2 Tesalonica

2 Tesalonica 1

1  Naan si Pablo, mukaꞌ su ngag dumau si Silas mukaꞌ si Timoteo, puitan ku amu sulat, yamu nu pikumpungan nu nga sakup ni Kristu ditug lunsud Tesalonica suminalabuuk na ditu Gamaꞌ ta Megbebayaꞌ mukaꞌ tu Kaunutan ta si Isukristu. 2Penenebiin ku tu Gamaꞌ ta Megbebayaꞌ mukaꞌ tu Kaunutan ta si Isukristu, begayan amu niin tulung mukaꞌ pianan ginaa. 3Naa yamu Mingumpated, gebii gendaw subay pekpeladpeladan nami su Megbebayaꞌ mekatag diniu. Bantang na daan mekpaladpalad ami diniin, puꞌ migisegi kesalig niu, miksamet dademai keglinelaatay niu. 4Kaas saꞌ meksimba ami dia nga pikumpungan nu nga sakup ni Kristu, pingangyaꞌ nami amu dinilan, puꞌ miktigel amu di kegleget diniu, mukaꞌ ndaꞌ mpalini kekpetuud niu pia milegenan amu. 5Naa, ki pigbetad niu mukaꞌ kektigel niu kia, iin su tuꞌus puꞌ melepengi ginukuman nu Megbebayaꞌ, kaas baalen amu niin bantang sumakup ditu Keglekaunutanen. Puꞌ sabaꞌ nu kesakup niu tu Keglekaunutanen, milegenan amu nemun. 6Mukaꞌ penggulaulaan pa nu Megbebayaꞌ su gempia, puꞌ pelegetanen su nga mikpeleget diniu, 7mukaꞌ peleliinen amu nga pilegetan, sampay yami pa pagid. Penggulaulaan nu Megbebayaꞌ saꞌ metuaꞌ puliꞌ su Kaunutan si Isus genat tug langit, tendugan nu nga ginuungan sesuguꞌen nu Megbebayaꞌ getaw langit mukaꞌ ligaꞌ gapuy, 8adun pelebuꞌanen su nga mimilas tu Megbebayaꞌ mukaꞌ mimilas tu Gempia Petenday mekatag di Kaunutan ta si Isus. 9Iini pelabuꞌ di nga memilas, pelaatan ilan di ndaꞌi tamanen, puꞌ peliuꞌen ilan nu Megbebayaꞌ tu Kaunutan ta, mukaꞌ tu kelengas nu pegbayaꞌen mukaꞌ ginuungen. 10Mpenggulaula di gendaw nu ketuaꞌen puliꞌ, puꞌ iini metuaꞌ dun si Isukristu, pededengegen nu piglegetawanen, mukaꞌ pegbesaan dadema nu ngag launan mekpetuud kampuꞌ amu, puꞌ mituudan amu di ginukit nami. 11Kaas tatap nami amu penenebiay, puꞌ baalen nu Megbebayaꞌ su pegbetaden niu mbantang di keꞌenggaten diniu. Penenebiin da nami dema, puun tu ginuungen pekpelasenen sug launan gempia delendeman niu sampay sug launan penggulaulaan niu puun tu kesalig niu. 12Maꞌantu mpededengeg niui ngalan nu Kaunutan ta si Isus, mukaꞌ pededengegenen damu dema. Mpenggulaula pebian di tulung nu Megbebayaꞌ su pektemuyen ta mukaꞌ nu Kaunutan ta si Isukristu.

