1 Pedro1 Diniu nga getaw mipemiliꞌ sakup nu Megbebayaꞌ, Naan si Pedro, peneligan ni Isukristu, piwitan ku amu sulat kini, yamu nga minguliꞌan tu ngag lain benwa, mipelak na tu nga prubinsya Ponto, Galacia, Capadocia, Asia, mukaꞌ Bitinia. 2Puꞌ puun tug daansamaꞌ delendeman nu Gamaꞌ ta Megbebayaꞌ, pimiliꞌ amu niin mpaas amu nug Balakat nu Megbebayaꞌ. Iini mpaas amu dun, puꞌ adun mbaal amu tantu piglegetawanen mukaꞌ adun mekpetuud amu pagid dini Isukristu sampay maugasan amu nug duguꞌen. Naa, penenebiin ku tu Megbebayaꞌ megiseg gusayi tulungen mukaꞌ pianan ginaa mbianan niu. 3Naa, mekpaladpalad ita ditu Megbebayaꞌ, su pektemuyen nu Kaunutan ta si Isukristu mukaꞌ su Gamaꞌen dadema, puꞌ su Megbebayaꞌi migbegay dinita begu ketubuꞌ pibian di kepetubuꞌen puliꞌ dini Isukristu miksekat di gembagel lelaaten. Bigayen dinita puꞌ adun duuni pedetengen ta gembageli gatagen. 4Pedetengen ta puꞌ mpeduunan ita kepianan penenggiꞌan duni pusakaꞌ ginandamen tuꞌu ditug langit, ki ndiꞌ melapuk, ndiꞌ melemuꞌan mukaꞌ ndiꞌ mbeleng. 5Yamuig bigayan dun, pegingaten amu nu Megbebayaꞌ pibian di ginuungen sabaꞌ nu kesalig niu, puꞌ adun megawen amu. Saꞌ sungu na melengkebig benwa, mbuasan na gupia ki kegawen dinita nu Megbebayaꞌ. 6Kaas, ki pedetengen niu kini, dedialay niu, pia pasiꞌ maubaꞌi ginaa niu nemun ndiꞌ maiben, sabaꞌ nu nga mbianan pa niu gininisan kengindan. 7Iini pengindanan amu dun, adun peksimaꞌen su kesalig niu, saꞌ gempagen ba, saꞌ gembabaw ba. Su kengindan di kesalig niu, maaꞌ nu keksimaꞌ dig bulawan, puꞌ sug bulawan, saꞌ peksimaꞌen pebianen di gapuy adun mesuunan saꞌ tantu, saꞌ kanaꞌen. Laak melagaꞌ pa dig bulawani kesalig niu, puꞌ sug bulawan, mpupus da. Yamu, saꞌ mekebian amu di nga kengindan diniu, iinig deksuꞌanen, penalan amu, megdedengeg amu mukaꞌ pegbesaan amu, saꞌ metuaꞌ puliꞌ dini si Isukristu. 8Puꞌ iin, pia ndaꞌ niu siben maitaꞌ, petailen niu. Pia ndiꞌ na niu melabet, mituudan amu diniin. Kaas liliag amu dun gupia dig leliag ndaiꞌ tamanen, 9puꞌ mekpalas tuꞌui kesalig niu, saꞌitada megawen amu. 10Mendadi, ki nga getaw pimuunan nu Megbebayaꞌ dengantu, pinemalan nilan penilungay ki keglegawen kini di getaw tu nga salaꞌ, adun metukawan nilan sug bian nu Megbebayaꞌ menggulaula dun. Pisuun nilan dayun tu nga getaw su ketulung diniu nu Megbebayaꞌ nemun. 11Sigi nilan tukaway saꞌ nanu mbuasay ki keglegawen mukaꞌ kendutaꞌi kebianen. Puꞌ su nga kelegenay mbianan pa ni Kristu mukaꞌ su kegdedengegen gupia dayun, pisuun pedaan dinilan nug Balakat ni Kristu mingapuꞌ dinilan. 