Hebreo1 Naa kini, begudiin iinig betad nu Megbebayaꞌ, tatapen teluꞌay su nga getaw. Pigininisen ukitay su nga ginepuꞌay ta pibian di nga pimuunanen. 2Laak nemun, su tampusan gendaw kini, iini tinduꞌen mekpetenday dinita, sug Bataꞌen. Kig Bataꞌen kini, pibaal diniin nu Megbebayaꞌ su gekleb langit buꞌ lupaꞌ. Iin dademai tinduꞌ nu Megbebayaꞌ mekalap dig launanen. 3Iini ketinggas nu kelengas nu pegbayaꞌ nu Megbebayaꞌ. Su gasal nu Megbebayaꞌ, iin dademai gasal nug Bataꞌen. Sug Bataꞌeni megawid di gekleb langit buꞌ lupaꞌ mekatag di ginuungan taluꞌen. Mitubusen ugasay su nga salaꞌ, miditug langit, migingkud di dapit lintu nu Megbebayaꞌ, su Tampusan Metaas, puꞌ pipeglekaunutan nu Megbebayaꞌ. 4Maꞌantu kig Bataꞌ nu Megbebayaꞌ, mibaluy metaas pa di nga sesuguꞌen nu Megbebayaꞌ getaw langit, maaꞌ nu ketaas nu gelalen. Puꞌ metaas pai gelal bigay diniin di gelal nu nga sesuguꞌen nu Megbebayaꞌ getaw langit. 5Puꞌ ndaꞌ ba mesulat di Misulat Taluꞌ nu Megbebayaꞌ, “Yaꞌa sug Bataꞌu. Nandaw mibaluy nau gamaꞌ mu.” Naa ndaꞌiduni getaw langit tiluꞌan nu Megbebayaꞌ maꞌnia. Miktaluꞌ dadema su Megbebayaꞌ, “Mbaalu gamaꞌen. Mbaal dain dema Bataꞌu.” Laak kanaꞌ dadema mekatag di getaw langit. 6Su kesuguꞌ pa pagid nu Megbebayaꞌ ditu penganay Bataꞌen medinig lumbang, miktaluꞌ su Megbebayaꞌ, “Subay pektemuyen nu tibaꞌan sesuguꞌen ku.” 7Laak mekatag di nga getaw langit, laungen, “Su nga getaw langit, binaalu maaꞌ nu genus. Binaalu dailan dema maaꞌ nug ligaꞌ gapuy.” 8Laak dagid mekatag dig Bataꞌen, laungen, “Uu Megbebayaꞌ, ndaꞌi taman nu Keglekaunutan mu. Meglepeng tantui keguit mu tu nga sakup mu. 9Mauyaꞌan mu gupia su kekesuun, mukaꞌ mpauka di melaat, kaas su Megbebayaꞌ, su pektemuyen mu, tinduꞌa niin meglekaunutan, mukaꞌ pitaasa pa niin di ngag duma mu. Kaas dema leliagen ka gusay.” 10Laung padun nu Megbebayaꞌ, “Yaꞌa Kaunutan, kanugdiin binaal mu sug lumbang, mukaꞌ genat di kemet mu su gekleb langit buꞌ lupaꞌ. 11Bisan kig langit buꞌ lupaꞌ kini, malep. Laak yaꞌa, ndaꞌi gumul mu. Ilan, medanul ilan maaꞌ nu penepeten. 12Maaꞌ nu suub, penlepiꞌen mu ilan, puꞌ mailisan maaꞌ nu penepeten. Laak dagid yaꞌa, ndiꞌa mpalin pia maikaꞌ. Ndaꞌi gumul mu.” 13Laungen pa dun, “Gingkuda dini gupidu, dapit lintu, puꞌ pegbesaan ku yaꞌa sampay di gendaw pelebaun ku yaꞌa daagen mu su nga kuntra mu.” Kanaꞌ nu getaw langiti tiluꞌanen dun. 14Naa saꞌ maꞌantui tinaluꞌ nu Megbebayaꞌ tug Bataꞌen, taꞌ mai gelal nu nga getaw langit? Asa ginis dailan nu nga ndiꞌ maitaꞌ, launan nilan, laak mektamuy dailan dema tu Megbebayaꞌ mukaꞌ sinuguꞌen ilan megabang di getaw pegleguunenen di salaꞌ. 1 Kaas, subay penemalan ta talentenay su metuud tinituluꞌ dinita, adun ndiꞌ mpalinig delendeman ta dun. 2Puꞌ mituudan ita dun puꞌ minuud na su pitenday nu sesuguꞌen nu Megbebayaꞌ getaw langit tu nga ginepuꞌay ta, saꞌitada su Palinta nu Megbebayaꞌ. Puꞌ begudiin adini getaw minggulaula melaat, saꞌ mimilas ditu Palinta, inukuman nu Megbebayaꞌ mbantang tu kemilasen. 3Kumalenged maꞌantu, ndiꞌ ita mekegliaw di ginukuman dinita nu Megbebayaꞌ, saꞌ petuyangen ta su tinituluꞌen dinita mekatag di kegawen dinita. Ki kegawen kini, ndaꞌig labaw pa dun. Miguna megukit dun su Kaunutan ta si Isus. Tinakesiꞌan dinita dayun nu nga mikedengeg dun puꞌ metuud. 4Midengan dadema senguꞌay nu Megbebayaꞌ, puꞌ pipenggulaulanen di nga mikedengeg dun kia nga migininisan mekesalebuꞌ, tuꞌus nu pegbayaꞌen. Adini getaw mauyaꞌan nu Megbebayaꞌ begayan, piktukiden dadema begayay tinawan nug Balakat nu Megbebayaꞌ. 5Naa subay pektalentenan ta dadema su tinituluꞌen dinita, puꞌ kanaꞌ nu nga getaw langiti mitenduꞌ nu Megbebayaꞌ meglekaunutan dig begu lumbang baalenen pa ditug binayaꞌ gebii buꞌ gendaw. Segaga su kilawani tinduꞌen meglekaunutan dig lumbang pekteluꞌen ta kini. 6Misuunan ta ia, puꞌ duuni miktaluꞌ di Misulat Taluꞌen, “Uu Megbebayaꞌ, su kilawan, mekesalebuꞌig lelaat mu diniin, asa maikaꞌ laakig lagaꞌen. Bisan maikaꞌig lagaꞌ nu getaw, tinulung mu gupia. 7Pibabaꞌ mu iin di nga sesuguꞌen mu getaw langit, laak ndaꞌ maiben. Pitaas mu iin puꞌ bigayan mu melengas dengegan mukaꞌ pipegbasa mu. 8Pipegbayaꞌ mu dadema diniin sug launan binaal mu.” Naa kumalenged misulat dia puꞌ pipegbayaꞌ nu Megbebayaꞌ tu getaw sug launan binaalen, gempantek puꞌ ndaꞌidunig binaalen ndaꞌ mpeduma. Laak pia maꞌantu, nemun ndaꞌ pai getaw minitaꞌ ta megbayaꞌ tug launanen. 9Iin laaki minitaꞌ ta kini si Isus, su pibabaꞌ nu Megbebayaꞌ di nga getaw langit ndaꞌ maiben, adun matay. Minitaꞌ tain pitaas na nu Megbebayaꞌ, puꞌ bigayanen tampusan melengas dengegan mukaꞌ pipegbasanen di nga getaw. Puꞌ sabaꞌ nu tulung nu Megbebayaꞌ, minatay, guminantiꞌ dig launan getaw. 10Kagina binaal nu Megbebayaꞌ sug launan bitang adun mpenalan iin, bentanganen begay nu Megbebayaꞌ melegenan su Kaunutan ta, adun menggangeti kekesuunen. Mikegawen dayun di kelaun bataꞌ nu Megbebayaꞌ, adun mpeduma ilan dig dengeganen mukaꞌ di kegbasa diniin ditug langit. 11Naa si Isus, pitelimaꞌen su nga getaw tu Megbebayaꞌ. Iin mukaꞌ su nga pitelimaꞌen, salabuuk dai Gamaꞌ nilan. Kaas ndiꞌ mpiid mekpaingalan dinilan nga ngudanen. 12Puꞌ ndaꞌ ba pektaluꞌ di Misulat Taluꞌ nu Megbebayaꞌ, “Uu Megbebayaꞌ, ukitan ku su nga ngudan ku mekatag diniꞌa. Penalan ku yaꞌa di pikumpungan nilan.” 13Miktaluꞌ dadema, “Suminaligu ditu Megbebayaꞌ.” Duun pa pagidi misulat, kaliꞌ pektaluꞌ, “Keni dau, ilan nu nga gembataꞌ bigay dinaan nu Megbebayaꞌ.” 14Kagina iini gasal nu nga piningalanen dun ngag bataꞌ kilawan, kuminilawan dadema si Isus, adun matay. Minatay dayun, adun daagenen su Palin, su puun gupia nu kepatay. 15Maꞌantu, pibeluyen su nga getaw. Puꞌ ita nu nga getaw, genat tu kaikaꞌay ta sampay matengi gumul ta, maꞌniin ita gulipen nu gendekan ta, puꞌ mendek ita gupia matay. 16Mendadi, mekatag di kepatayen, gempantek kanaꞌ nu nga sesuguꞌen nu Megbebayaꞌ getaw langiti pegebanganen. Ndaꞌ ba mesulat kanugdiin, “Pegebanganen su nga sapuꞌ ni Abraham.” 17Saꞌ maꞌantu, si Isus, subay miksibaluy getaw maꞌniin nu nga ngudanen dig launan betaden, adun mbaal Tampusan Metaas Belian, melilelaaten mukaꞌ meseligan mektamuy tu Megbebayaꞌ, adun mpedasun su nga getaw tu nga salaꞌ ta. 18Puꞌ kagina pingindanan si Isus maaꞌ da nu kengindan dinita nga getaw mukaꞌ milegenan dadema maaꞌ da dinita, metau megabang dinita, saꞌ pengindanan ita. 1 Naa mendadi, yamu kepetedan ku, nga samasakupu dini Kristu ginggat nu Megbebayaꞌ megbenwa tug langit ditug binayaꞌ gebii buꞌ gendaw, pegdelendem niu deliꞌ si Isus. Si Isus kini, iin su peneligan nu Megbebayaꞌ mukaꞌ Tampusan Metaas Belian mekatag di kekpetuud ta. 2Puꞌ maaꞌ dani Moises begudiin, mikpetuud gupia tu Megbebayaꞌ, su tuminduꞌ dun. Mikpetuud si Moises kiin saananen meguit tug balay nu Megbebayaꞌ, saꞌitada su nga sakupen. 3Pinenggiꞌ duuni getaw megbaal balay. Gembagel paig dengeg nu megbaal dun sabayaꞌ nug balay. Maꞌantu dadema si Isus. Mbantang metaas pa su kegbasa diniin di kegbasa dini Moises. 4Metuud saꞌ duunig balay, mesuunan ta duun dademai migbaal dun, laak su Megbebayaꞌi minaal tug launan bitang. 5Si Moises kiin, meseligan gupia sesuguꞌen diag balay nu Megbebayaꞌ, saꞌitada su nga getaw ginulipiten. Kanugdiin inukiten pedaan su teluꞌen pa nu Megbebayaꞌ ditug binayaꞌ gebii buꞌ gendaw. 