2 Tesalonica 2

1  Naa, Mingumpated, ki kelusad puliꞌ nu Kaunutan ta si Isukristu mukaꞌ ki kekpungun ta diniin, penengiin nami diniu, 2ndiꞌ megduaꞌduaꞌig delendeman niu dun. Ndiꞌ damu dema melibuleng puꞌ minateng na daw ki gendaw kia. Mabuꞌ laung dun nu getaw puꞌ naan dawi miktaluꞌ dun saanan ku migwali taluꞌ nu Megbebayaꞌ, saꞌ migukitu, saꞌ daw sinulatu. 3Pia taꞌi mektaluꞌ dun, ndiꞌ amu pekpelimbung. Puꞌ ndiꞌ pa mateng ki gendaw kia subay mauna memilas gupia tu Megbebayaꞌ su nga getaw, mukaꞌ metuaꞌ dadema su pinulay, su ginandam pengain ditug linaw gapuy. 4Ki pinulay kini, iin su kumuntra tug launan pemilangen nu getaw diwata mukaꞌ tug launan pektemuyen nu getaw. Mekpelabaw dig launan nilan sampay mangay diag Balay Pengedapan tu Megbebayaꞌ, megingkud dia, engkenenen iini Megbebayaꞌ. 5Ndaꞌ ba niu medelendem puꞌ su saanan ku dia niu, iini tinaluꞌu diniu? 6Daan na niu misuunan puꞌ nemun duuni megbelabag di kuleg nu pinulay sampay mateng nai gempia timpu. Ki pinulay, metuaꞌ dayun, 7puꞌ kuminulegkuleg na su gandang pigbuni betad nga getaw mekesesalaꞌ, laak mibebelebagan pa sampay mawaꞌ na su migbebelabag dun. 8Mbuasan dayun su pinulay, mukaꞌ petain nu Kaunutan ta si Isus pebian di giup, binesaan di tiag nu ketuaꞌ nu Kaunutan. 9Benaꞌ metuaꞌ su pinulay, puun tu pegbayaꞌ ni Satanas. Penggulaulaneni mekesalebuꞌ tuꞌus mukaꞌ ginuung, adun mpegbelusanen su nga getaw. 10Peglimbunganen di gininisan melaat su nga getaw gasal nilan mpeditug linaw gapuy, puꞌ ndaꞌ nilan telimaꞌay su metuud mukaꞌ ndaꞌ nilan mauyaꞌay, tekaw buus megawen ilan sia. 11Maꞌantu buangen ilan gupia nu Megbebayaꞌ mpeglimbungan, kaas metuudan ilan dun sug balus. 12Deksuꞌanen, ukuman ilan nu Megbebayaꞌ mukaꞌ pelebuꞌanen dadema sug launan ndiꞌ mekpetuud tu tantu metuud mukaꞌ sug leliagen dun sug dupangan. 13Naa yamu pelum, uu Mingumpated petailen nu Kaunutan ta, subay mekpaladpalad ami lelayun tu Megbebayaꞌ mekatag diniu. Puꞌ su ndaꞌ pa mbaali gekleb langit buꞌ lupaꞌ, tinduꞌ amu niin megawen pibian di ginuung nug Balakaten. Megawen amu daan, puꞌ binaal amu niin piglegetawanen pibian dadema dig Balakat nu Megbebayaꞌ mukaꞌ miksekat tu kekpetuud niu tu metuud. 14Inggat amu nu Megbebayaꞌ megawen pibian di Gempia Petenday inukit nami diniu, adun mpeduma amu dig dengegan nu Kaunutan ta si Isukristu mukaꞌ tu kegbasa diniin. 15Kaas, ndiꞌ megduaꞌduaꞌig delendeman niu di tituluꞌan nami diniu, ndiꞌ niu selingaway, pia di ginukit nami, saꞌ su sinulat nami. 16-17Naa, penenebiin nami tu Kaunutan ta si Isukristu mukaꞌ tu Gamaꞌ ta Megbebayaꞌ, penguliksegan amu niin mukaꞌ pepentekenenig delendeman niu mekatag dig launan gempia penggulaulaan niu mukaꞌ pekteluꞌen niu, puꞌ petailen ita niin mukaꞌ tulungen ita niin, kaas mengulikseg ita di ndaꞌi tamanen, mukaꞌ bigayan ita niin gempagen pedetengen.