12Mibuasan dadema dinilan puꞌ saꞌ tinaluꞌ nilan pedaan ki pisuun diniu nemun, kanaꞌ gabang dinilan. Sinangkaliꞌ pa tanan, iini miktaluꞌ ilan dun pedaan, adun ebangan amu. Iin nai mektaluꞌ dun diniu, su nga megukit Gempia Petenday, kig bigayan ginuung nug Balakat nu Megbebayaꞌ pilusad dinilan nu Megbebayaꞌ. Pia su nga sesuguꞌen nu Megbebayaꞌ getaw langit, mauyaꞌan nilan gupia mesabut nilan su nga pisuun diniu nemun kini mekatag di kegawen ta. 13Kaas sangkap na niuig delendeman niu, adun baalen niu su mauyaꞌan nu Megbebayaꞌ. Guut niu pa pagidig delendeman niu, sampay pepenggengeten niui pedetengen niu tu kepia diniu saꞌ lumusad puliꞌ si Isukristu. 14Pekpetuud amu gupia tu Megbebayaꞌ, mukaꞌ ndiꞌ niu begay su gayak niu meguit tug delendeman niu kinilawan, su gayak niu saꞌ ndaꞌ pa niu mesabut su metuud. 15Segaga pegbetaden niu su ndaꞌi melamug dun melaat di tibaꞌan penggulaulaan niu, maaꞌ da nu Megbebayaꞌ, ndaꞌi melamug dun melaat, su migenggat diniu sumakup diniin. 16Puꞌ ndaꞌ ba mesulat di Misulat Taluꞌ nu Megbebayaꞌ, “Subay ndiꞌ niu begay melamug di pigbetad niu ki melaaten, puꞌ naan, ndaꞌig betadu melaaten.” 17Naa su Megbebayaꞌ, kagina ingelanan niu iin Amaꞌ saꞌ menenabi amu tu niin, subay pegbesaan niu iin gupia sinegay niu megbebenwa pa dinig dibabaw lumbang. Puꞌ gebii gendaw peglepengenen da ukumay su tibaꞌan getaw mbantang tu gulaula nilan, puꞌ ndaꞌig lingken petailenen. 18Keduaꞌen, pegbesaay niu iin, puꞌ misuunan niu saꞌ likat amu niin di pigbetad niu ndaꞌi gatagen pingumbilin diniu nu nga ginepuꞌay, kanaꞌ nu selapiꞌ atawaka bulawani piglekat dun, puꞌ kia, mpapas da. 19Iin pasiꞌi piglegawenen diniu, su melagaꞌ duguꞌ ni Kristu, sug binaal betang maaꞌ nati karniru ndaꞌi melaat dig lawasen. 20Puꞌ su ndaꞌ pa mbaali gekleb langit buꞌ lupaꞌ, daan na pigdelendem nu Megbebayaꞌ si Kristu meglegawen dinita. Dayun nemun mibuasan na, adun mpianan amu. Mibuasan nemun kini, ki tampusan gebii buꞌ gendaw kini. 21Pebian dini Kristu mikpetuud namu ditu Megbebayaꞌ, su mikpetubuꞌ puliꞌ dini Kristu mukaꞌ pitaasen sampay ndaꞌig lumabaw tug dengeganen. Kaas suminalig amu gupia tu Megbebayaꞌ, mukaꞌ pedetengen niu tuꞌu puꞌ penuudenen su nga pinasaden. 22Naa, kagina dinunutan niu su metuud tituluꞌan, miugasan namu di melaat pigbetad niu, kaas kanaꞌ na duaꞌduaꞌig lelaat niu di nga samasakup niu. Maꞌantu, subay gelaꞌ niui ginaa niu di kekpinetailay niu. 23Puꞌ migigetaw namu puliꞌ pibian di taluꞌ nu Megbebayaꞌ, ki taluꞌ ndaꞌi kepupusen mukaꞌ mekegbegay ketubuꞌ. Kanaꞌ namu bataꞌ nu getaw gasalen matay, puꞌ bataꞌ namu nu ndiꞌ matay. 24Maꞌantu, ndaꞌ ba mesulat di Misulat Taluꞌ nu Megbebayaꞌ, “Kig launan kilawan, maaꞌ ilan laak nu sigbet, maaꞌ da nug bulakbulak sigbeti kelengas nilan. Su sigbet, melawes, mukaꞌ sug bulaken, melugdas. 