6Si Kristu, meseligan dadema gupia, laak kanaꞌ sesuguꞌen, puꞌ Bataꞌ nu Megbebayaꞌ, kaunutan dig balayen. Naa itaig balayen kiin, saꞌ menamal ita sumalig diniin mukaꞌ menamal dademaig leliag ta ditu pedetengen ta. 7Kaas, subay pektalentenan ta ki taluꞌ nug Balakat nu Megbebayaꞌ kini, puꞌ ndaꞌ ba mesulat di Misulat Taluꞌen, “Saꞌ medengeg niu nandawi tingeg nu Megbebayaꞌ mektaluꞌ, 8ndiꞌ niu buklusayig delendeman niu maaꞌ danug betad nu nga ginepuꞌay niu, su kemilas nilan tu Megbebayaꞌ kanugdiin. Puꞌ pingindanan nilan su Megbebayaꞌ su saanan nilan ditug limawaꞌ.” 9Puꞌ tinaluꞌ nu Megbebayaꞌ, “Pingindananu nu nga ginepuꞌay niu mukaꞌ kig lelaatu, piksimaꞌ nilan, bisan minitaꞌ nilan su pinggulaulau sampay paat puluꞌ taun. 10Kaas melaat gupiai ginau dinilan di gendaw kiin. Tinaluꞌu puꞌ lelayun mpenulayig delendeman nilan, sug betadu, ndaꞌ nilan dunutay. 11Melaati ginau dinilan kaas mingaduguꞌu, ‘Ndiꞌ nailan mesuꞌat suled tug benwa tandaꞌu ilan sia pedumaay dinaan melali.’” 12Naa, yamu kepetedan ku, peglengilam amu, adun ndaꞌidun diniu melaatig delendemanen mukaꞌ memilas, kaas suay dayun ditu Megbebayaꞌ ndaꞌi gumulen. 13Laak, sinegay gendawan ta pa, puꞌ duun pai sikawan ta megdunut dun, subay mektinikukay amu gendawgendaw, adun ndaꞌidun diniui melimbungan nug betad mekesalaꞌ, dayun maulayun duni melaat betaden. 14Puꞌ ita, saꞌ penemalan ta pektalentenay sug bekna kesalig ta dini Kristu sampay matengi gumul ta, sigi ita meksalabuuk diniin. 15Iin daani mitaluꞌ di Misulat Taluꞌen, “Saꞌ medengeg niu nandawi tingeg nu Megbebayaꞌ mektaluꞌ, ndiꞌ niu buklusayig delendeman niu maaꞌ danug betad nu nga ginepuꞌay niu, su kemilas nilan tu Megbebayaꞌ kanugdiin.” 16Taꞌ mai mikedengeg tu tingeg nu Megbebayaꞌ mukaꞌ mingatu diniin? Su nga getaw mimegawaꞌ ditug benwa Ehipto ginulipit ni Moises kanugdiin. 17Taꞌ demai melaati ginaa dun su Megbebayaꞌ tu seled paat puluꞌ taun? Iin da pagid su nga sapuꞌ ni Israel. Mikesalaꞌ ilan, kaas migelaꞌ ilan matay, saanan nilan ditu pa limawaꞌ. 18Saꞌ mingaduguꞌ dadema su Megbebayaꞌ puꞌ ndiꞌ nailan mekeseled tug benwa tandaꞌen ilan sia peleliay, taꞌ mai tiluꞌanen? Ilan dadema, su nga mimilas diniin. 19Mendadi, misuunan ta dayun ini, ndaꞌ ilan pekeseled tug benwa kiin sabaꞌ nu kemilas nilan, puꞌ ndaꞌ nilan seligay su Megbebayaꞌ. 1 Mendadi, ki pinasad kia nu Megbebayaꞌ mekatag di pelali, pinasaden pa dinita nandaw. Kagina maꞌantu, subay mekpetubud ita, adun ndaꞌidun diniui ndiꞌ mekebian tu pelali kia ditug binayaꞌ gebii buꞌ gendaw. 2Puꞌ ita, midengeg ta su Gempia Petenday inukit dinita maaꞌ dadema nu kedengeg nu nga ginepuꞌay ta kanugdiin. Midengeg nilan su pitenday dinilan, laak ndaꞌi pantagen, puꞌ ndaꞌ nilan seligay. 3Ita pasiꞌ, su nga mikpetuud dun, mikeseled ita ditu tandaꞌ ita peleliay nu Megbebayaꞌ, su kelali tinaluꞌ nu Megbebayaꞌ saꞌ laungen, “Melaat gupiai ginau dinilan, kaas mingaduguꞌu puꞌ ndiꞌ nailan mesuꞌat suled tug benwa tandaꞌu ilan sia pedumaay dinaan melali.” Naa mitaluꞌen ia mekatag di kelalinen, puꞌ daanen na mitubus sug baalenen su kegbuaten dig lumbang kanugdiin. Kaas mesuunan ta miandam nai kelalinen. 4Puꞌ ndaꞌ ba mesulat di Misulat Taluꞌen mekatag di kepitu endawen, “Su kepitu endawen, mitubus na nu Megbebayaꞌ su kelaun baalenen, kaas mikelali na.” 5Mendadi malap ta nai sala misulat mekatag di kelalinen kia, laungen, “Ndiꞌ nailan mesuꞌat suled tug benwa tandaꞌu ilan sia pedumaay dinaan melali.” 6Naa, sabaꞌ nu kemilas nu ngag daansamaꞌ mikedengeg tu Gempia Petenday, ndaꞌ ilan mpeduma di kelalinen. Laak duun paig lain mekegduma dun, 7puꞌ pinasad nu Megbebayaꞌig lain gendaw paingalanen dun “Nandaw.” Mesuunan ta ia puꞌ genat tu timpu ni Moises santaꞌ gatus taun na, pitaluꞌen dini David su mialapu kamun, laungen, “Saꞌ medengeg niu nandawi tingeg nu Megbebayaꞌ mektaluꞌ, ndiꞌ niu buklusayig delendeman niu tu kemilas niu.” 8Naa, iini suminukli dini Moises begudiin meguit tu getaw, si Josue. Saꞌ iwit ilan sia ni Josue ditug benwa tandaꞌ ilan peleliay nu Megbebayaꞌ, tubus nitu ndaꞌ siai metaluꞌ nu Megbebayaꞌ mekatag dig lain gendaw. 9Kaas misuunan ta, ita nu nga sakup nu Megbebayaꞌ, mekelali paita ditug binayaꞌ gebii buꞌ gendaw maaꞌ danu kelalinen di kepitu endawen kanugdiin, su ketubusen muat tu gekleb langit buꞌ lupaꞌ. 10Pia adini getaw mpeduma di kelali nu Megbebayaꞌ, mesikpaꞌ mengimbaal maaꞌ danu kesikpaꞌ nu Megbebayaꞌ mengimbaal kanugdiin. 11Penemalan ta dayun pektalentenay su Gempia Petenday mekatag dini Isus, adun mekeseled ita ditu tandaꞌ ita peleliay nu Megbebayaꞌ, adun ndaꞌidun dinitai ndiꞌ mpeduma di kelalinen sabaꞌ nu kemilasen, kemilas maaꞌ danilan kanugdiin. 12Naa, ki taluꞌ nu Megbebayaꞌ pegyegaan ta kini, tetubuꞌ maaꞌ danu ketubuꞌ nu Megbebayaꞌ, ginuungan dadema. Mauteng pa di sundang duaꞌig babaꞌen, puꞌ mauteng pia dia gelet ginaa mukaꞌ delendeman, diag lelenguꞌan mukaꞌ gutek tulan. Metau megunapunap dun su mauyaꞌan getaw, sampay dig delendeman getaw. 13Su Megbebayaꞌ, ndaꞌiduni meleglud diniin, ndaꞌidun, puꞌ lumbus mibuasan diniin, medayagig launanen maꞌniin lebas na. Subay iini sembagen ta mekatag di gulaula ta. 14Kaas, subay pektalentenan tai kekpetuud ta mekatag dini Isus, puꞌ iin su Tampusan Metaas Belian ta, sug Bataꞌ nu Megbebayaꞌ minuliꞌ na ditug langit, tu gedapan nu Megbebayaꞌ. 15Puꞌ si Isus, misuunanen gupia kig betad ta nga getaw. Melemu ita mesayep mukaꞌ megdupang. Mibiananen su ginis kengindan maaꞌ danita, laak ndaꞌ mainsan pekesalaꞌ. 16Kaas, subay ndiꞌ ita mpiid mekpesempel tu Megbebayaꞌ, saꞌitada menenabi, pia mikesalaꞌ ita, puꞌ mbianan ta dayun sug lelaaten mukaꞌ su tulungen, pia taꞌ endaway duni mauyaꞌan ta. 1 Naa, su nga metaas belian, ndiꞌ ba metuud, diadia mpemiliꞌ di nga samatawen, mukaꞌ metenduꞌ megabang dinilan? Iin su gabang dinilan nu metaas belian, pektemuyenen su Megbebayaꞌ, puꞌ memegbegay ditu Megbebayaꞌ mukaꞌ mengilak diniin betang. Mengilak sabaꞌ nu salaꞌ nu nga getaw. 2Kagina kilawan, metau mesayep, kaas metau dadema mengmayaꞌmayaꞌ mektigel di nga sakupen mikesayep ndaꞌ metukaway. 3Kagina mikesayep dadema, subay mengilak sabaꞌ nu salaꞌen, kanaꞌ laak sabaꞌ nu salaꞌ nu nga sakupen. 4Sinangkaliꞌ pa tanan, ndiꞌ mesuꞌat iini tunduꞌ dig lawasen metaas belian pegbesaan nu getaw, puꞌ tenduꞌen nu Megbebayaꞌ mbaal metaas belian. Maꞌniai kegenggat nu Megbebayaꞌ dini Aaron mbaal metaas belian kanugdiin. 5Maꞌantu dadema si Kristu, ndaꞌen tenduꞌayig lawasen mbaal metaas belian pegbesaan gupia. Iini tuminduꞌ dun su Megbebayaꞌ, su miktaluꞌ diniin, “Yaꞌa sug Bataꞌu, nandaw mibaluy nau Gamaꞌ mu.” 6Miktaluꞌ pa pagid su Megbebayaꞌ di sala sinulat di Misulat Taluꞌen, “Yaꞌa sug belian di ndaꞌi gikteben, maaꞌ nu kegbelian ni Melquisedec.” 7Naa si Isus, su kegbenwanen dinig lumbang, minekeg iin mengaduy saananen menenabi mukaꞌ mikpaingabang gupia ditu Megbebayaꞌ, puꞌ adun megawen sia nu Megbebayaꞌ di kepatayen. Kagina gembageli kegbasanen tu Gamaꞌen mukaꞌ mikpetuud gupia diniin, tilimaꞌ nu Megbebayaꞌ su kenenabinen. 8Laak dagid pia iin sug Bataꞌ nu Megbebayaꞌ, milegenan. Maꞌantu miglegintau mekpetuud puun tu kelegenayen. 9Benaꞌ mingganget su kekpetuuden, puꞌ gilaꞌen penggulaulaay su pibaal diniin, mibaluy gumpungan di kegawen ndaꞌi gikteben dig launan getaw mekpetuud diniin. 10Gilal nu Megbebayaꞌ dayun metaas belian maaꞌ danu kegbelian ni Melquisedec. 11Naa, melaun pa siai pegwaliu diniu mekatag dini Melquisedec mukaꞌ ni Isus, laak melegen ulugen diniu, puꞌ maꞌniin metegas gupiai gulu niu, ndiꞌ pa niu mesabut. 