2 Tesalonica 3

1  Naa, uu Mingumpated, duun pai teluꞌen ku diniu. Saꞌ yami, kelelaat penenebiay niu ami, adun medaliꞌ mesigwag gusayi gukiten nami mekatag di Kaunutan ta mukaꞌ metelimaꞌ dadema gupia maaꞌ nu mipenggulaula diniu. 2Penenabi damu dema, megawen ami di nga mekedupang mukaꞌ di nga getaw lelayun melaati gulaula nilan, puꞌ kanaꞌ nug launan getawi suminalig tu Kaunutan ta. 3Laak su Kaunutan ta, meseligan iin. Pementekeneni kekpetuud niu mukaꞌ penendingan amu niin di Palin. 4Kagina pingmetuudan ami niin, iini kesalig nami mekatag diniu, pinggulaula na niu su tinituluꞌ nami diniu, mukaꞌ penggulaulaan pa niu. 5Penenebian nami amu isegen nu Kaunutan ta dig delendeman niu sug lelaat dinita nu Megbebayaꞌ mukaꞌ su kektigel niu miksekat dini Kristu. 6Naa Mingumpated, kaas tinituluꞌ nami amu pegliaun niu su nga samasakup niu melelaꞌ, su nga ndiꞌ mengimbaal, su nga ndiꞌ dumunut tu tinituluꞌ nami diniu. Tinituluꞌ nami amu, puꞌ pigwekilan ami nu Kaunutan ta si Isukristu. 7Misuunan niu su pinggulaula nami su saanan nami ditu niu. Subay penunggilingan niu ami, puꞌ yami, ndaꞌ ami peglelaꞌ ditu. 8Ndaꞌiduni ginalap nami gaan atawaka pektulugan ndaꞌ nami biaday. Gebii gendaw minamal ami mengimbaal, adun ndiꞌ nami amu medeligan. 9Pia yami siaig bantang menengi diniu sukayan, ndaꞌ, puꞌ adun mbaal niu ami gempia lendasan. 10Ndiꞌ ba metuud, su saanan nami dia niu, iini tinituluꞌ nami diniu, saꞌ duuni getaw ndiꞌ mengimbaal, ndiꞌ dema niu paanen? 11Puꞌ midengeg nami duun dawig duma niu melelaꞌ, ndiꞌ daw mengimbaal. Iin laaki tembaꞌenen, su kenginampenen tu ndaꞌ naig labeten dun. 12Naa, su nga sakup maꞌnia, puun tu kegwakil dinami nu Kaunutan ta si Isukristu, tituluꞌan nami ilan mukaꞌ pegad nami dinilan, subay mengimbaal ilan di kegleketubuꞌ nilan, mukaꞌ ndiꞌ ilan mesasaw di pegbenwa. 13Yamu dema Mingumpated, ndiꞌ niu lukasay gulaulaay su gempia. 14Saꞌ duun diniui ndiꞌ dumunut tu sinulat nami kini, pedelendem niu dun ndiꞌ amu megduma dun, adun mpiid. 15Laak dagid, ndiꞌ niu iin pemilangay kuntra niu. Subay tituluꞌan niu maꞌniin nu ngudan niu. 16Naa, su Kaunutan ta, penenebiin nami diniin pepiananeni ginaa niu gebii gendaw, pia taꞌ alanduni kebetang niu, puꞌ iini puun gupia nu pianan ginaa. Mukaꞌ penenebiin da nami dema diniin, megduma iin diniu, launan niu. 17Naan si Pablo. Ki pinirmaan ku di sulat kini, naani suminulat dun. Kiai tuꞌus dig launan sinulatu puꞌ suminulatu dun, kiaig betadu sumulat. 18Penenebiin nami pa pagid ditu Kaunutan ta si Isukristu begayan amu niin tulungen gebii gendaw, launan niu. Daal daitu. Pablo