25Laak dagid, ki taluꞌ nu Kaunutan, ndaꞌ nai kebelengen.” Ki taluꞌen kini, iin su Gempia Petenday miukit na diniu. 1 Kaas yamu, teliuday niuig launan dupangan niu, ndiꞌ namu pegbalus, ndiꞌ namu pektautau mekesuun, ndiꞌ amu pengimbegu, sampay ndiꞌ amu peglibak dig duma niu. 2Sinangkaliꞌ, maaꞌ nu gembataꞌ begu pegigetaw mauyaꞌanen gupia dumuduꞌ, gangut niu dun medengeg niu su taluꞌ nu Megbebayaꞌ, puꞌ adun megisegi sinuunan niu di metuud mukaꞌ megawen amu. 3Puꞌ ndaꞌ ba mesulat di Misulat Taluꞌ nu Megbebayaꞌ, “Mibianan na niu sug lelaat nu Kaunutan.” 4Pekpesempel amu di Kaunutan, su mektetubuꞌ di ndaꞌi tamanen. Iin, mpetanggiꞌ dig batu pimilas sia nu getaw migbaal balay, puꞌ ndaꞌi gatagen daw. Iin sungkini mipemiliꞌ nu Megbebayaꞌ, puꞌ gembagel gupiai gatagen. 5Yamu dema, maaꞌ damu nu tetubuꞌ batu, kaas pekpetuud amu ditu Megbebayaꞌ, adun mbaal amu niin balay diniwata, saꞌitada ki pikumpungan nga sakupen. Megbelian amu dia da balay kia, pinaas nu Megbebayaꞌ, adun pebian dini Isukristu pengilaken niu sug betang medawat nu Megbebayaꞌ. Kig betang kiin, iin su kektamuy ta diniin. 6Puꞌ ndaꞌ ba mesulat di Misulat Taluꞌ nu Megbebayaꞌ, “Pektalentenay niu ini! Duuni tinduꞌu melagaꞌ batu, betangen ku diag benwa Sion baalen ku gentudan tug balay. Adini getaw sumalig diniin, ndiꞌ mekpelilu.”2:6 Kig batu pimilas nu getaw, guluganen si Isukristu, su pimilas nu nga getaw Judea, asa iini tinduꞌ nu Megbebayaꞌ tampusan metaas. 7Kig batu kini, melagaꞌ gupia diniu nga mikpetuud, laak mekatag tu nga ndaꞌ pekpetuud dini Isukristu, ndaꞌ ba mesulat di Taluꞌ nu Megbebayaꞌ, “Kig batu pimilas nu nga megbaal balay, iini mibaal tampusan gempagen gintudan tug balay.” 8Ndaꞌ ba mesulat di sala sinulat di Misulat Taluꞌ nu Megbebayaꞌ, “Meseknun nu nga getawig batu kini, ki genduk mekepesulaub di getaw.” Naa metuud. Duuni nga getaw, miseknun nilanig batu kia, puꞌ ndaꞌ mailan pekpetuud tu Gempia Petenday pimuun nu Megbebayaꞌ. Kiai tinduꞌan dinilan nu Megbebayaꞌ. 9Laak yamu pasiꞌ, pimiliꞌ amu nu Megbebayaꞌ daniin bansa, ki ngag belian nu Tampusan Gadiꞌ si Kristu, ki nasud pinaasen, ki nga tantu piglegetawanen. Tinduꞌ amu niin megukit amu tu nga mekesalebuꞌ penggulaulaan nu Megbebayaꞌ. Inggat amu niin guaꞌ di medelem, adun medelagan namu nu metuud. 10Puꞌ dengantu, kanaꞌ amu sakup nu Megbebayaꞌ, laak dagid nandaw, sakup namu niin. Dengantu, ndaꞌ niu mbianay sug lelaaten. Nandaw, lilaatan namu niin. 11Naa, yamu nga petailen ku, penengiin ku diniu, kagina kanaꞌ mamu dangen dinig lumbang kini, puꞌ guliug da laak amu dini, naa ndiꞌ niu begay su gayak niu kinilawan megbayaꞌ di ginaa niu. Puꞌ kia, megdaang lelayun dig delendeman niu, adun ndiꞌ amu sia dumunut tu Megbebayaꞌ. 