌ nug delalak. Duuni pikteluꞌanen, laungen, “Panawa!” 2Kaliꞌu pegbentayay, minitaꞌui kebayuꞌ, gemputiꞌ kebayuꞌ. Ki peksakay dun, peguidaneni panaꞌ mukaꞌ bigayan dadema tundek. Iin, mipanaw na tuꞌu memendaag, ndaꞌiduni dumaag dun. 3Naa, sikat na pelum nu Nati Karniru su keduaꞌ pideketen lunay mukaꞌ midengegu dadema su keduaꞌ tetubuꞌ biwaten. Duun dademai pikteluꞌanen, laungen, “Panawa!” 4Duun dayuni keduaꞌ kebayuꞌen gumiwaꞌ, gempula kebayuꞌ. Ki peksakay dun, bigayan pegbayaꞌ mekpegubat di tibuukan lumbang, adun mekpinetayay su nga getaw. Tinulunan dadema iin gembagel sundang. 5Naa sikat na pelum nu Nati Karniru su ketelu pideketen lunay, dayun midengegu su ketelu tetubuꞌ biwaten. Duun pa pagidi pikteluꞌanen, laungen, “Panawa!” Kaliꞌu pegbentayay, duuni minitaꞌu maitem kebayuꞌ. Ki peksakay dun, miguit timbangan. 6Mukaꞌ duuni midengegu maꞌniin tingeg nu getaw genat dia paat buuk tetubuꞌ biwat kia. Kaliꞌ taluꞌ, “Sendaw mengimbaal, tindanen sala kaltik laak trigo. Saꞌ su sebadai tindan, telu kaltik. Laak sug lana nu gayu olibo mukaꞌ su pegimulanan gubas, ndiꞌ dadema salibaꞌen.” 7Naa, sikat na pelum nu Nati Karniru su kepaat pideketen lunay, midengegu dayun su kepaat tetubuꞌ biwaten miktaluꞌ. Duuni pikteluꞌanen, laungen, “Panawa!” 8Dayun duuni minitaꞌu kebayuꞌ mimansiꞌ. Ki peksakay dun, paingalan dun si Kepatay, dumanen peksakay si Bayaꞌ. Ki peksakay kia, bigayan ilan pegbayaꞌ di kepaat ilasen di nga kilawan, adun pemetain nilani nga getaw pibian di gubat, gunus, leduun sampay ditu mekalig metetubuꞌ. 9Mendadi, sikat na pelum nu Nati Karniru su kelima pideketen lunay. Minitaꞌu dayuni gentudan gilak, mukaꞌ dia silungen duuni nga gimuud nu nga pinatay sabaꞌ nilan megukit tu taluꞌ nu Megbebayaꞌ mukaꞌ sabaꞌ nu keglegintuud nilan tu ginukit ni Isukristu. 10Ki nga gimuud kia, mimeksay ilan, laung nilan, “Yaꞌai ginuungan Diwata! Pinaasa ditu melaat mukaꞌ meseligan ka gupia! Saaken nami diniꞌa saꞌ maiben mu pa ukumay su nga getaw diag dibabaw lumbang mukaꞌ pelebuꞌay, sugda tu kepatay nilan dinami.” 11Dayun diadia bigayan mekelambak suub, gemputiꞌ, mukaꞌ pilali deliꞌ sampay mematayi kelaun sama sesuguꞌenen mukaꞌ mimated diniin maaꞌ nu kibiananen. 12Naa, miksekat ki Nati Karniru tu keꞌenem pideketen lunay. Miglinug dayun metikteg, minitemi mata gendaw maaꞌ nu maitem penepeten binaal saku, mipulaig bulan maꞌniin palas duguꞌ, 13mimeglabuꞌ su ngag bitun maꞌniin bunga igera mipudu saꞌ dulukan metikteg genus, pia mailaw pa. 14Dayun malep su tibuuk langit, maaꞌ laak nu papil linulun na. Su ngag bentud mukaꞌ su nga pinuluꞌan, piawaꞌ ilan dig daan kibetanganen. 15Dayun su kelaun getaw dig lumbang, su nga gadiꞌ, su nga kaunutan getaw, su nga kaunutan dadema sundalu, su nga medatuꞌ mukaꞌ su nga megbayaꞌ dig duma getaw, sampay su gulipen, saꞌ su kanaꞌ gulipen, migelaꞌ ilan memegeglud ditu ngag langeb sampay ditu silung nu nga genduk diag binentudan. 16Pigbeksayan nilan dayun su ngag batu mukaꞌ binentudan, laung nilan, “Yamu ngag batu mukaꞌ bentud, silabuꞌ amu dini nami, tebunay niu ami, adun ndiꞌ ami maitaꞌ nu pegingkud tu melengas gingkudan kia nu gadiꞌ, mukaꞌ adun ndiꞌ ami medekdakan nug lenget nu Nati Karniru. 17Puꞌ minateng na su mekesalebuꞌ gendaw pengukuman nilan. Taꞌ taway dun bai mekegaga dun ini?”

Biwasan 7

1  Naa tubus nitu, duuni minitaꞌu paat tawan pelum sesuguꞌen nu Megbebayaꞌ getaw langit. Ki nga sesuguꞌen kia nu Megbebayaꞌ, diadia pegindeg ditu sala di nga paat sungut nig lumbang kini. Inapag nilan su paat buuk genus dumuluk sia dinig lupaꞌ, dig dagat, mukaꞌ di nga gayu. 2Minitaꞌu dademai sala getaw langit, peglentu genat ditu dapit silangan. Iin, peguitenen su pektuꞌus nu pektetubuꞌ Diwata. Biksayanen su paat tawan getaw langit kia, kig daan na bigayan nu Megbebayaꞌ pegbayaꞌ gebaꞌen nilan sug benwa mukaꞌ peglaatan nilan sug dagat. 3Kaliꞌ pektaluꞌ su sala tawan getaw langit kia, “Ndiꞌ pa niu peglaatay sug lupaꞌ, sug dagat sampay su nga gayu, subay unaan pa nami tuꞌusay su gangas nu nga sakup nu Megbebayaꞌ pektemuyen ta, su nga sesuguꞌenen getaw lumbang.” 4Kaliꞌu medengeg su kelaun nu pentuꞌusan di tuꞌus nu Megbebayaꞌ di gangas nilan, iini segatus buꞌ paat puluꞌ buꞌ paat ngibu tawan getaw metenday di nga sepuluꞌ buꞌ duaꞌ gesalan getaw Israel. 5Naa pemiliꞌan maꞌniniꞌ, duuni selaksaꞌ buꞌ duaꞌ ngibu tawan sapuꞌ ni Apuꞌ Juda, duun dademai selaksaꞌ buꞌ duaꞌ ngibu tawan sapuꞌ ni Apuꞌ Ruben, selaksaꞌ buꞌ duaꞌ ngibu tawani sapuꞌ ni Apuꞌ Gad, 6mukaꞌ maꞌantu dademai kelaun nu sapuꞌ ni nga Apuꞌ Aser, ni Apuꞌ Neftali, ni Apuꞌ Manases, 7ni Apuꞌ Simeon, ni Apuꞌ Levi, ni Apuꞌ Isacar, 8ni Apuꞌ Zabulon, ni Apuꞌ Jose sampay ni Apuꞌ Benjamin, piksepuluꞌ buꞌ duaꞌ ngibu ki tinuꞌusan. 9Tubus nitu, kaliꞌu pegenleng, naa melaun gupia getaw, ndaꞌiduni mekebilang dun. Sakup ilan di tibaꞌan nasud, dig launan bansa, dig lumaun benwa sampay dig lumaun pikebitan. Mimegindeg ilan di gedapan nu melengas gingkudan nu gadiꞌ, di mesunguꞌan dadema nu Nati Karniru, lumbus ilan pemekseluk gemputiꞌ mekelambung suub, peguidan nilani nga paka pisa. 10Mimeksay ilan, laung nilan, “Penalan ta su Megbebayaꞌ, su pektemuyen ta mukaꞌ su pegingkud dini melengas gingkudan nu gadiꞌ mukaꞌ penalan ta pa pagid ki Nati Karniru, puꞌ mikpuun dinilan duaꞌ su kegawen dinita.” 11Naa, su kelaun sesuguꞌen nu Megbebayaꞌ getaw langit, migalidung ilan pemegindeg dia melengas gingkudan kia, mukaꞌ di peglidungan dadema nu nga meglegulang kaunutan sampay di paat buuk tetubuꞌ biwat. Mimenlaub di gedapan nu gingkudan su nga getaw langit kia, pinginluꞌudan nilan su Megbebayaꞌ. 12Kaliꞌ ilan taluꞌ, “Amen! Ki Megbebayaꞌ kini, di ndaꞌi gikteben gembantang dadema tuꞌu penalan, megdedengeg mukaꞌ pemilangen metelisebuten. Di ndaꞌi tamanen gempia pekpeladpeladan, pegbesaan sampay pemilangen ginuungan. Mukaꞌ megbayaꞌ di ndaꞌi tamanen! Amen!” 13Naa mendadi, sala tawan di nga meglegulang kaunutan, sinaaken dinaan saꞌ ki nga getaw kia mimekseluk gemputiꞌ mekelambung suub, taꞌ taway dun mukaꞌ saꞌ tandaꞌ ilan genat. 14Kaliꞌu peksembag, “Uu Sir, ndaꞌu ma mesuunay. Mabuꞌ yaꞌai mekesuun dun.” Kaliꞌ taluꞌ, “Ilan kini su mikebian di mekendekendek gupia kelegenay. Ikdakan na nilan su nga suub nilan dig duguꞌ nu Nati Karniru, adun mekeputiꞌ na tanan. 15Kaas mekaindeg ilan di gedapan nu melengas gingkudan nu Megbebayaꞌ, mukaꞌ meketamuy ilan diniin gebii gendaw dinig Balay Pengedapan diniin. Penendingan ilan nu pegingkud di melengas gingkudan nu gadiꞌ, adun ndaꞌi mpenggulaula nilan. 16Kaas ndiꞌ nailan mainsan puliꞌ gutemen mukaꞌ kuaun, ndiꞌ na nilan metigeli mesait pedes atawaka taꞌ alanduni gininisan mainit. 17Puꞌ megingat dinilan lelayun ki Nati Karniru pegindeg dia titengaꞌ nu melengas gingkudan. Pengegaken ilan niin ditu tebud nu tubig mekegbegay ketubuꞌ ndaꞌi tamanen, mukaꞌ penguaꞌen dinilan nu Megbebayaꞌ sug launan mekpaubaꞌ di ginaa nilan.”

Biwasan 8

1  Naa mendadi, su kepitu pideketen lunay nug linulun sinulat, benaꞌ sikat nu Nati Karniru, mingamed dayun ditug langit taman ginengaꞌ uras. 2Benaꞌ mitektaki ginengaꞌ uras, minitaꞌu su pitu tawan sesuguꞌen nu Megbebayaꞌ getaw langit pegindeg ditu gedapan nu Megbebayaꞌ. Miktukid ilan bugyung. 3Naa, duun paduni sala getaw langit mituaꞌ pegindeg dia mesunguꞌan nu gentudan gilak. Piguidan nu getaw langit kiaig yaꞌung bulawan, betangan pelinan. Bigay dayun diniin melaun pelinan, adun pedumanen ditu kenenabi nu nga piglegetawan nu Megbebayaꞌ, dayunen ilakay dia gentudan di mesunguꞌan nu melengas gingkudan kia. 4Su gebel nu tinutung pelinan mipeduma di kenenabi nu nga piglegetawan nu Megbebayaꞌ, luminintuk diag ditaas, genat tug yaꞌung piguidan nu getaw langit pegindeg dia gedapan nu Megbebayaꞌ. 5Pipenuꞌ dayun nu getaw langit gapuy sug yaꞌung bulawan bitangan pelinan pileket diag dibabaw gentudan gilak, mukaꞌ libuꞌanen dun sug lumbang. Migdelalak metikteg, duuni mesasak gupia, migbunsilaꞌi gilat, miglinug pa padun. 6Maꞌantu, su pitu tawan sesuguꞌen nu Megbebayaꞌ getaw langit bigayan bugyung, miuyaꞌ nailan megiup dun. 7Mendadi, sug bekna getaw langit, pitaluꞌen kig bugyungen. Dinupiꞌan dayun sug lumbang, dupiꞌ batu mukaꞌ gapuy lamug duguꞌ. Mitutung dayun su ketelu ilasen dig dibabaw lumbang, mukaꞌ su ketelu ilasen di nga gayu sampay su nga kelaun mailaw sigbet. 8Naa, su keduaꞌ getaw langiten, pitaluꞌen pelum kig bugyungen. Duun dayuni milabuꞌ ditug dagat maꞌniin palas gembagel dungus megligaꞌ. Su ketelu ilasen ditug dagat, binaluy na dema duguꞌ. 9Mukaꞌ pa pagid migelaꞌ matay su ketelu ilasen nu metetubuꞌ mukaꞌ sedaꞌ diag dagat. Migelaꞌ pa padun meglaat su ketelu ilasen di ngag bangkaꞌ ditu. 10Naa su ketelu getaw langiten, pitaluꞌen pelum kig bugyungen. Lemen laak miktaluꞌ sug bugyung, duuni gembagel bitun megligaꞌ maaꞌ nu tilaw, milabuꞌ, mitenaꞌ ditu ketelu ilasen di tinubigan sampay nga tebud. 11Ngalan nug bitun kia, Gempait. Benaꞌ mitenaꞌ, binaluy gempait su ketelu ilasen di tubig, kaas melaun getaw minatay sabaꞌ nilan minum di tubig mibaluy gempait. 12Mendadi pitaluꞌ na pelum nu getaw langit kig bugyungen, kia su kepaaten na. Misugat dayun su ketelu ilasen di gendaw, su ketelu ilasen dig bulan sampay su ketelu ilasen di ngag bitun. Kaas su ketelu ilasen di kedelag nilan, ndiꞌ na mbaluy. Kaas dumilem dema su ketelu ilasen nu gendaw mukaꞌ nu gebii. 13Kaliꞌu pengenleng puliꞌ, minitaꞌui maaꞌ nu tipuli peglayug diag ditaas, lamugen memeksay, “Ay! Mekelelaatlelaat! Mekelelaatlelaat tuꞌu! Saꞌ peteluꞌen nu telu tawan pa getaw langit sug bugyung nilan, mekelelaatlelaat gupia su kelaun pektetubuꞌ dinig dibabaw lumbang!”

