Cobato Manobo Revelation

Kepehaa I Hésus Kelistu

1 Na, ini sa igsulat denu sa igpehaa i Hésus Kelistu. Igsugkow di iya wé kedu diyà si Nemula anì metiigan sa medoo etaw eg-unut-unut diyà kenagdi sa buyu dé mebaelan. Igpetiig i Kelistu iya wé diyà kenak danà di migpeangay sa egsugùsuguen di kedu langit dò diyà kenak, aken i Huwan sa egpangunut diyà kenagdi. 2 Igsulat ku sa langun hinaa ku, owoy egtulonen ku diyà keniyu siini kagi i Nemula dinineg ku owoy sa tuu tegudon igpetiig i Hésus Kelistu diyà kenak. 3 Amuk egbasawen yu sa langun kagi igsulat diyà siini libelu, tigtu yu meanggan. Amuk egdineg-dineg yu owoy egpangunut yu diyà siini kagi igsulat diyà siini libelu, tigtu yu ma meanggan enù ka buyu dé meketuu siini langun igpetiig i Nemula. 4 Na, si Huwan a egsulat ini i diyà keniyu i etaw egpigtuu eg-ugpà dutu siedò pitu menuwa diyà sa dakel uwang tanà Asiya. Egsimbà a anì mekehaa yu sa dakel ketabang ipeuloy da i Nemula owoy sa Metiengaw Suguy di owoy si Hésus Kelistu, owoy ungayà ku ma kumelanih sa keugpà yu danà da. Na si Nemula, tapay dé duen kagdi i edung egoh anay taman ini egoh owoy taman melugay. Owoy sa Metiengaw Suguy i Nemula, duen sa pitu ukit kepehaa di sa dakel tunung di owoy takà eg-ugpà diyà sa taengan sa metolol bangkù i Nemula. 5 Owoy si Hésus Kelistu, kesaligan sa kagi di. Kagdi sa anay etaw inenaw i Nemula egoh di nematay owoy sa Tigtu Datù egsabà sa langun ulu-ulu diyà siini sinukub langit. Dakel sa kehidu di kenita, huenan di linaun di kita kedu diyà sa medoo salà ta danà sa depanug di miglesut egoh di nematay. 6 Iglapeg di kita diyà sa kedatù di, owoy binaluy di kita sa medoo egsugùsuguen di takà eg-olò sa Emà di si Nemula. Huenan di, meolò Hésus Kelistu i, enù ka endà meelut sa kedatù di taman melugay. Amin. 7 Taa yu, hih. Pelikù Hésus Kelistu i unutan gaeb, owoy hauwen sa langun etaw lapeg sa medoo mig-imatay kenagdi. Suminegaw sa langun balangan etaw diyà siini sinukub langit danà di tumebow enù ka kagdi sa migtamay kenagda. Meketuu doo iya wé. Amin. 8 Na, si Datù Nemula épê tigtu dakel egkegaga, tapay dé duen kagdi i edung egoh anay taman ini egoh di owoy taman melugay. Huenan di, guwaen di, "Aken sa Alpa owoy sa Oméga." Na, iya sa selepangan sa inikagi di, kagdi sa edungan sa langun eghauwen owoy sa ketamanan di. 9 Na, aken si Huwan sa duma yu egpigtuu, owoy lagà a ma keniyu danà ta nesesebaen si Hésus, enù ka egtigkelan ku ma sa lihay nekeuma diyà kenita danà ta eg-unut-unut diyà sa kedatù i Nemula. Pineangay a diyà sa tukééy pungul Patmos danà ku egtegudon sa kagi i Nemula owoy danà ku ma egtulù sa tuu tegudon igpetiig i Hésus Kelistu. 10 Na, sebaen Akad, sa agdaw ta eg-olò si Datù, linuhub a sa Metiengaw Suguy i Nemula owoy duen sa igpehaa di diyà kenak. Dinineg ku sa eg-ikagi metaled denu iyug ku, owoy lagà sa dagì tegbuli enù ka tigtu metaled. 11 Guwaen di, "Sulati ko sa langun eghauwen ko, owoy peuwiti ko diyà sa pitu umpungan sa etaw egpigtuu, dutu menuwa Épéso owoy menuwa Ismilna owoy menuwa Pilgamo owoy menuwa Tiyatila owoy menuwa Saldis owoy menuwa Piladelpiya owoy menuwa Laodisiya." 12 Egoh ku migdineg iya wé, migkiling a anì hauwen ku sa etaw mig-ikagi diyà kenak. Egoh ku migkiling, hinaa ku sa pitu tinaguan sulù anan bulawan. 13 Diyà sa teliwadà siini pitu taguan sulù, duen sa etaw egtigdeg éhê palas sa Kakay Langun. Melomboy sa kawal di owoy bulawan sa bandan di. 14 Tigtu mebulà temù sa balut ulu di lagà sa kebulà sa ginis unung patay, owoy éhê legleg apuy sa mata di. 15 Egsenang sa lisen di nekeiling sa galang tinapis owoy kinayasan. Tigtu metaled sa kagi di lagà sa labal sagpaw. 16 Duen pitu bituen sinabaan di diyà sa belad di denu kuwanan, owoy duen ma sa megalang sundang eglesut diyà sa ebà di. Egsenang temù sa palas di éhê sa senang agdaw amuk nekebugsang. 17 Na, egoh ku mighaa kenagdi, tigtu a nelimedangan owoy nekelagkeb a diyà sa taengan di. Endà egpekelanuhen a enù ka lagà a dé nematay. Agulé sinabaan di aken sa belad di denu kuwanan, owoy guwaen di, "Yaka egkelimedangan na, enù ka aken sa edungan sa langun eghauwen owoy sa ketamanan di. 18 Aken sa épê lalù endà meelut di. Apiya di pa inimatayan a egoh anay, melalù a doo taman melugay. Duen sa egkegaga ku egpelalù sa etaw nematay. Amuk mematay sa etaw, duen ma sa egkegaga ku egpeangay kenagda diyà sa kenà da mugpà. 19 Na, sulati ko langun iya wé ipehaa ku diyà keniko, sa medoo eghauwen ko ini egoh di owoy sa medoo mebaelan kani. 20 Ipetiig ku diyà keniko sa selepangan sa pitu bituen hinaa ko sinabaan ku denu kuwanan owoy sa selepangan sa pitu taguan sulù anan bulawan. Sa pitu bituen, iya sa pitu kaunutan eg-ipat sa pitu umpungan ku etaw egpigtuu; owoy sa pitu taguan sulù, iya sa pitu umpungan etaw egpigtuu."

Kepehaa I Hésus Kelistu 2

1 Agulé guwaen i Hésus, "Sulati ko diyà sa kaunutan eg-ipat sa medoo etaw egpigtuu dutu menuwa Épéso dò. Sulati ko sa kagi ku diyà kenagda, guwaen ku, 'Aken si Hésus sa egsabà sa pitu bituen diyà sa belad ku denu kuwanan, owoy aken ma sa egbigkat diyà sa teliwadà sa pitu taguan sulù anan bulawan. 2 Netiigan ku sa langun egbaelan yu. Netiigan ku ma megelol yu doo eggalebek owoy egtigkel yu sa kelikutan yu danà yu egpigtuu. Netiigan ku ma eg-ekedan yu sa medoo etaw tegebael medaet. Tinepengan yu ma sa medoo etaw ubòubò da sa salu i Hésus, owoy netiigan yu butbuten da danà yu migtepeng kenagda. 3 Netiigan ku ma eg-udes yu egtigkel sa kelikutan yu apiya di pa nepelihay yu danà yu egpigtuu diyà kenak. Endà ma egkesemek yu eg-unut-unut diyà kenak. 4 Dodoo duen ma sa egbaelan yu endà egkeiyapan ku duu. Egoh yu anay egpigtuu diyà kenak, dakel sa kehidu yu kenak, dodoo migketukééy dé polo ini egoh di. 5 Petuleng-tuleng yu sa dakel kehidu yu kenak egoh anay. Huenan di, ekedi yu dé sa medaet egbaelan yu, owoy baeli yu dema sa mepion iling sa binaelan yu egoh anay. Enù ka amuk endà ekedan yu duu, mangay a diyà keniyu owoy kedanan ku sa legdaw yu diyà sa kenà di igtagù. 6 Dodoo netuuwan a ma doo diyà keniyu, enù ka egkelepuhan yu sa medaet egbaelan sa medoo etaw eg-unut diyà si Nikolayi. Hediya ma egkelepuhan ku ma sa medaet egbaelan da. 7 Na, kiyu i etaw egdineg siini kagi ku, pangunut yu dé diyà sa kagi sa Suguy i Nemula diyà sa langun etaw egpigtuu. Sumalà dé sa etaw endà eglengaen di duu sa keunut-unut di kenak, iya sa etaw pekaenen ku sa bunga kayu egpelalù etaw taman melugay dutu siedò kenà i Nemula eg-ugpà.' " 8 Agulé guwaen i Hésus, "Sulati ko ma sa kagi ku diyà sa kaunutan eg-ipat sa medoo etaw egpigtuu dutu menuwa Ismilna dò. Guwaen ku, 'Ini sa kagi ku diyà keniyu, aken sa edungan sa langun eghauwen owoy sa ketamanan di. Nematay a egoh anay, dodoo neenaw a doo egoh ku nematay. 9 Netiigan ku netigkelan yu sa lihay nekeuma diyà keniyu. Netiigan ku ma tigtu yu pubeli, dodoo tigtu yu doo kawasà dutu langit dò. Netiigan ku ma endà tuu di sa kesumbung sa etaw Hudiyu keniyu. Guwaen da dò kagda sa tigtu etaw Hudiyu eg-unut diyà si Nemula, dodoo egtampil da polo diyà si Satanas. 10 Yoko egkelimedangan na sa lihay buyu dé mekeuma diyà keniyu. Taa yu, hih. Buyu dé ipebilanggu i Satanas sa duma etaw diyà keniyu enù ka tukawan di sa kepigtuu yu, owoy mepelihay yu ma taman sepulù agdaw. Dodoo apiya di pa mematay yu, peeles yu doo sa kepigtuu yu diyà kenak, enù ka duen sa untung ibegay ku diyà keniyu sa lalù endà meelut di. 11 Na, kiyu i etaw egdineg siini kagi ku, pangunut yu dé diyà sa kagi sa Suguy i Nemula diyà sa langun etaw egpigtuu. Sumalà dé sa etaw endà eglengaen di duu sa keunut-unut di kenak, iya sa etaw endà mekehaa di sa kepigtamay i Nemula pinengadanan sa keduwa gulê kepatay etaw.' " 12 Agulé guwaen i Hésus, "Sulati ko ma sa kagi ku diyà sa kaunutan eg-ipat sa medoo etaw egpigtuu dutu menuwa Pilgamo dò. Guwaen ku, 'Ini sa kagi ku diyà keniyu, aken i épê sa sundang tigtu megalang. 13 Netiigan ku apiya di pa eg-ugpà yu diyà siedò menuwa egsabaan i Satanas, tigtu meeles doo sa kepigtuu yu diyà kenak. Endà ma eg-ekedan yu duu sa ketulù ku egoh da mig-imatay si Antipas egoh anay. Kagdi sa etaw meudes egtulù sa kagi ku, huenan di neimatayan dutu siedò menuwa yu egsabaan i Satanas. 14 Dodoo duen ma sa egbaelan yu endà egkeiyapan ku duu, enù ka duen etaw diyà keniyu eg-unut diyà sa butbut igtulù i Balam egoh anay. Igtulù i Balam diyà si Balak sa ukit di eg-enggat sa medoo tugod i Islaél anì sumabuh da eg-unut diyà si Nemula. Neenggat da diyà salà danà da egkaen sa kaleni igbegay diyà sa inetaw egpenemulawen da owoy danà da ma egbigà. 15 Hediya ma, duen ma etaw diyà keniyu egpigtuu da diyà sa butbut igtulù i Nikolayi. 16 Huenan di, ekedi yu dé iya wé medaet egbaelan yu. Amuk endà ekedan yu duu, medelamet a mangay diyà keniyu anì pigtamayan ku sa medoo etaw egbael medaet. Iya sa ipigtamay ku kenagda siini sundang eglesut diyà sa ebà ku pinegulepengan sa kagi ku. 17 Na, kiyu i etaw egdineg siini kagi ku, pangunut yu dé diyà sa kagi sa Suguy i Nemula diyà sa langun etaw egpigtuu. Sumalà dé sa etaw endà eglengaen di duu sa keunut-unut di diyà kenak, iya sa etaw begayan ku siedò kaenen kedu diyà langit endà pa mehaa di etaw. Owoy ibegay ku ma diyà kenagdi sa batu mebulà sinulatan sa magtu ngadan di endà metiigan di etaw liyu daa sa mebegayan ku.' " 18 Agulé guwaen i Hésus, "Sulati ko ma sa kagi ku diyà sa kaunutan eg-ipat sa medoo etaw egpigtuu dutu menuwa Tiyatila dò. Guwaen ku, 'Aken sa Anak i Nemula eg-ikagi diyà keniyu. Lagà legleg apuy sa mata ku, owoy egsenang sa lisen ku lagà sa galang magtu kinayasan. 19 Netiigan ku sa langun egbaelan yu. Dakel sa kehidu yu owoy meeles ma sa kepigtuu yu diyà kenak. Megelol yu ma egtabang diyà sa medoo duma yu, owoy meudes yu ma egtigkel sa kelikutan yu. Netiigan ku ma egkeumanan ma sa mepion egbaelan yu ini egoh di diyà sa egbaelan yu egoh anay. 20 Dodoo duen doo sa egbaelan yu endà egkeiyapan ku duu. Enù ka mepion doo diyà keniyu amuk tumulù diyà keniyu Hésabil i, siedò bayi ubòubò egsugkow sa kagi i Nemula. Dodoo eg-akalan di sa medoo etaw ku danà di egtulù endà mesalà sa etaw gaa amuk meseuma sa lawa da sa beken sawa di owoy endà ma mesalà da gaa amuk kumaen da sa kaleni igbegay diyà sa inetaw egpenemulawen da. 21 Nelugay dé egtigkelan ku kagdi anì meekedan di iya wé medaet egbaelan di, dodoo endà eg-ekedan di duu. 22 Taa yu, hih. Pigtamayan ku owoy pehibaten ku danà di luminadu. Dakel ma sa lihay peangayen ku diyà sa medoo duma di nesebigà amuk endà ma ekedan da duu sa medaet binaelan da danà siini bayi. 23 Imatayan ku ma sa medoo etaw eg-unut diyà sa igtulù di. Iya sa baelan ku anì metiigan sa langun etaw egpigtuu aken sa neketiig sa langun pedu yu owoy sa langun penemdem yu ma, owoy metiigan da ma aken sa megay diyà sa uman sebaen etaw sa hagdi untung nekesugat denu sa binaelan di. 24 "Duen ma sa kagi ku diyà keniyu i medoo liyu etaw diyà Tiyatila endà eg-unut diyà sa medaet igtulù siedò bayi owoy endà ma ilingan yu duu sa penemdem guwaen da dò milantek dodoo kedu diyà si Satanas polo. Endà duen sa igsugù ku diyà keniyu liyu daa ini i. 25 Peeles yu dé diyà sa pedu yu sa tuu tegudon egketiigan yu taman endà meuma sa kepelikù ku diyà tanà. 26 Amuk endà eglengaen yu duu sa keunut-unut yu diyà kenak, dodoo egpangunutan yu polo sa uyot ku taman endà meuma sa sabuhanan agdaw, begayan ku kiyu egkegaga iling sa egkegaga igbegay sa Emà ku diyà kenak. Ibegay ku iya wé anì kumedatù yu sumabà sa medoo balangan tanà diyà siini sinukub langit. 27 Mebagel sa kesabà yu kenagda éhê sa kebagel sa putow endà metepù di, owoy lagà buyung mepesà sa medoo kuntelà yu enù ka atuwan yu. 28 Owoy ibegay ku ma diyà keniyu sa telasimag. 29 Na, kiyu i etaw egdineg siini kagi ku, pangunut yu dé diyà sa kagi sa Suguy i Nemula diyà sa langun etaw egpigtuu."