12Subay penemalan niu pegbetaday su melegdeng, adun pia pegdenaꞌen amu nu nga ndaꞌ pa pekpetuud, mailala nilan gusay puꞌ gempiai pigbetad niu. Deksuꞌanen ia, penalan nilan su Megbebayaꞌ di gendaw lumusad puliꞌ iin adun pengukumanen su tibaꞌan getaw. 13Maꞌantu yamu, puun di kesakup niu tu Kaunutan, pekpetuud amu gusay tu ngag launan meglekaunutan dinig dibabaw benwa, tu tampusan gadiꞌ si Cesar, puꞌ ndaꞌig labaw diniin, 14mukaꞌ tu nga gubirnadur, su nga pigwekilan nu gadiꞌ kiin meksilut tu nga menggulaula melaat mukaꞌ megenal tu nga menggulaula gempia. 15Puꞌ iini mauyaꞌan nu Megbebayaꞌ, pemaagen niu su nga medupang getaw di keglekuti nilan diniu. Mpemaag ilan saꞌ maitaꞌ nilan su mekesuun pigbetad niu. 16Kagina biluy namu nu Megbebayaꞌ di melaat gulaula niu, subay mektetubuꞌ amu di ndaꞌidunig lain mekegbayaꞌ diniu. Laak dagid su kebeluy niu di salaꞌ niu, ndiꞌ niu baalay sikaw niu megdupang amu, puꞌ sesuguꞌen amu nu Megbebayaꞌ. 17Pegbesaay niu sug launan getaw, petail niu su nga samasakup niu, penemalay niu pegbesaay su Megbebayaꞌ, mukaꞌ pegbesaay niu dadema su tampusan gadiꞌ. 18Naa, yamu nu nga sesuguꞌen, subay mekpetuud amu tu gegalen niu mukaꞌ pepenggengeten niui kegbasa niu dinilan. Kanaꞌ mpia pegbesaan laak su nga melilelaaten mukaꞌ mesumayaꞌ gegalen niu, subay su nga mekpeleget dadema diniu. 19Deksuꞌanen ia, pepianan amu nu Megbebayaꞌ, saꞌ metau amu mektigel di kegleget diniu kanaꞌ niu tinibabaꞌ. Pektigelen niu su kegleget diniu, puꞌ pegdelendem niu su mauyaꞌan nu Megbebayaꞌ. 20Puꞌ gempia bamu enalen saꞌ pektigelen niu laaki kelaneg diniu di tinibabaꞌ niu, puꞌ sabaꞌ nu salaꞌ niu? Ndiꞌ lai. Laak saꞌ pektigelen niu su nga kelaneg diniu nu nga gegalen niu, pia melengas pasiꞌi penggulaulaan niu, naa kiin, pepianan amu dun nu Megbebayaꞌ. 21Tinduꞌ amu nu Megbebayaꞌ mektigel di kegleget diniu pia melengas dai penggulaulaan niu. Puꞌ si Kristu, milegenan gumantiꞌ ma diniu mukaꞌ mingumbilin diniu lendasan, adun penunggilingan niu iin. 22Iin, ndaꞌ mainsan pekesalaꞌ, ndaꞌ dadema mainsan pegbalus. 23Benaꞌ piksudiꞌan nu nga getaw, ndaꞌen ilan suliꞌay peksudiꞌay. Benaꞌ piglegetan nu nga getaw, ndaꞌen ilan suliꞌay pengetuay, segaga pisaligen su mpenggulaulanen tu Megbebayaꞌ, su ndiꞌ meksulamig saꞌ mengukum. 24Laak dagid si Kristu, piglegetan iin nu Megbebayaꞌ sabaꞌ nu nga salaꞌ ta. Su nga salaꞌ ta, iwiten ditu kurus pidumanen tug lawasen, adun mpemilang taig lawas ta minatay na, ndaꞌ naig labeten tu salaꞌ. Sinangkaliꞌ pa tanan mektetubuꞌ naita di kekesuun. Puun tu gangelen, miuliꞌan namu. 25Dengantu maꞌniin amu nu petubuꞌen paingalan dun karniru midalaꞌ. Laak dagid nandaw minuliꞌ namu di Megingat Karniru, puꞌ iini megingat gupia diniu. 