Biwasan 9

1  Naa mendadi, pitaluꞌ na pelum nu kelima getaw langiten kig bugyungen. Duun dayuni minitaꞌu bitun, salabuuk, daan na milabuꞌ diag lumbang. Kaliꞌu pegbentayay, kig bitun kia, bigayan gunsiꞌ pekpukaꞌ dig luak bianan pangay ditug bayaꞌ. 2Pinukaꞌ dayun nug bitun kia sug bayaꞌ. Minipuglun guaꞌ diag bisuangani gebel, maꞌniin gebel nu gembagel gupia gapuy. Dumilem duni gendaw mukaꞌ gawanawan. 3Duun dayuni nga gapan luminusad ditug lupaꞌ genat dia gebel kia. Su nga gapan, bigayan ilan lala, mesama dig lala nu gulangulang. 4Binandu dinilan su kepeglaat nilan sia tu sigbet, tu nga gayu sampay tu nga pimula, iin daw laaki pelegetan nilan su nga getaw ki ndaꞌiduni tuꞌus nu Megbebayaꞌ di gangasen. 5Ndaꞌ dadema buang dinilan petain nilan su nga getaw pelegetan nilan, laak iin pasiꞌi bigay dinilan, pelesain nilan di mesait su nga getaw ndaꞌ tuꞌusay, taman lima bulan. Su kesait nu kepetugaꞌ nilan di nga getaw, maaꞌ daw nu kesait saꞌ segeden gulangulang. 6Mendadi taman lima bulan kiin, enguten nu nga getaw matay sia, laak dagid ndiꞌ matay. Penengaun nu nga getawig bian kepatay nilan sia, laak maꞌniin ilan mpegliaw nu gumul nilan. 7Mendadi, ki nga gapan kini, palas nilan maꞌniin palas kebayuꞌ minuyaꞌ na sumakay dun pangay lumumpak. Dia gulu nilan duuni maaꞌ nu tundek bulawan. Su muluꞌ nilan, maꞌniin palas muluꞌ getaw. 8Sug buuk nilan, maꞌniin palas buuk libun, su ngisi nilan, maꞌniin palas ngisi limaung. 9Pinseluk nilan di gegdeb nilani penending dun maaꞌ nu palas putaw, dayun saꞌ megedegud su nga gekpak nilan, maꞌniin deguk nu melaun prada pegleguyuden nu nga kebayuꞌ saꞌ menggebek pangay lumumpak. 10Duuni gikug nilan mukaꞌ seged nilan maaꞌ danu gulangulang. Su gikug nilan, mekpetugaꞌ di nga getaw taman lima bulan. 11Naa, duuni gadiꞌ meguit di nga gapan kiin, iin su getaw langit megbayaꞌ na dig bayaꞌ. Iini ngalanen saꞌ pikebitan nu getaw Judea, si Abbadon, saꞌ pikebitan nu getaw Grecia, si Apolyon (saꞌitada maꞌananen su Menginapul). 12Mendadi sug bekna mekendekendek pelabuꞌ sungu mayan dig lumbang, mitubus na. Duun paig duaꞌ ginis pelum sungu mpenggulaula. 13Naa, pitaluꞌ na pelum nu keꞌenem getaw langiten kig bugyungen. Midengegu dayuni tingeg ditu paat buuk sungut nu gentudan gilak kia bulawan dia gedapan nu Megbebayaꞌ. 14Ki tingeg kia, miktaluꞌ dia keꞌenem getaw langiten pegawid bugyung, “Naa, ki paat tawan getaw langit kia binalud ditu gembagel tubig Eufrates, beluyay mu ilan!” 15Biluyanen tuꞌu ki paat tawan kia getaw langit. Gandang nailan pingandam, pemetain nilani ketelu ilasen di nga kilawan, di gempia uras, gendaw, bulan sampay taun tinduꞌ nu Megbebayaꞌ. 16Duuni nga sakup nilan sundalu peksakay kebayuꞌ. Tumuꞌ pisuun dinaan sug laun nu sundalu peksakay kebayuꞌ kia, 200,000,000, saꞌitada duaꞌ laksaꞌ piluꞌ di selaksaꞌ. 17Iin dayun pinitaꞌ dinaan su nga kebayuꞌ sampay su peksakay dun, pinseluk di gegdeb nilani penending dun, putaw gempula, maꞌniin ligaꞌ gapuy, melunaw dadema gupia miglamug medalag. Su nga kebayuꞌ pelum, gulu nilan, maaꞌ da gulu limaung. Mingguaꞌ dig babaꞌ nilani gapuy, gebel mukaꞌ asupre. 18Dayun puun di telu pelabuꞌ kiin, ki gapuy, gebel mukaꞌ asupre pekpengguaꞌ diag babaꞌ kebayuꞌ kia, mitimalan mematay su ketelu ilasen di nga kilawan. 19Puꞌ melala gupiaig babaꞌ mukaꞌ gikug ni nga kebayuꞌ kia. Su gikug nilan, maꞌniin mamak, duun masiꞌi gulunen, iini memesait di nga getaw. 20Laak pia maꞌantu, su ngag duma getaw ndaꞌ pematay di nga pelabuꞌ kini, ndaꞌ nilan gusay teliuday su pektemuyen nilan, iin da gusay piktamuy nilan su pigbaal laak nilan. Minamal ilan sungkin mektamuy ditu menenulay mukaꞌ ledawan binaal bulawan, bulawan selapiꞌ, bedunsi, batu sampay gayu, su nga ndiꞌ mekengitaꞌ, ndiꞌ mekebatik, sampay ndiꞌ mekepanaw. 21Ndaꞌ da nilan padun pegbiksuꞌay su kembinasa nilan, su nga kenigdud nilan dig duma nilan, su kenlelingay nilan sampay su kegdaaw.

Biwasan 10

1  Naa mendadi, minitaꞌui sala sesuguꞌen nu Megbebayaꞌ getaw langit ginuungan gupia, peglusad dinig lumbang genat ditug langit. Ki getaw langit kia, milipukutan iin nu gabun mukaꞌ piglidungan nug landungi gulunen. Su muluꞌen, mekesulaw maꞌniin nu mata gendaw, su mesekeg gupia geksuden, maꞌniin dadema pasek megligaꞌ. 2Piguidaneni maikaꞌ linulun sinulat biklad di kemeten. Migbelak megindeg, sug lintu geksuden piꞌindegen ditug dagat, sug bibangen pelum ditug lupaꞌan. 3Miktawag dayun maaꞌ nu genggel limaung, dayun simbag nu pitu buuk delalak, meketenug gupia. 4Lemen laak mideksuꞌig delalak, sulaten ku na sia. Laak dagid duuni midengegu taluꞌ ditug langit, kaliꞌ taluꞌ, “Su tinaluꞌ nu pitu buuk delalak, pegbuni mu, ndiꞌ mu sulatay!” 5Naa, minitaꞌu dayun su getaw langit, ki pegindeg diag dagat mukaꞌ lupaꞌ, tinggalenig baingkenen dapit lintu ditug langit, 6puꞌ suminapa, peksembayanen su Megbebayaꞌ su ndaꞌi gumulen, su Mikleb tug langit, Miwat tug lupaꞌ, Minunag tug dagat mukaꞌ Minaglis tu tubig, sampay Mitang tug lumaun bitang dun. Kaliꞌ sapa su getaw langit, laungen, “Ndaꞌidun na dema tuꞌui mekelangan dun! 7Puꞌ saꞌ peteluꞌen na nu kepitu getaw langiten kig bugyungen, dayun na tuꞌu penuuday nu Megbebayaꞌ ki pigbuni pigdelendemen di pisuunen dengantu tu nga sesuguꞌenen pimuunanen.” 8Naa mendadi, midengegu na puliꞌ su tingeg kiin ditug langit. Kaliꞌ taluꞌ dinaan, “Diaan ka na, alap mui mibeklad sinulat kia, ki peguidan nu getaw langit pegindeg diag dagat mukaꞌ lupaꞌ.” 9Kaas pisempelan ku dayun su getaw langit, adun penengiin ku diniin su maikaꞌ linulun sinulat. Kaliꞌ taluꞌ dinaan su getaw langit, “Alap mu ini, dayun aan mu. Naa saꞌ dia pa babaꞌ mu, memis maaꞌ teneb, laak saꞌ medul mu na, tulisan ka dun.” 10Naa saꞌ maꞌantu, inalapu tuꞌu su maikaꞌ linulun sinulat ditu kemeten dayun inaan ku. Memis tuꞌu sinegay diin pa babaꞌu, laung mu dun teneb. Laak benaꞌ midulu na, tinulisanu tuꞌu. 11Kaliꞌ pektaluꞌ dinaan, “Subay pegwali mu puliꞌ su taluꞌ nu Megbebayaꞌ mekatag di kelaun bansa mukaꞌ nasud, su kelaun ginis pikebitan metaluꞌ nu getaw, sampay su kelaun gadiꞌ.”