Kepehaa I Hésus Kelistu 3

1 Agulé guwaen i Hésus, "Sulati ko ma sa kagi ku diyà sa kaunutan eg-ipat sa medoo etaw egpigtuu dutu menuwa Saldis dò. Guwaen ku, 'Aken si Hésus Kelistu egsabà sa pitu bituen, owoy diyà kenak ma sa Metiengaw Suguy i Nemula egpehaa sa tunung di danà sa pitu ukit di. Netiigan ku sa egbaelan yu. Eglalag yu dé enù ka duen sa lalù yu endà meelut di, dodoo lagà yu polo nematay enù ka endà egtandaan yu duu sa kepigtuu yu danà sa egbaelan yu. 2 Huenan di, enaw yu dé. Pebagel yu sa tukééy kepigtuu yu, enù ka buyu dé mekedan. Netiigan ku endà nesugat sa egbaelan yu diyà sa kehaa i Nemula. 3 Huenan di, yoko egkelipeng duu sa tuu tegudon dinineg yu pinigtuu yu egoh anay, dodoo unuti yu polo. Ekedi yu ma sa salà yu, enù ka amuk endà ekedan yu duu sa medaet adat yu, mepetow yu sa egoh ku mangay diyà keniyu. Lagà sa ketebow tegepenakaw sa kepelikù ku enù ka endà egketiigan yu duu sa ulas ku tumebow. 4 Tukééy daa sa etaw diyà keniyu dutu Saldis dò sa endà egpelueden da duu sa ginis da mebulà, enù ka endà eg-unutan da duu sa medaet adat. Kagda sa etaw munut diyà kenak mekeginis mebulà, enù ka mekeunut da diyà kenak danà sa mepion egbaelan da. 5 Sumalà dé sa etaw endà eglengaen di duu sa keunut-unut di diyà kenak, iya sa etaw mekeginis mebulà mekeiling kenak, owoy endà kedanan ku duu sa ngadan di diyà sa libelu igsulat ku ngadan sa medoo etaw nebegayan lalù endà meelut di. Owoy tulonen ku ma sa keunut-unut di kenak diyà sa taengan sa Emà ku si Nemula owoy sa medoo egsugùsuguen di ma diyà langit. 6 Na, kiyu i etaw egdineg siini kagi ku, pangunut yu dé diyà sa kagi sa Suguy i Nemula diyà sa langun etaw egpigtuu.' " 7 Agulé guwaen i Hésus, "Sulati ko ma sa kagi ku diyà sa kaunutan eg-ipat sa medoo etaw egpigtuu dutu menuwa Piladelpiya dò. Guwaen ku, 'Aken si Hésus Kelistu eg-ikagi diyà keniyu. Aken sa tigtu metiengaw etaw owoy kesaligan a ma. Binegayan a egkegaga anì egkedatù a iling sa kedatù i Datù Dabid egoh anay. Amuk ukaan ku sa pintù anì mekedalem sa etaw diyà sa kedatù ku, endà mepintuan di etaw. Amuk pintuan ku anì endà mekeludep sa etaw, endà ma meukaan di etaw. 8 Netiigan ku sa egbaelan yu. Netiigan ku ma endà iseg yu medoo owoy tukééy ma daa sa egkegaga yu, dodoo eg-udes yu doo eg-unut diyà sa igtulù ku owoy endà ma eglidungen yu duu kiyu sa etaw ku. Huenan di, inukaan ku dé sa pintù diyà keniyu anì mekeludep yu, owoy endà ma duen sa etaw mekepintù enù ka endà mealang da duu sa ipebael ku diyà keniyu. 9 Taa yu, hih. Egbutbut daa sa medoo etaw guwaen da dò kagda sa tigtu etaw Hudiyu eg-unut diyà si Nemula, dodoo etaw i Satanas da polo. Peligkuweden ku kagda kani diyà sa taengan yu anì metiigan da kiyu sa etaw eghiduwan ku temù. 10 Na, danà yu egpangunut diyà sa igsugù ku keniyu denu sa ketigkel yu kelikutan, huenan di tulikan ku ma kiyu anì endà mekeuma di diyà keniyu sa tigtu medaet kelikutan tumebow diyà tanà amuk tepengan i Nemula sa langun etaw. 11 Buyu a dé pelikù diyà tanà. Huenan di, peeles yu ipat sa tuu tegudon netiigan yu anì endà duen sa liyu etaw mekekuwa sa untung yu. 12 Sumalà dé sa etaw endà eglengaen di duu sa keunut-unut di diyà kenak, iya sa etaw pelagaen ku sa mebagel bugsud diyà sa Dalesan i Nemula dutu langit dò. Mugpà dutu taman melugay owoy endà dé mehalì di. Owoy isulat ku ma diyà kenagdi sa ngadan sa Emà ku si Nemula owoy sa ngadan sa menuwa i Nemula, sa Magtu Hélusalém, sa menuwa tumenà kedu si Nemula diyà langit. Owoy isulat ku ma diyà kenagdi sa magtu ngadan ku. 13 Na, kiyu i etaw egdineg siini kagi ku, pangunut yu dé diyà sa kagi sa Suguy i Nemula diyà sa langun etaw egpigtuu.' " 14 Agulé guwaen i Hésus, "Sulati ko ma sa kagi ku diyà sa kaunutan eg-ipat sa medoo etaw egpigtuu dutu menuwa Laodisiya dò. Guwaen ku, 'Ini sa kagi i Hésus Kelistu sa ginelal Amin, enù ka kesaligan a owoy anan tuu sa kagi ku. Pineduen i Nemula sa langun eghauwen danà ku. 15 Endà oloen ku duu kiyu enù ka netiigan ku sa langun egbaelan yu. Netiigan ku lagà yu sa wayeg endà meedup di owoy endà megenaw di, enù ka duwa-duwa sa pedu yu eg-unut diyà kenak. Mepion hedem amuk sebaen daa sa pedu yu, lagà sa wayeg tigtu megenaw ataw ka tigtu meedup. 16 Dodoo, neduwa polo sa pedu yu lagà yu sa wayeg alang-alang, endà megenaw di owoy endà meedup di. Huenan di, kedanan ku daa kiyu lagà a daa eg-emug keniyu. 17 Egpeolòolò yu daa danà yu kawasà dé etaw owoy mepion sa keugpà yu owoy endà ma duen sa kulang yu. Dodoo, lagà yu polo etaw langap enù ka endà egketiigan yu duu sa tigtu kelikutan yu. Mekehidu-hidu yu enù ka lagà yu pubeli etaw danà di kulang sa kepigtuu yu. Lagà endà duen ginis yu enù ka endà duen sa mepion egbaelan yu. 18 Huenan di, ini sa isasà ku diyà keniyu. Beli yu diyà kenak sa tigtu bulawan tinapis diyà apuy pinegulepengan sa tigtu kepigtuu yu anì meketuu sa pantiyali yu. Beli yu ma diyà kenak siedò mebulà ginis anì endà memalaan yu danà yu endà duen ginis. Owoy beli yu ma diyà kenak sa bulung mata anì bulungan sa mata yu anì kumeilag yu. 19 Eg-indawen ku sa langun etaw eghiduwan ku, owoy egpigtamayan ku ma kagda anì kumepion sa adat da. Huenan di, udesi yu baeli sa mepion owoy ekedi yu ma sa medaet egbaelan yu. 20 Taa yu, hih. Lagà a sa etaw eg-umow egtigdeg diyà sa selat sa dalesan yu. Amuk duen etaw egdineg sa kagi ku owoy eg-ukaan di sa pintù, lumudep a owoy meseunut ké dé kumaen diyà sa kenà di. 21 Sumalà dé sa etaw endà eglengaen di duu sa keunut-unut di diyà kenak, iya sa etaw pepenuuwen ku diyà sa dapag ku diyà sa kedatù ku, lagà sa kepenuu ku diyà sa dapag sa Emà ku si Nemula egoh ku mig-atu dé diyà si Satanas. 22 Na, kiyu i etaw egdineg siini kagi ku, pangunut yu dé diyà sa kagi sa Suguy i Nemula diyà sa langun etaw egpigtuu.' "

Kepehaa I Hésus Kelistu 4

1 Agulé, duen sa sebaen ma ipehaa i Datù diyà kenak. Eglengag a owoy hinaa ku sa pintù neukaan dutu langit dò. Owoy duen sa eg-ikagi diyà kenak, sak eg-ikagi metaled éhê dagì tegbuli iling sa dinineg ku egoh muna. Guwaen di diyà kenak, "Angay ka dini, enù ka ipehaa ku diyà keniko sa medoo mebaelan kani." 2 Petow a dé nebatun dutu langit dò danà sa tunung sa Suguy i Nemula, owoy hinaa ku sa bangkù sa mapulù Datù diyà langit owoy duen sa egpenuu dahiya. 3 Tigtu egsenang sa palas di lagà sa senang sa tigtu mapulù batu pinengadanan ta haspi owoy kolnalina. Nekeulingut diyà sa bangkù di, duen sa belugtu melunu éhê sa egoh-egoh sa mapulù batu melunu pinengadanan ta esmilalda. 4 Duen ma duwa pulù owoy epat bangkù nekeulingut diyà sa bangkù di, owoy egpenuu dahiya sa duwa pulù owoy epat kaunutan etaw. Anan da migginis mebulà owoy migsayap da bulawan. 5 Nelibet malalimet silà sa bangkù i Datù, owoy dinineg ku ma sa ébê owoy sa eglegu-legu. Owoy duen sa pitu sulù eglegleg diyà sa taengan sa bangkù di, enù ka iya sa tandà sa pitu ukit kepehaa sa Metiengaw Suguy i Nemula sa tunung di. 6 Owoy hinaa ku ma diyà sa taengan bangkù di sa éhê melabel dagat tigtu metiengaw lagà pegalungan. Hinaa ku sa epat mapulù egsugùsuguen i Nemula egtigdeg diyà sa epat kilidan sa bangkù i Datù. Neseluh mata sa lawa da denu iyug da owoy denu isaluwan da ma. 7 Éhê palas alimaw sa sebaen siedò egsugùsuguen i Nemula, owoy éhê palas sapì sa keduwa di, owoy éhê palas etaw sa ketelu di, owoy éhê palas banug eglayang sa keepat di. 8 Na, uman sebaen siini epat egsugùsuguen di, enem sa pakpak di. Neseluh mata sa lawa da, lapeg leketanà sa pakpak da. Agdaw owoy sigep iya daa sa egbaelan da egduyuy da, guwaen da, "Anan metiengaw temù sa langun egbaelan i Nemula. Kagdi sa Datù épê tigtu dakel egkegaga. Tapay dé duen kagdi ya edung egoh anay taman ini egoh di owoy taman melugay." 9 Egpenuu Nemula i diyà sa bangkù di kenà di egpedatù, owoy kagdi sa melalù taman melugay. Kagdi sa takà eg-oloen siedò epat egsugùsuguen di, owoy eg-adatan da, owoy egpesalamat da diyà kenagdi. 10 Egoh da egduyuy eg-olò kenagdi, eglagkeb ma sa duwa pulù owoy epat kaunutan diyà sa taengan i Nemula egpenuu diyà sa bangkù di, owoy eg-oloen da ma kagdi i melalù taman melugay. Itenà da ma sa sayap bulawan da diyà sa taengan di enù ka tandaan da sa keadat da kenagdi, owoy eg-oloen da, 11 guwaen da, "O Datù ké si Nemula, tigtu ka mapulù. Huenan di, meolò ka, owoy meadatan ka, enù ka tigtu dakel sa tunung ko. Enù ka kuna sa migbael sa langun eghauwen, owoy danà sa niko uyot daa, pineduen ko sa langun eghauwen, owoy nehagtay da ma danà ko."

Kepehaa I Hésus Kelistu 5

1 Agulé, hinaa ku duen sa egsabaan sa egpenuu diyà siedò metolol bangkù. Egsabaan kuwanan di sa kalatas dinilin nesedibaluy sulat, owoy duen ma sa pitu tandà igpedeket dahiya anì endà mebekah di. 2 Agulé, eghauwen ku ma sa mebagel egsugùsuguen i Nemula dahiya, owoy pinetaled di sa kagi di, guwaen di, "Ngadan di etaw sa mekebekah siini sulat? Ngadan di etaw mekegaga kumedan sa tandà di igpedeket anì mebasa?" 3 Apiya di pa eglagbeten di diyà langit owoy diyà tanà owoy diyà bayà, endà duen etaw mehaa di mekelekat sa pitu tandà igpedeket anì mebasa sa igsulat. 4 Huenan di, tigtu a egsinegaw enù ka endà duen etaw apiya sebaen mekebekah iya wé kalatas dinilin anì mebasa iya wé sulat. 5 Agulé, duen sa sebaen diyà sa duwa pulù owoy epat kaunutan mig-ikagi diyà kenak, guwaen di, "Yaka egsinegaw wa. Taa ko. Si Hésus Kelistu, sa ginelal Alimaw enù ka dakel sa egkegaga di, kagdi sa tugod i Huda owoy sa tugod i Datù Dabid, owoy kagdi sa mig-atu dé diyà si Satanas, huenan di kagdi daa sa mekegaga mekah sa sulat dinilin owoy kagdi ma sa mekekedan sa pitu tandà igpedeket dahiya." 6 Agulé, duen sa hinaa ku teliwadà sa metolol bangkù i Datù owoy sa epat mapulù egsugùsuguen i Nemula owoy sa duwa pulù owoy epat kaunutan. Iya sa hinaa ku sa Anak Kebili-bili egtigdeg dahiya, owoy hinaa ku ma sa kelaing palì di danà di inimatayan egoh anay. Duen sa pitu sidung di owoy pitu mata di. Na, sa pitu mata di, iya tandà sa pitu ukit kepehaa sa tunung sa Suguy i Nemula peangayen di diyà sa langun balangan tanà. 7 Agulé, eg-angay egdapag sa Anak Kebili-bili diyà sa metolol bangkù kenà i Datù egpenuu, owoy kinuwa di sa kalatas dinilin sinabaan kuwanan i Datù. 8 Egoh di migkuwa sa kalatas dinilin, eglagkeb sa epat mapulù egsugùsuguen i Nemula owoy sa duwa pulù owoy epat kaunutan enù ka egdatuen da sa Anak Kebili-bili. Uman sebaen kaunutan épê da pegelung, owoy egsabaan da ma sa bilu bulawan nepenù lana mepion ngadeg eg-ulowen anì umebel sa mepion ngadeg. Iya sa pinegulepengan sa kesimbà sa medoo etaw i Nemula. 9 Egduyuy da ma sa magtu duyuy, guwaen da, "Mapulù ka enù ka kuna sa mekegaga kumuwa sa kalatas dinilin, owoy kuna daa sa mekegaga kumedan sa tandà igpedeket dahiya, enù ka inimatayan ka egoh anay, owoy danà sa depanug ko egoh ko nematay, tinigtuwan ko sa salà sa langun etaw anì mebaluy da ma etaw i Nemula. Kedu da diyà sa langun balangan geumpung etaw owoy sa langun balangan kagi etaw owoy sa langun balangan etaw owoy sa langun balangan tanà. 10 Iglapeg ko kagda diyà sa medoo etaw eg-ipaten ko, owoy binaluy ko ma kagda sa medoo egsugùsuguen ko takà eg-olò si Nemula, owoy begayan ko ma kagda sa kedatuan da diyà tanà." 11 Agulé, eglangalanga a owoy egdinegen ku sa medoo egsugùsuguen i Nemula egduyuy. Tigtu medoo da temù, enù ka ngibu-ngibuwan da. Egtigdeg da nekeulingut diyà sa duwa pulù owoy epat kaunutan owoy sa epat mapulù egsugùsuguen i Nemula owoy sa metolol bangkù i Datù. 12 Egduyuy da langun, owoy tigtu metaled sa duyuy da. Guwaen da, "Mapulù sa Anak Kebili-bili inimatayan, huenan di meolò ta enù ka dakel sa egkegaga di. Endà duen sa ketamanan sa kekawasaan di, owoy milantek sa penemdem di, owoy tigtu mebagel ma sa tunung di. Meadatan ta, owoy pedakelen ta, owoy meolò ta ma." 13 Agulé, egdinegen ku sa duyuy sa langun eg-ugpà diyà langit owoy diyà tanà owoy diyà bayà owoy diyà dagat. Egduyuy sa langun pineduen i Nemula sumalà dé sa kenà da, guwaen da, "Meolò sa mapulù Datù egpenuu diyà sa metolol bangkù, owoy meolò ma sa Anak Kebili-bili. Meadatan ta, owoy pedakelen ta ma taman melugay, enù ka kagda daa sa épê dakel egkegaga." 14 Agulé, egsagbì sa epat mapulù egsugùsuguen i Nemula, guwaen da, "Amin." Agulé eglagkeb dema sa duwa pulù owoy epat kaunutan enù ka egdatuen da.