1 Naa maꞌantu dadema, yamu nu ngag libun, diadia subay petuudenen ki sawanen, adun su ngag laki ndaꞌ pa pekpetuud tu taluꞌ nu Megbebayaꞌ, magak ilan mekpetuud dini Kristu pebian di melengas betad niu. Saꞌ maꞌnia, ndiꞌ na niu kambat ilan ukitay mekatag di Gempia Petenday, 2puꞌ mesimet ma nilan di pegbetaden niu ndaꞌi melamug dun melaat mukaꞌ tu kegbasa niu tu Megbebayaꞌ. 3Ndiꞌ niu mpia pemilangay lengasan niu su gininisan kegimakay niu, su kenlenuꞌlenuꞌ niu dig buuk niu mukaꞌ su keseluk niu pekayan binaal bulawan. 4Iin sungkini gempia niu baalen lengasan niu sug delendeman niu, lengasan ndiꞌ mpalin, maitaꞌ dig betad mesumayaꞌ mukaꞌ ndiꞌ mesasak. Kia, melagaꞌ gupia di pegitaꞌen nu Megbebayaꞌ. 5Maꞌniin dema sug betad nu nga gembasa libun dengantu binaal nilan lengasan nilan. Suminalig ilan tu Megbebayaꞌ, mukaꞌ iini binaal nilan pekayan nilan, su kekpetuud nilan tu sawa nilan. 6Maꞌniini pigbetad ni Sara, puꞌ iin, mikpetuud dini Abraham, sampay piningalanen dun gegalenen. Yamu nemun, mbaluy namu ngag bataꞌ ni Sara, saꞌ penggulaulaan niui kekesuun, mukaꞌ ndaꞌi gendekan niu, pia maikaꞌ. 7Mukaꞌ yamu dema nu ngag laki, mituꞌusan niu puꞌ su ngag libun, melukaꞌ pa dun diniu, kaas su kesenlangan niu, subay pegbesaanen diadia su sawanen. Keduaꞌen, mpeduma diniu su ngag libun begayan nu Megbebayaꞌ ketubuꞌ ndaꞌi tamanen puun tu tulungen. Pegbesaan niu dailan dema, adun ndaꞌi mekebelabag di kenenabi niu ditu Megbebayaꞌ. 8Naa, duun pai tituluꞌu diniu, launan niu. Subay meksalabuuk amu dig delendeman niu sampay di ginaa niu. Pekpinetailay amu, puꞌ lepeng mekpated namu. Peglinelaatay damu dema sampay diadia pebebaꞌeneni ginaanen dig dumanen. 9Su mekpelaat diniu, ndiꞌ niu suliꞌay melaat. Su mektampalaksa diniu, ndiꞌ niu suliꞌay tampalaksaay. Tumuꞌ pa suliꞌay niu gempia, puꞌ iini ginggat amu dun nu Megbebayaꞌ, puꞌ adun pepianan niu su nga samataw niu, mukaꞌ begayan pamu dema niin kepia. 10Ndaꞌ ba mesulat di Misulat Taluꞌ nu Megbebayaꞌ maꞌniniꞌ, “Adin su getaw anguten dun memisi kebetangen dinig lumbang mukaꞌ leliagen dun su ketubuꞌen dini, subay ndiꞌ meglibak mukaꞌ ndiꞌ megbalus. 11Subay pegliaunen su melaat, iin laaki penggulaulaanen su gempia. Subay sumalabuuk di ngag dumanen, gikteb di megaganen. 12Puꞌ pegingaten nu Kaunutan su nga mekesuun, pekineeganen gusay su nga kenenabi nilan. Laak dagid su nga menggulaula melaat, kuntraanen ilan gusay.” 13Naa maꞌantu, saꞌ menamal amu menggulaula melengas, ndaꞌi getaw mekpelaat diniu. 14Laak dagid pia pelegetan amu puun di kenggulaula niu mekesuun, leliagen damu. Ndiꞌ amu mendek di getaw, ndiꞌ amu dema melibuleng. 