Biwasan 11

1  Mendadi bigayanu pektepeng maꞌniin sekud, dunut duuni miktaluꞌ dinaan, laungen, “Pegbuata, kig Balay Pengedapan tu Megbebayaꞌ, tepeng mu, sampay su gentudan gilak, dayun bilang mu dadema su kelaun getaw memektamuy dia. 2Laak ndiꞌ mu tepengay sug lenuꞌan diag liu, puꞌ kia, bigay na ditu nga getaw kanaꞌ getaw Judea. Ilan kiin, peglaatan nilan su syudad pinaas nu Megbebayaꞌ taman paat puluꞌ buꞌ duaꞌ bulan. 3Pepegwaliu dademaig duaꞌ tawan pekseluk suub saku, dayun pegukiten nilan su taluꞌ nu Megbebayaꞌ gikteb sengibu buꞌ duaꞌ gatus buꞌ enem puluꞌ endaw.” 4Naa kig duaꞌ tawan megukit kia, ilan sug duaꞌ puun gayu olibo, ilan dadema sug duaꞌ buuk betangan suluꞌ kia bitang ditu mesunguꞌan nu Kaunutan di tibuuk lumbang. 5Saꞌ duuni mekpeleget dinilan, mengguaꞌ dig babaꞌ nilani gapuy mekesapul dun su nga kumuntra dinilan. Maꞌantu, adini mauyaꞌanen mekpeleget dinilan duaꞌ, mekangay ditu kepatay. 6Mukaꞌ pagid duuni pegbayaꞌ nilan megbelibad dig dupiꞌ saanan nilan megwali tu taluꞌ nu Megbebayaꞌ. Mpegbiaꞌan nilan dadema su nga tebud mbaluy duguꞌ, mukaꞌ duun pa pagidi pegbayaꞌ nilan dig benwa, pia taꞌ pelebuꞌay dun, pia sanu deksuꞌi mauyaꞌan nilan pebianen nilan dun. 7Naa, kig duaꞌ tawan megwali, saꞌ metubus nilan peglegintuuday, bunuꞌen ilan nu mekendekendek menamad guaꞌ dig luak bianan pangay tug bayaꞌ. Daagen ilan nu menamad, dayunen ilan petayay. 8Sug bangkay nilan, mbilin laak ditug dalan nu gembagel syudad tandaꞌ linansang su Kaunutan nilan di kurus. Sodoma atawaka Ehiptoi sambingay ngalan nu gembagel syudad kiin. 9Naa, duuni nga getaw dig launan bansa, di kelaun pikebitan, sakup ilan di tibaꞌan benwa mukaꞌ lumaun nasud, pegeklungan nilan sug bangkay nug duaꞌ tawan kia taman telu endaw buꞌ selapus. Mukaꞌ ndiꞌ nilan buangen lebengay sug bangkay nug duaꞌ tawan megwali kia. 10Penleliagen dayun su kelaun getaw dinig dibabaw lumbang ditu kepatay nilan duaꞌ. Meglekebibu su nga getaw mukaꞌ megbebegayay ilan, puꞌ kig duaꞌ tawan megwali, mekpuun dinilan su nga kelegenay nu nga kilawan. 11Laak dagid benaꞌ minayan nai telu endaw buꞌ selapus, kig duaꞌ tawan megwali, pitubuꞌ ilan puliꞌ nu Megbebayaꞌ. Migbuat nailan tuꞌu, kaas mipatiꞌ gupia mendek su nga kelaun getaw mikaitaꞌ dinilan. 12Duun dayuni midengeg nug duaꞌ tawan megwali migbeksay ditu gekbus langit, kaliꞌ taluꞌ, “Lentu namu dini!” Lumintu nilan duaꞌ pangay tuꞌu ditug langit, pigalidungan ilan nu gabun saanan pegbantay dun su nga kumuntra dinilan. 13Iin dayuni miglinug metikteg. Naa su kesepuluꞌ ilasen di gembagel syudad, migebaꞌ, mimatay duni pitu ngibu tawan getaw. Su nga getaw ndaꞌ patay, mimegendek, pinalan nilan gupia su Megbebayaꞌ ditu gekbus langit. 14Naa, mipapas na su keduaꞌ pelabuꞌen. Laak, bentayay pa daan niu, sungu mateng ki ketelunen. 15Naa mendadi, su kepitu getaw langiten mibegayan bugyung, pitaluꞌen dayun kig bugyungen. Duun dayuni migdengan memeksay ditug langit, laung nilan, “Megbayaꞌ na tuꞌu tu tibaꞌan kilawan su Kaunutan ta Megbebayaꞌ mukaꞌ su Tinduꞌen Meglekaunutan, mukaꞌ iin, meglekaunutan di ndaꞌi gikteben!” 16Dayun sug duaꞌ puluꞌ buꞌ paat tawan meglegulang kaunutan memegingkud dia nga gingkudan nu gadiꞌ dia mesunguꞌan nu Megbebayaꞌ, mimenlaub ilan mengamuyuꞌ tu Megbebayaꞌ, 17kaliꞌ ilan pektaluꞌ, “Uu Kaunutan Megbebayaꞌ ki Tampusan Ginuungan, su tetubuꞌ nandaw buꞌ dengantu! Mekpaladpalad ami diniꞌa, puꞌ diin na gengkeman mu su gembagel pegbayaꞌ mu, mukaꞌ mikpuun ka na tuꞌu meglekaunutan. 18Minlimuuk su ngag bansa getaw kanaꞌ piglegetawan mu, puꞌ minateng na su masa nu kepelabuꞌ mu dinilan, ki masa nu kengukum mu tu nga mimatay, mukaꞌ gempia mu sugdaan di melengas su nga getaw sesuguꞌen mu migwali tu taluꞌ mu sampay su nga piglegetawan mu, sug lumaun megbasa diniꞌa, saꞌ su ngag datuꞌ saꞌ su gempusuk. Minateng na su masa gempia mu sepulen su nga menginapul di tibuukan lumbang!” 19Mendadi sug Balay Pengedapan ditug langit, mipukaꞌ, dayun midayag diag dialemen su kaban gindan tug bekna sabut nu Megbebayaꞌ. Dayun migbunsilaꞌi gilat, mingeneg, migdelalak metikteg, miglinug sampay migdupiꞌ batu, gempales dupiꞌ.

Biwasan 12

1  Naa mendadi, mituaꞌ ditug langit ki mekesalebuꞌ gupia tuꞌus. Duunig libun, su gendawi suuben, sug bulan, gindeganen, mukaꞌ mipenundek diniini sepuluꞌ buꞌ duaꞌ buuk bitun. 2Kig libun kini, sungu megbataꞌ. Sabaꞌ kesait nu kegbatik tianen, mengagedi tanan mengaduy. 3Naa, duun pa pelumi sala mekesalebuꞌ tuꞌus midayag ditug langit. Gembagel gupia metetubuꞌ, gempula, maꞌniin palas mamak atawaka buaya, pitu buuki gulunen, sepuluꞌi sungagen. Miktukid dadema tundeki nga gulunen. 4Mendadi impun nu maꞌniin buaya di gikugen su ketelu ilasen di ngag bitun diag langit, piniglaken dayun dinig lumbang. Pegindeg iin dayun dia mesunguꞌan nig libun kini, adun depaꞌenen su gembataꞌ saꞌ megigetaw na. 5Dayun megaanay kig libun kia. Kaliꞌ pegigetaw su gembataꞌ, bataꞌlaki, iin su meglekaunutan di nga kelaun nasud mukaꞌ bansa lemaꞌ denlag. Metegasi keguiten dinilan, puꞌ peguit dinilan su sekuden putaw. Laak dagid duuni suminakmit tu gembataꞌ, dayun iwit ditu Megbebayaꞌ, ditu melengas gingkudan gadiꞌ. 6Mikeglaguy dayun sug libun ditug limawaꞌ daan na pingandam nu Megbebayaꞌ pegbebenwananen. Piꞌingat dayun nu Megbebayaꞌ dia sug libun, taman sengibu buꞌ duaꞌ gatus buꞌ enem puluꞌ endaw. 7Mendadi benaꞌ mitektak na su sengibu buꞌ duaꞌ gatus buꞌ enem puluꞌ endaw, iin dayuni pikpuunan nu gubat ditug langit. Si Miguel, sala tawan di nga sesuguꞌen nu Megbebayaꞌ getaw langit, mukaꞌ su nga sakupen sama sesuguꞌenen, mingatu ilan ditu maꞌniin buaya kia. Ki maꞌniin buaya kia mukaꞌ su nga sakupen sama sesuguꞌenen, mingatu dailan dema megbunuꞌ. 8Laak dagid, dinaag gupia su maꞌniin buaya mukaꞌ su nga sesuguꞌenen kia. Pingutidan ilan dayun diag langit, subay ndiꞌ nailan puliꞌ megbenwa dia. 9Mendadi ki gembagel metetubuꞌ maꞌniin palas buaya, linabuꞌ na tuꞌu dini silung. Iinen su mamak dengantu, ngalanen su Palin mukaꞌ si Satanas, su miglimbung di tibaꞌan kilawan. Sampay su nga sama sesuguꞌenen getaw langit, linabuꞌ dailan dema gelaꞌ dinig lumbang. 10Mendadi, benaꞌ milabuꞌ ilan, duun dayuni midengegu beksay ditug langit, laungen, “Ki keglegawen nu Megbebayaꞌ di nga kilawan, minuud na tuꞌu nandaw! Su pegbayaꞌ nu Megbebayaꞌ, biwasanen na gupia, puꞌ iini tantu Gadiꞌ. Ki Tinduꞌ nu Megbebayaꞌ Meglekaunutan pa pagid, biwasan na dema sug daniin pegbayaꞌ! Puꞌ ki migindeg ditu gedapan nu Megbebayaꞌ adun dengatenen gebii gendaw su nga mimated dinita, iin, piawaꞌ na dinig langit. 11Su nga mimated dinita, mikedaag nailan ditug dumangat dinilan kia, pibian dig duguꞌ nu Nati Karniru, puun dadema tu taluꞌ nu Megbebayaꞌ piglegintuud nilan. Puꞌ ndaꞌ dig delendeman nilan su gumul nilan, kaas lagaꞌ na tuꞌu nu kesakup nilan su gumul nilan. 12Kaas yamu nga tibaꞌan megbenwa dinig langit, gempia penleliagen amu! Laak dagid, yamu nga megbenwa diag lupaꞌ mukaꞌ diag dagat, mekelelaatlelaat amu gupia! Puꞌ su Palin, luminusad na diniu. Iin, mipatiꞌ gupia mangit, puꞌ sabaꞌ misuunanen sungu na mengikteb su sikawanen menggulaula melaat.” 13Naa, ki maꞌniin palas buaya, kaliꞌen mesuunay puꞌ linabuꞌ dinig lumbang, pingeteden dayun sug libun kia migbataꞌ bataꞌlaki. 14Laak dagid sug libun, bigayan duaꞌ buuk gekpak gembagel tipuli, adun mekelayug meglaguy ditug limawaꞌ, ditu tandaꞌ paingaten iin taman telu taun buꞌ ginengaꞌ, adun ndiꞌ medepilan nu maꞌniin buaya. 15Dagid, ki maaꞌ nug buaya, sinumpitanen dayun sug libun tubig, laung mu dun maꞌniin nu guluan baaꞌ, adun sia manud ditu selegan sug libun. 16Laak dagid, ibangan pasiꞌ nug lupaꞌ sug libun, puꞌ miganga sug lupaꞌ, dayunen igupay su tubig sinumpit dun sia nug buaya. 17Iin, mitutung dayun gangiten ditug libun, kaas pigbunuꞌen su kelaun lain bataꞌ nug libun, saꞌitada su ngag lumaun mikpetuud ditu pinalinta nu Megbebayaꞌ, ki dumunut tu metuud ginukit ni Isus. 18Dayun ki maꞌniin palas buaya kia, megindeg dia geksid dagat.

Biwasan 13

1  1Mendadi benaꞌ ndaꞌ maiben, duuni minitaꞌu ki mekendekendek menamad guminawen diag dagat. Ki menamad kia, sepuluꞌ buuki sungagen, pitu buuki gulunen, miktukid tundeki nga sungagen. Su nga gulunen, miktukid dadema sulatay ngalan meksudiꞌ ditu Megbebayaꞌ. 2Iini palas nu menamad minitaꞌu, maꞌniin gembagel malig kuting. Su geksuden, maaꞌ danu gembagel gituꞌ telunan. Sug babaꞌen, maꞌniin babaꞌ limaung. Mendadi, su metetubuꞌ maꞌniin palas buaya, bigayen dayun ditu menamad su ginuungen mukaꞌ su keglekaunutanen sampay su metaas pegbayaꞌen. 3Naa, ki menamad guminawen ditug dagat, salabuuk di nga gulunen, mipatiꞌ mengelay, palas gangelen mekepatay. Laak dagid su gangelen, mikpaliꞌ na. Misebuꞌan dun dayun sug launan getaw, benaꞌ suminakup ilan diniin, 4mukaꞌ piktamuy nilan dadema su metetubuꞌ maꞌniin palas buaya, puꞌ sabaꞌ bigayen tu menamad kia su metaas pegbayaꞌen. Mukaꞌ piktamuy pa padun nu nga getaw su menamad. Kaliꞌ ilan taluꞌ, “Ki menamad kini, ndaꞌidunig lepengen. Ndaꞌiduni mekengatu megbunuꞌ dun!” 5Naa, ki mekendekendek menamad kiin, mibuang diniin menakabul sampay meksudiꞌ gupia tu Megbebayaꞌ, mukaꞌ bigayan pegbayaꞌ gikteb laak paat puluꞌ buꞌ duaꞌ bulan. 6Piksudiꞌanen su Megbebayaꞌ, su ngalan nu Megbebayaꞌ, mukaꞌ su pegbenwananen, sampay su ngag launan megbenwa ditug langit. 7Biwang dadema di menamad lumpakanen su nga piglegetawan nu Megbebayaꞌ dinig lumbang, mukaꞌ daagenen ilan, sampay bigayan dadema pegbayaꞌen meglekaunutan di kelaun bansa, di tibaꞌan benwa, dig launan getaw pia taꞌ pikebitanay dun, sampay dig lumaun nasud. 8Maꞌantu mektamuy tuꞌu diniin sug launan kilawan megbenwa dinig dibabaw lumbang, saꞌitada su nga getaw ndaꞌ mesulati ngalan nilan tug linulun sinulat nu pinatay Nati Karniru. Puꞌ su ndaꞌ pa mbaali gekleb langit buꞌ lupaꞌ, linista na dig linulun sinulat kiin su ngalan nu nga getaw mpeduma di ketubuꞌ ndaꞌi tamanen. 9Kaas adin sug duuni telinganen, mekineeg dema tuꞌu! 10Adini getaw singuꞌanen daapen, iini daapen tuꞌu. Adin pelumi getaw singuꞌanen kepetayanen sundang, sundangi pekpatay dun tuꞌu. Kaas ita nga piglegetawan nu Megbebayaꞌ, subay menamal ita mektigel di kelegenay ta, mukaꞌ sumalig ita gusay diniin. 11Mendadi duun pa pagidi minitaꞌu sala mekendekendek menamad gumiwaꞌ dig lupaꞌ. Ki menamad kia gumiwaꞌ dig lupaꞌ, duaꞌ buuki sungagen maaꞌ sungag nati karniru, laak su taluꞌen, maaꞌ danug buaya. 12Iin, pipegbiaꞌan nug bekna mekendekendek menamad, adun sumugut dun. Tigelen su tibuuk lumbang mektamuy ditug bekna mekendekendek menamad, su mipatiꞌ gangel laak mikpaliꞌ na. 13Naa, ki keduaꞌ mekendekendek menamaden, pinggulaulaneni nga mekesalebuꞌ ginuung, pilebuꞌanen gapuy kig lumbang kini genat ditug langit di pegitaꞌen nug launan getaw. 14Piglimbunganen su kelaun getaw dinig dibabaw lumbang pibian di mekesalebuꞌ tuꞌus biwang diniin penggulaulanen di gedapan nug bekna mekendekendek menamad. Sinuguꞌen dayun su kelaun getaw dinig lumbang megbaal ilan ledawan, palas nug bekna mekendekendek menamad, adun pegbasa diniin, su miangel sundang laak ndaꞌ mpatay dun. 15Biwang dayun tu keduaꞌ mekendekendek menamaden begayanen ginaa sug ledawan nug bekna mekendekendek menamad, adun mekektaluꞌ sug ledawan mukaꞌ mekepatay tu nga ndiꞌ mektamuy diniin. 16Tigelen dayun sug launan getaw, sug duuni gelalen saꞌ su ndaꞌidun, sug datuꞌ saꞌ su gempusuk, su gulipen saꞌ su kanaꞌ gulipen, betangan tuꞌus sug lintu kemet nilan mukaꞌ su gangas nilan. 17Ndaꞌiduni mekesaluy mukaꞌ mekeksesaluy, bisan taꞌ taway dun, subay su laak mibaalan tuꞌus. Ki tuꞌus kia, su ngalan nug bekna mekendekendek menamad, atawaka sug lumiru gantiꞌ tu ngalanen. 18Naa subay melisebuten amu. Adin su metaasi tinawanen, iini mekaulug dig lumiru kini nu menamad, puꞌ kig lumiru, guminantiꞌ di ngalan nu getaw. Ki genem gatus buꞌ enem puluꞌ buꞌ enem (666), iin sug lumiru nug bekna mekendekendek menamad.