Kepehaa I Hésus Kelistu 6

1 Agulé egoh ku eghaa, linekat sa Anak Kebili-bili sa sebaen tandà igpedeket diyà sa kalatas dinilin. Agulé, dinineg ku sa kagi sa sebaen mapulù egsugùsuguen i Nemula. Nekeiling sa kagi kilat sa kagi di, guwaen di, "Téél ka dé." 2 Hê, hinaa ku sa kudà mebulà, owoy duen sa etaw egkudà egkemkem busug. Binegayan da kagdi sa sayap bulawan anì tandaan sa egkegaga di umatu. Hê, eglagbas diyà tanà anì atuwan di sa langun kuntelà di. 3 Agulé, eglekaten sa Anak Kebili-bili sa keduwa tandà igpedeket diyà sa kalatas dinilin. Hê, dinineg ku sa kagi sa keduwa mapulù egsugùsuguen i Nemula, guwaen di, "Téél ka dé." 4 Agulé, duen sa sebaen ma kudà migtebow tigtu melalegà. Duen sa dakel sundang igbegay da diyà sa etaw egkudà, owoy pineangay da kagdi anì lebegen di sa melanih keugpà etaw diyà tanà anì meselimbul sa langun etaw anì meseimatay da. 5 Agulé, eglekaten sa Anak Kebili-bili sa ketelu tandà igpedeket diyà sa kalatas dinilin. Hê, dinineg ku sa kagi sa ketelu mapulù egsugùsuguen i Nemula, guwaen di, "Téél ka dé." Agulé, hinaa ku sa kudà meitem migtebow, owoy duen sa timbangan inuwit sa etaw egkudà. 6 Dinineg ku sa eg-ikagi diyà teliwadà sa epat mapulù egsugùsuguen i Nemula. Guwaen di, "Pilagà ko sa kaenen da, enù ka sa tengà supà alina daa sa mebeli etaw danà sa sukay di eggalebek segeagdaw, owoy sakasupà owoy tengà sébada daa sa mebeli etaw danà sa sukay di segeagdaw. Dodoo endà mehalì sa lagà sa lana owoy sa wain inemen etaw." 7 Agulé, eglekaten sa Anak Kebili-bili sa keepat tandà igpedeket diyà sa kalatas dinilin. Hê, dinineg ku sa kagi sa keepat mapulù egsugùsuguen i Nemula, guwaen di, "Téél ka dé." 8 Agulé, hinaa ku sa kudà ebul. Iya ngadan sa etaw egkudà, Kepatay, owoy Bayà sa ngadan sa etaw egsetugdug kenagdi. Nebegayan da egkegaga anì meimatayan da sa sebaed diyà sa epat baed sa langun etaw danà sa gila owoy sa bitil owoy sa linadu dumeket diyà kenagda owoy sa mebalaw uled tanà. 9 Agulé, eglekaten sa Anak Kebili-bili sa kelima tandà igpedeket diyà sa kalatas dinilin. Hê, eghauwen ku diyà leketanà sa kenà da eg-imatay hinagtay ibegay diyà si Nemula, sa suguy sa langun etaw inimatayan danà da egtegudon sa kagi i Nemula owoy danà da ma eg-udes egtulon denu si Hésus Kelistu. 10 Eg-ikagi da metaled, guwaen da, "O Datù Nemula, kuna daa sa épê dakel tunung. Tigtu metiengaw sa pedu ko owoy kesaligan ka. Ngadan sa lugay ké eg-angat sa kesulì ko diyà sa kinepatay ké? Nengan sa kepigtamay ko diyà sa medoo etaw eg-ugpà diyà tanà mig-imatay kenami?" 11 Agulé, duen sa melomboy kawal mebulà igbegay diyà sa uman sebaen etaw dahiya, owoy inikagiyan i Datù kagda anì angatan da pelà sa medoo duma da egpangunut diyà si Nemula taman endà melengon sa kedoo da meimatayan lagà sa kinepatay da. 12 Agulé, eglekaten sa Anak Kebili-bili sa keenem tandà igpedeket diyà sa kalatas dinilin. Petow dé eglinug meleges, owoy egkeitem sa agdaw lagà sa keitem ginis, owoy egkelalegà sa bulan lagà depanug. 13 Egkenabù diyà tanà sa medoo bituen lagà sa mehilaw bunga kayu egkenabù danà sa meleges kelamag. 14 Egkekedan sa langit lagà sa ikam nedilin, owoy egkehalì ma sa langun tuduk owoy sa langun pungul kedu diyà sa tapay kenà da. 15 Agulé sa langun etaw diyà tanà, iling ka sa medoo sulutan owoy sa medoo datù owoy sa medoo ulu-ulu sundalu owoy sa medoo kawasà etaw owoy sa medoo etaw épê egkegaga, owoy sa langun liyu etaw iling ka udipen ataw ka temù etaw, eglidung da langun diyà sa medoo ilib owoy sa medoo takub diyà tuduk. 16 Eg-umow da ma diyà sa medoo tuduk owoy dakel batu, guwaen da, "Penabù yu dé diyà kenami anì endà dé mehaa di kami sa Datù egpenuu diyà sa metolol bangkù, owoy anì endà dé meuma ké sa kepigtamay sa Anak Kebili-bili kenami. 17 Enù ka egkeuma dé sa agdaw sa kepigtamay da kenami i etaw. Apiya sebaen, endà duen etaw mekeeked sa kepigtamay da."

Kepehaa I Hésus Kelistu 7

1 Agulé, hinaa ku sa epat egsugùsuguen i Nemula egtigdeg diyà sa epat sulung tanà, owoy eglambengen da sa epat kelamag anì endà mekelamagan sa uwang tanà owoy sa dagat owoy sa kayu ma. 2 Agulé, hinaa ku sa sebaen ma egsugùsuguen i Nemula eglesut denu tebowon agdaw. Inuwit di sa tandà i Nemula, sa Nemula endà egkematay. Eg-ikagi metaled diyà sa epat egsugùsuguen i Nemula sa binegayan egkegaga pedaet sa tanà owoy sa dagat. 3 Guwaen di diyà kenagda, "Yoko pelà egpedaet duu sa tanà owoy sa dagat owoy sa medoo kayu taman endà metandaan ké duu sa kilay sa langun etaw egpangunut diyà si Nemula." 4 Agulé, dinineg ku sa kedoo da metandaan diyà sa kilay da. Iya sa kedoo da, magatus epat pulù owoy epat ngibu etaw, owoy kedu da diyà sa sepulù owoy duwa geumpung tugod i Islaél. 5 Sepulù owoy duwa ngibu etaw sa netandaan diyà sa tugod i Huda. Hediya ma, sepulù owoy duwa ngibu etaw diyà sa tugod i Lubin, owoy sepulù owoy duwa ngibu etaw diyà sa tugod i Gad, 6 owoy sepulù owoy duwa ngibu etaw diyà sa tugod i Asél, owoy sepulù owoy duwa ngibu etaw diyà sa tugod i Néptali, owoy sepulù owoy duwa ngibu etaw diyà sa tugod i Manasi, 7 owoy sepulù owoy duwa ngibu etaw diyà sa tugod i Simiyon, owoy sepulù owoy duwa ngibu etaw diyà sa tugod i Lebi, owoy sepulù owoy duwa ngibu etaw diyà sa tugod i Isakal, 8 owoy sepulù owoy duwa ngibu etaw diyà sa tugod i Sabulon, owoy sepulù owoy duwa ngibu etaw diyà sa tugod i Hosé, owoy sepulù owoy duwa ngibu etaw diyà sa tugod i Bénhamin. 9 Agulé, hinaa ku ma sa melaweng etaw endà mebilang enù ka medoo da temù. Kedu da diyà sa langun balangan tanà, owoy sa langun balangan geumpung etaw, owoy sa langun balangan etaw, owoy sa langun balangan kagi etaw. Egtigdeg da diyà sa taengan sa metolol bangkù i Nemula owoy diyà sa taengan sa Anak Kebili-bili. Owoy migkawal da sa melomboy kawal mebulà owoy migsabà da sa panga kayu melaweng daun. 10 Migpetaled da eg-ikagi, guwaen da, "Meolò Nemula i, sa egpenuu diyà sa metolol bangkù, owoy meolò ma sa Anak Kebili-bili, enù ka linaun da kita diyà sa salà ta." 11 Duen ma dahiya sa langun egsugùsuguen i Nemula egtigdeg nekeulingut diyà sa metolol bangkù i Datù owoy sa duwa pulù owoy epat kaunutan owoy sa epat mapulù egsugùsuguen i Nemula. Agulé, eglagkeb da langun diyà sa taengan sa metolol bangkù i Datù owoy eg-oloen da Nemula i. 12 Guwaen da, "Amin. Tigtu mapulù Nemula i sa Datù ta, huenan di meolò kagdi i. Pedakelen ta, owoy pesalamat ki diyà kagdi, owoy adatan ta, enù ka milantek sa penemdem di, owoy dakel sa egkegaga di, owoy mebagel sa tunung di. Meolò Nemula i takà taman melugay. Amin." 13 Agulé, duen sa sebaen kaunutan eg-igsà diyà kenak, guwaen di, "Netiigan ko pa siini medoo etaw dahini migkawal mebulà owoy sa keduwan da?" 14 Migsagbì a, guwaen ku, "O Datù, tuloni ko polo aken, enù ka kuna sa neketiig." Agulé, guwaen di diyà kenak, "Ini sa medoo etaw nekeukit diyà sa tigtu dakel lihay diyà tanà. Pinìpian da dé sa kawal da anì egkebulà temù danà sa depanug sa Anak Kebili-bili. 15 Huenan di, neketigdeg da dé diyà sa taengan sa metolol bangkù i Nemula. Agdaw owoy sigep eg-ugpà da diyà sa Dalesan i Nemula, owoy takà da egpangunut diyà sa uyot di. Eg-ipaten i Nemula kagda, si Nemula egpenuu diyà sa metolol bangkù. 16 Endà dé meketues da, owoy endà ma dé melupahan da, owoy endà ma dé melenek da danà sa meedup agdaw ataw ka sa liyu balangan meedup. 17 Enù ka sa Anak Kebili-bili diyà sa taengan sa metolol bangkù i Datù, kagdi sa eg-ipat kenagda, owoy eg-uwiten di ma kagda diyà siedò tebulan wayeg mekepelalù etaw taman melugay. Owoy eghunasen i Nemula ma sa langun luhà da enù ka egkedanan di sa langun kekebukulan da."

Kepehaa I Hésus Kelistu 8

1 Agulé, eglekaten sa Anak Kebili-bili sa kepitu tandà igpedeket diyà sa kalatas dinilin. Egoh di miglekat, minetigkemed sa langun diyà langit taman tengà ulas. 2 Agulé, hinaa ku sa pitu egsugùsuguen i Nemula egtigdeg diyà sa taengan i Nemula, owoy duen sa igbegay di tegbuli diyà sa uman sebaen kenagda. 3 Duen ma sa sebaen egsugùsuguen i Nemula eg-uwit sa bilu bulawan dinaleman sa mepion ngadeg. Mig-angay egtigdeg medapag diyà sa kenà da eg-imatay hinagtay ibegay diyà si Nemula. Duen medoo lana mepion ngadeg igbegay diyà kenagdi anì meseamut sa mepion ngadeg ulowen di owoy sa kesimbà sa langun etaw i Nemula. Agulé, eg-ulowen di sa mepion ngadeg diyà sa lamisan bulawan diyà sa taengan sa metolol bangkù i Nemula. 4 Hê, egkeseamut sa ebel mepion ngadeg owoy sa kesimbà sa medoo etaw i Nemula, owoy egpekeuma diyà kagdi kedu diyà sa bilu bulawan egsabaan sa egsugùsuguen di egtigdeg diyà sa taengan i Nemula. 5 Agulé, egkuwaen sa egsugùsuguen i Nemula sa bilu bulawan, owoy pinenù di baga kedu diyà sa lamisan kenà da eg-ulow sa hinagtay inimatayan. Hê igbuung di diyà tanà. Petow dé migkilat owoy migpeletê owoy egsilà owoy miglinug. 6 Agulé, tapay da dé igpeteges sa pitu egsugùsuguen i Nemula sa tegbuli da. 7 Agulé eghiyupen sa muna egsugùsuguen i Nemula sa hagdi tegbuli. Hê, petow dé duen sa nenabù diyà tanà, sa bunga"t udan megenaw, owoy nenabù ma sa apuy neamutan depanug. Huenan di, neulow sa sebaed diyà sa telu baed sa tanà, owoy neulow ma sa sebaed diyà sa telu baed sa medoo kayu owoy sa langun keluwen. 8 Agulé, eghiyupen sa keduwa egsugùsuguen i Nemula sa hagdi tegbuli. Hê, duen sa nenabù diyà dagat sa éhê dakel getan eglegleg. Huenan di, nebaluy depanug sa sebaed diyà sa telu baed sa dagat, 9 owoy nematay ma sa sebaed diyà sa telu baed sa langun sedà diyà dagat, owoy nedaetan ma sa sebaed diyà sa telu baed sa langun eg-edaan diyà dagat. 10 Agulé, eghiyupen sa ketelu egsugùsuguen i Nemula sa hagdi tegbuli, owoy nenabù kedu langit dò sa dakel bituen eglegleg lagà sulù. Nekesugat diyà sa sebaed diyà sa telu baed sa langun lawa"t wayeg owoy tebulan. 11 Iya sa ngadan sa bituen nenabù, Mepait. Huenan di, egkepait sa sebaed diyà sa telu baed sa langun wayeg diyà tanà, owoy medoo sa etaw nematay danà sa wayeg ininem da enù ka tigtu mepait temù. 12 Agulé, eghiyupen sa keepat egsugùsuguen i Nemula sa hagdi tegbuli. Hê, petow dé nedaetan sa sebaed diyà sa telu baed sa agdaw, owoy nedaetan ma sa sebaed diyà sa telu baed sa bulan, owoy nedaetan ma sa sebaed diyà sa telu baed sa medoo bituen. Huenan di, nekedan sa sebaed diyà sa telu baed sa legdaw da. Tigtu migdeleman, enù ka endà dé duen sa eglegdaw taman epat kaulas uman agdaw. Hediya ma amuk sigep, endà ma dé duen sa eglegdaw taman epat kaulas. 13 Agulé, egoh ku eghaa pelà, dinineg ku sa kagi sa banug eglepal mehagtaw diyà awang. Eg-ikagi metaled taman telu gulê, guwaen di, "Aba! Mepasangan temù sa langun etaw eg-ugpà diyà tanà." Agulé guwaen di dema, "Tigtu kumedaet pa uman sa kelikutan mekeuma diyà kenagda, enù ka buyu dé tumegbuli sa telu nesamà egsugùsuguen i Nemula."