12Yamu, pia miniben namu sumakup dini Isus, kaas mekekpetuꞌun namu sia, subay duun pai mekpetuꞌun diniu puliꞌ. Pekpetuꞌunen diniu su melemu mesabut tituluꞌan di Misulat Taluꞌ nu Megbebayaꞌ. Maꞌniin subay peduduꞌen pamu maaꞌ nu maikaꞌ gembataꞌ sabayaꞌ di maan amu tantu gaan. 13Adin su petuꞌunan pa di melemu mesabut, ndaꞌ pai tinawanen di medalem tituluꞌan mekatag di gempia mukaꞌ di melaat. 14Su maaꞌ da tantu gaan, saꞌitada su medalem tituluꞌan, iini petuꞌunan dun su nga migineken na, su duminunut gusay tu tinituluꞌ dinilan, kaas metau na memiliꞌ di gempia mukaꞌ melaat. 1 Kagina maꞌantu, sukal nai kenilung ta dig bekna tituluꞌan mekatag dini Kristu. Subay pegisegen ta nai sinuunan ta mekatag diniin, adun mengganget gupiai kekpetuud ta. Ndiꞌ ta na kambat puliꞌan baalay sug bekna pinggulaula ta maꞌniniꞌ, su keteliud ta dig baalen ta adun metelimaꞌ ita nu Megbebayaꞌ laak ndaꞌi pantagen, mukaꞌ su kesalig ta dayun diniin. 2Maꞌantu dadema su tinituluꞌan mekatag di kekpebunag ta tubig, su kegdepen dig begu sakup, su kepetubuꞌ puliꞌ nu nga minatay mukaꞌ su kaukum nu Megbebayaꞌ ndaꞌi gikteben. 3Subay pekpuunan ta na penilungay su medalem tituluꞌan. Menamal ita dayun menilung dun saꞌ begay nu Megbebayaꞌ. 4Puꞌ saꞌ upama duuni getaw penensili metalin di kekpetuud ta, ndiꞌ mesuꞌat pegbiksuꞌanen puliꞌ. Su nga getaw daan na pidelagan nu Megbebayaꞌ mekatag di metuud, mibianan na nilan su gempia begay nu Megbebayaꞌ mukaꞌ piktukid pa pagid dinilan sug bigay nug Balakaten. 5Mibianan na nilan dadema su kepia nu tinaluꞌ nu Megbebayaꞌ mukaꞌ su nga penggulaulaan nu ginuungen ditu pa binayaꞌ gebii buꞌ gendaw. 6Naa saꞌ teliudan nilan dayun su kekpetuud ta, ndiꞌ na nilan mesuꞌat pegbiksuꞌay puliꞌ. Puꞌ maꞌniin linsangan nilan puliꞌ ditu kurus sug Bataꞌ nu Megbebayaꞌ mukaꞌ pingumpiid nilan iin di gedapan nu nga getaw. 7Puꞌ pesemaan ku dig lupaꞌ. Saꞌ duunig lupaꞌ tatap dupiꞌay mukaꞌ delepay tubig, kaas melauni pimula mentubuꞌ dun sukal di nga getaw mengimbaal dun, naa kig lupaꞌ kia, pepianan nu Megbebayaꞌ. 8Laak dagid saꞌ sigbet mukaꞌ dugii mentubuꞌ dia, sug lupaꞌ kia, ndaꞌi pantagen, sungu pelebuꞌay nu Megbebayaꞌ. Deksuꞌanen ia sensulan laak, puꞌ ndaꞌi pedetengen dun. 9Naa, yamu nu nga petailen ku, bisan mitaluꞌ nami maꞌnia, mituudan ami dun puꞌ yamu pasiꞌ, melengas pa gupia su pigbetad niu. Pinggulaula niu su melengas mbantang di kegawen diniu. 10Meglepengi kaukum nu Megbebayaꞌ, kaas misuunan ta ndiꞌen selingawan su pinggulaula niu mukaꞌ su petailan niu diniin, su kegabang niu di nga samasakup niu mukaꞌ su gabang pa niu dinilan. 11Iini mauyaꞌan ku gupia, saladuaꞌ diniu, gelaꞌeneni ginaanen pentekenen dig delendemaneni pedetengenen tu kelusad puliꞌ ni Isus, sampay menuud su pekpelaban niu. 12Kanaꞌ iinig liagan ku, meksilelaꞌ amu, segaga penunggilingan niu su nga malap tu nga pinasad nu Megbebayaꞌ pebian di kesalig nilan diniin mukaꞌ di kektigel nilan di kaibenen sampay medawat nilan. 13Naa kanugdiin, su Megbebayaꞌ, minasad dini Abraham. Kagina ndaꞌiduni metaas pa di Megbebayaꞌ petakesiꞌen dun, mingaduguꞌ puꞌ penuudenen su pasaden dini Abraham. 14Kaliꞌ pektaluꞌ dini Abraham, “Pasadu diniꞌa, pepianan ku yaꞌa gusay. Pasad dau dema diniꞌa mekpulaka melaun.” 15Kagina miktigel si Abraham ditu kegelaten, mialapen dayun su pinasad diniin nu Megbebayaꞌ. 16Naa, saꞌ upama mengaduguꞌi getaw, sembayanen su metaas pa diniin, adun pengmetuudaneni getaw pesadanen. Belebagan dayun nu kengaduguꞌen sug launan sualan sia mekatag di pasaden. 17Kaas saꞌ mauyaꞌan nu Megbebayaꞌi maꞌnia, pengmetuudanen su nga pisadanen kanugdiin, puꞌ ndiꞌ mpalini delendemanen, sinumpaten tu pinasaden su kengaduguꞌen. 18Mendadi, duunig duaꞌ buuk meseligan ta ndiꞌ mpalin, ki pinasaden mukaꞌ ki pingaduguꞌen. Ndiꞌ mesuꞌat megbalus su Megbebayaꞌ. Kaas ita nga mikpesempel tu Megbebayaꞌ mekpegawen diniin, miulikseg ita gupia mekpedateng ditu kepianen dinita ditug binayaꞌ gebii buꞌ gendaw. 19Ki pedetengen ta kia, maaꞌ nu gempagen pundu di ginaa ta, puꞌ ndiꞌ daagen mukaꞌ ndiꞌ mpenulay. Sabaꞌ nu pedetengen ta kia, maꞌniin mekebian ita di kurtina bilet dia Pengedapan tu Megbebayaꞌ ditug langit, puꞌ mekadap ita diniin ditu Tampusan Meꞌelig Sugud pebian di kenenabi ta. 20Si Isus, miguna suled ditu Pengedapan kiin tu Megbebayaꞌ, adun ebangan ita niin, puꞌ mibaluy na tampusan metaas belian di ndaꞌi tamanen, maaꞌ danu kegbelian ni Melquisedec. 1 Naa kini si Melquisedec, iin su gadiꞌ nug lunsud Salem kanugdiin, mukaꞌ belian dadema mektamuy tu Tampusan Metaas Megbebayaꞌ. Naa, duuni ngag lain gadiꞌ kanugdiin linumpakan nu ginepuꞌay ta si Abraham. Benaꞌ mikedaag na si Abraham mukaꞌ minuliꞌ na, sinungkak ni Melquisedec kini, puꞌ pinenebianen masiꞌ. 2Bigayan dayun ni Abraham gilas di sepuluꞌ ilasan dig launan mialapen ditu gubat. Naa, ki ngalan ni Melquisedec, duaꞌi maꞌananen. Bekna, mekesuun gadiꞌ, keduaꞌen, gadiꞌ di Salem, saꞌitada gadiꞌ di kelinaw. 3Ndaꞌi misulat mekatag di ginaꞌen, saꞌ su gamaꞌen, saꞌ su gesalanen. Ndaꞌ dadema mesulati kegigetawen mukaꞌ gumulen. Kaas gitunganen sug Bataꞌ nu Megbebayaꞌ, ndiꞌ mengiktebi kegbelianen. 4Naa, pegdelendem niu deliꞌ su ketaas ni Melquisedec. Bekna, kumalenged iinig bigayan nu ginepuꞌay ta si Abraham gilasen tu ginagawen tu gubat kia, metaas pa dun. 5Sug betad nu getaw Israel, peningilen nu nga sapuꞌ ni Levi su kesepuluꞌen dia mitimud nu getaw Israel. 6Keduaꞌen si Melquisedec, kanaꞌ sapuꞌ ni Levi, laak dagid pia maꞌantu, mialapen su gilasen tu ginagaw ni Abraham ditu gubat, mukaꞌ pinenebianen si Abraham, sug daansamaꞌ pisadan nu Megbebayaꞌ. 7Kanaꞌ duaꞌduaꞌ ini, penenebiin nu metaas getaw su kepia di getaw gembabaꞌ pa diniin. 8Ketelunen su ngag belian sapuꞌ ni Levi, midawat nilan su kesepuluꞌ ilasanen, asa gasal nilan matay da. Si Melquisedec pasiꞌ, midawaten dadema su kesepuluꞌ ilasanen, laak misulat puꞌ metubuꞌ iin, saꞌitada, ndaꞌ mesulat puꞌ minatay. 9Si Levi kiin, su ginepuꞌay nu ngag belian, mikedawat iin di kesepuluꞌ ilasanen. Kinanaꞌ bigay ni Abraham dini Melquisedec su kesepuluꞌen, lepeng iini migbegay dun dadema. 10Puꞌ su kesungkak ni Melquisedec dini Abraham, ndaꞌ pa pegigetaw si Levi, lepeng dia pa dialem lawas ni Abraham, su gapuꞌ luluden. 11Naa, misuunan ta puꞌ mipalintaan nu Megbebayaꞌ su nga getaw Judea miksekat tu kegbelian ni nga Levi. Laak dagid saꞌ mikpalas sia su kektamuy nu nga sapuꞌ ni Levi, ndiꞌ na kambat metuaꞌig lain ginis belian, maaꞌ nu kegbelian ni Melquisedec sabayaꞌ di kegbelian nu sapuꞌ ni Levi si Aaron. 12Kinanaꞌ mesukliani kegbelian, subay suklian dademai palinta. 13-14Su Kaunutan ta si Isus, ki tinduꞌ nu sinulatu kini, gempantek kanaꞌ nu sapuꞌ ni Levi, puꞌ sapuꞌ ni Juda. Ndaꞌi sapuꞌ ni Juda belian, puꞌ ndaꞌi misulat ni Moises di Palinta nu Megbebayaꞌ mekatag di sapuꞌ ni Juda belian. 15Mendadi gempantek na, misukliani palinta mukaꞌ su kegbelian puꞌ duun nai mituaꞌ, ki sala belian lepeng dini Melquisedec. 16Ki sala kini, ndaꞌ mbaal belian pebian di palinta mekatag di gesalanen. Mibaal belian sabaꞌ nu ginuungen. Puꞌ su ketubuꞌen, ndaꞌi tamanen. 17Ndaꞌ ba mesulat, “Yaꞌa sug belian ndaꞌi gikteben, lepeng tu kegbelian ni Melquisedec.” 18Misabut ta dayun puꞌ pingawaꞌ sug daan pinalinta, puꞌ ndaꞌ pekpalas, ndaꞌi pantagen. 19Puꞌ ndaꞌiduni getaw menggangeti kekesuunen puun tu Palinta kia. Tumuꞌ pai pedetengen ta bigay dinita ni Kristu, puꞌ puun dia mekekpesempel naita tu Megbebayaꞌ mekpaingabang ita diniin. 