Biwasan 14

1  Mendadi kaliꞌu pegenleng, minitaꞌu su Nati Karniru pegindeg ditug bentud Sion. Duun dademai megatus buꞌ paat puluꞌ buꞌ paat ngibu tawan getawig duma nu Nati Karniru. Ki nga melaun getaw kini, misulat di gangas nilan su ngalan nu Nati Karniru mukaꞌ su ngalan nu Gamaꞌen. 2Duun pa pagidi midengegu taluꞌ ditug langit maꞌniin deguk nu tubig dia metaas baga, maꞌniin dadema metikteg delalak. Su tingeg midengegu, mekauyuk arpa pegayep nu nga getaw. 3Naa ki nga megatus buꞌ paat puluꞌ buꞌ paat ngibu tawan getaw kini, memegindeg ilan dia mesunguꞌan nu melengas gingkudan gadiꞌ, di gedapan dadema nu paat buuk tetubuꞌ biwat sampay nu nga meglegulang kaunutan. Pemegbebaten nilanig begu bebat. Ndaꞌig lain getaw mekesuun dun, ilan laak su nga milekat dini tibuuk lumbang. 4Ilan dademai nga getaw, saꞌ beniꞌ dagid melinggas ilan, puꞌ ndaꞌ ilan pegdusa. Genat pa di kaikaꞌay nilan ndaꞌi kelemuꞌay nilan. Megdedunut ilan gusay ditu Nati Karniru, pia tandaꞌ iin pangay. Likat ilan nu Karniru di kelaunan kilawan, kaas ilani mibaal bekna begay ditu Megbebayaꞌ mukaꞌ ditu Nati Karniru. 5Puꞌ ndaꞌiduni medengeg taluꞌ nilan balus mukaꞌ kanaꞌ ilan medangat. Su Telu Tawan Sesuguꞌen nu Megbebayaꞌ Getaw Langit 6Naa mendadi, minitaꞌu pa paduni sala sesuguꞌen nu Megbebayaꞌ getaw langit peglayug ditu gawanawan. Ki getaw langit kini, peguitenen su Gempia Petenday ndiꞌ mpapas, adun mpelaktag di nga getaw dinig dibabaw lumbang, di tibaꞌan bansa, dig lumaun benwa, pia taꞌ pikebitanay dun, sampay ditu nga getaw di kelaun nasud. 7Miktegas dayun mektaluꞌi getaw langit, laungen, “Ki Megbebayaꞌ, pegbesaay niu iin dunut mendek amu dun, mukaꞌ penalan niu! Puꞌ mitektak na tuꞌu su sesaꞌ, ukumenen na tuꞌu su tibaꞌan kilawan. Pektamuy niu gusay su Mikleb dig langit, su Miwat dig lupaꞌ, su Minunag dig dagat sampay di nga kelaun tebud!” 8Duun dayuni keduaꞌ sesuguꞌen nu Megbebayaꞌ getaw langit suminukli ditug bekna getaw langit. Kaliꞌ pektaluꞌ su keduaꞌ getaw langiten, “Migebaꞌ! Ki migdedengeg gupia syudad kiin, Babilonia, migebaꞌ na tuꞌu! Iini pilebuꞌan dun, puꞌ piꞌinumen na di tibaꞌan getaw su gembisa penginumenen, ki penginumen, iin su gayaken gupia tu kegdusa.” 9Mendadi duun na pelumi ketelu getaw langiten suminukli ditug duaꞌ tawan kia miuna. Iin, miktegas dayun mektaluꞌ, “Adin su getaw mektamuy ditug bekna mekendekendek menamad mukaꞌ ditug ledawanen, sampay begayen mesulatani gangasen atawaka kemeten tuꞌus nu menamad kia, 10iin, mainumen pa su penginumen nu Megbebayaꞌ. Ndaꞌ belekwitay su penginumenen pia maikaꞌ, aalen ditu tasa nu gangiten, saꞌitada su kekpelabuꞌ nu Megbebayaꞌ dig lumaun mikesalaꞌ! Su kelaun kilawan mektamuy ditu mekendekendek menamad, pelegetan ilan di gapuy ndaꞌi kepalengen mukaꞌ di pegligaꞌ asupre. Kiin, mbianan nilan di pegitaꞌen nu nga pinaas sesuguꞌen nu Megbebayaꞌ getaw langit, sampay di gedapan nu Nati Karniru. 11Su gebel nu gapuy kia mekpeleget dinilan, peglintuk di ndaꞌi gikteben. Ki tibaꞌan kilawan mektamuy tu menamad mukaꞌ ditug ledawanen, bisan taꞌ taway dun misulatan ngalan nu menamadi gangasen, saꞌ su kemeten, gebii gendaw subay mektigel di keleget ndaꞌi kesikpaꞌen.” 12Kaas, ita pasiꞌ nga piglegetawan nu Megbebayaꞌ, su nga mekpetuud di pinalintanen mukaꞌ sumalig gusay ditu Kaunutan ta si Isus, subay menamal ita mektigel di kelegenay ta. 13Naa mendadi, duun dayuni midengegu tingeg ditug langit, kaliꞌ taluꞌ, “Kini pelum sulat mu. Genat nandaw leliagen gusay su nga mematay puun tu keksalabuuk nilan ditu Kaunutan!” Kaliꞌ sumpat sug Balakat nu Megbebayaꞌ, “Metuud lai daan, mekelali nailan tuꞌu dig lasay nilan, puꞌ saꞌ muliꞌ nailan dini, muit na dema nilan su sengkuꞌ nug lesayan nilan.” 14Mendadi tubus nitu, kaliꞌu pegbantay, minitaꞌui gemputiꞌ gabun, duuni pegingkud dia gabun maꞌniin nu kilawan. Ki pegingkud dia, duuni tundeken bulawan dia gulunen. Pegawid mauteng garab. 15Dayun duuni sala getaw langit gumiwaꞌ diag Balay Pengedapan tu Megbebayaꞌ, mukaꞌ minekeg mektaluꞌ ditu pegingkud dia gabun, “Peglabay mu su garab mu, peglegania na, puꞌ minateng na tuꞌu kig basa meglegani. Mainug na pakayaw su geniin dinig lumbang!” 16Piglabay dayun tuꞌu nu pegingkud dia gabun su garaben. Kaas sug lumbang, mitebas na. 17Naa, duun pa pagidi minitaꞌu sala getaw langit gumiwaꞌ ditug Balay Pengedapan tu Megbebayaꞌ ditu gekbus langit. Iin, peguit dadema mauteng garab. 18Mendadi, duun pelumi getaw langit gumiwaꞌ ditu gentudan gilak. Iini megbayaꞌ ditu gapuy. Tiwaganen su getaw langit kia, su peguit dadema garab, kaliꞌ taluꞌ, “Peglabay mu su garab mu, adun lugdas mu na su kelaun bunga gubas dia pigimulanan dun dig lumbang, puꞌ migelaꞌ na mainug su ngag bunganen!” 19Maꞌantu piglabay tuꞌu nu getaw langit su garaben mukaꞌ linugdasen dayun su kelaun bunga nu gubas kia. Benaꞌ mitubus, dayunen pengempunay, linabuꞌen dayun ditug luak tandaꞌ peesen nu Megbebayaꞌ su gubas adun baalenen penginumen. Ki kekpeesen kiin, iin su gangit nu Megbebayaꞌ. 20Laak pinees su nga gubas diag liu syudad. Benaꞌ pinees, migbaaꞌ dayuni pineesan dun. Kig baaꞌ, duguꞌ, telu gatus kilumitruig yebaꞌan nug duguꞌ, sedepai kedalemen.

Biwasan 15

1  Naa mendadi, duun na pelumi sala mekesalebuꞌ gupia tuꞌus minitaꞌu ditug langit. Duuni pitu tawan sesuguꞌen nu Megbebayaꞌ getaw langit, peguiten nilani pitu ginis pelabuꞌ mayan dinig benwa. Iin na su katapusan pelabuꞌ nu Megbebayaꞌ, megelaꞌ na tuꞌu mekpalas dun su gangiten. 2Mukaꞌ pagid, duun dademai minitaꞌu dagat, maꞌniin palas pagalungan milemugan gapuy. Minitaꞌu pa pagid su nga getaw mikegdaag ditug bekna mekendekendek menamad, sug duunig ledawanen mukaꞌ sug lumiru ledawan nu ngalanen. Ki nga getaw kini, memegindeg ilan ditu geksid nug dagat kia maꞌniin palas pagalungan, peguidan nilani ngag arpa bigay dinilan nu Megbebayaꞌ. 3Pegbebaten nilan sug bebat ni Moises, su sesuguꞌen nu Megbebayaꞌ dengantu, iin dademaig bebat nu Nati Karniru. Kaliꞌ ilan pegbebat, “Uu Kaunutan Megbebayaꞌ, Tampusan Ginuungan, Su gulaula mu, migleep gupiaig dengegan nu kelengasen. Kig baalen mu, mekesalebuꞌ tanan! Ndaꞌiduni nasud, saꞌ kanaꞌ yaꞌai meglekaunutan dun. Kig betad mu, meglepeng tandeng mukaꞌ metuud gupia. 4Ndaꞌidun bai getaw ndiꞌ megbasa diniꞌa, uu Kaunutan? Adin ba saani mpauk mangken puꞌ melengasi pegbayaꞌ mu? Puꞌ ndaꞌidunig lain mikpaas ditu melaat, ditu salaꞌ, yaꞌa laak. Mekpesempel diniꞌa su nga ginsekupan nu tibaꞌan nasud, adun mengamuyuꞌ ilan diniꞌa. Puꞌ medayag nu kelaun getaw su mekesuun gulaula mu.” 5Mendadi tubus nitu, minitaꞌu sug Balay Pengedapan tu Megbebayaꞌ ditu gekbus langit kampuꞌ nug lepintaw dia pegbenwanan nu Megbebayaꞌ, mipukaꞌ. 6Gumiwaꞌ diai pitu tawan sesuguꞌen nu Megbebayaꞌ getaw langit, peguiten nilan su pitu ginis katapusan pelabuꞌ pebianen dinig dibabaw benwa. Mengelinggat tanani suub nu nga getaw langit kia sabaꞌ keputiꞌen, sabaꞌ dadema kelenuꞌen. Duun dadema di gegdeb nilani misulagdat dun bulawan. 7Mendadi salabuuk di nga paat buuk tetubuꞌ biwat kia, duuni pitu buuk yaꞌung bigayen tu nga pitu tawan getaw langit kia. Ki pitu buuk yaꞌung kini, gaalan bulawan, mipenuꞌ nu gangit nu Megbebayaꞌ, su ndaꞌi gumulen. 8Naa sug Balay Pengedapan tu Megbebayaꞌ, mileep gebel puun tu tiag nu Megbebayaꞌ mukaꞌ ginuungen. Kaas ndaꞌiduni mekeseled dig balay kia, subay mpapas pai pitu ginis pelabuꞌ kia iwit nu pitu tawan sesuguꞌen nu Megbebayaꞌ getaw langit.