15Sinangkaliꞌ pa tanan, pegbesaay niu gusay si Kristu di ginaa niu buꞌ delendeman niu, iin dai Kaunutan. Subay pegandam amu lelayun sumbag di getaw sumaak diniu saꞌ taꞌ mai suminalig amu dun tu Megbebayaꞌ. 16Laak subay pengmayaꞌmayaꞌ niu sembagay su samataw niu mukaꞌ pegbesaan niu ilan. Pia taꞌ alanduni penggulaulaan niu, baal niu di gempia delendeman, adun saꞌ duuni getaw peksudiꞌanen su gempia pegbetaden niu miksekat di keksalabuuk niu dini Kristu, mpiid dayun di kesudiꞌen. 17Puꞌ saꞌ upama iini mauyaꞌan nu Megbebayaꞌ mbianan niui peleget, tumuꞌ pa pelegetan amu meksekat di kenggulaula niu di melengas, sabayaꞌ nu kenggulaula niu melaat. 18Puꞌ si Kristu, minatay mainsan sabaꞌ nu nga salaꞌ ta, ndiꞌ na kambat puliꞌan. Minatay su mekesuun gumantiꞌ di nga kanaꞌ mekesuun, adun meksud ita tu Megbebayaꞌ. Pinatay nu getaw sug lawasen, laak su gimuuden, ndaꞌ patay. 19Linaawan dayun nu gimuuden su nga gimuud mipikutan na, puꞌ migwali dinilan. 20Ki nga gimuud kia, gimuud nu nga mimilas tu Megbebayaꞌ ditu gendawan pa ni Noe dengantu. Pia miktigel su Megbebayaꞌ dinilan saananen megelat di kegbiksuꞌ nilan sia, mimilas ilan gupia sinegay pegbaalen ni Noe su gembagel sekayan. Sug walu tawan mikesakay tug butuk, migawen ilan di tubig. 21Ki tubig kia, maꞌantui tubig mbunag dinita, puꞌ megawen naita miksekat di kebunag dinita pebian di ketubuꞌ puliꞌ ni Kristu. Naa, ki kebunag kia tubig, kanaꞌ pegugas dig luud nug lawas ta, segaga iin sungkini kekpaingabang ta tu Megbebayaꞌ, adun tetubuꞌ daita di gempia delendeman ta. 22Puꞌ si Kristu, miditug langit sampay ditu gupid nu Megbebayaꞌ dapit lintu, tandaꞌ megbayaꞌ tug lumaun sesuguꞌen nu Megbebayaꞌ getaw langit, mukaꞌ tu ngag launan duma megbayaꞌ, sampay tu tibaꞌan meglekaunutan di nga ndiꞌ maitaꞌ. 1 Naa kagina miktigel si Kristu di mesait, yamu dadema, subay mengandam amu di kepesait diniu, puꞌ saꞌ mektigeli getaw di kelegenayen, tumiliud na di salaꞌ. 2Kaas genat nandaw, subay mektetubuꞌ amu dinig dibabaw lumbang puun tu mauyaꞌan nu Megbebayaꞌ, sabayaꞌ tu gayak niu kinilawan. 3Sanipuꞌ na su minayan pigbetad niu, saꞌ minggulaula pamu nga gayak nu nga ndiꞌ mekpetuud tu Megbebayaꞌ. Iini pigbetad niu kia, midusa amu, miayak amu di mekepiidpiid, tatap amu megbebulek, pinenatan damu dema meglekebibu, sampay miktamuy amu tug ledawan ndiꞌ tanan sindapan nu Megbebayaꞌ. 4Kaas nemun su ngag duma niu ndiꞌ mekpetuud tu Megbebayaꞌ, misebuꞌan nailan dun puꞌ mauma ndiꞌ namu megduma dinilan meglekebibu, kaas piksudiꞌan amu nilan. 