20Naa su ketenduꞌ nu Megbebayaꞌ dini Isus megbelian, mingaduguꞌ dadema su Megbebayaꞌ. Laak su ketenduꞌ di sapuꞌ ni Aaron megbelian, ndaꞌi pingaduguꞌen dun. 21Mibaal belian si Isus mekatag di kengaduguꞌ nu Megbebayaꞌ, puꞌ kaliꞌ pektaluꞌ, “Mingaduguꞌ su Kaunutan Megbebayaꞌ, mukaꞌ ndiꞌ mpalinig delendemanen, ‘Yaꞌa sug belian ndaꞌi gikteben.’” 22Kaas mikpesalig si Isus tu pasad gempia pa dun. 23Naa sug daan belian, melaun, puꞌ ndaꞌ ilan pengganget di kegbelian nilan sabaꞌ nu gumul. 24Laak si Isus kini, ndaꞌi gumulen, kaas ndaꞌidunig belian sumukli diniin. 25Kaas megaganen guunay lelayun su nga mekpesempel tu Megbebayaꞌ pebian di keksalabuuk nilan diniin. Meglegawen dinilan, puꞌ metubuꞌ di ndaꞌi tamanen, adun penenebianen ilan ditu Megbebayaꞌ. 26Maꞌantu, si Isus, iin su Tampusan Metaas Belian mbantang megabang dinita, puꞌ ndaꞌi salaꞌen pia maikaꞌ, mukaꞌ kanaꞌ medangat, mekesuun, pisuay di nga mikesalaꞌ getaw sampay pitaas na ditu gekbus langit. 27Kanaꞌ maaꞌ nu ngag lain metaas belian, sapuꞌ ni Levi, puꞌ ndiꞌ na kambat mekanu gendawgendaw. Ndiꞌ na kambat mengilak adun mawaꞌ siai salaꞌen, dayun adun mawaꞌi salaꞌ nu nga ginsekupanen. Ndiꞌ na kambat mekanu, puꞌ mainsan da pengilak, su kebegayen matayig lawasen mekatag di salaꞌ nug launan getaw. Ndiꞌ na mpuliꞌan. 28Mendadi su nga getaw mitenduꞌ tampusan metaas belian pebian di pinalinta dini Moises kanugdiin, mikesayep dailan. Laak dagid benaꞌ miniben na, kig Bataꞌ kini nu Megbebayaꞌ, mitenduꞌ tampusan metaas belian pebian di kengaduguꞌ nu Megbebayaꞌ. Puꞌ ki kekesuunen, mingganget di ndaꞌi tamanen. 1 Naa, iini maꞌanan nu pigyaga ta kini, duun nai Tampusan Metaas Belian ta, maꞌniai kebetangen. Iin, nandaw pegingkud dia dapit lintu nu gingkudan nu Tampusan Megbebayaꞌ ditu gekbus langit. 2Mektamuy ditu tantu Pengedapan tu Megbebayaꞌ, sug binaal nu Kaunutan, kanaꞌ nu getaw. 3Naa, adini tampusan metaas belian dinig lumbang, mitenduꞌ memegay tu Megbebayaꞌ mukaꞌ mekanu dadema. Maꞌantu si Isus, ki Tampusan Metaas Belian ta, subay duunig begayen. 4Saꞌ upama dini pa lumbang, kanaꞌ da belian, puꞌ duun paig belian dini memegay tu Megbebayaꞌ munut tu pinalintanen ditu nga getaw Israel kanugdiin. 5Kig baalen nu ngag belian kia, lingu laak, puꞌ mpenunggilingan laak nilan su kektamuy ditu tantu Pengedapan tu Megbebayaꞌ diag langit. Misuunan ta ia puꞌ su sungu kepaindeg ni Moises tug lepintaw binaal luna, tinituluꞌ nu Megbebayaꞌ si Moises. Kaliꞌ pektaluꞌ su Megbebayaꞌ, “Subay dunutan mu gusay sug lendasan pinitaꞌu diniꞌa ditug bentud.” 6Su kektamuy mitenduꞌ dini Isus, melengas pa dig danilan ngag belian kia. Maꞌantu dademai nga sabut. Melengas pa dig daan sabut su pisabut ni Isus tu Megbebayaꞌ ilan nu nga sakupen, puꞌ miksekat tu pasad melengas pa di pinasad nu Megbebayaꞌ dini nga Moises begudiin. 7Saꞌ upama mikpalas daig bekna sabut meglegawen dinita, ndiꞌ na kambat suklian di keduaꞌen. 8Laak dagid laung nu Megbebayaꞌ puꞌ kulang su pigbetad nu getaw duminunut tug bekna sabut, kaliꞌ pektaluꞌ, “Ditug binayaꞌ gebii buꞌ gendaw duuni gendaw mateng, laung nu Kaunutan, meksabutu puliꞌ di nga getaw Israel mukaꞌ di nga getaw Juda, tug begu pasad gabang dinilan. 9Mukaꞌ kanaꞌ maaꞌ nug daan sabut, su sinabutu di nga ginepuꞌay nilan su gendaw inagaku ilan, adun uiten ku ilan megawaꞌ ditug benwa Ehipto. Ndaꞌ nilan penemalay dunutay sug daan sabut kiin, kaas pituyangu ilan. 10Naa, iin nai pasadu di nga getaw Israel, saꞌ mateng nai gendaw kiin ditug binayaꞌ gebii buꞌ gendaw, laung nu Kaunutan, betangen ku su nga pinalintau di ginaa nu piglegetawan ku, mukaꞌ pepenggengeten ku dig delendeman nilan. Kaas mekpetuud ilan dinaan, puꞌ naani Megbebayaꞌ, mukaꞌ duaten ku ilan nga piglegetawan ku. 11Danilan, diadia ndiꞌen na kambat tituluꞌen su nga samatawen, saꞌ sug betaꞌanen, mekatag dinaan. Ndiꞌen na kambat teluꞌan sug dumanen, ‘Aa lai, sambat amu tu Kaunutan.’ Ndiꞌen na kambat teluꞌan maꞌnia, puꞌ sumambat dinaan su tibaꞌan nilan, su nga metaas sampay su nga gembabaꞌ. 12Lelaatan ku ilan ditu ngag dupangan nilan. Ndiꞌu na pegdelendemeni nga salaꞌ nilan.” 13Naa kumalenged duuni tinaluꞌ nu Megbebayaꞌ mekatag dig begu pasad, pimilangen sug bekna sabut, daan na. Mukaꞌ adini mekpapas na, mesuunan ta, sungu na mbeleng gupia. 1 Naa sug betad nug bekna sabut, duuni ngag bian tituluꞌan pektamuy tu Megbebayaꞌ. Duun dademaig lepintawen binaal nu nga getaw. 2Puꞌ binaal nu nga getawig lepintaw luna, duaꞌi suguden. Sug bekna suguden, duunig betangan nga suluꞌ mukaꞌ lemisaan betangan pan gilak tu Megbebayaꞌ. Piningalan nilan dun su sugud kia Meꞌelig Sugud. 3Gilet tu nga sugudi gembagel kurtina. Su keduaꞌ suguden, piningalan nilan dun Tampusan Meꞌelig Sugud. 4Duuni bitang nilan dia binaal bulawan pektutungan pelinan, mukaꞌ kaban miputus bulawan. Su kaban kia, gindan tug bekna sabut nu Megbebayaꞌ. Bitang ditug dialemen bandi bulawan bitangan pan pilusad genat tug langit piningalan nilan dun manna. Bitang dadema ditug dialemen su sekud ni Aaron mintubil kanugdiin, mukaꞌ sug duaꞌ laad batu sinulatan di sepuluꞌ taang pinalinta nu Megbebayaꞌ. 5Bitang nilan diag dibabaw kaban kia su piningalan nilan dun gingkudan nug lelaat nu Megbebayaꞌ, saꞌitada su kepedasunen tu nga salaꞌ. Duun pa pagidig duaꞌ buuk ledawan diag dibabaw nu kaban palas sesuguꞌen nu Megbebayaꞌ getaw langit, gantiꞌ ilan diniin. Duuni gekpak nilan mibelat diag dibabaw nu gingkudan nug lelaat nu Megbebayaꞌ. Daal daia misulatu dun, puꞌ ndiꞌu na gupia maulug. 6Saꞌ maꞌnia, benaꞌ migelaꞌ mesangkap sug lepintaw kia, betad nu ngag belian, gendawgendaw suled ilan ditug bekna suguden, adun mektamuy ilan. 7Laak su Tampusan Meꞌelig Sugud, iinig betaden, mekeseled dia su laak Tampusan Metaas Belian, mainsan da setaun. Mukaꞌ su Tampusan Metaas Belian, saꞌ suled, subay meguit duguꞌ gilak tu Megbebayaꞌ, adun mawaꞌ su salaꞌen mukaꞌ su salaꞌ nu nga samatawen ndaꞌ nilan metukaway. 8Naa, mipanteki tituluꞌan nug Balakat nu Megbebayaꞌ dig launan kektamuy kia, puꞌ sinegay dia pai tibuuk lepintaw meseledan nu ngag belian, ndaꞌ pa mpukaꞌ di nga getaw sug bianan suled tu Tampusan Meꞌelig Sugud. 9Kiai mibaal penenggiꞌan di timpu kini nandaw. Guluganen su nga pemegay tu Megbebayaꞌ mukaꞌ su petubuꞌen pengilak diniin, ndiꞌ mekekpesikesuun dig delendeman nu nga getaw mektamuy diniin. 10Puꞌ dinunutan laak nug betad kektamuy kia sug betad di kaꞌaan, di kainum mukaꞌ kegugas lawas, lumbus pinalinta nu Megbebayaꞌ mekatag dig lawas. Kiai migbayaꞌ di kektamuy sampay di gendaw suklian nu Megbebayaꞌ tug begu bian mektamuy diniin. 11Nemun si Kristu, mituaꞌ na. Iin na su Tampusan Metaas Belian mekatag di melengas begu bianan. Su Pengedapan tandaꞌen pektemuyay su Megbebayaꞌ, gempia pa dun tug daan lepintaw, puꞌ kanaꞌ binaal nu getaw, saꞌitada kanaꞌ duma nug biwat dinig lumbang. 12Maꞌantu kumitas di melengas pa Pengedapan mukaꞌ mikeseled tu sugud diag langit piningalan dun Tampusan Meꞌelig Sugud. Mukaꞌ kanaꞌ duguꞌ nu kanding mukaꞌ turu bakai giwiten ditug dialem, puꞌ daniin ma duguꞌi giwiten ditu, ginilak tu Megbebayaꞌ. Su keseleden, mainsan, ndaꞌ na mpuliꞌay. Maꞌnia piksuꞌatsuꞌaten ita lekatay di ginukuman sia dinita, kaas ndaꞌi taman nu kegawen dinita. 13Naa kanugdiin, saꞌ duuni getaw milemuꞌan miksekat tu kepesempelen dig bangkay, subay pesikan duguꞌ nu kanding mukaꞌ turu baka lamug di gabu nu tinutung nati baka. Saꞌ maꞌantu, mpesikan na duguꞌ, mawaꞌ na su kelemuꞌayen, adun metelimaꞌ na puliꞌ nu Megbebayaꞌ. 