Biwasan 16

1  Mendadi, duuni metikteg gupia taluꞌ diag Balay Pengedapan tu Megbebayaꞌ. Tiluꞌaneni pitu tawan sesuguꞌen kia nu Megbebayaꞌ getaw langit, laungen, “Panaw namu. Bunag na niu ditug lumbang ki pitu buuk gaalan niu bitangan gangit nu Megbebayaꞌ!” 2Naa sug bekna getaw langit kia, mipanaw dayun tuꞌu, binunagen tuꞌu su peguidanen gaalan dinig lumbang. Lemen laak mibunag, duun dayuni mesait gupia penleduun mituaꞌ dia panit nu nga getaw misulatan ngalan nu mekendekendek menamad, su kelaun miktamuy ditug ledawanen. 3Mendadi benaꞌ mitubus, su keduaꞌ getaw langiten, binunagen na pelum su gaalanen, ditunen pelum binunag dagat. Sug dagat, binaluy dayun maaꞌ nug duguꞌ bangkay. Dayun mimatay su kelaun metetubuꞌ mukaꞌ sedaꞌ diag dagat. 4Tubus nitu, su ketelu getaw langiten, binunagen na pelum su gaalanen, ditunen pelum binunag ngag lawas tubig mukaꞌ ditu nga tebud. Binaluy dadema duguꞌ su nga tubig sampay su nga kelaun tebud. 5Midengegu dayun su tingeg nu getaw langit megbayaꞌ tu tubig. Kaliꞌ taluꞌ, “Uu Diwata mikpaas ditu melaat, ditu salaꞌ, su tetubuꞌ nandaw mukaꞌ su tetubuꞌ dengantu, meglepeng gupia ki nga kengukum mu kini di nga getaw. 6Su nga getaw kia, kagina pitigis ma nilan sug duguꞌ nu piglegetawan mu kampuꞌ nu nga megwali tu taluꞌ mu, naa piꞌinum mu dadema dinilan duguꞌ. Iin maig bantang sugda dinilan.” 7Midengegu dademai miktaluꞌ dia gentudan gilak, laungen, “Uu Kaunutan Megbebayaꞌ Tampusan Ginuungan, su kengukum mu, meglepeng tantu mukaꞌ metuud gupia!” 8Mendadi su kepaat getaw langiten, binunagen na pelum su gaalanen, ditunen binunag mata gendaw, kaas biwang dun pepesuꞌen su nga getaw sabaꞌ nu kainiten. 9Dayun mipatiꞌ tuꞌu mpasuꞌ su nga getaw dinig dibabaw lumbang, sabaꞌ kainit nu gendaw. Tinampalaksaan nilan dayun su Megbebayaꞌ, su migbayaꞌ di nga kelaun pelabuꞌ. Laak dagid bisan maꞌantu, ndaꞌ ilan gusay pegbiksuꞌ di salaꞌ nilan mukaꞌ ndaꞌ nilan gusay pegdedengegay su Megbebayaꞌ. 10Mendadi, su kelima getaw langiten, binunagen na pelum su gaalanen. Binunaganen dun su gingkudan nu mekendekendek menamad. Su keglekaunutan nu menamad kia, dumilem dayun. Pingebut tanan nu nga getaw sug dilaꞌ nilan sabaꞌ kektigel nilan di mesait. 11Tinampalaksaan nilan su Megbebayaꞌ ditug langit, sabaꞌ nu nga mesait nilan mukaꞌ nu nga melaat gupia leduun nilan. Laak dagid bisan maꞌantu, ndaꞌ nilan gusay teliuday su melaat gulaula nilan. 12Mendadi, su keꞌenem getaw langiten, binunagen na pelum su gaalanen. Ditunen binunag lawas nu gembagel tubig piningalan dun Eufrates. Mitian dayun su tubig, puꞌ adun duunig dalan nga gadiꞌ mpanaw genat ditu dapit silangan. 13Minitaꞌu dayun ki maꞌniin palas buaya kia, mukaꞌ sug bekna mekendekendek menamad, sampay su sala tawan tautau pimuunan daw nu Megbebayaꞌ. Telu ilan. Duun dademai gumiwaꞌ dig babaꞌ nilan, telu buuk mekelemuꞌlemuꞌ menenulay. Ki menenulay kia, palas nilan maꞌniin nu gekbak. 14Ginuungan ilan gupia menggulaula mekesalebuꞌ. Tukiden nilan laaway sug launan gadiꞌ dini tibuuk lumbang, pungunen nilan, puꞌ adun menlumpak ilan saꞌ mateng na ki mekesalebuꞌ gendaw tinduꞌ nu Megbebayaꞌ, su Tampusan Ginuungan. 15Naa, midengegu miktaluꞌ su Kaunutan ta, “Pektalentenay niu gupia! Mpuliꞌ dau diin maaꞌ nu ketuaꞌ nu megdaaw, puꞌ metekawan. Su pegenduk mukaꞌ sug lelayun pegandam di penepetenen adun saꞌ tekaw mekepanaw, kanaꞌ da peglebas, ndiꞌ da mpiidan di gedapan nu melaun getaw, ilan, leliagen ilan.” 16Naa, minitaꞌu dayun pinungun tuꞌu nu menenulay su nga gadiꞌ, ditu nilan pungunay salabuuk benwa, piningalan dun nu getaw Judea Armagedon. 17Mendadi, su kepitu getaw langiten, binunagen na pelum su gaalanen. Ditunen binunag gawanawan. Duun dayuni minikteg mektaluꞌ ditug Balay Pengedapan tu Megbebayaꞌ, kaliꞌ pektaluꞌ, “Naa mingikteb na!” 18Migilat dayun lamug mikpenlugung, mesasak gupia, sampay metiktegig linug. Genat pa dengantu ndaꞌ pa siben bianay ki maꞌnia ketiktegen. 19Saꞌ maꞌantu, su migdedengeg gupia syudad kia Babilonia, mipegilas telu ilasan, mukaꞌ migebaꞌ tanan su ngag lunsud di nga kelaun nasud. Puꞌ su Megbebayaꞌ, midelendemen su syudad, kaas piꞌinumen dun su penginumen bitang tu tasanen, saꞌitada su gembagel gangiten. 20Mukaꞌ su kelaun pinuluꞌan diag dagat mukaꞌ su ngag binentudan, migelaꞌ dadema malep. 21Dinupiꞌan dayun dupiꞌ batu su nga getaw dinig dibabaw lumbang. Kada salabuuk dig dupiꞌ batu kia, naa lima puluꞌ kiluig begaten. Tinampalaksaan dayun nu nga getaw su Megbebayaꞌ, sabaꞌ melaat patiꞌ pelabuꞌ sug dupiꞌ batu kia.

Biwasan 17

1  Naa mendadi, sala tawan di nga pitu tawan sesuguꞌen nu Megbebayaꞌ getaw langit pegawid pitu gaalan, mikpesempel dinaan. Kaliꞌ pektaluꞌ, “Dunuta dinaan, puꞌ ki migdedengeg libun kiin tebiaꞌ meglaat pekesuunan, paitaꞌu diniꞌa saꞌ endutaꞌen ku dun pelebuꞌay. Guluganen su gembagel syudad dia mibetang tandaꞌ nu timualag. 2Su nga gadiꞌ dinig lumbang kini, tebiaꞌ miksumbang tu migdedengeg laat libun kia. Maꞌniin mibulek di penginumen su kelaun getaw sabaꞌ nu kainum nilan dig dusanen.” 3Naa mendadi, pingepuꞌanu nug Balakat nu Megbebayaꞌ mukaꞌ iwitu nu getaw langit ditug limawaꞌ. Benaꞌ ditu nau, duuni minitaꞌu libun peksakay di gempula menamad. Su sikayanen menamad, mekendekendek, mileep sulatay nga ngalan meksudiꞌ tu Megbebayaꞌ, pitu buuki gulunen sampay sepuluꞌ buuki sungagen. 4Naa, kig libun kini, piselukan suub, metinggasi kepulanen. Miputus dadema pekayan bulawan, ngag bagabaga mukaꞌ nga perlas.Pegawid pa pagid tasa bulawan mipenuꞌ penginumen, saꞌitada su nga mekepiidpiid gulaula kampuꞌ nu kelaun melaat gulaula, sengkuꞌ nu kesumbangen. 5Misulat dadema di gangaseni ngalan, laak igludi guluganen. Iini misulat, “Kig Babilonia, migdedengeg syudad, su ginaꞌ nu nga kelaun libun tebiaꞌ meglaat pekesuunan sampay su nga menggulaula gininisan mekepiidpiid dinig dibabaw lumbang kini.” 6Mukaꞌ minitaꞌu kig libun kia, mibulek dig duguꞌ nu nga piglegetawan nu Megbebayaꞌ, sug duguꞌ nu nga getaw pipatayen sabaꞌ nu kesakup nilan dini Isus. Kaliꞌu maitaꞌ sug libun, misebuꞌanu dun gupia. 7Laak su sesuguꞌen nu Megbebayaꞌ getaw langit, kaliꞌ saak dinaan, “Taꞌ mai misebuꞌan ka dun? Kig libun kia, pesuun ku pa diniꞌa su giglud guluganen sampay su gulugan nu sekayanen mekendekendek menamad, ki pitu buuki gulunen mukaꞌ sepuluꞌi sungagen. 8Ki menamad kia minitaꞌ mu, gandang tetubuꞌ, laak nemun, minatay na. Laak sungu na guaꞌ pelum ditug bayaꞌ, adun mekangay ditu pektipuan dun tantu. Misebuꞌan duni nga getaw megbenwa dinig dibabaw lumbang ndaꞌ mesulati ngalan nilan dig linulun sinulat tandaꞌ milista su ngalan nu getaw mpeduma di ketubuꞌ ndaꞌi tamanen, ki gandang na misulat su ndaꞌ pa mbaali gekleb langit buꞌ lupaꞌ. Puꞌ su menamad, gandang tetubuꞌ, laak minatay na mukaꞌ metuaꞌ pa puliꞌ.” 9Laung padun nu getaw langit, “Naa, subay metelisebuten su getaw, subay duuni kekesuunen, adun maulugen ini. Su pitu buuk gulu nu mekendekendek menamad, iin su pitu dungusan pegingkudan nug libun kia. Sala guluganen, pitu tawan gadiꞌ. 10Naa, su pitu tawan gadiꞌ kia, lima tawan dinilan, ndaꞌ na. Su sala tawan dinilan, peglekaunutan pa nemun. Su sala pa, ndaꞌ pa metuaꞌ. Laak saꞌ mateng nain, ndiꞌ dadema maibeni keglekaunutanen. 11Ki mekendekendek menamad kiin, gandang tetubuꞌ dayun minatay, iini kewalu adiꞌen, duma nu nga pitu tawan gadiꞌ. Iin, peksungu ditu kepatayen ndaꞌi gikteben. 12“Su minitaꞌ mu kia sepuluꞌ buuk sungag nu menamad, iini sepuluꞌ tawan gadiꞌ pelum, laak ilan, ndaꞌ pailan pekpuun meglekaunutan. Begayan pailan pegbayaꞌ megduma ilan di mekendekendek menamad meglegadiꞌ taman laak sauras. 13Salabuuk daig delendeman nu sepuluꞌ tawan gadiꞌ. Su ginuung nilan sampay su pegbayaꞌ nilan, begay nilan ditu mekendekendek menamad. 14Megbunuꞌ pailan ditu Nati Karniru, laak dagid daagen ilan nu Nati Karniru mukaꞌ nu nga sakupen, su nga pingenggaten, tinduꞌen mukaꞌ mibaal meseligan sakupen. Puꞌ ki Nati Karniru kini, iin su Meglekaunutan di nga kaunutan mukaꞌ Meglegadiꞌ di nga gadiꞌ.” 15Laung padun dinaan nu getaw langit pegawid gaalanen, “Naa, ki minitaꞌ mu lawas tubig kia miktimualag ditu tandaꞌ pegingkud sug libun tebiaꞌ meglaat pekesuunan, iini getaw di melaun bansa, di metibaꞌ benwa, sampay di gininisan nasud mukaꞌ pikebitan. 16Naa su pelum minitaꞌ mu sepuluꞌ buuk sungag nu menamad, saꞌitada su sepuluꞌ tawan gadiꞌ kampuꞌ nu mekendekendek menamad, mesengay nilan gusay kig libun kia. Penguiꞌen nilan sug launan gimunen benaꞌ melebasan laak iin. Aanen pa nilan padun su guneden dayun nilan tutungay su samaꞌ dig libun kia. 17Puꞌ pidelendem nu Megbebayaꞌ dinilan pekpelasen nilan su mauyaꞌanen. Sug bian dun, meksalabuuk ilan sampay megbegay ilan pegbayaꞌ nilan meglekaunutan ditu mekendekendek menamad. Mekpetuud ilan ditu menamad, sampay megelaꞌ na menuud su tinaluꞌ nu Megbebayaꞌ.” 18Diksuꞌ nu getaw langit su tinaluꞌen dinaan, laungen, “Naa ki minitaꞌ mu kia libun tebiaꞌ meglaat pekesuunan, iin daan su migdedengeg syudad migbayaꞌ di nga kelaun gadiꞌ dinig lumbang nemun.”