Kepehaa I Hésus Kelistu 9

1 Agulé, eghiyupen sa kelima egsugùsuguen i Nemula sa tegbuli di. Hê, duen sa eghauwen ku sa éhê palas bituen dutu tanà dò enù ka nenabù dé kedu diyà langit. Binegayan da gunsì anì ukaan di sa tosong endà duen taman kedalem. 2 Agulé, inukaan di dé iya wé tosong, owoy eglesut dahiya sa ebel lagà sa ebel dakel apuy. Huenan di, migdeleman sa uwang tanà enù ka nedilungan sa agdaw danà sa mekepal ebel miglesut kedu dalem sa tosong. 3 Agulé, duen medoo kasuk migpeunut diyà sa ebel owoy migtenà da diyà tanà. Nebegayan da egkegaga anì tigtu mesakit sa kehemued da lagà sa kehemued sa menipit. 4 Dodoo nesasà da doo anì endà pedaetan da duu sa keluwen ataw ka sa medoo hinemula ataw ka sa medoo kayu, dodoo iya daa sa pesakitan da sa medoo etaw endà duen tandà i Nemula diyà sa kilay da. 5 Mekebaluy da doo melihay etaw taman lima gebulan, dodoo nehawidan da ma anì endà mimatay da etaw. Lagà sa kesakit sa kehemued menipit sa kepelihay da etaw. 6 Diyà siini lima gebulan, iya sa ungayà sa medoo etaw petoyò da hedem, dodoo endà mebaluy di mematay da. Apiya di pa dakel sa ungayà da mematay, endà ma mematay da. 7 Ini sa egoh-egoh sa medoo kasuk hinaa ku. Éhê sa lawa kudà egkudaan etaw eg-angay eggila sa lawa da, dodoo éhê sa palas etaw sa palas da, owoy duen sa éhê sayap bulawan diyà sa ulu da. 8 Metaes ma sa bulbul da lagà sa balut ulu bayi, owoy éhê ngipen alimaw sa ngipen da. 9 Duen diyà sa kagpa da sa éhê enil sedà, dodoo putow polo enù ka lagà anit da. Nekeiling sa dagì sa medoo kudà egletu eggodoy kalitun eg-angay eggila sa dagì lepelet sa pakpak da eglepal. 10 Éhê ikug menipit sa ikug da, enù ka épê ma seged. Danà sa ikug da, mekepelihay da sa medoo etaw taman lima gebulan. 11 Iya sa ulu-ulu eg-uwit kenagda sa egsugùsuguen i Satanas eg-ipat sa tosong endà duen taman kedalem. Iya sa ngadan di diyà sa kagi Hibelu, Abadon, owoy Apolyon sa ngadan di diyà kagi Geligu. Na, iya sa selepangan di sa atung tegepedaet. 12 Hê, neelut dé sa sebaen kelikutan tigtu medaet mekeuma diyà sa medoo etaw diyà tanà, dodoo duen pa sa duwa kelikutan tigtu medaet buyu dé tumebow. 13 Agulé, eghiyupen sa keenem egsugùsuguen i Nemula sa hagdi tegbuli, owoy duen sa eg-ikagi dinineg ku kedu diyà sa epat sidung diyà sa epat sulung sa lamisan bulawan kenà da eg-ulow sa mepion ngadeg diyà sa taengan i Nemula. 14 Eg-ikagi diyà sa keenem egsugùsuguen i Nemula migtegbuli, guwaen di, "Lengai ko dé sa epat egsugùsuguen i Nemula nesigkem egoh anay dutu siedò dakel lawa"t wayeg Upelatis." 15 Huenan di, linengaan di dé siedò epat egsugùsuguen di nesigkem. Tinapay da dé egoh anay egpeangat taman endà meuma siini ulas ini egoh di diyà siini bulan owoy siini palay, anì imatayan da sa sebaed diyà sa telu baed sa langun etaw. 16 Agulé, tinulonon a sa kedoo sundalu egkudà eg-unut diyà siedò epat egsugùsuguen di. Iya sa kedoo da duwa pulù ngibu lagsà. 17 Ini sa egoh-egoh sa medoo kudà owoy sa sundalu igpehaa diyà kenak. Duen sa anit sa medoo sundalu egkudà hinaa ku, duen melalegà éhê sa kelalegà apuy owoy duen ma melunu éhê sa mapulù batu sapilo owoy duen ma melalag éhê sa asulpul. Nekeiling ulu alimaw sa ulu kudà da, owoy duen sa apuy owoy sa ebel owoy sa asulpul eglegleg eglesut diyà sa ebà kudà. 18 Danà sa apuy owoy sa ebel owoy sa asulpul eglesut diyà sa ebà kudà, nematay sa sebaed diyà sa telu baed sa langun etaw. 19 Enù ka duen egkegaga sa medoo kudà eg-imatay da etaw danà sa ebà da owoy danà ma sa ikug da, enù ka nekeiling uled sa ikug da enù ka duen sa ulu di anì mepelihay sa medoo etaw danà sa ikug da. 20 Dodoo sa medoo etaw nesamà endà pa nematay da danà sa binaelan sa kudà, tapay doo endà ekedan da duu sa medaet egbaelan da. Endà egsabuh da egpenemula sa medoo busaw owoy sa medoo inetaw binaelan da bulawan owoy pilak owoy galang owoy batu owoy kayu. Tapay doo egsaligan da apiya di pa endà egpekehaa sa medoo inetaw owoy endà ma egpekedineg da owoy endà ma egpekebigkat da. 21 Endà ma ekedan sa medoo etaw duu sa keimatay da etaw owoy sa kegamut da owoy sa kebigà da owoy sa kepenakaw da.

Kepehaa I Hésus Kelistu 10

1 Agulé, hinaa ku sa sebaen ma mebagel egsugùsuguen i Nemula migpetuntun kedu langit dò eg-unutan gaeb. Nekeulingut sa belugtu diyà sa ulu di, owoy egsenang sa palas di lagà sa senang agdaw, owoy nekeiling tungenu eglegleg sa senang lisen di. 2 Duen sa tukééy kalatas nebekah diyà sa belad di. Egoh di migtenà, igkogkog di sa lisen di denu kuwanan diyà sa teliwadà dagat owoy igkogkog di ma sa bibang di diyà tanà. 3 Pinetaled di sa kagi di nekeiling sa kagi alimaw. Egoh di mig-ikagi, petow dé egsagbì sa pitu kilat metaled. 4 Egoh di neubus eg-ikagi sa pitu kilat, ungayà ku isulat ku hedem sa dinineg ku. Dodoo duen polo sa eg-ikagi kedu langit dò, guwaen di, "Yaka egsulat duu sa inikagi sa pitu kilat. Tagui ko daa diyà sa pedu ko." 5 Agulé, sa egsugùsuguen i Nemula egtigdeg diyà dagat owoy diyà tanà, pinetigdeg di sa belad di denu kuwanan, 6 owoy egpengibet diyà si Nemula, sa Nemula melalù taman melugay sa migbael langit owoy tanà owoy dagat owoy sa langun eghauwen. Eg-ikagi, guwaen di, "Endà dé melimpas sa atas i Nemula. 7 Enù ka amuk tumegbuli sa kepitu egsugùsuguen di, ipetuu i Nemula doo sa penemdem di iglidung egoh anay, enù ka iya dé sa igpetiig di diyà sa medoo tegesugkow di egpangunut diyà kenagdi." 8 Agulé, eg-ikagi dema diyà kenak siedò mig-ikagi kedu langit dò dinineg ku. Guwaen di, "Angay ko kuwa iya wé tukééy kalatas nebekah sinabaan sa egsugùsuguen i Nemula egtigdeg diyà dagat owoy diyà tanà." 9 Huenan di, mig-angay a diyà sa egsugùsuguen i Nemula owoy egpegeniyen ku sa kalatas sinabaan di. Agulé, eg-ikagi diyà kenak, guwaen di, "Kuwa ko owoy kaen ko ma. Tigtu meemis éhê nanam teneb diyà sa ebà ko, dodoo amuk imeluten ko, tigtu mepait diyà sa tekuwes ko." 10 Agulé, kinuwa ku sa tukééy kalatas diyà sa belad di, owoy kinaen ku. Tigtu meemis lagà nanam teneb diyà sa ebà ku, dodoo egoh ku mig-imelut, tigtu mepait diyà sa tekuwes ku. 11 Hê, duen dema sa eg-ikagi diyà kenak, guwaen di, "Sugkowi ko dema sa kagi i Nemula denu sa medoo ulu-ulu owoy sa medoo etaw diyà sa langun balangan tanà owoy sa medoo balangan geumpung etaw owoy sa medoo balangan kagi etaw."

Kepehaa I Hésus Kelistu 11

1 Agulé, binegayan a sa tembu éhê tuked, owoy duen sa migsugù kenak, guwaen di, "Angay ko tembu sa simbaan Dalesan i Nemula, owoy sa kenà da eg-imatay hinagtay ibegay diyà si Nemula. Owoy bilang ko ma sa kedoo etaw egsimbà dahiya. 2 Dodoo, yaka egtembu duu sa duwangen di, enù ka iya sa mekebegay diyà sa medoo etaw beken Hudiyu. Atuwan da owoy utuhan da sa menuwa Hélusalém, sa menuwa i Nemula taman epat pulù owoy duwa gebulan. 3 Duen sa duwa etaw peangayen ku dutu anì tumegudon da. Kumawal da sakù owoy tulonen da ma sa kagi i Nemula taman sengibu duwa gatus owoy enem pulù agdaw." 4 Na, siini duwa etaw tegetegudon, kagda sa pinegulepengan sa duwa kayu olibu tinulon sa tegesugkow i Nemula egoh anay. Owoy kagda ma sa pinegulepengan sa duwa sulù igtenà diyà sa taengan i Nemula sa Datù diyà sa langun tanà. 5 Amuk duen etaw melihay kenagda, dumuen apuy lumesut diyà sa ebà da anì meulow sa etaw egkuntelà kenagda. Huenan di, meimatayan doo sa langun etaw melihay kenagda. 6 Duen ma sa tunung da umalang sa gaeb anì endà umudan di taman sa lugay da tumegudon. Duen ma sa tunung da anì baluyen da depanug sa lawa"t wayeg, owoy duen ma sa egkegaga da migtamay sa langun etaw diyà tanà danà sa medoo balangan lihay, muni dé nengan sa uyot da. 7 Amuk meubus siini duwa etaw egtegudon sa kagi i Nemula, dumuen sa mebalaw uled tanà lumesut diyà sa tosong endà duen taman kedalem. Gilawen di kagda owoy atuwan di kagda owoy imatayan di. 8 Agulé, pehibaten da daa lawa siini duwa etaw diyà sa kalasada sa dakel menuwa kenà sa Datù da igtutuk diyà sa kayu igbugsud egoh anay. Na, diyà sa peligad denu iya wé menuwa, iya sa ngadan di Sodoma owoy Igiptu. 9 Agulé, sa langun balangan etaw diyà sa medoo balangan kagi etaw owoy sa medoo balangan geumpung etaw owoy sa medoo balangan tanà, hauwen da sa lawa siini duwa etaw nekehibat diyà sa kalasada taman telu agdaw owoy tengà. Nehawidan sa kelebeng sa lawa da. 10 Tigtu meanggan sa langun etaw diyà tanà danà sa duwa etaw nematay. Huenan di, pistawan da owoy sebegayay da ma uloy. Iya sa pesuwan da egpista enù ka nematay dé siini duwa tegesugkow i Nemula sa migpelihay kenagda diyà tanà. 11 Dodoo amuk meelut sa telu agdaw owoy tengà, peginawaen i Nemula dema siini duwa tegesugkow di. Hê, meenaw da owoy tumigdeg da. Huenan di, tigtu melimedangan temù sa langun etaw eghaa kenagda. 12 Agulé, dinineg sa duwa tegesugkow i Nemula sa eg-ikagi metaled kedu diyà langit, guwaen di, "Angay yu dé diyà langit." Hê, egkebatun da dé diyà langit eg-unutan gaeb, owoy hinaa ma sa langun kuntelà da kagda egkebatun. 13 Hê, petow dé miglinug tigtu mebagel. Medaetan sa sebaed diyà sa sepulù baed diyà iya wé menuwa, owoy nekesugsug ma sa pitu ngibu etaw danà sa linug. Tigtu egkelimedangan sa medoo etaw nesamà, huenan di eg-oloen da Nemula i épê dakel egkegaga diyà langit. 14 Na, neelut dé sa keduwa kelikutan tigtu medaet mekeuma diyà sa medoo etaw diyà tanà. Dodoo duen pa sa ketelu di buyu dé tumebow. 15 Agulé, eghiyupen sa kepitu egsugùsuguen i Nemula sa hagdi tegbuli, owoy duen sa medoo eg-ikagi metaled diyà langit, guwaen da, "Endà dé duen duma datù diyà sa langun etaw diyà tanà liyu daa si Datù Nemula owoy si Kelistu sa Datù hinemilì di. Endà meelut sa kedatù di taman melugay." 16 Agulé, eglagkeb dema sa duwa pulù owoy epat kaunutan egpenuu diyà sa taengan i Nemula, owoy eg-oloen da, 17 guwaen da, "O Datù ké si Nemula, tigtu dakel sa egkegaga ko. Tapay ka dé Nemula egoh anay taman ini egoh di. Egpesalamat ké diyà keniko, enù ka igpehaa ko dé sa dakel tunung ko, owoy nekeedung dé sa kedatù ko diyà tanà. 18 Apiya di pa temù egbulitan sa medoo kuntelà ko kuna, neuma doo sa agdaw ko migtamay kenagda, owoy ini ma sa agdaw ko tumepeng sa binaelan sa langun etaw nematay. Neuma ma dé sa egoh ko megay untung diyà sa langun etaw migpangunut diyà keniko, sa medoo tegesugkow ko egoh anay, owoy sa langun etaw ko iling ka lagdà etaw ataw ka dakel etaw, owoy sa langun etaw eg-adat keniko. Neuma ma dé sa agdaw ko pedaet sa langun etaw migbael medaet diyà tanà." 19 Agulé, neukaan sa Dalesan i Nemula diyà langit, owoy hinaa ku dahiya sa baul dinaleman sa sulat igpasad i Nemula. Hê, petow dé egsilà owoy egkilat owoy egpeletê owoy eglinug owoy duen ma sa tigtu dakel bunga"t udan.