14Kinanaꞌ megaga nug duguꞌ mukaꞌ gabu kia ugasay su milemuꞌan, labi pa megaga nu kepatay ni Kristu ugasayig delendeman ta, su ndaꞌ maugasay miksekat tu kektamuy ta ndaꞌi pantagen. Si Kristu, inilakenig lawasen tu Megbebayaꞌ pibian di Balakaten ndaꞌi gumulen. Mbantang mengilak, puꞌ ndaꞌi kulangen mukaꞌ ndaꞌi melaaten dun. Kagina miugasanig delendeman ta, mekektamuy naita tu Megbebayaꞌ ndaꞌi gumulen. 15Si Kristui miksabut tug begu pasad, adun malap nu nga ginggat nu Megbebayaꞌ sumakup diniin su pusakaꞌ pinasad dinilan, su pusakaꞌ ndaꞌi tamanen. Mesuꞌat na malap ilan puꞌ duuni minatay, adun lekaten su nga sakupen di melaat gulaula nilan su kegulipit pa dinilan nug daan sabut. 16Naa saꞌ su pusakaꞌ, betaden subay ndiꞌ begayan su pinusekaꞌan subay mpantek tuꞌu puꞌ minatay na su minusakaꞌ dun. 17Puꞌ betaden, ndaꞌi pantagen su sinulat sabut mekatag di pusakaꞌ sinegay tetubuꞌ pai minusakaꞌ dun. Mekpalas laak saꞌ matay na su minusakaꞌ. 18Maꞌnia dademaig bekna sabut nu Megbebayaꞌ. Ndaꞌ pai pantagen di getaw subay duuni petubuꞌen petain, adun baalen gilak sug duguꞌen. 19Su kepalinta ni Moises tug launan getaw Judea kanugdiin, maꞌniai mipenggulaula. Puꞌ si Moises kiin, migelaꞌen pelektagay su nga getaw mekatag dig launan pinalinta nu Megbebayaꞌ, dayun pimesikanen duguꞌ su sinulatan di Palinta, saꞌitada su Misulat Taluꞌ nu Megbebayaꞌ. Pemesikanen duguꞌ nu nati baka mukaꞌ kanding pedumanan tubig, iini pemesiken dun su gangaw nu gayu piningalan nilan dun hyssop mukaꞌ gempula bembul nu karniru. Pimesikanen dadema su nga getaw. 20Kaliꞌ taluꞌ si Moises, “Kig duguꞌ kinii tuꞌus nu sabut binaal nu Megbebayaꞌ, adun medawat amu niin. Subay dunutan niu gupia su sabut kiin.” 21Maꞌnia dadema pimesikanen duguꞌ sug lepintaw binaal luna mukaꞌ sug launan kesengkapan nu kektamuy nilan. 22Metuud ia, tinituluꞌ di nga pinalinta nu Megbebayaꞌ ugasan duguꞌ sug launanen. Saꞌ su pimetang, adun mawaꞌi kelemuꞌayen, saꞌ su getaw, adun mbiadan su salaꞌen. Guluganen ia, ndaꞌiduni getaw mpedasun di salaꞌen, saꞌ ndaꞌig duguꞌ mbunag, saꞌitada, saꞌ ndaꞌi matay. 23Naa, subay miugasan duguꞌ sug lepintaw kia mukaꞌ su nga kesengkapanen dia, dagid lendasan laakig lumbus tu tantu Pengedapan tu Megbebayaꞌ ditug langit. Ki Pengedapan kiin ditug langit, subay melengas pai gilak dun. 24Puꞌ si Kristu, sumiled na gupia ditug langit, adun mekpaitaꞌ nemun tu gedapan nu Megbebayaꞌ megabang dinita. Kanaꞌ pengedapan binaal nu getawi siledanen, puꞌ sug binaal nu getaw, lendasan laak tu tantu Pengedapan ditug langit. 25Naa sug betad nu Tampusan Metaas Belian ditug lepintaw, tauntaun suled tu piningalan nilan dun Tampusan Meꞌelig Sugud, adun uitenen dia sug duguꞌ, kanaꞌ daniin duguꞌ. Laak si Kristu pasiꞌ, ndaꞌ pekpuliꞌpuliꞌ suled ditu Pengedapan ditug langit, adun ilakenenig lawasen. 26Puꞌ saꞌ mimaꞌantu sia, genat tu kegbaal dig lumbang sampay nemun, subay mekpuliꞌpuliꞌ sia melegenay. Laak iini mipenggulaula, mituaꞌ si Kristu nandaw saꞌ sungu melengkebig benwa, adun puaꞌenen su salaꞌ ta pebian di kegilaken tug lawasen. Inilaken laak mainsan, daal daitu tantu. 27Iini pigdelendem nu Megbebayaꞌ, subay launan getaw matay mainsan, ukumen dayun nu Megbebayaꞌ. 28Maꞌnia dadema minatay mainsan si Kristu mibaal gilak, adun uaꞌenen su nga salaꞌ nu melaun getaw. Di keduaꞌ deksuꞌen metuaꞌ pa puliꞌ dinig lumbang, laak kanaꞌ sabaꞌ nu salaꞌ, puꞌ guunenen na gupia su nga getaw mekpedateng diniin. 1 Naa, su Palinta pingumbilin di nga getaw Judea, lingu laak nu nga melengas metuaꞌ pa pebian dini Kristu. Kaas ndiꞌ mekpesikesuun di nga getaw mektamuy tu Megbebayaꞌ. Ndiꞌ mekpesikesuun dinilan sekat di ngag betang, bisan tauntaun tatap ilakay. 2Puꞌ saꞌ upama miugasan sia di salaꞌ su nga miuna mektamuy tu Megbebayaꞌ, ndaꞌ ilan sia mpiid di salaꞌ nilan mukaꞌ misikpaꞌ ilan sia mekanu. 3Laak, kagina menamal ilan mekanu tauntaun, tatap pailan tegyungay di nga salaꞌ nilan. 4Puꞌ sug duguꞌ nu turu baka mukaꞌ kanding, ndiꞌen mawaꞌ su nga salaꞌ ta. 5Kaas, si Kristu, saꞌ sungu medinig lumbang, miktaluꞌ tu Megbebayaꞌ, “Ndaꞌ mu mauyaꞌay petubuꞌeni mbaal guliden mukaꞌ nga pemegay, puꞌ inandam mu naig lawasu mbaal gilak. 6Su nga gilak, megelaꞌ tutungay, mukaꞌ su nga pemegay megbeleng di salaꞌ, ndiꞌa leliagen dun.” 7Maaꞌ laungen padun, “Kaliꞌu pektaluꞌ, ‘Uu Megbebayaꞌ, keni dau, mituaꞌu adun penggulaulaan ku su mauyaꞌan mu. Kiai misulat mekatag dinaan ditu sinulatan di nga pinalinta mu.’” 8Naa sug bekna tinaluꞌen, laungen, “Su nga pekanu mukaꞌ su nga pemegay sampay su nga gilak megelaꞌ tutungay mukaꞌ pemegay, adun megbeleng di salaꞌ, ndiꞌa leliagen dun, ndaꞌ mu mauyaꞌay.” Kaas tinaluꞌen ia bisan mipalinta sug launan gilak di pinalinta dini Moises kanugdiin. 9Sinumpaten padun, kaliꞌ pektaluꞌ, “Uu Megbebayaꞌ, keni dau, mituaꞌu adun penggulaulaan ku su mauyaꞌan mu.” Kaas misuunan ta puꞌ pingawaꞌ na nu Megbebayaꞌ sug daan pekenuan, adun suklinen dun si Kristu, su tantu guliden. 10Mendadi saꞌ maꞌantu, kagina pinggulaula ni Kristu su mauyaꞌan nu Megbebayaꞌ, miugasan na su kelaunan ta di salaꞌ ta. Mitelimaꞌ ita tu Megbebayaꞌ sekat dig lawas ni Kristu mibaal gilak mainsan. Ndiꞌ na kambat puliꞌan. 11Naa, sug daan betad pektamuy, gendawgendaw mekanui ngag belian, diadia mekpuliꞌpuliꞌ mengilak. Laak pia maꞌantu, ndiꞌ gusay mawaꞌ su nga salaꞌ nu getaw mikpuun tu gilak kia. 12Si Kristu pasiꞌ, migilak mainsan salabuuk laak gilak, kig lawasen bayad tu salaꞌ nu nga getaw di ndaꞌi tamanen. Migingkud dayun ditu gupid nu Megbebayaꞌ, dapit lintu, 13tandaꞌ megelat sampay pelebaun nu Megbebayaꞌ, daagenen su nga kuntranen. 14Saꞌ maꞌantu, pisikesuunen su nga mitelimaꞌ tu Megbebayaꞌ di ndaꞌi gikteben pibian di salabuuk betang inilaken. 15Miglegintuud dun sug Balakat nu Megbebayaꞌ di Misulat Taluꞌen, laungen, 16“Naa iini pasadu pa dinilan, saꞌ mateng nai gendaw kiin ditug binayaꞌ gebii buꞌ gendaw, laung nu Kaunutan, betangen ku su nga Palintau di ginaa nilan mukaꞌ pepenggangetu dig delendeman nilan.” 17Maaꞌ laungen padun, “Ndiꞌu na pemilangeni nga salaꞌ nilan mukaꞌ ngag dupangan nilan.” 18Kaas saꞌ mpedasun ita di salaꞌ ta, ndiꞌ na kambat mengilak adun mbelengi salaꞌ. 19Naa yamu kepetedan ku, kagina maꞌantu, danita, ndiꞌ naita mendek mukaꞌ ndiꞌ naita mpiid suled ditu Pengedapan nu Megbebayaꞌ piningalan dun su Tampusan Meꞌelig Sugud. Mekeseled ita pebian di kenenabi ta, puꞌ sabaꞌ minatay si Isus. 20Binaalan ita niin begu bianan lumapus di kurtina kia milet di titengaꞌ nu Pengedapan kia. Ki keglapus ta di kurtina kia, sabaꞌ nu kepatayen di kurus. 21Kagina duuni Tampusan Metaas Belian ta megbayaꞌ dig balay nu Megbebayaꞌ, 22naa subay mekpesempel ita tu Megbebayaꞌ puun tu tugaling di ginaa mukaꞌ di kesalig ndiꞌ megduaꞌduaꞌ. Puꞌ misuunan ta miugasani ginaa ta di melaat delendeman ta mukaꞌ kepiidan ta miksekat di kepatay ni Isus. Su kekpebunag ta tubig, miugasan dademaig lawas ta tubig ndaꞌig lamugen. 23Subay penemalan ta pektalentenay su pedetengen ta, puꞌ meseligan su Megbebayaꞌ, kaas mesuunan ta menuud su pinasaden. 24Pegdelendemen ta deliꞌ saꞌ endutaꞌen duni kektinegyungay ta di kekpinetailay ta mukaꞌ kenggulaula ta di melengas. 