Biwasan 18

1  Mendadi tubus nitu, duuni minitaꞌu pelum sala sesuguꞌen nu Megbebayaꞌ getaw langit peglusad dinig lumbang genat ditug langit. Iin, metaas gupiai pegbayaꞌen. Su tiagen, mitiagan dun sug liwenagan nig lumbang kini. 2Migbeksay dayun, kaliꞌ pektaluꞌ, “Migebaꞌ na! Ki migdedengeg syudad Babilonia, migebaꞌ na tuꞌu! Genat nandaw ndaꞌi megbenwa dun, subay laak nga ginis menenulay sampay su kelaun ginis mekelemuꞌ mukaꞌ mekesalasala manukmanuk. 3Iini migebaꞌ dun, puꞌ kig libun kia tebiaꞌ meglaat pekesuunan gitunganen su syudad, miginum di gembisa penginumenen sug launan nasud, saꞌitada di gayak nug libun dig dusa. Minlelingay dun su nga gadiꞌ dig lumbang, mukaꞌ duminatuꞌ gupia su nga nigusyanti puun tu ketagia nu melaat gayak nug libun.” 4Mendadi iin pa pagidi tingeg midengegu ditug langit, kaliꞌ taluꞌ, “Yamu nga piglegetawan ku, pegawaꞌ amu dia syudad kia! Pegliaw niuig libun kia! Iin, ndiꞌ amu pekpedelaꞌig di salaꞌen, adun ndiꞌ damu dema mpeduma di ginukuman pelebuꞌen ku diniin! 5Puꞌ su salaꞌen, tinalimpuk, misangkuꞌ ma tug langit, pingebet na nu Megbebayaꞌ su melaat betaden. 6Peglegetay niu iin sama gupia di kepeglegeten diniu. Su pinggulaulanen diniu, suliꞌay niu duaꞌ piluꞌ. Su penginumen piꞌinumen diniu, painumay niu pelum iin dig duaꞌ piluꞌ pai kebisanen. 7Su ketaas nu kepetaasen dig lawasen mukaꞌ su kemis nu kebetangen, pesemaay niu dun su kegleget niu diniin mukaꞌ su kelegenayen. Lelayun pekteluꞌenen dig lawasen, laungen, ‘Kini dau pegingkud maaꞌ nug bai, kanaꞌ dau dema balu, kaas ndiꞌu na daan tuꞌu mbianan su nga kelegenay!’ 8Kagina kiaig delendemanen, megelaꞌen mbianay sug launan pelabuꞌ diniin dig lagaꞌ sendaw laak. Kinii pelabuꞌ diniin, su meliget leduun, nga kelegenay di ginaa, mukaꞌ gunus sampay metutung di gapuy. Puꞌ kiin, su Kaunutan Megbebayaꞌ mengukum diniin, tampusan metaasi ginuungen.” 9Mendadi su nga gadiꞌ dinig dibabaw lumbang mipeduma ditu melaat gayak nug libun mukaꞌ ditu kegdusanen, saꞌ maitaꞌ nilan su gebel nu ketutung diniin, megbeksay ilan mengaduy, lamug nilan menembit. 10Memegindeg ilan dia melayuꞌ, puꞌ mendek ilan mbuus mpeduma ilan ditu kelegenayen, mukaꞌ mektaluꞌ ilan, “Apelai! Mekelelaatlelaat! Ki syudad Babilonia kini, migdedengeg gupia mukaꞌ migbayaꞌ di melaun nasud, dayun di sauras laak mibiananen na su ginukuman diniin.” 11Naa, su nga nigusyanti kia, mengelaw dailan dema mukaꞌ melegenan ilan, puꞌ sabaꞌ ndaꞌidun nai menaluy ditu ngag degangan nilan. 12Ndaꞌ nai menaluy bulawan, bulawan selapiꞌ, bagabaga sampay perlas. Ndaꞌ nai getaw menaluy penepeten, pia kendutaꞌ pai kelengasen sug budabudanen, saꞌ gemputiꞌ, saꞌ gempula, saꞌ pekayan gupia. Ndaꞌidun dademai menaluy melengas gayu mukaꞌ pimetang binaal gayu, tangu, mukaꞌ nga ginis putaw mukaꞌ tisaꞌ. 13Ndaꞌ na pagidi menaluy gelingag, nga pagemut, pelinan, penginumen saꞌ lana, garina, trigo, baka saꞌ karniru, kebayuꞌ mukaꞌ sekayan duunig ligiden, sampay getaw, saꞌitada nga gulipen. 14Pekteluꞌen pa pagid nu nga nigusyanti ditug libun gitunganen su syudad, laungen, “Su kelaun gayak mu gimu, mialep na. Su tibaꞌan gaꞌus mu sampay su kelengas nug lawas mu, migelaꞌ na mbeleng. Ndiꞌ mu na maitaꞌ puliꞌ!” 15Laak memegindeg dia melayuꞌ su nga duminatuꞌ puun tu kendagang nilan dia syudad kia, puꞌ mipatiꞌ ilan mendek mbuus mpeduma ilan di kelegenay nu syudad. Melegenan ilan mukaꞌ mengelaw ilan. 16Kaliꞌ ilan taluꞌ, “Apelai! Mekelelaatlelaati syudad Babilonia kini, asa migdedengeg gupia sia! Kitegaman nu sakupen, mekseluk ilan melengas gupia penepeten, gemputiꞌ saꞌ gempula, sampay megimakay ilan bitekel, baklaw mukaꞌ singkil bulawan, bagabaga mukaꞌ perlas. 17Dayun lagaꞌ sauras, migelaꞌ gupia mbeleng dun su nga kelaun gimu nilan.” Naa, su ngag launan meguit pelum bangkaꞌ, su nga sumakay dun, su kelaun mengimbaal diag bangkaꞌ sampay sug launan megleketubuꞌ dig dagat, mimegindeg ilan dia melayuꞌ di syudad, 18mukaꞌ migbeksay, saanan nilan megbantay tu gebel nu ketutung diniin, kaliꞌ taluꞌ, “Genat pa dengantu ndaꞌidun naig lain syudad mesama puliꞌ di migdedengeg kini syudad!” 19Igbudan nilan dayun gabu lupaꞌ su gulu nilan mukaꞌ miktenlis ilan mengaduy, lamug nilan menembit, laung nilan, “Apelai! Mekelelaatlelaati migdedengeg syudad kini! Su ngag launan duunig bangkaꞌen, duminatuꞌ puun tu gaꞌusen. Dayun lagaꞌ sauras migelaꞌ mbeleng diniin su gikteb gaꞌusen.” 20Naa taluꞌu diniu, yamu nga getaw langit, penleliagen namu, puꞌ ki syudad kini, migebaꞌ na! Yamu nga piglegetawan nu Megbebayaꞌ dinig lumbang, sampay yamu nga peneliganen mukaꞌ pimuunanen, penleliagen namu! Puꞌ su pinggulaula diniu nu syudad Babilonia, inukuman na nu Megbebayaꞌ. 21Mendadi, duun pelumi sesuguꞌen nu Megbebayaꞌ getaw langit ginuungan gupia, minimud batu maꞌniin bagel galingan, dayunen lebuꞌay ditug dagat. Kaliꞌ taluꞌ, “Ki migdedengeg syudad Babilonia, maꞌniniꞌi kegebaꞌen tekaw. Dayun ndiꞌ na maitaꞌ puliꞌ. 22Ndiꞌ na medengeg puliꞌ dia syudad su tingeg arpa, bebat getaw, taluꞌ lantuyan atawaka bugyung! Ndaꞌidun demai panday mengimbaal dia, pia taꞌ tinawanay dun! Ndiꞌ na puliꞌ medengeg dia sug deguk galingan! 23Ndiꞌ na puliꞌ maitaꞌ diaig lamag nu suluꞌ, ndiꞌ na padun medengeg dia su kabit nug beliꞌiin. Kiin, asa su nga mengnigusyu dia, daansamaꞌ miglekaunutan ilan di tibuuk benwa. Piglimbungan nilan su kelaun getaw dini tibuuk lumbang pibian di sagya pengemaw nilan.” 24Naa, ki syudad Babilonia kini, iini inukuman dun, puꞌ minitaꞌ diaig duguꞌ nu nga pimuunan nu Megbebayaꞌ sampay su nga piglegetawanen, kampuꞌ nug duguꞌ nu ngag launan pinatay diag dibabaw lumbang.