Kepehaa I Hésus Kelistu 12

1 Agulé, duen sa dakel tandà mekegaip hinaa ku diyà langit. Hinaa ku sa bayi igginis di sa agdaw owoy mig-utuh ma diyà sa bulan owoy duen sepulù owoy duwa bituen igsayap di. 2 Egsakalan sa bayi owoy eglesing danà sa kesakit di enù ka buyu dé eglesutan. 3 Agulé, duen sa sebaen ma dakel tandà mekegaip hinaa ku diyà langit. Duen sa tigtu dakel uled melalegà pinengadanan da nagan. Duen pitu ulu di owoy sepulù sidung di, owoy diyà sa uman sebaen ulu di duen sa metolol sayap di tandà sa egkegaga di. 4 Huenan di, egkuwaen ikug di daa sa sebaed diyà sa telu baed sa bituen diyà langit, owoy ibuung di diyà tanà. Agulé, egtigdeg diyà sa taengan sa bayi buyu umanak anì mekaen di sa batà amuk lumesut. 5 Agulé, eg-anak maama sa bayi, dodoo endà nekaen sa nagan duu enù ka petow dé kinuwa i Nemula nebatun diyà sa metolol bangkù di. Na, iya sa ketamanan siini batà pedatù kani diyà sa langun balangan etaw diyà tanà, owoy endà duen etaw mekeeked sa kedatù di enù ka mebagel lagà sa putow endà metepù. 6 Dodoo egoh sa bayi mig-anak dé, egpelaguy diyà sa melabel tanà mediyù dalesan enù ka iya sa tinapay i Nemula kenà di mekeugpà. Eg-ipaten di kagdi dutu taman sengibu duwa gatus owoy enem pulù agdaw. 7 Agulé, duen sa gila diyà langit. Si Miguwél, sa sebaen ulu-ulu egsugùsuguen i Nemula, owoy sa medoo duma di egsugùsuguen i Nemula, eggilawen da sa nagan. Eg-atu ma eggila sa nagan owoy sa medoo egsugùsuguen di. 8 Egsegilaway da, dodoo endà nekegaga sa nagan. Huenan di, endà dé nekeugpà da diyà langit. 9 Nehemagawan sa dakel uled nagan kedu diyà langit, owoy nekebuung diyà tanà lapeg sa medoo egsugùsuguen di. Na, kagdi sa pinengadanan sa tapay uled egoh anay, owoy kagdi si Satanas ulu-ulu sa medoo busaw owoy sa tegeakal langun etaw diyà tanà. 10 Agulé, duen sa eg-ikagi metaled dinineg ku diyà langit. Guwaen di, "Neketuu dé sa kealuk i Nemula etaw ini egoh di. Igpehaa dé i Nemula sa egkegaga di egpedatù, owoy igpehaa ma sa Tigtu Datù hinemilì i Nemula sa egkegaga di egpedatù. Endà dé duen sa egtipu sa medoo etaw egpigtuu, enù ka nehemagawan dé kedu diyà langit Satanas i sa tegetipu kenagda diyà si Nemula agdaw owoy sigep. 11 Siini medoo etaw egpigtuu, nekeatu da dé diyà siedò tegetipu kenagda danà sa depanug sa Anak Kebili-bili sa inimatayan diyà sa kayu igbugsud. Owoy nekeatu da ma danà sa tuu tegudon egtulonen da. Endà egsagipaen da duu sa hagtay da, dodoo mepion polo diyà kenagda amuk meimatayan da danà sa kepigtuu da. 12 Huenan di, keanggan yu dé, kiyu i langun etaw eg-ugpà diyà langit. Dodoo tigtu mepasangan yu, kiyu i etaw eg-ugpà diyà tanà owoy diyà dagat, enù ka migtebow dé diyà keniyu sa datù busaw, si Satanas. Tigtu egbulit enù ka netiigan di buyu dé meuma sa egoh di mepigtamayan." 13 Na, egoh sa dakel uled nagan neketiig nekebuung dé diyà tanà, eglohoten di siedò bayi mig-anak maama. 14 Dodoo duen sa duwa pakpak dakel banug igbegay i Nemula diyà sa bayi anì mekelepal dutu siedò kenà di eg-ugpà diyà sa melabel tanà mediyù dalesan, enù ka eg-ipaten i Nemula dutu taman telu gepalay owoy tengà anì endà meuma di sa nagan. 15 Agulé, pinelesut sa nagan diyà sa ebà di sa dakel wayeg anì melened sa bayi. 16 Dodoo tinabangan sa tanà sa bayi, enù ka nesekawang. Hê, mig-ukit polo dahiya sa dakel wayeg kedu diyà sa ebà nagan. 17 Huenan di, tigtu egbulitan sa nagan sa bayi, owoy mig-angay eggila diyà sa medoo tugod di. Kagda sa medoo etaw egpangunut diyà sa igsugù i Nemula owoy eg-udes ma eg-unut diyà sa tuu tegudon igtulù i Hésus. 18 Agulé, egtigdeg sa nagan diyà sa mantadan.

Kepehaa I Hésus Kelistu 13

1 Agulé, hinaa ku sa mebalaw uled tanà eglesut diyà dagat. Duen sepulù sidung di owoy pitu ulu di. Duen sa metolol sayap diyà sa uman sebaen sidung di, owoy duen sa medaet kagi igsumbung diyà si Nemula nekesulat diyà sa uman sebaen ulu di. 2 Éhê sa dakel miyong liyopaldo sa egoh-egoh siini uled tanà hinaa ku. Tigesa sa lisen di éhê sa lisen sa uled tanà oso, owoy éhê ebà alimaw sa ebà di. Agulé, igbegay sa nagan diyà siini mebalaw uled tanà sa langun tunung di owoy sa kedatù di owoy sa dakel egkegaga di egpedatù diyà tanà. 3 Nepalian sa sebaen ulu siini mebalaw uled tanà, owoy lagà nematay dé iya wé ulu di, dodoo nebawuh sa dakel palì di owoy nehagtay dema. Huenan di, egkegaipan sa langun etaw diyà tanà, owoy eg-unutan da ma sa mebalaw uled tanà. 4 Egpenemulawen da sa nagan enù ka igbegay di sa egkegaga di diyà sa mebalaw uled tanà. Egpenemulawen da ma sa mebalaw uled tanà, guwaen da, "Endà duen sa mekelowon diyà sa mebalaw uled tanà, owoy endà ma duen sa mekeatu kenagdi." 5 Endà sagipaen i Nemula duu sa mebalaw uled tanà anì egpeolòolò owoy mekesumbung ma diyà si Nemula, owoy egpandayaen di ma anì egpedatù diyà tanà taman epat pulù owoy duwa gebulan. 6 Egoh di eg-ikagi, egsumbungen di Nemula i, owoy egtubaden di ma sa kenà i Nemula eg-ugpà diyà langit, owoy egsumbungen di ma sa langun etaw i Nemula eg-ugpà diyà langit. 7 Egpandayaen i Nemula ma sa kegila sa uled tanà diyà sa medoo etaw i Nemula diyà tanà anì atuwan di. Owoy mebegayan ma egkegaga anì kumedatù diyà sa langun balangan etaw owoy sa langun geumpung etaw owoy sa langun balangan kagi etaw diyà sa langun balangan tanà. 8 Hê, penemulawen sa langun etaw diyà tanà sa mebalaw uled tanà, liyu daa sa medoo etaw nekesulat sa ngadan da diyà sa libelu sinulatan sa ngadan sa langun etaw nebegayan lalù endà meelut di. Iya sa libelu igsulat sa Anak Kebili-bili neimatayan, owoy tapay dé igsulat di egoh sa tanà endà pa duen. 9 Na, kiyu i medoo etaw egdineg, dineg-dineg yu hih sa eg-ikagiyen ku. 10 Amuk duen etaw hinemilì i Nemula anì mesigkem, mesigkem doo. Owoy amuk duen etaw mimatay duma di danà sundang, mematay ma doo danà sundang. Huenan di, tigkelan ta sa kelikutan ta owoy sumalig ki ma diyà si Nemula, kita i etaw egpigtuu. 11 Agulé, hinaa ku sa sebaen ma mebalaw uled tanà eglesut kedu dalem tanà. Duen duwa sidung di nekeiling sidung anak kebili-bili, dodoo nekeiling sa kagi sa dakel uled nagan sa keikagi di. 12 Siini mebalaw uled tanà, kagdi sa salu sa muna mebalaw uled tanà, owoy kagdi ma sa binegayan di egkegaga. Egtegelen di sa langun etaw diyà tanà anì penemulawen da sa muna mebalaw uled tanà, sak nelikuan egoh di nematay danà palì. 13 Duen medoo dakel panduan egbaelan sa keduwa mebalaw uled tanà. Duen apuy igpetuntun di kedu diyà langit hauwen sa langun etaw. 14 Huenan di, meakalan sa langun etaw diyà tanà danà sa medoo panduan binaelan di danà sa egkegaga sa muna mebalaw uled tanà. Agulé, sinugù di kagda anì baelan da sa inetaw penemulawen da éhê egoh sa muna mebalaw uled tanà nepalian danà sundang dodoo nelikuan doo. 15 Agulé, nebegayan ma egkegaga siini keduwa mebalaw uled tanà anì peginawaen di sa inetaw binaelan da éhê egoh sa muna mebalaw uled tanà. Huenan di, egpekeikagi ma dé sa inetaw owoy isugù di ipeimatay sa langun etaw endà egpenemula kenagdi. 16 Agulé, egtegelen di ma sa langun etaw, iling ka dakel etaw ataw ka tukééy etaw, iling ka kawasà etaw ataw ka pubeli, iling ka udipen ataw ka temù etaw anì ipetandà sa belad da denu kuwanan ataw ka sa kilay da. 17 Huenan di, sumalà dé sa etaw endà duen sa tandà di, endà mekedagang di owoy endà ma mekebeli di. Na, iya sa tandà di sa ngadan sa muna mebalaw uled tanà ataw ka sa lemilu sa selepangan ngadan di. 18 Iya daa sa meketiig ini i sa etaw binegayan i Nemula sa milantek penemdem. Metiigan sa etaw épê melabel penemdem sa selepangan siini lemilu sa uled tanà, enù ka ngadan etaw sa selepangan di. Iya sa lemilu di, enem gatus owoy enem pulù owoy enem.

Kepehaa I Hésus Kelistu 14

1 Agulé, eghauwen ku sa Anak Kebili-bili egtigdeg diyà sa Getan Siyon. Duen ma medoo etaw diyà kenagdi, magatus epat pulù owoy epat ngibu sa kedoo da. Duen sa igsulat diyà sa kilay da sa ngadan sa Anak Kebili-bili owoy ngadan sa Emà di. 2 Agulé, dinineg ku sa eg-ikagi diyà langit. Lagà labal sa dakel sagpaw sa kagi di, owoy metaled ma lagà kilat. Lagà ma dagì sa medoo togò sa dinineg ku. 3 Egtigdeg siini magatus epat pulù owoy epat ngibu etaw diyà sa taengan sa metolol bangkù i Nemula owoy sa epat mapulù egsugùsuguen di owoy sa duwa pulù owoy epat kaunutan. Egduyuy da sa magtu duyuy, owoy endà duen etaw meketiig sa duyuy da liyu daa kagda, enù ka kagda daa sa etaw diyà tanà nekelaun kedu diyà sa kedatù i Satanas. 4 Kagda sa etaw endà lebeg pedu enù ka endà egbigà da, enù ka tigtu metiengaw sa adat da. Takà da eg-unut-unut diyà sa Anak Kebili-bili sumalà dé sa angayan di. Kagda ma sa muna linaun di kedu diyà sa langun etaw diyà tanà anì lagà da sa letus palay mekebegay diyà si Nemula owoy sa Anak Kebili-bili. 5 Endà ma duen sa butbut tinulon da, owoy endà ma duen sa salà binaelan da. 6 Agulé, hinaa ku sa sebaen ma egsugùsuguen i Nemula eglepal diyà sa teliwadà awang. Iya sa galebek di itulù di sa Mepion Tegudon endà mekedan di taman melugay. Egtegudonen di diyà sa langun balangan etaw diyà sa langun balangan tanà owoy sa langun geumpung etaw owoy diyà sa langun balangan kagi etaw. 7 Eg-ikagi metaled, guwaen di, "Adati yu Nemula i, owoy olò yu ma, enù ka neuma dé sa agdaw di tumepeng sa binaelan sa langun etaw. Olò yu Nemula i enù ka kagdi sa migbael langit owoy tanà owoy dagat owoy tebulan wayeg." 8 Agulé, duen sa sebaen ma egsugùsuguen i Nemula nekesetugdug. Guwaen di, "Nedaetan dé. Tigtu nedaetan dé iya wé dakel menuwa Babiloniya. Lagà sa bayi tegepediyangdang enù ka inenggat di sa langun etaw egpeinem sa wain di tigtu mekehilu anì mekeunut da kenagdi egbael sa salà tigtu egkelepuhan i Nemula." 9 Agulé, duen sa ketelu egsugùsuguen i Nemula nekesetugdug diyà kenagda. Migpetaled eg-ikagi, guwaen di, "Amuk duen etaw egpenemula sa mebalaw uled tanà owoy sa inetaw éhê sa egoh-egoh di, owoy amuk egpetandà diyà sa mebalaw uled tanà diyà sa kilay di ataw ka sa belad di, 10 iya sa etaw tigtu mepigtamayan i Nemula. Sa kepigtamay di kenagda lagà sa wain mepait hinudud di diyà sa basù pinelagaan sa dakel kebulit di, owoy iya sa meinem da. Tuu ma doo, sumalà dé sa etaw egpenemula sa mebalaw uled tanà, iya sa etaw tigtu mepelihay temù diyà sa lanaw apuy owoy diyà sa asulpul eglegleg, owoy eghahauwen sa Anak Kebili-bili owoy sa medoo egsugùsuguen i Nemula iya wé mebaelan da. 11 Endà dé mekedan di taman melugay sa ebel apuy kenà da mepigtamayan. Endà ma dé mekedan sa lihay da agdaw owoy sigep, enù ka kagda sa etaw migpenemula sa mebalaw uled tanà owoy sa inetaw éhê sa egoh-egoh di binaelan da, owoy migpetandà da ma sa ngadan di." 12 Huenan di, tigkeli yu dé sa kelikutan yu, kiyu i etaw i Nemula taman sa kedoo ta egpangunut diyà sa igsugù i Nemula owoy egpigtuu diyà si Hésus. 13 Agulé, dinineg ku sa eg-ikagi diyà kenak kedu diyà langit, guwaen di, "Sulati ko ini i. Amuk mematay sa etaw egpigtuu diyà si Datù, meanggan da doo." Hê, egsagbì sa Metiengaw Suguy i Nemula, guwaen di, "Tuu ma doo. Tigtu meanggan da temù, enù ka mekeetud da gumalebek, enù ka dumuen sa untung da danà sa mepion binaelan da." 14 Agulé, eglengag a dema owoy hinaa ku sa gaeb egsenang, owoy duen sa egpenuu dahiya éhê egoh sa Kakay Langun. Duen sa metolol sayap di bulawan, owoy duen sa megalang kumpay sinabaan di. 15 Agulé, duen sa sebaen ma egsugùsuguen i Nemula miglaun diyà sa Dalesan i Nemula diyà langit. Eg-ikagi metaled diyà sa etaw egpenuu diyà gaeb, guwaen di, "Kumpay ko dé, enù ka neuma dé sa agdaw keketu, enù ka lagà sa palay melegà dé sa tanà." 16 Agulé, egkumpay sa etaw egpenuu diyà gaeb, owoy egketuwen di sa tanà. 17 Agulé, hinaa ku sa sebaen ma egsugùsuguen i Nemula miglaun diyà sa Dalesan i Nemula diyà langit, owoy duen ma sa hagdi kumpay megalang. 18 Agulé, miglaun sa sebaen ma egsugùsuguen i Nemula diyà sa kenà da eg-ulow mepion ngadeg diyà sa Dalesan i Nemula. Kagdi sa egsugùsuguen i Nemula eg-ipat sa apuy dahiya. Migpetaled eg-ikagi diyà sa egsugùsuguen i Nemula egsabà kumpay, guwaen di, "Kumpay ko dé, owoy ketu ko sa bunga palas dutu tanà dò, enù ka melegà dé." 19 Hê, egkumpay sa egsugùsuguen i Nemula, owoy egketuwen di sa langun bunga palas diyà tanà. Agulé, igbuung di diyà sa atung kenà da eghemeg palas. Na, iya sa pinegulepengan sa kenà da eghemeg palas sa kepigtamay i Nemula mekeuma diyà sa medoo egkuntelà kenagdi. 20 Diyà dibaluy sa menuwa sa kenà da eghemeg palas. Hê, eglesut dahiya sa depanug mekeiling memahà owoy egdelug taman labi telu gatus kakilu owoy taman pelà sa kedalem di.