5Laak duuni gendaw subay menembag ilan ditu gedapan nu Megbebayaꞌ, su minuyaꞌ na mengukum tu nga getaw tetubuꞌ pa sampay su nga mimatay na. 6Kaas pia su nga mimatay na, su nga mikebian na di ginukuman dinilan dengantu su saanan nilan tetubuꞌ pa, iini miukitan ilan dun Gempia Petenday, adun metubuꞌ dailan dema, maaꞌ nu ketubuꞌ nu Megbebayaꞌ. Puꞌ mbianan dadema nug launan getaw ki ginukuman kia. 7Naa mendadi, sungu na melengkebig benwa. Kaas subay metau amu megbayaꞌ di ginaa niu mukaꞌ meguit tug delendeman niu, adun mekenenabi amu tu Megbebayaꞌ. 8Pidag pa tanan subay kanaꞌ duaꞌduaꞌi kekpinetailay niu, puꞌ ki kekpinetailay, iini mekpetuyang di metibaꞌ salaꞌ nu nga samataw niu. 9Pektinelimaꞌay amu pa pagid dia ngag balay niu, mukaꞌ ndiꞌ amu megdialem ginaa. 10Naa kagina bigayan amu nu Megbebayaꞌ tinawan, diadia subay gemitenen su tinawanen di gabangen tu nga samasakupen, puꞌ saꞌ maꞌantu, gempia seligan nu Megbebayaꞌ. 11Pinenggiꞌ saꞌ duunig bigayan tinawanen megwali, subay pegweliinen tuꞌu su taluꞌ nu Megbebayaꞌ. Adin dema sug bigayan tinawan megabang di nga samatawen, subay megabang da di gikteb megaganen bigay dun nu Megbebayaꞌ. Kaas sug lumaun baalen niu, pegbetad niu su megleep dun sug dengegan nu Megbebayaꞌ puun dini Isukristu. Puꞌ daniin su gempia dengegan mukaꞌ ginuung di ndaꞌi tamanen! Amen. 12Naa, yamu nga petailen ku, ndiꞌ amu melibuleng di nga meliget pengindan diniu pektigelen niu nemun, puꞌ kia, subay mbianan nu nga sakup ni Kristu. 13Sinangkaliꞌ pa tanan, subay leliagen amu di keksaliunung niu di kelegenay ni Kristu, adun mpenggangetig leliag niu ditug binayaꞌ gebii buꞌ gendaw saꞌ medayag na nu tibaꞌan getaw su kelengas nu pegbayaꞌ ni Kristu. 14Naa, saꞌ iini tampalaksaan amu dun nu getaw puꞌ sakup amu ni Kristu, leliagen namu, puꞌ guluganen luminusad na diniu su ginuungan mukaꞌ melengas Balakat nu Megbebayaꞌ, mukaꞌ ndiꞌ na mawaꞌ diniu. 15Asa ndiꞌ mpia saꞌ duun diniui melegenan, iini sabaꞌen puꞌ mimunuꞌan atawaka migdaaw atawaka mimilas tug betad atawaka menginampen tu ndaꞌig labeten dun. 16Laak saꞌ melegenan amu pasiꞌ puun tu kesakup niu dini Kristu, naa ndiꞌ amu mpiid dun, segaga pekpeladpeladan niu su Megbebayaꞌ, puꞌ diin namu gengkeman ni Kristu. 17Naa, minateng nai gendaw mekpuun na mengukum su Megbebayaꞌ di tibaꞌan getaw. Mukaꞌ iini unaanen ukumay, ita nga suminakup diniin. Kumalenged itai unaanen ukumay, ndiꞌ ba labi na meligeti mpenggulaula nu nga ndaꞌ pekpetuud di Gempia Petenday genat tu Megbebayaꞌ, saꞌ ilan nai ukuman? 18Maꞌantu, ndaꞌ ba mesulat di Misulat Taluꞌ nu Megbebayaꞌ, “Saꞌ melegen megawen ki nga mekesuun, mekendutaꞌ ma dun pelum su nga ndiꞌ megbasa tu Megbebayaꞌ kampuꞌ nu nga mikesalaꞌ?” 19Kaas adin su melegenan puun dig delendeman nu Megbebayaꞌ, subay paingaten sug lawasen mukaꞌ su ginaanen ditu Miwat dun, pebian di kenggulaulanen melengas, puꞌ su Miwat dun, ndaꞌiduni pasaden ndiꞌen penuuden.