Biwasan 19

1  1Mendadi tubus nitu, duuni midengegu maꞌniin nu gelang nu melaun gupia getaw mektaluꞌ ditug langit. Kaliꞌ ilan taluꞌ, “Su Megbebayaꞌ, penalan ta! Mikpuun diniin su kegawen dinita, mukaꞌ iini megdedengeg gupia sampay ginuungan tandeng! 2Metuud daan sug lumbus kengukumen, meglepeng gupia! Puꞌ inukumanen su migdedengeg kia libun tebiaꞌ meglaat pekesuunan, saꞌitada su gembagel syudad Babilonia, puꞌ pegdaangan nug libun kia su tibuuk lumbang puun tug dusanen. Sinilaꞌ iin nu Megbebayaꞌ, puꞌ sabaꞌ pimatay nug libun su nga sesuguꞌenen kilawan.” 3Dayun mimeksay puliꞌ su melaun getaw ditug langit, laung nilan, “Penalan ta gusay su Megbebayaꞌ! Su gebel nu mitutung syudad kia, ndiꞌ gusay mpugyaw.” 4Dayun kig duaꞌ puluꞌ buꞌ paat tawan kia meglegulang kaunutan mukaꞌ su paat buuk tetubuꞌ biwat, minginlulud ilan dia gedapan nu Megbebayaꞌ, su pegingkud dia melengas gingkudan gadiꞌ, mukaꞌ pigbesaan nilan iin dadema. Laung nilan, “Maꞌantu daan! Penalan ta su Megbebayaꞌ!” 5Naa, duun dayuni midengegu miktaluꞌ ditu melengas gingkudan gadiꞌ kia. Kaliꞌ taluꞌ, “Yamu nga sesuguꞌenen mukaꞌ yamu nga kilawan, medatuꞌ gempusuk, adin su megbasa ditu niin, penalan ta su Megbebayaꞌ, su pektemuyen ta!” 6Benaꞌ midengegu su tingeg nu melaun gupia getaw, maꞌniin deguk nu gembagel baga atawaka metenug gupia delalak. Kaliꞌ ilan pektaluꞌ, “Penalan ta su Megbebayaꞌ! Puꞌ su Kaunutan ta, su Tampusan ginuungan Megbebayaꞌ, mikpuun na tuꞌu Meglegadiꞌ!” 7Subay penleliagen ita dun gusay, penalan ta su ginuungan Diwata. Puꞌ minateng na su gendaw beliꞌiin su Nati Karniru. Su penginsuaanen, minuyaꞌ na. 8Puꞌ bigayan na su penginsuaanen peselukan gemputiꞌ penepetenen, mengelinggat sabaꞌ kelenuꞌen. (Iini gulugan nu penepeten kia, su gempia gulaula nu piglegetawan nu Megbebayaꞌ.) 9Mendadi su sala tawan kia sesuguꞌen nu Megbebayaꞌ getaw langit, miktaluꞌ pelum dinaan, “Sulat mu ini. Yamu nga ginggat sumaup dig belaꞌi nu Nati Karniru kini, leliagen namu.” Kaliꞌ dugang dun, laungen, “Kini gupia su metuud tinaluꞌ nu Megbebayaꞌ!” 10Dayunu miglaub di gedapan nu getaw langit kia, adun pegbesaan ku iin sia, dagid miktaluꞌ dinaan, “Paa, ndiꞌa pa deliꞌ. Sama sesuguꞌen mau mukaꞌ sama sesuguꞌen dau dema nu nga mimated diniꞌa, sampay su kelaun dumunut tu metuud ginukit ni Isus. Pegbesaay mu sungkin su Megbebayaꞌ.” Puꞌ su metuud biwasan ni Isus, iin da tanan su pitaluꞌ nu Megbebayaꞌ tu nga pimuunanen. 11Mendadi minitaꞌu sug langit mipukaꞌ puliꞌ, mukaꞌ duuni gemputiꞌ kebayuꞌ dia. Ki peksakay dun, ngalanen si Meseligan, mukaꞌ si Metuud. Iin, su kengukumen mukaꞌ keglumpaken, mekebian di metuud. 12Su matanen, maꞌniin nug ligaꞌ gapuy. Di gulunen, melaun tundek. Misulatan iin di ngalanen, ki ngalan kia, iin da laak salaneni mekesuun dun. 13Su suuben, mileep duguꞌ. Iini paingalan diniin, “Su Taluꞌ nug Megbebayaꞌ.” 14Tumindug diniin su nga sundalu dig langit, peksakay dailan dema gemputiꞌ kebayuꞌ, piselukan dailan dema suub gemputiꞌ, mengelinggat sabaꞌ kelenuꞌen. 15Mikseleput dig babaꞌeni mauteng gupia sundang, iini pekpendaagen tu nga nasud. Naa, saꞌ pendaagenen na, meglekaunutan dayun tuꞌu di nga nasud, peguiten dinilani sekud putaw. Peglaatanen ilan maaꞌ nu getaw mekpees di gubas saꞌ megbaal penginumen, puꞌ mangit dinilan gupia su Tampusan Ginuungan Megbebayaꞌ. 16Sinulat di suuben mukaꞌ di paanen ki gelalen kini, “Su Meglegadiꞌ di nga gadiꞌ, su Meglekaunutan di nga kaunutan.” 17Mendadi minitaꞌu pelum sala tawan sesuguꞌen nu Megbebayaꞌ getaw langit pegindeg dia mata gendaw. Pitikteganen gupia sebiay su kelaun manukmanuk peglayug dia gawanawan, laungen, “Pekpungun amu dini, saup namu dig lumpuk nu Megbebayaꞌ. 18Dini niu pengaanay su guned nu nga gadiꞌ mukaꞌ nu nga kaunutan sundalu sampay su nga sundalu, su guned nga kebayuꞌ sampay su suminakay dun, su guned nu tibaꞌan getaw, saꞌ gulipen, saꞌ su kanaꞌ gulipen, datuꞌ saꞌ gempusuk!” 19Naa mendadi, minitaꞌu su mekendekendek menamad gandang guminawen kia dig dagat mukaꞌ su nga gadiꞌ dinig lumbang sampay su kelaun sundalu nilan, mikpungun ilan gelaꞌ, adun pembunuꞌen nilan ki peksakay di gemputiꞌ kebayuꞌ mukaꞌ su kelaun daniin sundalu. 20Dayun daapay su mekendekendek menamad mukaꞌ su sala tawan kia tautau pimuunan nu Megbebayaꞌ, su minggulaula nga mekesalebuꞌ di pegitaꞌen nu menamad. (Miksekat di nga mekesalebuꞌ kia, piglimbungan nu tautau pimuunan su nga getaw mituꞌusan nu mekendekendek menamad, sampay sug lumaun miktamuy tug ledawanen.) Linabuꞌ dayun ditug linaw gapuy su mekendekendek menamad mukaꞌ su tautau pimuunan nu Megbebayaꞌ tetubuꞌ pa, su gapuy lamug asupre ndiꞌ mpaleng. 21Pinatay dayuni nga sundalu nilan di sundang, su sundang mikseleput diag babaꞌ nu peksakay gemputiꞌ kebayuꞌ, mukaꞌ pingaan nug lumaun manukmanuk su guned nilan taman mibesug ilan.

Biwasan 20

1  1Mendadi duun pelumi minitaꞌu sesuguꞌen nu Megbebayaꞌ getaw langit, peglusad. Duuni peguitenen, ki gunsiꞌ inandam ditug bayaꞌ, mukaꞌi gembagel lantaylantay. 2Ki gembagel metetubuꞌ maꞌniin palas buaya, sug dengantu gilal mamak, saꞌitada su Palin atawaka si Satanas, iin, binalud dayun nu getaw langit lantaylantay taman sengibu taun. 3Puꞌ linabuꞌ nu getaw langit ditug bayaꞌ, dayunen tekepay mukaꞌ piligenanen sampay metektaki sengibu taun kiin, adun ndiꞌ mekelimbung puliꞌ di nga kilawan dini tibuukan benwa. Naa, saꞌ metektak nai sengibu taun, beluyen pa puliꞌ su Palin ndiꞌ maiben. 4Mendadi minitaꞌu dayuni nga gingkudan gadiꞌ mukaꞌ su nga pemegingkud dia. Ki nga pemegingkud dun, bigayan ilan pegbayaꞌ tu kengukum. Minitaꞌu pa padun su nga gimuud nu nga getaw pimutukan gulu, sabaꞌ nilan megukit ditu metuud biwasan ni Isus mukaꞌ tu taluꞌ nu Megbebayaꞌ. Ilan kini, ndaꞌ nilan pektemuyay su mekendekendek menamad atawaka sug ledawanen. Ndaꞌ da nilan dema pesulatay di ngalaneni gangas nilan atawaka kemet nilan. Mendadi ki nga piputukan gulu kia, pitubuꞌ ilan puliꞌ. Migduma ilan dayun dini Kristu meglekaunutan taman sengibu taun. 5Naa, su kepetubuꞌ dinilan puliꞌ, iin sug bekna ketubuꞌ puliꞌ. (Laak, su samaꞌ nu nga getaw gandang mimatay, ndaꞌ pailan metubuꞌ puliꞌ, sampay metektubi sengibu taun.) 6Naa tumuꞌ, su mipeduma dig bekna ketubuꞌ puliꞌ kini, su gempantek mipaas nailan nu Megbebayaꞌ, penleliagen ilan gupia. Ndiꞌ ilan mpeduma di keduaꞌ kepatay, saꞌitada ndiꞌ ilan puliꞌ melegenan. Mbaal ilan dayun ngag belian nu Megbebayaꞌ mukaꞌ ni Kristu. Megduma dailan dema dini Kristu meglegadiꞌ taman sengibu taun. Dinaag su Palin 7Naa mendadi, kini si Satanas, benaꞌ mpapas na su sengibu taun, beluyen iin ditu pirisuan dun. 8Mpanaw dayun tu kelaun nasud misigwag di tibuuk lumbang, adun peglimbunganen su ginsekupan nu nga nasud. Paingalan dun su nga nasud kia, Gog mukaꞌ Magog. Pungunen dayun su ginsekupan nu nga nasud, adun meglegubat ilan. Ndiꞌ ilan mbilang sabaꞌ kelaunen, gitungan dun sug lubek dia geksid dagat. 9Naa saꞌ mpungun nailan, mesigwag ilan pakayaw diag liwenagan benwa, puꞌ adun pegalidungan nilan su pegbebelayan nu piglegetawan nu Megbebayaꞌ sampay su syudad kia pitail nu Megbebayaꞌ. Dagid duun pelumi gapuy melabuꞌ genat ditug langit sumapul di nga nasud. 10Dayun ki Palin meglimbung di nga nasud, pelebuꞌen na tuꞌu ditug linaw gapuy lamug asupre, dia tandaꞌ gandang bileng dadema su sala tawan tautau pimuunan nu Megbebayaꞌ mukaꞌ ki mekendekendek menamad. Dayun ilan peglegetay ditu gebii gendaw di ndaꞌi tamanen, ki tautau pimuunan nu Megbebayaꞌ mukaꞌ su mekendekendek menamad, ketelunen su Palin si Satanas. 11Naa tubus itu, duuni minitaꞌu gembagel gupia gingkudan gadiꞌ, gemputiꞌ, mukaꞌ minitaꞌui pegingkud dia. Mendadi ki pegingkud kia, mitekaw mawaꞌ ditu gedapanen su gekleb langit buꞌ lupaꞌ sampay mialep ilan gupia. Ndaꞌ nailan puliꞌ maitaꞌ. 12Naa, minitaꞌu pa pagid sug launan mimatay, datuꞌ mukaꞌ gempusuk, pemegindeg ilan dia mesunguꞌan nu gingkudan kia. Bimbal dayuni ngag linulun sinulat. Bimbal pa pagidi sala sinulat, kig linulun sinulat tandaꞌ milista su ngalan nu nga getaw mpeduma di ketubuꞌ ndaꞌi tamanen. Inukum dayun su nga mimatay, inukuman ilan mbantang tu gulaula nilan misulat na dia ngag linulun sinulat kia. 13Puꞌ su nga mimatay pelum diag liwenagan dagat, ditu gumul sampay su ngag ditug bayaꞌ, mimengguaꞌ ilan ditu. Ki tibaꞌan nilan, inukuman mbantang tu gulaula nilan. 14Mendadi ki gumul mukaꞌ kig bayaꞌ, linabuꞌ na tuꞌu ditug linaw gapuy. (Kig linaw gapuy kini, maꞌananen su keduaꞌ kepatay, su kepatay ndaꞌi tamanen.) 15Dayun lebuꞌay ditug linaw gapuy su kelaun getaw, adin su ndaꞌ mesulati ngalanen dig linulun sinulat kia tandaꞌ milista su ngalan nu nga getaw mpeduma di ketubuꞌ ndaꞌi tamanen.