Kepehaa I Hésus Kelistu 15

1 Agulé, duen sa sebaen ma tandà tigtu mekegaip hinaa ku diyà langit. Duen sa pitu egsugùsuguen i Nemula eg-uwit sa pitu balangan lihay. Iya sa sabuhanan lihay, enù ka amuk meimet siini pitu lihay, meubus dé sa kepigtamay i Nemula etaw diyà tanà. 2 Duen ma sa hinaa ku éhê lanaw tigtu metiengaw lagà pegalungan dodoo neamutan apuy. Hinaa ku ma dahiya sa langun etaw nekeatu diyà sa mebalaw uled tanà, enù ka endà egpenemulawen da duu sa inetaw éhê sa egoh-egoh di owoy endà ma egpetandà da sa lemilu ngadan di. Egtigdeg da diyà sa dapag lanaw tigtu metiengaw, owoy egsabaan da sa togò igbegay i Nemula diyà uman sebaen kenagda. 3 Langun da egduyuy sa duyuy i Mosis, sa migpangunut diyà si Nemula egoh anay, owoy sa duyuy eg-olò sa Anak Kebili-bili, guwaen da, "O Nemula, kuna sa Datù ké épê dakel egkegaga. Tigtu dakel sa langun egbaelan ko owoy mekegaip ma. Kuna sa Datù diyà sa langun balangan etaw. Anan metiengaw sa adat ko owoy anan metudà sa egbaelan ko. 4 O Datù, kuna sa meadatan etaw. Owoy pedatuen da ma kuna enù ka kuna daa sa tigtu metiengaw. Mangay diyà keniko sa langun balangan etaw anì oloen da kuna, enù ka igpehaa ko dé anan metudà sa egbaelan ko." 5 Agulé, hinaa ku neukaan sa Dalesan i Nemula diyà langit, owoy dahiya sa bilik kenà sa tandà i Nemula. 6 Agulé, miglaun kedu diyà Dalesan i Nemula sa pitu egsugùsuguen di eg-uwit sa pitu balangan lihay. Egsenang sa ginis da tigtu mebulà, owoy duen sa bandan da bulawan diyà sa kagpa da. 7 Agulé, igbegay sa sebaen keepat mapulù egsugùsuguen i Nemula sa bilu bulawan diyà sa uman sebaen siini pitu egsugùsuguen i Nemula. Nepenù sa pitu bilu bulawan sa bulitan i Nemula etaw, sa Nemula melalù taman melugay. 8 Agulé, nepenù ebel sa Dalesan i Nemula diyà langit, enù ka iya sa tandà sa senang i Nemula owoy sa tunung di. Huenan di, endà mekeludep sa etaw diyà sa Dalesan i Nemula taman endà meimet sa pitu lihay inuwit sa pitu egsugùsuguen i Nemula.

Kepehaa I Hésus Kelistu 16

1 Agulé, dinineg ku sa eg-umow diyà sa Dalesan i Nemula, owoy egsuguen di sa pitu egsugùsuguen i Nemula, guwaen di, "Angay yu buwah diyà tanà siedò pitu bilu nepenù sa bulitan i Nemula." 2 Agulé, mig-angay sa sebaen egsugùsuguen i Nemula egbuwah sa lihay dalem bilu di diyà tanà. Hê, petow dé migduen liboh diyà sa langun etaw migpetandà diyà sa mebalaw uled tanà owoy diyà sa langun etaw migpenemula sa inetaw nekeiling diyà sa palas di. Mahù sa liboh da owoy tigtu mesakit ma. 3 Hediya ma sa keduwa egsugùsuguen i Nemula, binuwah di diyà sa dagat sa lihay dalem sa bilu di. Petow dé nebaluy depanug sa dagat nekeiling sa depanug sa etaw nematay. Huenan di, nematay sa langun eghauwen dalem dagat. 4 Agulé, binuwah sa ketelu egsugùsuguen i Nemula sa lihay dalem sa bilu di diyà sa medoo lawa"t wayeg owoy diyà tebulan. Petow dé anan da nebaluy depanug. 5 Agulé, dinineg ku sa kagi sa egsugùsuguen i Nemula eg-ipat sa wayeg. Guwaen di, "O Nemula, kuna sa tigtu metiengaw. Tapay ka dé duen kuna ya egoh anay taman ini egoh di. Tigtu metudà sa kepigtamay ko nekeuma diyà siini medoo etaw, 6 enù ka inimatayan da sa medoo etaw egpigtuu diyà keniko owoy sa medoo tegesugkow ko egoh anay. Huenan di, pineinem ko ma kagda depanug. Mepion iya wé enù ka nekeuma dé diyà kenagda sa untung nekesugat diyà sa binaelan da." 7 Agulé, dinineg ku dema sa eg-ikagi kedu diyà sa kenà da eg-imatay hinagtay ibegay diyà si Nemula. Guwaen di, "O Datù Nemula épê dakel egkegaga, tuu ma doo. Tigtu nesugat sa kepigtamay ko etaw owoy metudà ma." 8 Agulé, binuwah sa keepat egsugùsuguen i Nemula sa lihay dalem sa bilu di diyà agdaw. Petow dé tigtu migkeedup temù sa agdaw, huenan di medaig sa medoo etaw diyà tanà. 9 Nedaig da enù ka tigtu meedup temù sa agdaw. Huenan di, egtubaden da Nemula i danà di migpeangay sa medoo lihay diyà kenagda. Dodoo tapay doo endà eg-ekedan da duu sa medaet egbaelan da, owoy endà ma eg-oloen da Nemula i. 10 Agulé, binuwah sa kelima egsugùsuguen i Nemula sa lihay dalem sa bilu di diyà sa bangkù kenà sa mebalaw uled tanà egpedatù. Petow dé migdeleman temù taman sa nelusud kedatuan sa mebalaw uled tanà. Agulé, nehemuedan sa langun etaw sa dilà da danà kesakit sa lihay nekeuma diyà kenagda. 11 Egtubaden da ma Nemula i diyà langit danà sa mesakit egtugedamen da owoy danà sa liboh diyà sa lawa da. Dodoo tapay doo endà eg-ekedan da duu sa medaet egbaelan da. 12 Agulé, binuwah sa keenem egsugùsuguen i Nemula sa lihay dalem sa bilu di diyà siedò dakel lawa"t wayeg Upelatis. Petow dé neeti iya wé wayeg anì dumuen sa ukitan sa medoo sulutan tumebow kedu tebowon agdaw. 13 Agulé, hinaa ku sa telu busaw tigtu medaet éhê egoh-egoh bakbak. Miglesut sa sebaen diyà sa ebà sa dakel uled nagan, owoy miglesut ma sa sebaen diyà sa ebà sa mebalaw uled tanà, owoy miglesut ma sa sebaen diyà sa ebà sa tegesugkow i Satanas. 14 Siini telu busaw, duen ma sa egkegaga da egbael panduan. Kagda sa pineangay i Satanas diyà sa langun sulutan diyà tanà anì setiponen da sa langun sundalu anì gilawen da Nemula ya amuk meuma siedò agdaw sa kepigtamay i Nemula épê dakel egkegaga. 15 Huenan di, egsetiponen da sa medoo sulutan owoy sa sundalu da dutu siedò getan pinengadanan Almagidon diyà sa kagi Hibelu. Na, eg-ikagi Datù i, guwaen di, "Taa yu, hih. Lagà sa ketebow tegepenakaw sa kepelikù ku diyà tanà, enù ka endà duen etaw neketiig sa ulas ku. Amuk pelikù a, meanggan sa etaw endà tumudug di owoy tapay dé migginis danà di eg-angat-angat kenak. Meanggan enù ka lagà endà petagbu-tagbu di enù ka endà duen sa kenà di memalaan." 17 Agulé, binuwah sa kepitu egsugùsuguen i Nemula sa lihay dalem sa bilu di diyà awang. Petow dé duen sa eg-ikagi metaled diyà sa metolol bangkù i Datù diyà sa Dalesan i Nemula, guwaen di, "Neelut dé." 18 Hê, petow dé egsilà owoy egkilat owoy egpeletê owoy eglinug meleges. Endà pa duen linug meleges éhê iya wé edung egoh i Nemula migbael etaw, enù ka iya sa tigtu meleges linug. 19 Nebaed telu baed iya wé dakel menuwa Babiloniya, owoy anan nedaetan ma sa medoo liyu dakel menuwa. Endà nelipengan i Nemula duu sa dakel menuwa Babiloniya, huenan di lagà pineinem di sa medoo etaw dahiya sa wain diyà sa basù di, enù ka igpeukit di diyà kenagda sa dakel kebulit di owoy tigtu egpigtamayan di kagda. 20 Nekedan sa langun pungul diyà dagat, owoy nepenas ma sa langun tuduk. 21 Nenabuan sa medoo etaw sa dakel bunga"t udan, lima pulù kakilu sa kebegat sa uman sebaen bunga"t udan. Huenan di, egtubaden sa medoo etaw diyà tanà Nemula i enù ka tigtu nepelihay da danà sa dakel bunga"t udan pineangay di diyà kenagda.

Kepehaa I Hésus Kelistu 17

1 Agulé, mig-angay diyà kenak sa sebaen kepitu egsugùsuguen i Nemula mig-uwit bilu, owoy guwaen di, "Angay ka dini, enù ka ipehaa ku diyà keniko sa kepigtamay i Nemula mekeuma diyà sa bayi tegepediyangdang miglalag eg-ugpà diyà sa medoo lawa"t wayeg. Iya lagà sa dakel menuwa medapag diyà wayeg. 2 Binigà sa langun sulutan diyà tanà iya wé bayi, owoy eghiluwen sa langun etaw diyà tanà danà sa wain ipeinem di, lagà sa kebigà di." 3 Agulé, danà sa tunung sa Metiengaw Suguy i Nemula, inuwit a sa egsugùsuguen i Nemula diyà sa melabel tanà mediyù dalesan. Hinaa ku dahiya sa bayi egkudà diyà sa melalegà mebalaw uled tanà. Duen sa sepulù sidung siini mebalaw uled tanà owoy duen sa pitu ulu di, owoy duen medoo kagi igsumbung diyà si Nemula nekesulat diyà sa lawa di. 4 Na, egginis sa bayi sa melalegà ginis tigtu mapulù owoy metolol nekeiling sa ginis sulutan. Tigtu neengom sa bayi sa medoo binaelan da bulawan owoy metolol batu mapulù owoy pélas. Egsabaan di ma sa tabù bulawan nepenù sa tétê binaelan di tigtu medaet danà di takà egpediyangdang. 5 Nekesulat diyà sa kilay di sa kagi nelidung pelà sa selepangan di. Iya sa nekesulat, guwaen di, "Babiloniya sa dakel menuwa miglalag, iya sa lagà inay sa langun tegepediyangdang owoy sa pesu sa langun medaet egbaelan etaw diyà tanà." 6 Agulé, hinaa ku ma eghiluwen iya wé bayi enù ka ininem di sa depanug sa medoo etaw egpigtuu inimatayan di danà da endà eg-eked sa kepigtuu da diyà si Hésus. Egoh ku mighaa iya wé bayi, tigtu a negaip. 7 Dodoo mig-ikagi sa egsugùsuguen i Nemula diyà kenak, guwaen di, "Maen di ya egkegaip ka? Tulonen ku diyà keniko sa selepangan siini bayi owoy sa selepangan sa mebalaw uled tanà egkudaan di épê pitu ulu owoy sepulù sidung. 8 Sa mebalaw uled tanà hinaa ko, nehagtay egoh anay owoy nematay dé, dodoo buyu dé lumesut dema kedu diyà sa tosong endà duen taman kedalem. Amuk lumesut dé, iya sa ketamanan di mekeangay diyà sa lanaw apuy anì mepigtamayan. Agulé, megaip sa langun etaw diyà tanà, sa medoo etaw endà nekesulat sa ngadan da egoh tanà binaelan diyà sa libelu sinulatan sa ngadan sa medoo etaw nebegayan lalù endà meelut di. Megaip da langun amuk hauwen da iya wé mebalaw uled tanà, enù ka nehagtay egoh anay owoy nematay dé, dodoo neenaw dema. 9 "Na, sa etaw épê milantek penemdem, iya sa meketiig ini i. Iya sa lagà sa pitu ulu sa uled tanà sa pitu getan pinenuuwan sa bayi tegepediyangdang. 10 Owoy iya ma sa selepangan di sa pitu sulutan. Nematay dé sa lima sulutan, owoy duen sa sebaen sulutan egpedatù pelà ini egoh di, owoy duen pa sa sebaen sulutan endà pa egpedatù di. Dodoo amuk meuma sa egoh di kumedatù, endà iseg di melugay sa kedatù di. 11 Na, sa mebalaw uled tanà nehagtay egoh anay dodoo nematay dé, iya sa kewalu di sulutan sumetugdug diyà sa pitu sulutan owoy mepigtamayan doo kani diyà sa lanaw apuy. 12 "Na, sa sepulù sidung hinaa ko, iya sa sepulù sulutan endà pa mig-edung da egpedatù. Dodoo mebegayan da egkegaga kumedatù anì meseselengan da sa mebalaw uled tanà, dodoo mepokò daa sa lugay da kumedatù. 13 Mesesebaen sa penemdem siini sepulù sulutan, owoy ibegay da sa egkegaga sa kedatuan da diyà sa mebalaw uled tanà owoy mangunut da ma diyà sa langun igsugù di. 14 Agulé, gilawen da sa Anak Kebili-bili. Dodoo atuwan doo sa Anak Kebili-bili owoy sa medoo duma di kagda, enù ka kagdi sa Tigtu Datù diyà sa langun datù owoy sa Tigtu Sulutan diyà sa langun sulutan. Iya sa medoo duma di umatu sa medoo etaw hinemilì i Nemula owoy pinepigtuu di owoy endà migpetangtang da sa keunut da kenagdi." 15 Agulé, eg-ikagi dema sa egsugùsuguen i Nemula diyà kenak, guwaen di, "Sa medoo lawa"t wayeg hinaa ko pinenuuwan sa bayi tegepediyangdang, iya lagà sa tigtu medoo etaw kedu diyà sa medoo balangan tanà owoy sa medoo balangan geumpung etaw owoy sa medoo balangan kagi etaw. 16 Na, sa sepulù sidung hinaa ko lagà sa sepulù sulutan, melepuhan da sa bayi tegepediyangdang. Hediya ma sa mebalaw uled tanà, melepuhan di ma sa bayi. Huenan di, pekawen da sa medoo langun taman di, owoy kedanan da ma sa ginis di, owoy kaenen da sa lawa di owoy ulowen da ma. 17 Iya sa baelan da diyà kenagdi enù ka binegayan i Nemula kagda penemdem anì petuuwen da sa uyot i Nemula. Huenan di, mesesebaen sa penemdem da owoy ibegay da diyà sa mebalaw uled tanà sa egkegaga sa kedatuan da taman endà meketuu sa langun inikagi i Nemula egoh anay. 18 Na sa bayi hinaa ko, iya lagà sa dakel menuwa eglalag eg-unutan sa langun sulutan diyà siini sinukub langit."