25Mukaꞌ, ndiꞌ ta sikpaꞌenig betad ta mekpungun pektemuyen su Megbebayaꞌ. Puꞌ duunig duma ta suminikpaꞌ na. Sinangkaliꞌ pa tanan mektinikukay ita, adun diadia mpemantekeni kesalig nug dumanen, puꞌ mesuunan ta sungu matengi gendaw lumusad puliꞌ su Kaunutan ta si Isus. 26Naa, saꞌ penensili menamal ita mekesalaꞌ, asa mipesuun na dinita su metuud mekatag dini Isus, ndaꞌidun naig lain betang mailak tu Megbebayaꞌ adun mbelengi salaꞌ ta. 27Iin laaki pekpelaban ta su ginukuman nu Megbebayaꞌ dinita mukaꞌ su gembagel gapuy tandaꞌ megelaꞌ tutungay su nga kumuntra tu Megbebayaꞌ. Pekpelaban ta daan lamug mendek ita patiꞌ. 28Puꞌ ndiꞌ ba metuud, iin sug betad nu pipalinta dini Moises, petain su memilas ditu Palinta kia di ndaꞌig lelaat dun, saꞌ duunig duaꞌ tawan saꞌ telu, meketakesiꞌ puꞌ mikesalaꞌ. 29Saꞌ maꞌantu, labi pa gembegati ginukuman di getaw tuliud di tulung sia diniin nug Bataꞌ nu Megbebayaꞌ. Puꞌ pemilangenen ndaꞌig lagaꞌen sug duguꞌ ni Isus, bayad di kepetelimaꞌen diniin, mukaꞌ gindan tug begu pasad nu Megbebayaꞌ. Mpeksudiꞌanen dadema sug Balakat nu Megbebayaꞌ, su metau melelaat di nga mikesalaꞌ. 30Misuunan ta su Megbebayaꞌi miktaluꞌ, “Naani metau sumuliꞌ tu nga getaw mekpelaat dig dumanen.” Miktaluꞌ dadema, “Mengukum su Kaunutan di piglegetawanen.” 31Saꞌ mukum dinita su tantu Megbebayaꞌ, mekendekendek gupia. 32Naa yamu, pegdelendem niu deliꞌ su mibianan niu saꞌ mikpuun pamu mekpetuud dini Isus. Saꞌ midelagan naig delendeman niu, pia melauni kelegenay niu, ndaꞌ amu daagay. 33Puꞌ taang dun mipiidan amu gupia puꞌ pilegetan amu, pimesaitan amu. Taang dun midelaꞌig amu di ngag duma mipengumpiidan maꞌnia, 34puꞌ milelaat amu gupia tu nga samasakup niu pinikutan, ibangan niu ilan. Miktigel damu dema di kawiꞌ di pimetang niu di gempia ginaa, puꞌ mituudan amu dun puꞌ duun paig daniu melengas pa di ginawiꞌ diniu mukaꞌ kia, ndiꞌ mawiꞌ diniu. 35Kaas, ndiꞌ niu belengayi kesalig niu, puꞌ saꞌ sumalig amu tu Megbebayaꞌ, gembagel gupiai sugda dun. 36Subay mektigel amu di mbianan niu, adun mbaal niu su mauyaꞌan nu Megbebayaꞌ, malap niu dayun su pinasaden begay dinita. 37Puꞌ ndaꞌ ba mesulat di Misulat Taluꞌ nu Megbebayaꞌ, “Ndiꞌ na maiben mateng su getaw pedetengen niu. Ndiꞌ melangan. 38Adini piglegetawan ku pemilangen ku mekesuun, malapen sug begu ketubuꞌ sabaꞌ nu kesaligen. Laak saꞌ duun dinilani tuliud dinaan, ndiꞌu leliagen dun.” 39Laak ita pasiꞌ, kanaꞌ ita duma nu nga suay, kaas gelaꞌen nu Megbebayaꞌ belengay, puꞌ duma ita nu nga sumalig diniin kaas megawen ita. 1 Naa, ki kesalig kini, alandun iin? Iin su maꞌniniꞌ. Saꞌ mesuunan ta gupia puꞌ malap ta su pedetengen ta, iini paingalan ta dun kesalig. Saꞌ kanaꞌ megduaꞌduaꞌi pedetengen ta di ndiꞌ ta pa maitaꞌ, iin dademai paingalan ta dun kesalig. 2Su nga getaw sakup nu Megbebayaꞌ kanugdiin, tilimaꞌ ilan nu Megbebayaꞌ mikpuun tu kesalig nilan. 3Mikpuun dadema di kesalig ta, misuunan ta puꞌ biwat nu Megbebayaꞌ su gekleb langit buꞌ lupaꞌ pibian di tinaluꞌen, kaas misuunan ta su kanaꞌ ta maitaꞌ, iini pigenatan nu maitaꞌ. 4Naa pegdelendem niu deliꞌ su nga mikauna getaw. Beknanen si Abel, bataꞌ ni Adan. Iin, mikpuun tu kesaligen, pingilaken tu Megbebayaꞌ sug betang gempia pa di pingilak nu gulangbataꞌen si Cain. Tilimaꞌ nu Megbebayaꞌ si Abel iini mekesuun mikpuun tu kesaligen, puꞌ midawat dadema nu Megbebayaꞌ su pingilaken. Minatay, laak pia miniben na, duun pai tinakesiꞌ dinita ni Abel mekatag di kesaligen. 5Si Enoc dadema. Pilentu nu Megbebayaꞌ ditug langit mikpuun di kesaligen, kaas ndaꞌ patay. Ndaꞌ mbaangay nu ngag dumanen sug bangkayen, puꞌ pilentu tug langit su tegilawan lawasen. Su ndaꞌ pa pelentuay, liliag dun su Megbebayaꞌ, puꞌ kiai misulat di Misulat Taluꞌ nu Megbebayaꞌ. 6Metuud ia, ndaꞌiduni leliagen dun su Megbebayaꞌ saꞌ ndiꞌ sumalig diniin. Adini getaw mauyaꞌanen mekpesempel tu Megbebayaꞌ, subay petuudenen puꞌ duuni Megbebayaꞌ, mukaꞌ petuudenen dadema puꞌ sugdaan nu Megbebayaꞌ su nga mekpaingabang diniin. 7Si Noe pelum. Saꞌ midengegen su tinaluꞌ nu Megbebayaꞌ mekatag di mpenggulaula ditug binayaꞌ gebii buꞌ gendaw, asa ndaꞌen pa maitaꞌ, mikpetuud dun mikpuun tu kesaligen. Binaalen dayuni sekayan butuk. Iinig bian nu kegawen dinilan nu nga gapenen tug bagyu lampap. Maꞌantu mipaitaꞌen su kesaligen, kaas pimilang nu Megbebayaꞌ mekesuun. Iin pai ginukuman nu ngag duma kilawan dinig lumbang, migelaꞌ mbinasa. 8Si Abraham pelum. Iin, saꞌ inggat nu Megbebayaꞌ puꞌ megawaꞌ diag daan benwanen adun muliꞌ dig benwa pinasad nu Megbebayaꞌ begayen dun, mikpetuud mikpuun tu kesaligen. Migawaꞌ tuꞌu pia ndaꞌen pa mesuunay su pegengayanen. 9Benaꞌ minateng ditug benwa pinasad nu Megbebayaꞌ begayen dun, migbebenwa dayun dia mikpuun tu kesaligen. Migbebenwa da dia maꞌniin miguliug, puꞌ kanaꞌ dangen dia. Pigbenwananenig bebelayan luna. Maꞌnia dademai pigbenwanan nug bataꞌen si Isaac sampay su gapuꞌen si Jacob. Su pinasad nu Megbebayaꞌ dini Abraham, iin dadema gusayi pinasaden dini Isaac buꞌ ni Jacob. 10Su saanan nilan dia, pedetengen pa ni Abraham ki gembagel lunsud, pigdelendem na nu Megbebayaꞌ mukaꞌ baalenen pain, kig lunsud gempageni gentudan dun, saꞌitada ndiꞌ megebaꞌ. 11Naa si Abraham kini, mikpuun dadema tu kesaligen, mikebataꞌ pa gusay, bisan megulang na gupia, mukaꞌ ndaꞌ mainsan mapet bataꞌen su sawanen si Sara, puꞌ guminulang dadema. Siliganen su Megbebayaꞌ metau mekpenuud tu pinasaden diniin. 12Kaas su sala tawan laki, gitunganen dun maꞌniin na minatay, puꞌ megulang na gupia, iini mibaal pikpuunan nu melaun sapuꞌen. Su kelaunanen, maaꞌ nu kelaunan nug bitun ditug langit mukaꞌ maaꞌ nu gelis di geksid dagat, ndiꞌ mbilang. 13Si nga Abraham kini, mitembusan nilan su kesalig nilan sampay minatengi gumul nilan. Ndaꞌ nilan malap su pinasad dinilan nu Megbebayaꞌ, laak misuunan nilan puꞌ ditug binayaꞌ gebii buꞌ gendaw, malap nilan tuꞌu su pekpelaban nilan. Puꞌ maꞌniin pinembaꞌ nilan su melayuꞌ pa dinilan. Laung nilan puꞌ kanaꞌ ilan dangen dig lumbang kini, pigbebenwanan laak nilan. 14Saꞌ upama duuni nga getaw megukit maꞌnia nandaw, gempantek puꞌ pekpenengaun pa nilan ki tantu pegbenwanan nilan. 15Saꞌ pimilang sia ni nga Abraham sug benwa bilengan nilan sug danilan gupia benwa, mekepuliꞌ dailan ditu, 16sabayaꞌ ditug benwa pinasad nu Megbebayaꞌ begay dinilan. Laak iin tumuꞌi pegenguten nilan kig benwa melengas pa dun dig danilan, saꞌitada, sug ditu gekbus langit. Kaas iini kesuun ta dun, kanaꞌ mpiid su Megbebayaꞌ gelalen nilan kig Diwata pektemuyen, nilan puꞌ indamanen ilan pegbenwanan nilan ditug langit. 17Laak si Abraham, pia pisadan iin nu Megbebayaꞌ puꞌ meksilaun gupiai sapuꞌen, pibaal diniin nu Megbebayaꞌ guliden sug buntung bataꞌen si Isaac, puꞌ pingindananen. Benaꞌ mipengindanan, bitangen sug bataꞌen dia gentudan gilak mikpuun tu kesaligen, 18pia tiluꞌan daan nu Megbebayaꞌ, puꞌ laung nu Megbebayaꞌ, “Su sapuꞌ nug bataꞌ mu si Isaac, iin laaki pemilangen sapuꞌ mu.” 19Puꞌ midelendemen metau mekpetubuꞌ puliꞌ su Megbebayaꞌ, bisan tu nga minatay na. Midawat dayun puliꞌ ni Abraham sug bataꞌen, saꞌitada, maꞌniin mitubuꞌ puliꞌ sug bataꞌen. 20Si Isaac na pelum. Iin, mikpuun tu kesaligen, pinenebianen sug bataꞌen si Jacob mukaꞌ si Esau mekatag di gempenggulaula dinilan nu nga sapuꞌ nilan dig lemaꞌ denlag. 21Si Jacob pelum. Saꞌ pekpatay na, pinenebianen su nga gapuꞌen bataꞌ ni Jose, mikpuun tu kesaligen ditu Megbebayaꞌ. Mialapen pengundeenanen su sekuden, dayun mektamuy tu Megbebayaꞌ. 