Biwasan 21

1  Mendadi minitaꞌu dayun kig begu langit mukaꞌ lumbang, puꞌ mibeleng sug daan langit mukaꞌ lumbang, sampay mialep sug dagat. 2Minitaꞌu pa pagidi Syudad Pinaas nu Megbebayaꞌ, kig begu Jerusalem, peglusad dig begu lumbang genat ditug langit, genat tu Megbebayaꞌ, minuyaꞌ na gupia, maꞌniin nug libun piselukan pekayan puꞌ sungu beliꞌiay, minuyaꞌ na mekitaꞌ ditu menginsawa dun. 3Midengegu dayuni mesekeg taluꞌ ditu gingkudan gadiꞌ, kaliꞌ taluꞌ, “Ki Megbebayaꞌ, mekpungun na di nga kilawan megbenwa! Iin, sumala na dinilan megbenwa, mukaꞌ ilan, mbaal ilan gegulingen piglegetawanen. Meksalabuuk gupia dinilan su Megbebayaꞌ, mukaꞌ iin, pektemuyen nilan na tuꞌu. 4Penguaꞌenen dinilanig launan mekpaubaꞌ di ginaa nilan. Genat itu ndaꞌidun nai matay, ndaꞌiduni melegenan, ndaꞌ nai mengaduy atawaka mesaitan. Su miuna kebetang getaw, megelaꞌ na mpalus.” 5Mendadi su megingkud dia melengas gingkudan gadiꞌ, kaliꞌ taluꞌ, “Bentayay pa daan, ki gikteb biwatu, gelaꞌen ku sukliay begu!” Kaliꞌ padun pektaluꞌ dinaan, “Sulat mu ini, puꞌ ki tinaluꞌ kini, metuud mukaꞌ meseligan gupia.” 6Dayun dinugangen dun, laungen, “Migelaꞌ na metubus! Naa naani miuna, naan dademai mbinayaꞌ. Naan, su ndaꞌidun pai mibaal, daan nau. Saꞌ megelaꞌ na mpapas sug launanen, kini pau gusay. Naa, adin su kuaun, painumen ku dun ki tubig kini genat di tebud nu ketubuꞌ ndaꞌi tamanen, di ndaꞌig bayaden. 7Adin su mekegdaag di melaat, iini petenged diniin, pektemuyenu niin mukaꞌ iini mbaal bataꞌu. 8Laak dagid su nga mpiid sumakup dinaan, su nga tumipu di samatawen, su nga menggulaula mekepiidpiid, su nga memunuꞌan, su nga meksumbang, su nga mensaled, su nga mektamuy tu sagya diwata sampay su taman belusen, iin sungkini gasal nilan, mpegbenwanan nilan sug linaw gapuy milemugan asupre, saꞌitada su keduaꞌ kepatayen.” 9Naa mendadi, mikpesempel pelum dinaan su sala tawan di nga pitu tawan sesuguꞌen nu Megbebayaꞌ getaw langit kia piguidan nilan su pitu buuk gaalan mipenuꞌ di katapusan pitu ginis pelabuꞌ kia, kaliꞌ taluꞌ, “Diniin ka, puꞌ paitaꞌu diniꞌa kig bimbeng nu Nati Karniru, su penginsuaanen.” 10Saꞌ maꞌantu, pingepuꞌanu nug Balakat nu Megbebayaꞌ, mukaꞌ iwitu nu getaw langit ditug dungus nu metaas bentud. Benaꞌ minateng ami, pinitaꞌen dayun dinaan su Jerusalem, ki Syudad Pinaas nu Megbebayaꞌ. Ki syudad kini, peglusad genat ditug langit, ditu Megbebayaꞌ. 11Mekesulaw puun tu kelengas nu Megbebayaꞌ, tumiag daan maꞌniin metinggas batu, maaꞌ nu piningalan dun haspe, sala penenggiꞌan duni pagalungan, sabaꞌ ketinawen. 12Duuni gembagel dendingen, metaas dadema, sepuluꞌ buꞌ duaꞌi gengaꞌanen. Duun dademai sepuluꞌ buꞌ duaꞌ tawan getaw langit megingat di ngag bisuanganen. Misulat dia ngag bisuangan kia su ngalan nu nga sepuluꞌ buꞌ duaꞌ bansa nu getaw Israel. 13Maꞌantu, kada sepesagiꞌ nu syudad, telu buukig bisuanganen, telu buuk diin dapit silangan, telu buuk dadema diin dapit gilidan gendaw dibaluy buꞌ dibaluy, mukaꞌ telu buuk pa pagid dia dapit sindepan. 14Duun pa pagidi sepuluꞌ buꞌ duaꞌ buuk gembagel bagabaga intudan nug dendingen. Ki ngag bagabaga kia, misulatan pelum tu nga ngalan nu sepuluꞌ buꞌ duaꞌ tawan peneligan nu Nati Karniru. 15Naa su getaw langit migyaga dinaan, duuni sekuden, bulawan, iini pektepengen tu syudad kini, tu ngag bisuanganen sampay ditug dendingen. 16Memesagiꞌi syudad kini, miksamaig beklanganen mukaꞌ yebaꞌanen. Naa tipeng tuꞌu nu getaw langit ki syudad kini. Sug yebaꞌanen, selaksaꞌ buꞌ duaꞌ ngibu istagya (saꞌitada, duaꞌ ngibu buꞌ paat gatus kilumitru), beklanganen mukaꞌ taasen miksama dig yebaꞌanen. 17Tipeng dadema nu getaw langit sug dending, megatus buꞌ paat puluꞌ buꞌ paat kubita (saꞌitada, telu puluꞌ buꞌ enem depa) su taasen mekatag dig betad kilawan mektepeng, puꞌ kiai ginamit nu sesuguꞌen kia nu Megbebayaꞌ. 18Sug dendingen, binaal bagabaga piningalan dun haspe. Su syudad, iini pengimbaalanen, lungkan bulawan, kaas metinggas maꞌniin metinaw pagalungan. 19Su nga sepuluꞌ buꞌ duaꞌ buuk batu gintudan diag dending nu syudad kia, pimulakmulakan sibaꞌ ngag bagabaga. Sug bekna gintudanen, binaal haspe, su keduaꞌ gintudanen, binaal sapiro, su ketelunen, agata, su kepaaten, esmeralda, 20su kelimanen, onise, su keꞌenemen, kornalina, su kepitunen, krisolito, su kewalunen, birilo, su kesiamen, topasyo, su kesepuluꞌen, krisopraso, su kesepuluꞌ buꞌ salanen, hasinto, sampay su kesepuluꞌ buꞌ duaꞌen, amatista. 21Ki sepuluꞌ buꞌ duaꞌ buuk bisuanganen kini, lumbus perlasi pengimbaalanen, piksalabuuk binaal salabuuk tibuuk perlas. Sug dalan kumitas dia syudad, binaal tibuuk metinggas bulawan maꞌniin metinaw pagalungan. 22Naa mendadi, ki syudad kini, ndaꞌu maitaꞌig Balay Pengedapan tu Megbebayaꞌ dia, puꞌ dia na gupia su Kaunutan ta Megbebayaꞌ, su Tampusan Ginuungan, mukaꞌ su Nati Karniru. 23Ndiꞌ na kambat tuiagi gendaw dia, mesama daig bulan, ndiꞌ dadema kambat tuiag dia, puꞌ medelagan gupia su syudad nu kelengas nu Megbebayaꞌ, su Nati Karnirui suluꞌ mekpedelag dun. 24Sug bianan nu nga getaw di kelaun nasud dinig lumbang kini, medelagan nu tiag nu syudad. Su nga gadiꞌ pa pagid dinig lumbang, penguiten nilan dia su nga gimu nilan. 25Sug bisuangan, mipukaꞌan gebii gendaw, ndiꞌ na puliꞌ tekepen. Puꞌ ndiꞌ na meglegebii dia. 26Adin su migdedengeg di nga nasud sampay su gaꞌus nilan, penguiten gelaꞌ dia syudad bian pegbasa tu Megbebayaꞌ. 27Laak dagid, taman taluꞌu diniu, ndaꞌiduni milemuꞌan mekeseled dia syudad, saꞌ su minggulaula mekepiidpiid sampay sug belusen. Iin laaki mekeseled dia, su nga getaw milista nai ngalan nilan dig linulun sinulat nu Nati Karniru, ki sinulat tandaꞌ milista su ngalan nu nga getaw mpeduma di ketubuꞌ di ndaꞌi tamanen.

Biwasan 22

1  Mendadi pinitaꞌ pagid dinaan nu sesuguꞌen nu Megbebayaꞌ getaw langit kig lawas tubig megbegay ketubuꞌ ndaꞌi tamanen. Metinggasi tubig kini maꞌniin pagalungan. Su gulunen, iin su gingkudan kia nu Megbebayaꞌ mukaꞌ nu Nati Karniru, 2dayun dia menelegan titengaꞌ nu karsada di syudad. Miktimpang di tubig kia ki gayu megbegay ketubuꞌ ndaꞌi tamanen. Betad nu gayu kini, tauntaun sepuluꞌ buꞌ duaꞌ deksuꞌ memunga, saꞌitada, mainsan sebulan. Sug daunen, gempia bulung peneguliꞌ di getaw tu kelaun nasud. 3Ndaꞌiduni getaw maitaꞌ dia syudad kia tinuyudan nu Megbebayaꞌ, pia sala tawan. Naa, su Megbebayaꞌ mukaꞌ su Nati Karniru, dia syudad kia su melengas gingkudanen. Dia mektamuy diniin su nga sesuguꞌenen, su nga getaw langit, saꞌ su nga kilawan. 4Su muluꞌen, maitaꞌ gupia nu ginsekupanen kia, sulaten dadema dia gangas nilan su ngalanen. 5Ndaꞌ nai gebii. Ndiꞌ na dema kambat gemiteni suluꞌ dia sampay ndiꞌ na kambat medelagan nu mata gendaw, puꞌ su Kaunutan Megbebayaꞌi mekpedelag di syudad. Su nga sesuguꞌenen, getaw langit saꞌ kilawan, meglekaunutan ilan di ndaꞌi gikteben. Su Kelusad puliꞌ ni Isukristu 6Naa mendadi, su sesuguꞌen nu Megbebayaꞌ, kaliꞌ pektaluꞌ dinaan, “Ki nga tinaluꞌ kini, metuud tantu mukaꞌ meseligan gupia. Su Kaunutan Megbebayaꞌ, su mikpepengapuꞌ Balakaten ditu nga pimuunanen, iin, sinuguꞌen su sesuguꞌenen getaw langit adun buasanen di nga sesuguꞌenen kilawan su sungu mpenggulaula.” 7Kaliꞌ taluꞌ si Isus, “Pektalentenay niu ini! Ndiꞌ maiben matengu! Su nga mekpetuud tu sinulat pedaan dig libru kini mpenggulaula lemaꞌ denlag, naa leliagen ilan!” 8Naa, naan si Juan, mikedengegu gupia mukaꞌ mikaitaꞌu di kelaun mipenggulaula kini. Naa benaꞌ mitubusu medengeg mukaꞌ maitaꞌ sug launanen kini, mikeglaubu dayun di gedapan nu getaw langit kia, su mikpaitaꞌ dinaan di kelaunen kini, puꞌ pektemuyen ku sia iin. 9Laak dagid laungen dinaan, “Paa, ndiꞌa dema tuꞌu pengmaꞌniin, puꞌ sama mau sesuguꞌen, sama sesuguꞌen dau dema nu nga mimated diniꞌa pimuunan nu Megbebayaꞌ, sampay su tibaꞌan mekpetuud tu sinulat dinig libru kini. Tamuy mu sungkin su Megbebayaꞌ!” 10Laungen padun dinaan, “Kini nga sinulat pedaan mekatag di mpenggulaula lemaꞌ denlag, ndiꞌ mu pegbuniay, puꞌ sungu na menuud kig launanen kini. 11Mendadi, adin su getaw menggulaula melaat, iin na gusayi penggulaulaanen. Adin su menggulaula mekepiidpiid, iin nai penemalanen. Su mekesuun dema, mekenamal dadema meksikesuun, sampay su pinaas nu Megbebayaꞌ, ki pigbetaden su laak mauyaꞌan nu Megbebayaꞌ, naa pediunen gusay su kepaas dun.” 12Kaliꞌ pektaluꞌ si Isus, “Pektalentenay niu ini! Ndiꞌ maiben matengu puliꞌ! Uiten ku su nga sugda tu nga getaw, diadia mbantang tu pinggulaulanen. 13Naa naan, su ndaꞌidun pai mibaal, daan nau. Saꞌ megelaꞌ na mpapas sug launanen, naan, kini pau gusay. Naani pikpuunan nug launan, naan dademai katapusanen. Naani miuna, naan dademai mbinayaꞌ.” 14Penleliagen su nga getaw pengekdakan nilan gupia su suub nilan, kaas buangen dinilan, mbantang nailan maan tug bunga nu gayu megbegay ketubuꞌ ndaꞌi tamanen, mbantang dailan dema mian dig bisuanganen, adun suled ilan tu syudad. 15Dagid su nga menggulaula mekepiidpiid, su nga mensaled, su meksumbang, su memunuꞌan, su mektamuy tug ledawan sampay su meglimbung mukaꞌ sug belusen, ditu laak ilan liu nu syudad. 16“Naa, naan kini si Isus, sinuguꞌu su sesuguꞌen ku, adun su gempenggulaula kini, ukitenen diniu nga pikumpungan nu suminakup dinaan. Naan su sapuꞌ ni David paingalan dinaan su pemulaw, ki tampusan mekesulaw bitun.” 17Mendadi, sug Balakat nu Megbebayaꞌ mukaꞌ su penginsuaan kia nu Nati Karniru, kaliꞌ ilan taluꞌ, “Naa, diniin ka na tuꞌu!” Naa, adini mekedengeg dun ini, subay teluꞌenen dadema, “Diniin ka tuꞌu, uu Kaunutan!” Diadia, adin diniui kuaun, diaan ka niin, alap mu tuꞌu ki tubig megbegay ketubuꞌ ndaꞌi tamanen, kig begay diniꞌa di ndaꞌig bayad dun. Pia adin su meliag dun, malap dun. 18Naan si Juan, pegaden ku daan su kelaun mekedengeg di mpenggulaula lemaꞌ denlag, ki sinulat pedaan dig libru kini. Saꞌ duuni getaw dumugang dun dini, pia sektaang taluꞌ, dugang nu Megbebayaꞌ di ginukuman dun su nga pelabuꞌ sinulat dig libru kini. 19Mesama saꞌ duuni getaw kulanganen ki sinulat pedaan di mpenggulaula kini lemaꞌ denlag, pia sektaang taluꞌ laak, naa, uiꞌen dadema diniin nu Megbebayaꞌ su gilasen dig bunga nu gayu kia megbegay ketubuꞌ ndaꞌi tamanen, sampay sug bentanganen suled dia Pinaas Syudad sinulat dig libru kini. 20Mendadi si Isus, su meglegintuud dun kig launanen kini, kaliꞌ taluꞌ, “Metuud! Sungu nau tuꞌu metuaꞌ!” Maꞌantu! Uu Kaunutan Isus, diniin ka na! 21Naa penenebiin ku, kig launan getaw, diadia tulungen lelayun nu Kaunutan ta si Isus.