Kepehaa I Hésus Kelistu 18

1 Agulé, hinaa ku sa sebaen ma egsugùsuguen i Nemula egpetuntun kedu langit dò mangay diyà tanà. Tigtu dakel sa egkegaga di, owoy nelegdawan sa uwang tanà danà sa senang di. 2 Migpetaled temù eg-ikagi, guwaen di, "Nedaetan dé. Tigtu nedaetan dé iya wé dakel menuwa Babiloniya. Nebaluy dé eg-ugpaan sa medoo busaw owoy sa langun egsugùsuguen i Satanas medaet atul, owoy nebaluy ma dé eg-ugpaan sa medoo medaet manuk melihi. 3 Iya sa nebaelan di enù ka inenggat sa bayi pinelagaan Babiloniya sa langun etaw anì eg-unut da kenagdi egbael medaet, enù ka lagà wain mekehilu igpeinem di diyà kenagda sa medaet igpebael di. Binigà sa langun sulutan diyà tanà kagdi, owoy migkawasà ma sa medoo tegedagang diyà tanà danà sa dakel ungayà sa bayi egbeli." 4 Agulé, dinineg ku sa sebaen ma eg-ikagi diyà langit, guwaen di, "Kiyu i etaw eg-unut diyà kenak, salidi yu dé iya wé menuwa. Yoko eg-unut duu siedò bayi egbael medaet anì endà mekelapeg yu diyà sa kepigtamay ku mekeuma diyà kenagdi. 5 Upama amuk meselogsud-logsud sa medoo salà di, mekeuma diyà langit enù ka medoo temù. Owoy endà melipengan i Nemula duu sa tigtu medaet binaelan di. 6 Sa kedakel kepelihay di keniyu, iya ma kedakel sa baeli yu diyà kenagdi, dodoo takep yu pa sa kesulì yu kenagdi. Penù yu sa basù di sa bulitan i Nemula kenagdi anì ipeinem di anì metakep sa kebulit i Nemula mekeuma diyà kenagdi. 7 Danà di subela sa kepedakel di kenagdi owoy nekuwa di ma sumalà dé sa ungayà di, huenan di sumubela ma sa lihay mekeuma diyà kenagdi owoy sa kekebukulan di. Enù ka endà egsabuh di egpeolòolò, guwaen di diyà sa pedu di, 'Aken sa booy kawasà, beken a bayi balu. Endà dumuen sa kelikutan mekeuma diyà kenak.' 8 Dodoo danà sa kepeolòolò di, petow dé mekeuma doo sa medoo balangan medaet diyà kenagdi. Diyà sa sebaen daa agdaw meseselengan sa linadu di owoy sa dakel kebukulan di owoy sa bitil, owoy meulow ma. Enù ka dakel temù sa egkegaga i Datù Nemula migtamay kenagdi." 9 Na, sa medoo sulutan diyà tanà mig-unut kenagdi egbael medaet owoy migpigtuu diyà sa hagdi uyot medaet, suminegaw da owoy dumelawit da ma amuk hauwen da sa ebel iya wé menuwa egkeulow. 10 Egpediyù da egtigdeg egsugpayal, enù ka nelimedangan da mekelapeg da diyà sa lihay di. Guwaen da, "Ay, egkedaetan temù sa dakel menuwa Babiloniya eglalag, enù ka sakaulas daa nekeuma sa kepigtamay i Nemula." 11 Suminegaw sa medoo tegedagang diyà tanà owoy dumelawit da ma danà iya wé menuwa nedaetan, enù ka endà dé duen etaw egbeli sa medoo dagangen da. 12 Endà duen meli sa medoo langun taman da, upama bulawan owoy pilak owoy metolol batu mapulù owoy pélas. Endà ma duen meli sa tila mapulù egdagangen da anan metolol, upama sa mebulà owoy sa dingung owoy sa menipis metolol owoy sa melalegà. Owoy endà ma duen etaw egbeli sa medoo balangan papan mepion ngadeg, owoy sa medoo langun taman da binaelan da diyà kayu mapulù owoy diyà batu owoy diyà ungal alipanti owoy diyà galang owoy putow owoy diyà sa batu malmol. 13 Owoy endà ma duen meli sa medoo egdagangen da mepion ngadeg, upama sa ipepion nanam kaenen, owoy sa lana mepion ngadeg ulowen etaw, owoy sa gità mepion ngadeg. Owoy endà ma duen meli sa kaenen egdagangen da, upama sa wain owoy sa lana owoy sa alina owoy sa palay. Owoy endà ma duen sa egbeli sapì owoy kebili-bili, owoy kudà owoy kalisa owoy sa etaw udipen. 14 Eg-ikagi sa medoo tegedagang diyà sa bayi pinelagaan Babiloniya, guwaen da, "Anan nedaetan sa langun egkeiyapan ko. Nedaetan ma sa pantiyali ko owoy sa medoo ipepion nanam ko, owoy endà dé mehaa ko duu iya wé." 15 Agulé, sa medoo etaw migkawasà danà da takà egdagang sa medoo langun taman mapulù diyà iya wé menuwa, egpediyù da egtigdeg egsugpayal enù ka nelimedangan da mekelapeg da diyà sa lihay di. Suminegaw da owoy dumelawit da ma. 16 Guwaen da, "Ay, egkedaetan temù iya wé dakel menuwa eglalag. Metolol egoh anay lagà sa bayi migkawal sa mapulù ginis mebulà owoy dingung lagà sa ginis sulutan owoy sa metolol ginis melalegà. Metolol lagà sa bayi neengom sa bulawan owoy metolol batu mapulù owoy pélas. 17 Dodoo sakaulas daa, anan nekedan iya wé langun pantiyali di." Agulé, sa langun ulu-ulu diyà baleku owoy sa medoo etaw mig-edà, owoy sa medoo tegegalebek diyà baleku owoy sa medoo egpantiyali diyà dagat, egpediyù da egtigdeg egsugpayal. 18 Egoh da mighaa sa ebel sa menuwa egkeulow, eg-ikagi da metaled, guwaen da, "Ay, endà dé duen sa menuwa nekelowon diyà siini dakel menuwa eglalag." 19 Agulé, binuhbuhan da kepung sa ulu da anì tandaan da sa pedu da nebukul. Egsinegaw da owoy egdelawit da ma, guwaen da, "Ay, egkedaetan temù iya wé dakel menuwa eglalag. Migkawasà sa langun épê baleku danà sa pantiyali iya wé menuwa, dodoo sakaulas daa anan nekedan sa langun pantiyali di." 20 Na, kiyu i etaw eg-ugpà diyà langit, keanggan yu dé danà iya wé menuwa nedaetan. Keanggani yu ma kiyu i medoo tegesugkow i Nemula owoy medoo salu i Hésus owoy medoo etaw i Nemula, enù ka pinigtamayan i Nemula dé iya wé menuwa danà sa medaet binaelan di diyà keniyu. 21 Agulé, duen sa mebagel egsugùsuguen i Nemula migkuwa sa batu éhê sa dakel gilingan kelang, owoy igbuung di diyà dagat. Guwaen di, "Hediya ma medaetan sa dakel menuwa Babiloniya, owoy endà dé mehaa di etaw. 22 Endà ma dé medineg da duu sa pegelung owoy sa togò, owoy sa palendeg owoy sa tegbuli, owoy sa duyuy etaw. Endà ma dé hauwen sa medoo etaw tegegalebek. Hediya ma endà ma dé medineg da duu sa dagì sa gilingan. 23 Owoy endà dé mehaa da duu sa legdaw palitan dahiya. Endà ma dé medineg sa kagi sa medoo etaw meanggan eglenged kawing. Nepigtamayan sa menuwa Babiloniya, enù ka nekelowon sa medoo tegedagang dahiya diyà sa langun tegedagang diyà tanà, owoy neakalan ma sa langun etaw diyà tanà danà sa beliyan tegebutbut dahiya. 24 Nepigtamayan ma sa menuwa Babiloniya enù ka hinaa dahiya sa depanug sa medoo tegesugkow i Nemula owoy sa medoo etaw di inimatayan da, lapeg sa langun etaw neimatayan diyà siini sinukub langit danà iya wé menuwa Babiloniya."

Kepehaa I Hésus Kelistu 19

1 Agulé, duen sa dinineg ku nekeiling ketaled kagi sa tigtu medoo etaw diyà langit. Guwaen da, "Haléluya, meolò Nemula i. Kagdi daa sa egpedakelen ta, kagdi ma daa sa épê dakel egkegaga, owoy kagdi sa eg-aluk kenita denu sa salà ta. 2 Tigtu nesugat sa kepigtamay di etaw owoy metudà ma, enù ka pinigtamayan di dé iya wé bayi tegepediyangdang eglalag danà di mig-enggat diyà salà sa langun etaw diyà tanà. Pinigtamayan di ma kagdi danà di mig-imatay sa medoo etaw migpangunut diyà si Nemula." 3 Agulé, eg-ikagi da dema metaled, guwaen da, "Haléluya, meolò Nemula i. Endà dé mekedan di taman melugay sa ebel iya wé dakel menuwa egkeulow." 4 Agulé, eglagkeb sa duwa pulù owoy epat kaunutan owoy sa epat mapulù egsugùsuguen i Nemula, owoy eg-oloen da Nemula i egpenuu diyà sa metolol bangkù di. Guwaen da, "Amin. Haléluya, meolò Nemula i." 5 Agulé, duen sa eg-ikagi medapag diyà sa metolol bangkù i Nemula, guwaen di, "Langun yu etaw egpangunut diyà si Nemula owoy langun yu eg-adat kenagdi, iling ka lagdà yu etaw ataw ka dakel etaw yu, olò yu langun Nemula i." 6 Agulé, dinineg ku sa kagi sa tigtu medoo etaw. Lagà sa labal sa dakel sagpaw sa kagi da, owoy lagà ma kilat. Guwaen da, "Haléluya, meolò Nemula i, enù ka sa Datù ta Nemula épê dakel egkegaga sa egkedatù dé diyà sa langun etaw. 7 Meanggan ki temù owoy meolò ta kagdi danà sa dakel egkegaga di, enù ka neuma dé sa pista kawing sa Anak Kebili-bili owoy tapay dé migpepion sa pinelagaan bayi sawaen di. 8 Enù ka duen sa tigtu mebulà ginis igbegay diyà sa bayi sawaen di, owoy egsenang owoy tigtu melanih ma." Na, iya sa pinegulepengan mepion ginis di sa metudà egbaelan sa medoo etaw i Nemula. 9 Agulé, eg-ikagi sa egsugùsuguen i Nemula diyà kenak, guwaen di, "Sulati ko ini i. Meanggan temù sa medoo etaw igsasà anì lumenged da sa pista kawing sa Anak Kebili-bili." Agulé, guwaen di ma diyà kenak, "Ini sa tuu kagi i Nemula." 10 Agulé, egligkuwed a diyà sa taengan di anì oloen ku. Dodoo hinawidan di aken, guwaen di, "Yaka eg-olò ya kenak, enù ka aken ma sa egpangunut diyà si Nemula lagà keniko owoy sa medoo duma ko egpigtuu diyà sa tegudon igtulù i Hésus. Si Nemula daa sa olò ko." Na, inikagi di iya wé enù ka iya sa tegudon igtulù i Hésus sa igtulù sa medoo tegesugkow i Nemula egoh anay. 11 Agulé hinaa ku sa langit neukaan, owoy duen sa kudà mebulà dahiya. Iya gelal sa etaw egkudà, Kesaligan owoy Anan Tuu. Metudà ma sa kekukum di, owoy metudà ma sa kegila di sa medoo kuntelà di. 12 Éhê legleg apuy sa mata di, owoy duen ma sa medoo metolol sayap diyà sa ulu di tandà kagdi sa Tigtu Datù. Duen ma sa ngadan nekesulat diyà kenagdi, dodoo kagdi daa sa neketiig sa selepangan di. 13 Lagà ineled diyà depanug sa kawal di, owoy iya sa gelal di sa Kagi i Nemula. 14 Duen tigtu medoo sundalu kedu langit dò eg-unut diyà kenagdi. Egkudà da ma sa kudà mebulà, owoy egkawal da ma sa tigtu mebulà ginis endà duen lued. 15 Duen sa megalang sundang eglesut diyà sa ebà di, owoy iya sa kinemkem di umatu diyà sa langun kuntelà di diyà tanà. Endà duen etaw mekeeked sa kedatù di enù ka mebagel lagà sa putow endà metepù. Pinelagà di sa kuntelà di sa bunga palas hemegen etaw egbael wain, enù ka ipehaa di diyà kenagda sa dakel kebulit i Nemula épê dakel egkegaga. 16 Duen ma sa gelal nekesulat diyà sa kawal di owoy diyà sa bubun di, guwaen di, "Sa Tigtu Datù diyà sa langun datù owoy sa Tigtu Sulutan diyà langun sulutan." 17 Agulé, hinaa ku sa egsugùsuguen i Nemula egtigdeg diyà sa mata"t agdaw. Eg-umow metaled diyà sa langun manuk diyà awang, guwaen di, "Téél yu dé. Setiponoy yu enù ka duen sa ipekaen i Nemula diyà keniyu. 18 Setiponoy yu anì mekaen yu sa ekud sa medoo sulutan owoy medoo kapitan sundalu owoy medoo sundalu. Kaen yu ma sa ekud sa medoo kudà owoy sa medoo etaw migkudà. Kaen yu ma sa ekud sa langun etaw, iling ka udipen ataw ka beken udipen, iling ka lagdà etaw ataw ka dakel etaw." 19 Agulé, hinaa ku iya wé mebalaw uled tanà owoy sa medoo sulutan diyà tanà inunutan da sa langun sundalu da. Nesetipon da anì gumila da diyà sa etaw egkudà sa kudà mebulà owoy sa medoo sundalu di kedu langit dò. 20 Hê, nesigkem iya wé mebalaw uled tanà, owoy nesigkem ma sa tegesugkow i Satanas sa migbael medoo panduan danà sa egkegaga sa mebalaw uled tanà. Danà sa medoo panduan binaelan di, inakalan di sa langun etaw egpetandà diyà sa mebalaw uled tanà owoy sa langun etaw migpenemula sa inetaw éhê sa egoh-egoh di. Agulé, sa mebalaw uled tanà owoy sa tegesugkow i Satanas, nekebuung da nehagtay doo diyà sa lanaw apuy kenà di eglegleg sa asulpul. 21 Hê, neimatayan ma sa langun sundalu da danà sa sundang eglesut diyà sa ebà sa etaw egkudà sa kudà mebulà. Agulé, tigtu nebesug sa langun manuk migkaen ekud sa medoo etaw nematay.