1 Naa saꞌ maꞌantu, yamu nu nga kaunutan di nga pikumpungan suminakup, duun nai penengiin ku diniu, puꞌ danaan, kaunutan dau dema maꞌniin diniu. Puꞌ miketakesiꞌu di kekpeleget dini Kristu, mukaꞌ mailasan mau dig dengeganen buꞌ kegbasa diniin saꞌ mbuasan na nu Megbebayaꞌ. Kaas, iini penengiin ku diniu nu nga kaunutan, 2ki nga samasakup niu, tagikul niu ilan gupia, puꞌ pisalig ilan diniu nu Megbebayaꞌ, maaꞌ ilan nu nga karniru nu Megbebayaꞌ. Kaas, ingat niu ilan gupia meksekat di mauyaꞌan niu megabang dinilan, kanaꞌ puun di kekpetegel diniu, kanaꞌ dadema puun di tindan diniu, puꞌ kiai mauyaꞌan nu Megbebayaꞌ. 3Ndiꞌ niu petegasayi keguit niu di nga pisalig diniu, segaga pegbetad niu lelayun su mbaal gempia lendasan nilan. 4Dayun saꞌ metuaꞌ su Tampusan Megingat, sugdaan amu niin di kelengasen mukaꞌ dengeganen ndiꞌ megengkan.
5Yamu pelum nu ngag begu getaw, maꞌantu damu dema, subay mekpetuud amu tu nga megulang pa dun diniu. Sampay launan niu, diadia subay pebebaꞌenenig lawasen tu ngag dumanen, adun mektinebangay amu gupia, puꞌ ndaꞌ ba mesulat di Misulat Taluꞌ nu Megbebayaꞌ, “Su mekpelabawlabaw getaw, teliudan nu Megbebayaꞌ, laak begayanen tulungen su nga mekpebabaꞌ di ginaa nilan.” 6Kaas subay mekpebabaꞌ amu gusay tu Megbebayaꞌ, su tampusan ginuungan, adun petaasen amu niin di gendaw pinasaden. 7Pegwakil niu diniin su kelaun kelibuleng niu, puꞌ iin, mektagikul diniu.
8Naa, guut niuig delendeman niu, peglengilam damu dema, puꞌ duuni kuntra niu, su Palin. Peglibedlibed iin pekpenengaw mpeteliuden tu Megbebayaꞌ maaꞌ nug limaung pekpemunggaul pekpenengaw depaꞌenen. 9Naa, pepagen niui kesalig niu mukaꞌ pengetuay niu su Palin, puꞌ misuunan niu puꞌ su nga samasakup ta dini tibuukan lumbang, mbianan pa nilan kelegenay maaꞌ nug daniu. 10Dayun su Megbebayaꞌ, saꞌ mbianan niui kelegenay ndiꞌ maiben, petindegenen su kekpetuud niu, pepegenenen su kesalig niu, sampay pepentekenen su sinuunan niu mekatag di metuud, puꞌ iini metau megbegay launan tulung tu nga sakupen. Iin dademai migenggat diniu mpeduma tu kelengasen mukaꞌ tu kegdedengegen ndaꞌi tamanen, miksekat di keksalabuuk niu dini Kristu. 11Subay penalan iin, puꞌ daniin su ginuung di ndaꞌi tamanen! Amen.
12Naa dini gempelek sulat kini, mikpaingabangu dun dini Silas. Iin, pimilangu meseligan mimated dinita. Piwitu diniu ki sulat kini, adun uliksegen ku amu sumalig gusay ditu Megbebayaꞌ, mukaꞌ adun pesuun ku dadema diniu puꞌ ki tituluꞌan ku diniu kini, iin su tantu tulung nu Megbebayaꞌ. Kaas subay pepenggengeten niu dig delendeman niu.
13Naa, sinambay amu nug duma niu mekumpung dini syudad Babilonia, su nga pimiliꞌ dadema nu Megbebayaꞌ mbaal sakupen. Sinambay damu dema ni Marcos, kig lepeng bataꞌu. 14Adun paitaꞌ niu su kekpinetailay niu, peglekumustaay amu mbantang tu nga pinaas nu Megbebayaꞌ daniin getaw.
Penenebiin ku, ki pianan ginaa, ndiꞌ suay diniu, saladuaꞌ, yamu nu nga sakup ni Kristu.
Daal daitu.
Pedro
|