22Si Jose dema. Saꞌ sungu matengi gumulen, mikpuun tu kesaligen, miktaluꞌ mekatag di kegawaꞌ nu nga samabansanen getaw Israel ditug Ehipto, mukaꞌ pingumbilinen dinilani tinituluꞌen mekatag di tulanen puꞌ adun uiten saꞌ megawaꞌ ilan dia. 23Si Moises pelum. Iin, mikpuun tu kesalig nu nga mekegulangen, saꞌ migigetaw na, iglud nilan, sampay telu bulan. Iini iglud dun nu mekegulangen puꞌ minitaꞌ nilan puꞌ piabataꞌ si Moises, mukaꞌ ndaꞌ ilan mendek sumagaꞌ tu pilaktag nu gadiꞌ kia. 24Dayun si Moises, bisan binataꞌ nug bai diag benwa Ehipto, benaꞌ migineken na, mipauk ingelanan bataꞌ nug bai kia mikpuun tu kesaligen. 25Puꞌ laungen tumuꞌ pasiꞌ meksaliunung di kelegenay nu nga samatawen getaw Israel, su nga piglegetawan nu Megbebayaꞌ, sabayaꞌ di keliagen tu salaꞌ ndiꞌ maiben. 26Pimilangeni kepiidanen sabaꞌ nu pedetengenen di metenduꞌ nu Megbebayaꞌ meglekaunutan pa si Kristu, melengas pa di tibaꞌan gimu nu gadiꞌ diag benwa Ehipto. Puꞌ piktalentenanen ki sugda pa diniin nu Megbebayaꞌ ditug binayaꞌ gebii buꞌ gendaw. 27Mikpuun dadema tu kesaligen, bilengan ni Moises sug benwa Ehipto, puꞌ ndaꞌ mendek di gangit nu gadiꞌ. Ndaꞌ deduaꞌay di kegawaꞌen diag benwa kia, puꞌ maꞌniin minitaꞌen migabay diniin su Megbebayaꞌ ndiꞌ maitaꞌ. 28Mikpuun pa pagid tu kesaligen, pitindegenig Lumpuk ta gindan ditug Liniusan, puꞌ sinuguꞌen degaꞌen duguꞌ karniru su gulu gegdan nu ngag balay nu nga samatawen. Mingmaꞌnia puꞌ adun ndiꞌ mpatayi nga penganay bataꞌlaki nu getaw Israel. Puꞌ duuni sesuguꞌen nu Megbebayaꞌ getaw langit mitenduꞌ nu Megbebayaꞌ mekpatay tug launan penganay bataꞌlaki diag Ehipto, laak ndaꞌ mpeduma su nga getaw Israel, puꞌ ndiꞌen na tuꞌu meseledan su ngag balay dinagaꞌ na. 29Su nga getaw Israel pelum, mikpuun tu kesalig nilan, mikebian ilan ditu Gempula Dagat lepeng pekpanaw dailan tug lupaꞌan. Su nga getaw Ehipto pasiꞌ, saꞌ pingeted nilan su nga getaw Israel, pikpulingkasan nilan bianay sug dagat, laak migelaꞌ ilan melemes, puꞌ pikimput puliꞌ nu Megbebayaꞌ sug dagat. 30Su kauliꞌ dayun nu nga getaw Israel ditug benwa pinasad dinilan, linumpakan nilan su kutaꞌ Jerico. Gendawgendaw mipanaw ilan, linibed nilan su kutaꞌ sampay pitu gebii. Su kepitu endawen, midaag gelaꞌ su ngag dendingen batu, mikpuun da gusay tu kesalig nu getaw Israel. 31Duunig libun diag lunsud kia Jerico gandang meglaat pekesuunan, ngalanen si Rahab. Iin, mikpuun tu kesaligen tu Megbebayaꞌ, ndaꞌ mpeduma bunuꞌay tu nga samatawen mimilas tu Megbebayaꞌ, puꞌ pinembaꞌen sug duaꞌ tawan getaw Israel su keditu nilan minilung tug benwanen. 32Taꞌ mai gempiau pa teluꞌen? Daal daitu, puꞌ saꞌ sia ukiten ku, maiben ku gupia ukitay mekatag dini Gideon, si Barak, si Samson, si Jepte, si David, si Samuel sampay su nga pimuunan nu Megbebayaꞌ kanugdiin. 33Mikpuun tu kesalig nilan, duun dinilani miglumpak di ngag lain nasud. Migelaꞌ nilan dayun daagay su ngag lain nasud. Duunig duma piglepengen uitayi nga sakupen. Mendadi duuni ngag duma, mialap nilan lain pinasad dinilan nu Megbebayaꞌ. Sug duma, mitikem nilani ngag babaꞌ nu ngag limaung, kaas ndaꞌ ilan mebut. 34Mikpuun dadema tu kesalig nilan, duunig duma mikepaleng tu gembagel gapuy, kaas ndaꞌ ilan mekaꞌiday. Duunig duma ndaꞌ bunuꞌay besi. Ngag duma, milubay, laak mikpuun tu kesalig nilan, migletaban ilan puliꞌ. Duunig duma mikedaag gupia di gubat, puꞌ mipegebek nilan su nga sundalu nu nga kuminuntra dinilan. 35Duuni ngag libun milegenan gupia, laak mikpuun tu kesalig nilan, minitaꞌ nilan pitubuꞌ puliꞌig betaꞌan nilan minatay na. Ngag duma, kagina laung nilan tumuꞌ pa matay sabayaꞌ tuliud ilan tu Megbebayaꞌ, mingimpauk ilan beluyen di kepetugaꞌ dinilan. Puꞌ petubuꞌenen ilan puliꞌ gempia pa ketubuꞌ, su ndaꞌi gikteben. 36Duunig duma pingumpiid gupia mukaꞌ pimbadas. Ngag duma, binalud kadina mukaꞌ pinikutan. 37Duuni nga binatu, duuni nga biklaꞌ gabas, duuni binunuꞌ besi. Duuni nga mipanawpanaw ndaꞌ tantui gengayanen, mikseluk panit karniru mukaꞌ kanding puꞌ gempusuk, piglegetan mukaꞌ pimesaitan. 38Ki nga getaw kia, kagina gembageli kesalig nilan tu Megbebayaꞌ, kanaꞌ mbantang mpeduma dinilan sug lain getaw dinig lumbang. Mipanawpanaw ilan di nga napuꞌ limawaꞌ, di ngag binentudan, mukaꞌ pigbenwanan nilani ngag langeb sampay luak dig lupaꞌ. 39Laak dagid ki tibaꞌan nilan kia, bisan migdedengeg gupiai kesalig nilan tu Megbebayaꞌ, ndaꞌ nilan tagad malap su pinasad dinilan nu Megbebayaꞌ. 40Iini ndaꞌ nilan tagad malap dun, puꞌ duun pai gempia pegdelendemen nu Megbebayaꞌ mekatag dinita. Puꞌ pigdelendemen ndiꞌ megelaꞌ menuud su pinasaden dinilan, subay mpeduma ita dun. 1 Naa ita dema, kagina maꞌantui kesalig nu nga miuna mekpetuud kanugdiin, lepeng piglidungan ita nu melaun getaw miglegintuud puꞌ meseligan su Megbebayaꞌ. Kaas sug betad ta mekebelabag di gempia bianan ta mukaꞌ su salaꞌ tatap ta baalay, melengas belengen ta. Maaꞌ nug lekis ki kegleketubuꞌ ta pa dinig lumbang. Subay menamal ita gubek sampay mateng ita ditu gengayan ta. 2Selian ta gubek, subay penemalan ta pekimanay si Isus, puꞌ iin su puunan nu kesalig ta mukaꞌ iini mikpengganget dun di ginaa ta. Kagina leliagen dun si Isus tug deksuꞌan nu mbiananen, miktigel di kelegenayen dia kurus, mukaꞌ pimilangen ndaꞌig lagaꞌen su piidanen. Migingkud dayun ditu gupid nu gingkudan nu Megbebayaꞌ dapit lintu. 3Mendadi, pegdelendem niu gusay ki mibianan ni Isus su saananen dini pa lumbang, puꞌ adun ndiꞌ melayuꞌi ginaa niu mukaꞌ ndiꞌ amu lumukas sumalig dun. Iin, miktigel gusay di kesigi diniin nu nga mikesalaꞌ getaw. 4Puꞌ sinegay niu sumagaꞌ di melaat betad, ndaꞌ pa niu mbianay matay amu sabaꞌ nu kesagaꞌ niu dun. 5Mabuꞌ milingawan na niu su tinituluꞌ nu Megbebayaꞌ diniu nu ngag bataꞌen. Ndaꞌ ba mesulat di Misulat Taluꞌen maꞌniniꞌ, “Ki mbataꞌ, pektalentenay mu su tituluꞌan diniꞌa nu Kaunutan. Ndiꞌ melayuꞌi ginaa mu saananen memaag diniꞌa. 6Puꞌ adini petailen nu Kaunutan, tituluꞌenen, mukaꞌ launan pemilangenen bataꞌen, pemaagenen.” 7Saꞌ maꞌantu, saꞌ duuni kelegenay niu, pektigel niu, pelepeng niu tu tituluꞌan nu gamaꞌ niu, puꞌ su kelegenay niu, mpaitaꞌ dun diniu puꞌ pemilangen amu nu Megbebayaꞌ bataꞌen. Duun bai gembataꞌ kanaꞌ tituluꞌen nu gamaꞌen? 8Kaas saꞌ upama ndiꞌ amu metituluꞌ nu Megbebayaꞌ, kanaꞌ amu tantu bataꞌen, bataꞌ nu sumbang laak, puꞌ metituluꞌ nu Megbebayaꞌ sug launan bataꞌen. 9Saꞌ su nga gamaꞌ ta dinig lumbang, metituluꞌ ita nilan, kaas pegbesaan tailan. Subay labi pa telimaꞌen ta su tituluꞌan dinita nu Gamaꞌ ta di ginaa. Metubuꞌ ita dayun di ndaꞌi gikteben. 10Tinituluꞌ ita nu gamaꞌ ta dinig lumbang ndaꞌ maiben lepeng tu kemilang nilan gempia. Su Megbebayaꞌ pasiꞌ, tituluꞌen daita dema niin adun mpianan ita mukaꞌ adun malap ta dadema su kekesuunen. 11Su pektituluꞌ dinita, laung ta dun mekelayuꞌ ginaa, masiꞌ pianan ginaa. Laak deksuꞌanen ia meksikesuuni getaw tinituluꞌ mukaꞌ melinawi ketubuꞌen. Nga Tituluꞌan mukaꞌ Pegad 12Kaas, ndiꞌ niu peglukaꞌlukaꞌayi kesalig niu. Ndiꞌ amu penlukasen dun. 13Penemalay niu dunutay su tantu bianan, adun ndiꞌ niu mbelebagan su ngag duma ndaꞌ pa mpanteki kekpetuuden. Sinangkaliꞌ pa tanan mekenggangeti kesalig nilan. 14Peksalabuuk amu gikteb nu megaga niu. Penamal damu dema meksikesuun, puꞌ ndaꞌi mekaitaꞌ tu Kaunutan Megbebayaꞌ saꞌ kanaꞌ mekesuun. 15Peglengilam amu, adun ndaꞌidun diniui meketeliud tu tulung diniin nu Megbebayaꞌ. Peglengilamay niu dadema su pegbetaden niu sia mekesesalaꞌ, puꞌ mbuus megleep meglegalin tu ngag duma niu. 16Subay ndaꞌidun diniui medusa atawaka tuliud tu Megbebayaꞌ maaꞌ ni Esau kanugdiin. Puꞌ si Esau, bisan iini gulangbataꞌ, pigbelesen ditu ngudanen su pegbayaꞌen tu kegulangbataꞌen di salaꞌaanan. 