Kepehaa I Hésus Kelistu 20

1 Agulé, hinaa ku sa egsugùsuguen i Nemula migpetuntun kedu diyà langit. Inuwit di sa gunsì sa pintù tosong endà duen taman kedalem, owoy inuwit di ma sa dakel sangkalì. 2 Hê, sinigkem di iya wé dakel uled nagan, sa tapay uled si Satanas sa kaunutan busaw, owoy pinolot di sangkalì anì endà melengà di taman endà meelut sa sengibu gepalay. 3 Igbuung di diyà iya wé tosong endà duen taman kedalem. Agulé pinintuan di owoy tinandaan di anì endà meukaan di etaw. Iya sa binaelan di anì endà dé meakalan i Satanas duu sa medoo etaw diyà siini sinukub langit taman endà meelut sa sengibu gepalay. Dodoo amuk meelut sa sengibu gepalay, melengaan dema, dodoo endà dé iseg di melugay. 4 Agulé, hinaa ku sa medoo metolol bangkù sa datù, owoy iya sa egpenuu dahiya sa medoo etaw binegayan egkegaga anì kumukum da. Hinaa ku ma sa suguy sa medoo etaw inimatayan danà da egtegudon sa kagi i Nemula owoy danà da ma egtulù denu si Hésus. Neimatayan da danà da endà egpenemula sa mebalaw uled tanà owoy sa inetaw éhê sa egoh-egoh di, owoy danà da ma endà egpetandà diyà sa kilay da ataw ka belad da. Neenaw da dé langun owoy neseselengan da si Kelistu egkedatù taman sengibu gepalay. 5 Ini sa muna keenaw i Nemula sa medoo etaw nematay. Dodoo sa medoo liyu etaw nematay, endà pa meenaw da taman endà meelut sa sengibu gepalay. 6 Tigtu meanggan sa medoo etaw mekelapeg diyà sa muna keenaw i Nemula etaw nematay owoy metiengaw da ma. Kagda sa etaw endà mekehaa da sa kepigtamay i Nemula etaw lagà sa keduwa gulê kepatay etaw. Kagda ma sa etaw egsugùsuguen da i Nemula owoy si Kelistu, owoy meseselengan da si Kelistu egkedatù taman sengibu gepalay. 7 Na, amuk meelut dé sa sengibu gepalay, mekelaun Satanas i kedu diyà sa bilangguwan di. 8 Amuk mekelaun, meakalan di sa langun etaw nekeseluh diyà siini sinukub langit pinelagaan Gog owoy Magog. Setiponen di sa langun kedoo da anì gilawen da Nemula ya. Medoo da temù lagà da enay mantadan. 9 Amuk mipanaw da, mekeseluh da diyà uwang tanà, owoy melibet da sa kenà sa medoo etaw i Nemula eg-ugpà, sa menuwa Hélusalém egkedakelan pedu i Nemula. Dodoo menabù diyà kenagda sa apuy kedu langit dò, owoy medaetan da langun. 10 Agulé, nekebuung Satanas i, sa mig-akal kenagda, diyà sa lanaw apuy kenà di eglegleg sa asulpul. Iya ma sa kenà da nekebuung sa mebalaw uled tanà owoy sa tegesugkow i Satanas. Mepelihay da dahiya agdaw owoy sigep taman melugay. 11 Agulé, hinaa ku sa dakel mebulà bangkù i Datù owoy duen ma sa egpenuu dahiya. Hê, nekedan sa langit owoy sa tanà kedu diyà sa taengan di, owoy endà dé mehaa di etaw. 12 Agulé, hinaa ku sa langun etaw nematay neenaw dé, iling ka dakel etaw ataw ka lagdà etaw, owoy egtigdeg da langun diyà sa taengan iya wé bangkù i Datù. Binekah sa medoo libelu owoy binekah ma iya wé libelu kenà di nekesulat sa ngadan sa langun etaw nebegayan lalù endà meelut di. Agulé, tinulon i Nemula sa ketamanan sa uman sebaen etaw danà sa igsulat diyà sa medoo libelu denu sa langun binaelan da egoh anay. 13 Egoh da mig-enaw, diyà da sa taengan i Nemula sa langun etaw nematay, iling ka nematay da diyà dagat ataw ka diyà tanà, owoy miglaun ma sa suguy da kedu diyà bayà eg-angay diyà sa taengan i Nemula. Hê, egtulonen i Nemula sa ketamanan sa langun etaw danà sa binaelan da egoh anay. 14 Sumalà dé sa etaw endà nekesulat sa ngadan di diyà sa libelu kenà di igsulat ngadan sa langun etaw nebegayan lalù endà meelut di, iya sa etaw nekebuung diyà sa lanaw apuy. Na, sa lanaw apuy, iya sa keduwa gulê kepatay etaw. Hê, nekebuung ma sa bayà diyà sa lanaw apuy, owoy nekebuung ma sa kepatay etaw diyà sa lanaw apuy.

Kepehaa I Hésus Kelistu 21

1 Agulé, hinaa ku sa magtu langit owoy sa magtu tanà, enù ka nekedan dé sa tapay langit owoy sa tapay tanà, owoy endà ma dé duen sa dagat. 2 Agulé, hinaa ku sa menuwa kenà i Nemula eg-ugpà sa Magtu Hélusalém. Egpetuntun kedu diyà langit owoy kedu si Nemula. Tigtu metolol iya wé menuwa, nekeiling sa bayi egkawingen tigtu neengom sa ginis di metolol. 3 Duen sa eg-ikagi metaled dinineg ku diyà siedò bangkù i Datù, guwaen di, "Taa yu, mig-angay dé Nemula i eg-ugpà diyà sa medoo etaw. Mugpà dé diyà kenagda, owoy mebaluy dé etaw di kagda. Tigtu eg-ugpà Nemula i diyà kenagda, owoy kagdi sa egpenemulawen da. 4 Hunasen di sa langun luhà diyà sa mata da, owoy endà dé duen etaw mematay. Endà dé mebukul sa pedu da, owoy endà ma dé suminegaw da. Endà ma dé dumuen sa mesakit da, enù ka nekedan dé sa tapay tanà." 5 Agulé, eg-ikagi sa egpenuu diyà sa bangkù i Datù, guwaen di, "Taa yu, anan dé magtu sa egbaelan ku ini egoh di." Guwaen di ma diyà kenak, "Sulati ko langun ini i, enù ka anan tuu sa kagi ku owoy kesaligan ma." 6 Guwaen di ma, "Netuu dé sa langun binaelan ku. Aken sa Alpa owoy Oméga, enù ka aken sa edungan sa langun eghauwen owoy sa ketamanan di. Amuk eglupahan sa etaw, peinemen ku diyà sa tebulan mekepelalù etaw taman melugay, owoy ipeuloy ku daa diyà kenagdi. 7 Sumalà dé sa etaw endà eglengaen di duu sa keunut-unut di kenak, iya sa begayan ku untung, owoy aken sa Nemula eg-unutan di owoy meanak ku kagdi. 8 Dodoo amuk eg-eked sa etaw eg-unut diyà kenak enù ka egkelimedangan da, owoy sa endà egpigtuu diyà kenak, iya sa mekebuung diyà sa lanaw apuy. Hediya ma sa tegebael medaet owoy sa tegeimatay owoy sa tegebigà owoy sa épê gamut owoy sa tegepenemula inetaw owoy sa langun tegebutbut, iya sa ketamanan da, mekebuung da langun diyà sa lanaw apuy kenà di eglegleg sa asulpul. Na sa lanaw apuy, iya sa keduwa gulê kepatay etaw." 9 Agulé, mig-angay diyà kenak sa sebaen kepitu egsugùsuguen i Nemula sa migbuwah sa pitu bilu dinaleman sa pitu dakel kepigtamay i Nemula etaw. Guwaen di diyà kenak, "Téél ka dé, enù ka ipehaa ku keniko sa bayi sawaen sa Anak Kebili-bili." 10 Agulé, danà sa tunung sa Metiengaw Suguy i Nemula, inuwit sa egsugùsuguen i Nemula aken diyà sa getan tigtu mehagtaw. Igpehaa di diyà kenak sa menuwa kenà i Nemula eg-ugpà sa Magtu Hélusalém migpetuntun kedu diyà langit owoy kedu si Nemula. 11 Tigtu egsenang iya wé menuwa danà sa senang i Nemula. Egsenang sa menuwa mekeiling sa mapulù batu haspi, owoy tigtu metiengaw ma lagà sa pegalungan. 12 Tigtu mehagtaw sa dakel kutà sa menuwa. Duen sa selat di sepulù owoy duwa, owoy duen sa egsugùsuguen i Nemula egbantay uman sebaen selat di. Nekesulat diyà sa uman sebaen pintù selat di sa sebaen ngadan sa sepulù owoy duwa geumpung tugod i Islaél. 13 Duen epat sulung sa kutà menuwa, owoy duen telu selat diyà sa uman sebaen sulung di. Duen telu selat denu tebowon agdaw, owoy telu ma denu eledan agdaw, owoy telu ma denu deligdigan, owoy telu ma denu kimataan. 14 Duen sepulù owoy duwa dakel batu pinetigdegan sa kutà menuwa. Nekesulat diyà sa uman sebaen batu sa uman sebaen ngadan sa sepulù owoy duwa salu sa Anak Kebili-bili. 15 Na, sinabaan sa egsugùsuguen i Nemula mig-ikagi diyà kenak sa tembu éhê sa tuked bulawan anì tembuwen di sa menuwa owoy sa selat di owoy sa kutà di. 16 Netelehung sa menuwa, enù ka nesetepeng sa kelabel di owoy sa ketaes di. Egoh di egtembu sa menuwa, iya sa ketaes di duwa ngibu epat gatus kakilu. Hediya ma sa kelabel di owoy sa kehagtaw di. 17 Egtembuwen di ma sa kutà menuwa, iya sa kehagtaw di telu pulù owoy telu lipo. Neketepeng sa lipo di diyà sa lipo ta. 18 Iya sa kutà di sa mapulù batu haspi, owoy anan tigtu bulawan iya wé menuwa owoy tigtu metiengaw éhê pegalungan. 19 Duen medoo balangan mapulù batu metolol neketukid diyà sa sepulù owoy duwa dakel batu pinetigdegan sa kutà di. Sa metolol batu haspi sa sebaen dakel batu, owoy sa keduwa di sapilo, sa ketelu di agata, sa keepat di esmilalda, 20 sa kelima di sa onisi, sa keenem di kolnalina, sa kepitu di kelisolito, sa kewalu di bililo, sa kesiyow di topaso, sa kesepulù di kelisopelaso, sa kesepulù owoy sebaen di hasinto, owoy sa kesepulù owoy duwa di amatista. 21 Iya sa sepulù owoy duwa pintù selat di sa sepulù owoy duwa pélas, enù ka sebaen daa dakel pélas sa uman sebaen pintù di. Anan tigtu bulawan sa kalasada diyà sa menuwa, owoy tigtu metiengaw lagà pegalungan. 22 Endà duen sa hinaa ku simbaan diyà iya wé menuwa, enù ka dahiya dé sa egpenemulawen ta si Datù Nemula épê dakel egkegaga owoy sa Anak Kebili-bili. 23 Endà dé duen ulan sa agdaw owoy sa bulan dahiya, enù ka egkelegdawan sa menuwa danà sa senang i Nemula owoy iya sa legdaw di sa Anak Kebili-bili. 24 Melegdawan sa langun etaw diyà tanà danà sa legdaw iya wé menuwa. Owoy uwiten sa langun sulutan diyà tanà sa pantiyali da diyà iya wé menuwa. 25 Endà dé mepintuan sa medoo selat di, enù ka neukaan amuk agdaw owoy endà dé duen sigep pa dutu. 26 Na sa langun etaw diyà tanà, uwiten da sa langun pantiyali da owoy sa medoo langun taman da mapulù diyà iya wé menuwa. 27 Dodoo endà mekeludep sa medaet dahiya, owoy endà ma mekeludep sa etaw egbael medaet owoy sa tegebutbut. Iya daa sa mekeludep sa medoo etaw nekesulat sa ngadan da diyà sa libelu kenà sa Anak Kebili-bili migsulat sa ngadan sa langun etaw nebegayan lalù endà meelut di.

Kepehaa I Hésus Kelistu 22

1 Agulé, igpehaa ma sa egsugùsuguen i Nemula diyà kenak sa lawa"t wayeg pinengadanan Wayeg Mekepelalù Etaw. Tigtu metiengaw iya wé wayeg nekeiling pegalungan. Egdelug sa wayeg kedu diyà sa bangkù i Nemula owoy sa Anak Kebili-bili. 2 Eg-ukit sa wayeg diyà teliwadà sa kalasada iya wé menuwa. Owoy duen sa kayu hinemula diyà sa ilis sa wayeg, sa kayu egpelalù etaw. Uman bulan egbunga owoy sepulù owoy duwa balangan sa bunga di. Owoy sa daun di, iya sa mekebulung diyà langun etaw. 3 Endà dé duen tayu egkelepuhan i Nemula eghaa diyà iya wé menuwa. Dahiya ma sa bangkù i Nemula owoy sa Anak Kebili-bili, owoy takà eg-oloen sa medoo etaw di Nemula i. 4 Hauwen da sa palas di, owoy mekesulat sa ngadan di diyà sa kilay da. 5 Endà dé duen pa sigep dahiya, owoy endà ma dé duen ulan sa palitan owoy sa agdaw, enù ka si Datù Nemula dé sa legdaw da. Owoy mekeunut da diyà si Nemula kumedatù taman melugay. 6 Agulé, eg-ikagi sa egsugùsuguen i Nemula diyà kenak, guwaen di, "Anan tuu siini kagi dinineg ko owoy kesaligan ma, enù ka si Datù Nemula sa migpeangay Suguy di diyà sa medoo tegesugkow di egoh anay, pineangay di dé sa egsugùsuguen di anì tulonen di diyà sa langun etaw di sa medoo buyu dé mebaelan." 7 Guwaen i Datù Hésus, "Taa yu, hih. Buyu a dé pelikù dema. Tigtu meanggan sa langun etaw egpangunut diyà sa kagi ku igsugkow nekesulat diyà siini libelu." 8 Na, aken si Huwan migdineg owoy mighaa siini langun igsulat ku dahini. Egoh ku migdineg owoy mighaa ini i, migligkuwed a diyà sa taengan sa egsugùsuguen i Nemula sa migpehaa ini i diyà kenak anì oloen ku. 9 Dodoo hinawidan di aken, guwaen di, "Yaka eg-olò ya kenak, enù ka iling ka aken ataw ka kuna ataw ka sa medoo duma ko tegesugkow i Nemula ataw ka sa langun etaw egpangunut diyà sa kagi siini libelu, nesetepeng ki doo anan egpangunut diyà si Nemula. Iya polo sa olò ko si Nemula." 10 Guwaen di ma diyà kenak, "Yaka eglidung duu sa medoo kagi igpetiig diyà keniko igsulat ko diyà siini libelu, enù ka buyu dé meketuu langun ini i. 11 Amuk duen etaw egbael medaet, meumanan pa sa kebael di medaet, owoy amuk duen etaw endà metiengaw sa pedu di, meumanan pa sa pedu di endà metiengaw. Dodoo amuk duen etaw egbael mepion, meumanan pa sa kebael di mepion, owoy amuk duen etaw metiengaw adat, meumanan pa sa adat di metiengaw." 12 Na, guwaen i Hésus, "Taa yu, hih, buyu a dé pelikù dema, owoy ibegay ku diyà sa uman sebaen etaw sa untung nesugat diyà sa binaelan di. 13 Aken sa Alpa owoy sa Oméga, aken sa edungan sa langun eghauwen owoy sa ketamanan di, owoy aken sa muna owoy sa sabuhanan di." 14 Na, tigtu meanggan sa langun etaw nekedanan salà lagà sa ginis da pinìpian anì tigtu mebulà, enù ka mebaluy dé mekekaen da sa bunga Kayu Egpelalù Etaw owoy mebaluy ma dé mekeludep da diyà sa selat sa menuwa i Nemula. 15 Dodoo sa medoo tegebael medaet, owoy sa medoo épê gamut, owoy sa medoo tegeimatay, owoy sa medoo tegebigà, owoy sa medoo tegepenemula inetaw, owoy sa medoo tegebutbut, owoy sa medoo tegeakal, endà mebaluy di lumudep da diyà sa menuwa i Nemula. 16 Agulé guwaen di, "Aken si Hésus sa migpeangay sa egsugùsuguen ku anì ipetiig di langun ini i diyà keniyu i medoo etaw egpigtuu. Aken sa tugod i Datù Dabid, sa datù egoh anay, owoy aken ma sa telasimag eghauwen amuk buyu dé sumimag." 17 Agulé, eg-umow sa Metiengaw Suguy i Nemula owoy sa bayi sawaen sa Anak Kebili-bili, guwaen da, "Téél ka dé." Hediya ma mekeumow ma sa medoo etaw egdineg siini kagi, guwaen da, "Téél ka dé." Sumalà dé sa etaw eglupahan owoy egkelukuy eg-inem, angay yu dé inem siedò wayeg mekepelalù etaw, sa ipeuloy di diyà keniyu. 18 Na, aken si Huwan, tulonen ku ini i diyà sa langun etaw dumineg sa kagi igsugkow nekesulat diyà siini libelu. Amuk duen etaw umanan di sa kagi diyà siini libelu, umanan i Nemula ma sa kepigtamay mekeuma diyà kenagdi sa medoo lihay tinulon ku diyà siini libelu. 19 Owoy amuk duen etaw kumedan sa kagi diyà sa medoo tinulon ku diyà siini libelu, kedanan i Nemula ma diyà kenagdi sa untung di sa bunga Kayu Egpelalù Etaw owoy sa keugpà di diyà sa menuwa i Nemula tinulon ku diyà siini libelu. 20 Eg-ikagi Hésus i sa egpetuu langun siini igsulat ku, guwaen di, "Tuu, buyu a dé pelikù dema." Amin, o Datù Hésus, ungayà ku pelikù ka dema. 21 Na, egsimbà a anì metabangan i Datù Hésus kiyu i langun etaw i Nemula. Na, taman iya daa sa kagi ku.

AMAZING GRACE BIBLE INSTITUTE