17Misuunan niu, genat nitu saꞌ mauyaꞌanen na penenebian nu gamaꞌen lepeng tu pegbayaꞌen, miteliudan dayun. Pinemalanen sia penengiay, laak ndaꞌen puliꞌ megaga malapi pigbelesen, bisan lamugen mengaduy sabaꞌen menengi dun. 18Naa yamu kepetedan ku, mikpesempel namu tu Megbebayaꞌ. Laak su mibianan niu mekpesempel dun, kanaꞌ maaꞌ nu kekpesempel diniin nu nga getaw Israel kanugdiin. Kanaꞌ nu maitaꞌ mukaꞌ nu mbatik niui pisempelan niu, saꞌitada, sug bentud Sinai tandaꞌ minitaꞌ nu nga getaw Israeli gembagel ligaꞌapuy, medelem gupia, mukaꞌ metikteg buligut. 19Su nga getaw Israel, duun dademai midengeg nilan metenug bugyung mukaꞌ tingeg genat tug langit. Benaꞌ midengeg nilan su tinaluꞌen, inubug nilan gupia, ndiꞌ nailan puliꞌ teluꞌan maꞌantu. 20Puꞌ ndaꞌ nilan megaga su pinalintanen, laungen, “Pia metetubuꞌi mekpuleg tug bentud kini, subay betuun sampay matay.” 21Kagina mekesalebuꞌ gupia su minitaꞌ nilan, mindek ilan gupia. Pia si Moises su kaunutan nilan, tinaluꞌen puꞌ mindek gupia, sinaaban. 22Laak dagid, yamu pasiꞌ, iini mipesempelan niu, sug bentud Sion, saꞌitada, su syudad ditug langit pesangay ta tu Jerusalem. Kiai pegbenwanan nu tantu Megbebayaꞌ. Mipesempelan niu dadema su nga sesuguꞌen nu Megbebayaꞌ getaw langit, ndiꞌ mbilangi kelaunen. 23Mikepesempel damu dema tug lumpuk nu nga penganay bataꞌ nu Megbebayaꞌ meglekebibu ditug langit. Su ngalan nilan, daan na misulat ditu. Midepet namu tu Megbebayaꞌ, su mukum tu tibaꞌan getaw. Mikepesempel damu pagid tu nga mekesuun getaw minatay na, kaas mingganget nai kekesuun nilan. 24Si Isus dademai mipesempelan niu, su migbaal begu pasad dinita nu Megbebayaꞌ, adun mekesalabuuk ita diniin. Puꞌ sabaꞌ nu kepatay ni Isus kini, tinulung ita nu Megbebayaꞌ. Pimesik diniu sug duguꞌ ni Isus, ki gempia pa dig duguꞌ ni Abel kanugdiin, puꞌ kia, tuꞌus laak puꞌ subay suliꞌan su mikpatay diniin. 25Kaas, kagina maꞌantui mibianan niu, petubuday niu ndiꞌ niu pemilasen su mektituluꞌ nandaw genat tug langit. Kanugdiin, saꞌ mipauk su nga getaw Israel mekineeg dini Moises, su mikpetenday dinilan pimuun nu Megbebayaꞌ dinig lumbang, mibianan nilani gembagel pelabuꞌ. Labi pa ndiꞌ ta mpegliaw su ginukuman nu Megbebayaꞌ, saꞌ teliudan ta su mektituluꞌ dinita genat tug langit. 26Kanugdiin mikegyugig lumbang sabaꞌ nu tingeg nu Megbebayaꞌ. Nandaw miktaluꞌ su Megbebayaꞌ, “Kegyugen ku pa puliꞌ mainsan sug lumbang, kanaꞌ laak nug lupaꞌ, pia sug langit.” 27Naa su tinaluꞌen kia, “Puliꞌ mainsan,” maꞌananen adinig bitangen mekegyug, uaꞌenen, adun mbilin da su Keglekaunutan nu Meglegawen ndiꞌ mekegyug. 28Kaas mekpaladpalad ita tu Megbebayaꞌ, puꞌ bigayen ita sumalabuuk ita tu nga miuna sumakup di Keglekaunutanen, su ndiꞌ mekegyug mukaꞌ ndiꞌ mpupus. Mengadap ita diniin gusay mbantang tu mauyaꞌanen, penemalan tain pegbesaay, lemugan ta dadema gendek. 29Puꞌ su Megbebayaꞌ, maaꞌ nu gapuy sigi meket sampay mpupus su kuminuntra diniin. Melaat gupiai ginaanen ditu mimilas diniin.
1 Kaas, ita nga samasakup, subay mekpinetailay ita gusay. 2Ndiꞌ niu selingaway pegdedialay niu dig balay niu su nga getaw ndiꞌ niu mailala. Duuni minembaꞌ tu sesuguꞌen nu Megbebayaꞌ getaw langit, laak laung nilan dun kilawan da. 3Ndiꞌ da niu dema selingaway ebangay niu su nga pinikutan, lepeng pinikutan damu dema. Pegdelendem niu su nga pilegetan, adun mebangan niu ilan, puꞌ duunig lawas niu melemu dadema melegenay.
4Naa, su kegawid niu duayan, subay pegbesaan niu, launan niu. Ndiꞌ amu mpia menlelingay, puꞌ ukumen nu Megbebayaꞌ su nga medusa mukaꞌ su nga menlelingay. 5Subay ndaꞌ dademai gayak niu tu selapiꞌ. Subay pemilangen niu sukal da su misukat niu saꞌ melaun saꞌ maikaꞌ, puꞌ ndaꞌ ba pektaluꞌ su Megbebayaꞌ, “Ndiꞌu yaꞌa belengan, ndiꞌu da yaꞌa dema teliudan.” 6Kaas gembageli kesalig ta tu Megbebayaꞌ, mukaꞌ ndiꞌ naita mpiid mektaluꞌ puun tu Misulat Taluꞌ nu Megbebayaꞌ, laung,
“Megabang dinaan su Kaunutan.
Kagina ndiꞌ nau mekaꞌidan,
taꞌ mai mendeku dun?”
7Naa, su nga miuna kaunutan niu, pegdelendem niu ilan, su nga mikpetuꞌun diniu taluꞌ nu Megbebayaꞌ. Pegdelendem niu gusay su pigbetad nilan sampay su kepatay nilan. Penunggilingay niu dayun su kesalig nilan dini Isus. 8Puꞌ si Isukristu, ndaiꞌ kepalinen, genat kanugdiin sampay nemun, mukaꞌ di ndaꞌi gikteben. 9Kaas ndiꞌ niu pektalentenayig lain tituluꞌan, su mekepetalin di kekpetuud niu. Tumuꞌ pa pepegenen ta su ginaa ta puun tu tulung nu Megbebayaꞌ, sabayaꞌ di kedunut ta tu nga tinituluꞌan di kegelig. Puꞌ su ngag duminunut tu nga tinituluꞌan kia, ndaꞌ mpepagen su ginaa nilan puun tu kedunut nilan dun.
10Naa, ita nga mekpetuud dini Isus, duunig betang ta tu gentudan gilak. Laak kia, ndaꞌi pegbayaꞌ nu nga mektamuy diag lepintaw nu getaw Judea maan ilan dun. 11Naa, sug betad nu Tampusan Metaas Belian nu getaw Judea, uitenen sug duguꞌ nu petubuꞌen diag dialem sugud nug lepintaw paingalan nilan dun su Tampusan Meꞌelig Sugud, adun pengilaken dia. Pengilaken dia adun maugasani salaꞌ nu nga getaw Judea. Sug lawas nu petubuꞌen, uitenen ditug liu nu pegbebelayan nilan, adun tutungen. 12Si Isus pelum, iini milegenan dun dadema diag liu nu syudad, adun petelimaꞌenen su tibaꞌan getaw ditu Megbebayaꞌ mekpuun tug daniin duguꞌ. 13Kaas ndiꞌ ta na seligan sug betad nu getaw Judea mekanu, segaga seligan ta si Isus mukaꞌ meksaliunung ita di kepiidanen. 14Puꞌ ndiꞌ metulayuni kaindegen su pegbenwanan ta dinig lumbang. Pedetengen ta pa su pegbenwanan ta tantu ditug binayaꞌ gebii buꞌ gendaw. 15Kaas, baalen ta gusay ki gilak pegenal tu Megbebayaꞌ pebian dini Isus, gitunganen su pengilak nu nga getaw miglegintuud dun puꞌ si Isus, iini Kaunutan. 16Ndiꞌ dadema niu selingaway pepianay su ngag duma niu, mukaꞌ mektinebangay amu, puꞌ lepeng ia tu gilak leliagen dun su Megbebayaꞌ.
17Mukaꞌ pektalentenay da niu dema su nga meguit diniu, mukaꞌ dunutay niu su suguꞌan nilan diniu, puꞌ ilani megingat di kebetang niu gebii gendaw, puꞌ ilani mekesembag dun tu Megbebayaꞌ. Saꞌ mekpetuud amu dinilan, gempia ginaa nilan di keguit nilan diniu. Saꞌ ndiꞌ niu ilan petuuden, melayuꞌi ginaa nilan di keguit nilan diniu. Saꞌ maꞌantu, taꞌ mai gabang nilan diniu?
18Yami pelum, penenebiay niu ami gusay. Misuunan nami ndaꞌi pegbiksuꞌan nami, puꞌ mauyaꞌan nami penggulaulaan nami lelayun su gempia. 19Penengiin ku diniu, kelelaat, penenebiin niu tu Megbebayaꞌ, ndiꞌ maiben suguꞌenu niin mpuliꞌu ditu niu.
20-21Naa su Megbebayaꞌ, pitubuꞌen puliꞌ su Kaunutan ta si Isus. Si Isus, iin su tampusan metau megingat dinita nga karnirunen, puꞌ pikulaꞌanen duguꞌ su kepatayen, mikpuun tug begu pasad ndaꞌi gikteben. Penenebiin ku pa ditu Megbebayaꞌ su megbegay pianan ginaa di nga sakupen, pesengkapen amu niin dig launan tinawan, adun penggulaulaan niu tantu su mauyaꞌanen. Penenebiin ku dadema baalen amu niin nga sakupen metau megbaal tug leliagen dun gupia pebian di tulung ni Isukristu, su gempia penalan di ndaꞌi gikteben. Amen.
22Naa, penengiin ku diniu, yamu kepetedan ku, telimaꞌ niu su tituluꞌan ku diniu kini di gempia ginaa, puꞌ gempelek dai sinulatu diniu kini. 23Aaw, pesuun ku pa padun diniu puꞌ si Timoteo su mimated dinita, biluyan na di pinikutan dun kaas, saꞌ ndiꞌ melangan, tundug dinaan saꞌ mangayu meguliug dia niu.
24Saꞌ mesuꞌat, sambay niau tu nga kaunutan niu sampay su tibaꞌan piglegetawan nu Megbebayaꞌ dia niu. Sinambay damu dema nu nga samasakup ta begu dateng dini genat tug Italia.
25Kinii taman penenebiin ku, mbianan niu lelayun su tulung nu Megbebayaꞌ, launan niu.
|